Jehovha a na fuvisa wotshe wubihi awu Sathane a wu mahako. Jehovha a vekile Jesu ti to eva Mkoma wa mafu otshe. Hahatshi ka wukoma wakwe, mafu ma na hundulwa me va paradhise.—Dhaniyeli 7:13, 14; Luka 23:43 [NM].

Ndite ati Jehovha a ti thembisako:

• SAKUDYA SO TALA NGUTU: “Mafu ma na humisa mihando ya ona; Txizimu, Txizimu txathu, txi na hi katekisa.” “Ditiko di na talelwa ngu kupfuna ka fulaho; yi na zinginikela txitimwi ka situnga.”—Masalmo 67:6; 72:16 [NM].

• KHA KU NA MBI VA NI TIYIMBI: “Ngonani mi ta wonetela mithumo ya Jehovha, simaho so xamalisa a nga si maha ha mafuni. Ngene a fuvisako tiyimbi ha mafuni kotshe.”—Masalmo 46:8, 9 [NM].

• KHA KU NA MBI VA NI VATHU VO BIHA: “Sigevenga si na loviswa . . . Ngu mbimoanyana ya yidotho khu na mbi va wona kambe vabihi hambi u txo tsimibila u va lava, khu na mbi swa u va wona”.—Masalmo 37:9, 10.

•  KHA KU NA MBI VA NI MALWATI, KUPANDISEKA NI LIFO: “Ngu mbimo yoneyo maso a mabhofu ma na tuleka, ni tinzeve ta maphanzeve ti na tuleka. Ngu mbimo yoneyo txikhwala txi na ndaka nga mhuti, ni lidimi la txiduma li na kwangula ngu kutsaka.”—Esaya 35:5, 6.

  “Se txona Txizimu txipune txi na va txi di navo. Txona txi na bahulela yotshe mirongo tikhoheni kwawe; kha ku na mbi swa ku txi maneka kambe lifo, hambi kudila, hambi tihuwa, hambi ku pandiseka. Nguko so khata si pindile.”—Mtuletelo 21:3, 4.

Jehovha kha hembi kufana ni Sathane ni madhimoni akwe. Totshe ati a ti thembisako ti na maheka ngu ditshuri. (Luka 1:36, 37) Jehovha wa kudhunda se a lava ti to u hanya ka Paradhise ayi a no yi maha. Lavetela Tifakazi ta Jehovha ti to u gonda ta tingi mayelana ni timhaka ti ti xamalisako ta ditshuri ati ti manekako amu ka Dipswi da Txizimu. U txi thumisa ati u nga ti gonda ka wutomi wako, u na khululeka ka wukhumbi wa makuhu, ku kholwa ka ta walo ni wupumbu. Ngu kutsimbila ka mbimo, u na txhatxheka ka wukhumbi wa txiwonho ni lifo. Ngu ha Jesu a nga womba ngu kona: “Mi na ziva ditshuri, se ditshuri di na mi khulula.”—Johane 8:32.