Hotshethu kwathu hi fanete kusawula. Mwendo hi na thumela Jehovha mwendo Sathane ni madhimoni akwe. Kha hi na kuthumela votshe ngu mbimo yimweyo. Ta wutxhari ngu thumela Jehovha!

Nga ha hi nga ti wona ngu kona, madhimoni ma tidila ngu kuxanisa vathu ni ku va kanganyisa. Jehova kha fani nawo. Ene a dhunda ngutu vathu nga tate wu a dhundako vanana vakwe. Ene M’ningi wa “sotshe sihiwa sa lisima ni sotshe siningo sa kuhetiseka”. (Jakobe 1:17) Kha txi nga ho txa txinene atxi a tonako vathu, hambi idi txo dhula ngutu kwakwe.—Vaefesu 2:4-7.

Alakanyisisa ngu ti Jesu Mwanana wa Txizimu a nga ti maha ha mafuni. Ene a hanyisile siduma ni mabhofu. A hanyisile va tshekela ni sikhwala. Ene a tovete madhimoni ni ku hanyisa malwati a tixaka totshe. Jesu ngu mtamo wa Txizimu a wusile vakufa.—Matewu 9:32-35; 15:30, 31; Luka 7:11-15.

Hahanze ko hi hembela ti to txi hi kanganyisa, Txizimu txi hi gela ditshuri yotshe mbimo.  Txona kha txi khali ku nga kanganyisa m’thu.—Tinhlayo 23:19.

Kufana ni ku txikelemu txi ñolako txihari txi txi hanya, magidhi a vathu va byetilwe ngu kukholwa makuhu. Va thava vafi. Va thava madhimoni. Va thava makhombo, tixolo, kuloywa ni wusekenye wa tiñanga. Vona va txikilwe ngu tigondo ni sihena a si singa seketelwa ka makuhu ya Sathane Dhiabhulosi. Vathumeli va Txizimu kha va kanganyiswi ngu txilo ni txa tximwetxo txa soneso.

Jehovha a ni mtamo wa hombe ku pinda Sathane. Ngako u txi thumela Jehovha, ene a na kuvhikela ka madhimoni. (Jakobe 4:7) Khu na mbi loywa. Ngu txikombiso, ka ditiko da Nijeriya, tiñanga tiraru ta hombe ti duketile kuloya Fakazi yimwane ya Jehovha ayi yi nga ti lamba kukhukha ka wukhalo wule. Mbimo yi wuloyi wawe wu nga tandeka, yimweyo ya tiñanga yi yite kwakwe yi ti ko hikabweka yi ya kombela divalelo.

Idi ti to madhimoni ma ku xupha, awe u nga dhana ditina da Jehovha se ene a na kuvhikela. (Swivuriso 18:10) Kambe ti to Txizimu txi kuvhikela, u fanete u tshotsha sotshe simaha si si tsimbitisanako ni wuñanga ni wukhozeli wa madhimoni. Ngu toneto Vaefesu va kale va nga ti maha. Va sengeletile mabhuku awe otshe a masalamuso  ve ma hisa. (Mithumo 19:19, 20) Vathumeli va Txizimu nyamsi va fanete kumaha tonento. Tikhulule ka sidhungulo, malinya o “tivhikela ngu ona”, wuloyi, mabhuku a wuñanga ni txihi ni txihi txa wukamba kamba mwendo matiloti.

U txi lava kutsakisa Txizimu, kha ta enela kuleka wukhozeli wa makuhu ni kuleka kumaha to biha basi. U fanete u hisekela wukhozeli wa ditshuri. DiBhibhele di womba ati ti lavekako:

Sathane ni madhimoni va ni vathu ha mafuni ava va gondisako wukhozeli wa makuhu ni kumaha to biha. Kambe nene Jehovha a navo vathu. Vathu va kona i Tifakazi ta Jehovha. (Esaya 43:10) Ha mafuni kotshe, ku ni Tifakazi ti ti pindako mtxhanu wa timiliyoni ni timbidi. Totshe Tifakazi ti duketa ngu mbilu yotshe kumaha ati i ku ta tinene ni kugondisa vathu kuziva ditshuri. Ka matiko a mangi u nga ti mana ka Nyumba ya Mfumo ahawa nawe u nga amukelwako ngu manza mambidi.

Mthumo wa tona ngu vhuna vathu ti to ve thumela Txizimu. Tona ti nga gonda ni nawe diBhibhele m’tini kwako, ti ku komba nzila ya yinene yo khozela Jehovha. Txiwalo atxi u no hakela. Tifakazi ti tsakela ku gondisa ditshuri nguko ti dhunda vathu kumweko ni Jehovha Txizimu.