Sathane ni madhimoni akwe va na mbi swa ve kanganyisa kambe vathu ku dingana mbimo yo tala. Jehovha a va hingile nzumani. (Mtuletelo 12:9) I singa kale, Txizimu txi na tshumela txi maha to kari ngu Sathane ni madhimoni akwe. Ka m’woniso wo ta ngu ka Txizimu, mpostolo Johane a ti khene: “Se ni to wona ngelozi yi txi txhika ngu nzumani, manzani yi di ni khiya ya diphala do hokoma ni txhini ya hombe. Ngelozi yi to ñola dragoni, mnyoka wa kale i ku Dhiabhulosi mwendo Sathane yi mu sunga kasiku e zumba digumi da mazana da malembe. Yi mu rinza diphalani ko hokoma, adiya yi nga di khubhunyeta, yi di lema ngu txixambanyo, kasiku a si kanganyisi mifumo kala me guma malembe a digumi da mazana.” (Mtuletelo 20:1-3) Ngu magwito, Dhiabhulosi ni madhimoni akwe va na loviswa ngu ha ku si gumiko.—Mtuletelo 20:10.

Vathu vo biha ni vona va na loviswa.—Masalmo 37:9, 10; Luka 13:5.

Msana kova Sathane ni madhimoni akwe va di lovisilwe, Jehovha a na tisela vathu makatekwa o tala. Kha ti na mbi swa ti khumbulwa ti to vafi kha va nga nga di ho. Jesu a fananisile lifo ni wukohe—wukohe wa hombe ngutu wo mbi na miloro. (Johane 11:11-14) Ene a wombile eto nguko a txi ti ziva ti to yi na hoka mbimo yi ava va nga otela mayivani va no wuswa ti to ve hanya. A ti khene: “Ya hoka mbimo, ayiya votshe vale va ku mayivani . . . va no wuka.”—Johane 5:28, 29; pimanisa ni Mithumo 24:15.

Va na wuyiselwa ka wutomi mafuni hawa. Makhaloni o engisa thenga yo khene ku fite m’thu, hi na mana thenga mayelana ni va va no wuswa ka vakufa! Hi nga wona litsako lo amukela maxaka athu ma txi ta ngu mayivani!