DiBhibhele di womba ti to Sathane i “mxengeteli wa dotshe ditiko”. (Mtuletelo 12:9) Sathane ni madhimoni akwe kha va ti lavi ti to hi kholwa ka Dipswi da Txizimu, iku diBhibhele. Ene a lava ti to vathu ve kholwa ti to vafi va hanya ka wukhalo wo kari wa moya. A hi wone ti to a ti mahisa ku txani toneto.

Wungi wa wukhongeli wu gondisa ti to vathu votshe va ni m’hefemulo awu mbimo yi ku fako mmidi wu khukhako wu ya ka wukhalo wa moya. Va womba ti to ku fa mmidi, kasi m’hefemulo kha wu fi. Ku engetela koneho, va kholwisisa ti to m’hefemulo kha wu fi.

Kambe Dipswi da Txizimu kha di gondisi toneto. DiBhibhele di komba ti to m’hefumulo i m’thu, hi nga txo maha txi txi ku didhawa ka m’thu. Ngu txikombiso, ku txi txhamuselwa ati Adhamu a nga wumbiswa tona, diBhibhele di khene: “Se Jehovha e ya masoni e wumba m’thu ngu lithulu la mafu ni ku thela moya ka tithonvu takwe ti to eva ni wutomi, se m’thu e va m’hefemulo wu wu hanyako.” (Genesa 2:7) Ngutoneto Adhamu  kha ningwa m’hefemulo; kambe ene i ti kova m’hefemulo.

Sihari ni sona si dhanwa ti to mihefemulo.—Genesa 1:20, 21, 24, 30.

Ngako dipswi da mu ka diBhibhele “m’hefemulo” di wombako m’thu apune, kha ti hi xamalisi kugonda ti to m’hefemulo wu nga fa, futshi wa fa. Mibhalo yi womba tiya:

• “M’hefemulo awu wu wonhako—wona wupune wu na fa.”—Ezekiyele 18:4.

• “Samsoni a wombile ti to: ‘Leka m’hefemulo wangu wufa ni Vafilisita.’”—Vaavanyisi 16:30.

• “Ta tumelelwa ngu ditshiku da sabbata kumaha tatinene mwendo kumaha to biha, kuponisa wutomi mwendo ku lovisa?”—Marku 3:4.

Mibhalo yimwane yi komba ti to mihefemulo yi nga dawa (Genesa 17:14), ku dawa ngu ditxhari (Yoxuwa 10:37), yi fisa tshiku (Yobo 7:15), ni ku fela matini (Yonasi 2:5). Ditshuri da kona ngu ti to m’hefemulo wa fa.

Hambi u txo lera dipswi ngu dipswi amu ka diBhibhele, khu na mbiza u mana mapswi awa “m’hefemulo kha wu fi”. M’hefemulo wa m’thu hi nga moya. Gondo yo khene m’hefemulo kha wu  fi, hi nga gondo ya mu ka diBhibhele. I gondo ya Sathane ni madhimoni akwe. Jehovha wa ma nyenya otshe makuhu a wukhongeli.—Swivuriso 6:16-19; 1 Timoti 4:1, 2.

Nzila yimwane ayi Sathane a kanganyisako vathu ngu yona wuñanga. Ñanga i m’thu awu a amukelako madungula aya ma tako ngu ka mapswi a wukhalo wa moya. Vathu vo tala ku pata ni tiñanga ti pune, va kholwa ti to madungula onewo ma ta ngu ka vafi. Kambe ngu ha se hi nga ti wona ka diBhibhele, eto kha ti koteki.—Eklesiasta 9:5, 6, 10.

Ina ka, se ma ta ngu hayi madungula oneyo? Ma ta ngu ka madhimoni! Ka madhimoni ti hehukile ku wona m’thu mbimo yi a ku ngadi a txi hanya; se me ziva ti to a ti wombawombisa ku txani, a ti zumbisile ku txani, a mahile txani ni ku ngu tihi ati a nga ti ti ziva. Se ngutoneto ti ma hehukelako kuendetela timhaka ta m’thu awu a nga fa.—1 Samuwele 28:3-19.

Sathane a thumisa tikaringani kota yimwane nzila ayi a kuzetelako makuhu mayelana ni vafi. Tikaringani toneto ti maha ti to vathu ve tshuketa kule ni ditshuri da diBhibhele.—2 Timoti 4:4.

