Sathane ni madhimoni nzivangwa sa tshofu si singa mbi lunga. Ka mbimo ya kale, Sathane a date sifuyo ni sithumi so thembeka sa Jobe. A tshumete e daya digume da vanana va Jobe, e maha ti to “txidzedze txa hombe” txi xasela nyumba yi va nga ti ka yona. Ku engetela ka toneto, a xasete Jobe “ngu wulwati wa hombe wa sitela ku khukhela ka txizenende ku hokela ha msungo.”—Yobo 1:7-19; 2:7.

Madhimoni ma mahile vathu ve va siduma ni ku va maha mabhofu, ka masiku a Jesu. (Matewu 9:32, 33; 12:22) Ona ma xanisile dijaha dimwane me maha ti to di ti kurumulela ngu marigwi. (Marku 5:5) Ma mahile ti to dizambi dimwane di dila ni ku ti ginyaletela hahatshi ni ku “di dhudhumelisa”.—Luka 9:42.

Ni nyamsi, Sathane ni madhimoni va ngadi ve xasela ngutu vathu. Ngu toneto, wubihi wuya wu engeteleka kukhukhela va  nga hingwa nzumani. Mahungu a ha mafuni kotshe ma fakaza wubihi wakwe. Ona ma xanisa vathu ngu malwati. Ma dhukisela vathu vamwane ni wusiku ve pwata wukohe ni kuva ni miloro yo thisa. Ma xanisa vamwane ngu ta mataho. Vamwane ma va xangisa, ma va xasela mwendo me va maha ve ti sunga.

Lintina, wa ditiko da Suriname a womba ti to, didhimoni dimwane mwendo moya wo biha, di date 16 wa maxaka akwe se ene di m’xanisa ngu malwati ni ku mxangisa kudingana malembe a 18. Ngu kuya ngu ti a nga ti wona a pune a womba ti to madhimoni “ma dhunda kuxanisa vathu ku ya hokela ha ko za ve fa”.

Kambe Jehovha a ni mtamo wo vhikela malanda akwe ka sikarato asi Sathane a si vangako.—Swivuriso 18:10.