Hotshethu ha yi lava male ti to hi xava si si lawako ngu mwaya wathu. (Swivuriso 30:8) Ditshuri ti to ‘male njivhikelo’. (Eklesiasta 7:12) Kota vatekani, ti nga mi nemelela ku bhulisana ngu ta timale, kambe mi nga yi tumeleleni yi mi vangela sikarato mwayani kwanu. (Vaefesu 4:32) Vatekani va fanete ku thembana ni ku engisana va txi maha sisungo sa nzila yi va no yi thumisa ngu yona male.

ATI DIBHIBHELE DI TI WOMBAKO: “I mani kwanu, awu a lavako kuaka txitezi txa kudingilila ka txona, a si thangiko ngu kukhalahatsha a txi bala mtengo wa si si lavekako, a txi wonisisa ti to mwendo si nga eneta mthumo kani?” (Luka 14:28) Nda lisima kubhula ngu nzila yi mi lavako kuthumisa male ngu yona. (Amosi 3:3) Mahani motshe txisungo txa si milavako ku si xava ni male yi mi lavako ku yi thumisa. (Swivuriso 31:16) Ku va ni male yo xava txo kari kha ti wombi tona ti to u fanete ku txi xava. Duketa kuvayilela kumaha txikweneti. Thumisani male yi mi ku nayo basi.—Swivuriso 21:5; 22:7.

NGU TIHI TI U NGA TI MAHAKO:

• Mi di saletwe ngu male ngu magwito ka mtxima, mi nga bhulisana ti to mi maha txani ngu yona

• Mi di ni txikweneti, hungulani kuxava si mi si lavako. Ngu txikombiso, makhaloni yo dya txitolo i tshuko mi tibhikela

ATI DIBHIBHELE DI TI WOMBAKO: “Hi thela kota ngu kumaha mithumo ya yinene i singa masoni ka Jehovha dwe, kambe ni masoni ka vathu.” (2 Vakorinto 8:21, Vuhundzuluxeri Bya Misava Leyintswa Bya Matsalwa, NM) Gela mkatako ti to u hola male muni ni ti to u thumisa male muni.

Mbimo yimwane ni yimwane bhulani ngu ti mi lavako ku maha tona ngu male. (Swivuriso 13:10) Ku bhulisana ngu mathumiselo a male ti na mi vhuna kuxayisa kudikha mwayani kwanu. U nga teke m’holo wako kota male yako wekha kambe i male ya mwaya.—1 Timoti 5:8.

NGU TIHI TI U NGA TI MAHAKO:

• Tumelelanani ti to i male muni ayi mmwane ni mmwane a nga yi thumisako hambi mi sa bhulisana

• Mi nga rinzeleni ti to ku humelela sikarato ngu mhaka ya male i di kona mi no khata kubhula mayelana ni ta timale