 Ka ditiko da Afrika, ku ni madungula o tala mayelana ni vathu ava va nga wonwa va txi hanya msana kova va di fite. Ngu mtolovelo, masingita o nga oneyo ma maheka kule ni wukhalo awu m’thu wa kona a nga ti hanya ka wona. Ti wotise: ‘Idi ti to ta pfala kwati ti to m’thu a ni mtamo wo tshumela e wuya kambe, ina a ndina tshumelela ka wukhalo wa kule ni maxaka ni vangana vawe kani?’

Nakambe, ina kha ti na kumaheka ti to m’thu wu a woniswako txipshwati e fananiswa ni wu se a nga fa? Ngu txikombiso, Makristu a mambidi aya ma nga ti txhumayela ka wukhalo wumwane wa ditiko va woni madhala mmwane a txi va londisela ngu ma woranyana. Mbimo yi a nga wutiswa ti to nji txani, a ti khene a gondile ti to mmweyo ka vanathu vale, i m’fowakwe awu a nga fa malembenyana ma nga pinda. Phela a ti phazamile ngutu, kambe kha tumela toneto. Alakanya loko madhaleyo a txo xawutela mhaka yiya ka vangana ni vaakelani vakwe!

Ditshuri ti to u ziva simahakalo so thisa asi vathu va nga si wona, va nga si pfa mwendo ku  si lora. Simahakalo soneso so mbi toloveleka mbimo ya yingi si dhukisela votshe ava va si pfako. Marein awu a zumbako Afrika wa Wuswa ditambo, mkama ni mkama a ti pfa dipswi da kokwane wakwe di txi mu dhana ni wusiku. Ngu kuthava, Marein a pekile huwa se e wusa votshe vaakelani vakwe. Ene a gwitisile kuxanga.

Se, idi ti to ditshuri ti to vafi va hanya, ina va nga xanisa ava va vadhundako? Ahim-him. Txisima txa madungula oneyo o thisa madhimoni.

Kambe ngu ku txani madungula oneo ma txi nga ma vhuna ni kuthavelela vathu? Ngu txikombiso, Gbassay wa Serra Leyowa a ti lwala. A lorile atxi wona tate wakwe atxi humelela kwakwe. Ene a mu gete ti to e tsula ka mndonga wo kari, eya hapha mazokoro ya wona e ma pata ni mati e sela. A sa fanela e gela m’thu na a si se ti maha. Ene a mahile toneto se ti mtsimbilete kwati.

Wamsikati mmwane a womba ti to mwamna wakwe a humelete kwakwe ni wusiku msana ka loko adi fite. Ene a womba ti to a ti tshurile ngutu na adi ambate siambalo so tshura.

Madungula o nga oneyo ni miwoniso ya kona si nga woneka nga nza sinene mwendo si txi vhuna. Ina si ta ngu ka Txizimu? Ahim him? Jehovha i “Txizimu txi txi ku ni ditshuri”. (Masalmo 31:5,  Vuhundzuluxeri Bya Misava Leyintshwa) Kha na mbi thuka e tumelela ti to hi kanganyiswa ni ku timetwa. Kambe hi nga timetwa ngu madhimoni basi.

Kambe, ina madhimoni nga manene? Ahim him. Hambi ona ma txo maha nga ma vhuna ngu mbimo ya yidotho, otshe madhimoni ma bihile. Mbimo yi Dhiabhulosi a nga wombawomba ni Evha, ene ati kombisile nga mngana. (Genesa 3:1) Kambe yi ve yihi wuyelo msana ka loko Evha adi mu engisile se e maha ati a nga womba? Evha a fite.

Wa tiziva ti to ti tolovelekile ti to m’thu wo biha a ti maha wa mnene ka va a lavako ku va xenga ni ku va kanganyisa. Divingwa da Afrika di khene “makwasa o basa, mbilu ya mtima”. Ni dona diBhibhele di womba ti to: “Hambi Sathane wa txitxa e teka m’bala wa ngelozi ya liwoningo”.—2 Vakorinto 11:14.

Txizimu kha txi nga ngadi txi wombawomba ni vathu ha mafuni ngu kuthumisa miloro, miwoniso mwendo mapswi o ta ngu ka ditiko da moya. Ene a va kongomisa ngu kuthumisa diBhibhele, adi di mahako ti to m’thu e “lulamiselwa ka yotshe mithumo ya yinene”.—2 Timoti 3:17.

Ngutoneto, mbimo yi Jehovha a hi txharihisako ka milawu ya Sathane, a maha toneto nguko wa hi dhunda. Ene wa ti ziva ti to madhimoni mbalala va tshofu.