“Ni kulete ka txidhoropana txa diprovhinsiya da wuphemba”, ku womba Dauda wa Sera Leyowa. “Mbimo yi ni nga ti ngadi dizambi, ku ve ni kulwisana ka mwaya wathu ni wumwane ngu mhaka ya thembwe. Ku ti ni kubangana. Ti to ve lamula mhaka yiya, va dhani ñanga. Yona, yi to ñolisa txibuko dijaha dimwedo, yi di fengeta ngu nguwo yo basa. Dijaha di to khata kuthava ni kudhunuka di di mndani ka nguwo. Mbimo yi di nga wonisisa txibuko, di to kwangula di txi: ‘Ni wona madhala a tshuketelako! Ene a ambate siambalo so basa. A laphile ni ku a kumbile, a ni wunvi ni ku, a tsimbila a di namile.’

“Ene a ti txhamusela kokwane! Koneho, a to henya e guleta dipswi a txi khene: ‘mi si tumeli ti ni wombako, ngonani mi ta wona mipune!’ Ku walo wu a nga tsana kumaha toneto! Ñanga yi to di malatela ngu ku di xwayela mrende wa wuñanga awu ku nga ti patilwe mazokoro ni mati ka txibhembe txi yi nga ti natxo manzane.

“‘Kokwani’ a txi wombawomba ngu kuthumisa dijaha di di nga ti ñote txibuko, a ti khene thembwe yile yi lumba mwaya wathu. A tshumete e gela kokwane wangu wa txisikati ti to a fanete kudima a si thavi txilo. Mwaya wule wumwane wu tumete txirumo txonetxo. Mhaka yi lamulisilwe toneto.”

 Timhaka to fana ni tiya ti tolovelekile Afrika wa wuswa ditambo. Kona ni ka makhalo mamwane, vathu vo tala va tumela ti to vafi va ka wukhalo wo kari wa moya, a ha va nga wonako ni kubelela ka timhaka ta vathu va va hanyako. Ina ngu yoneyo gondo ya ditshuri? Ina ngu ditshuri ava va nga fa va hanya? I di ti to kha va hanyi, mbamani ava va ti mahako vakufa? Nda lisima ngutu kuziva tixamulo ta siwotiso siya. I mhaka yi yi koxako wutomi mwendo lifo.