Mahungu a manene a ti to vathu vana ta hanya ngu ha ku si gumiko ha mafuni mabhatwe mu ka diBhibhele. (Masalmo 37:29) DiBhibhele di ni 66 wa mabhuku a madotho. Txizimu txi thumisile vavamna vo thembeka va konamu ka 40 ku ma bhala. Mabhuku o khata a mtxhanu ma bhatwe ngu Mosi konamu ka malembe a 3.500 ya ma nga pinda. Do gwita di bhatwe ngu mpostoli Johane ka malembe ya 1.900 ya ma nga pinda. Mapimo a mani ya ma ku mu ka diBhibhele? Txizimu txi wombawombile ni vabhali va diBhibhele ngu ku thumisa moya wo sawuleka. (2 Samueli 23:2) Va bhate mialakanyo ya Txizimu, i si nga yawe. Ngu koneho, Jehovha, M’bhali wa diBhibhele.​—Gonda 2 Timoti 3:16; 2 Pedro 1:20, 21.

Ha tiziva to diBhibhele di ta ngu ka Txizimu ngu ku, di profeta ngu wumangwana ngu ku tshima ni ku yelana. Kha nga ho m’thu wu a si kotaku ku maha toneto. (Joxuwa 23:14) Txizimu txa mitamo yotshelele txi txi nga kotako ku profeta ngu ku yelana ni ngu wumanguwana wa vathu.​—Gonda Isaya 42:9; 46:10.

Ta pfala kuva i di dibhuku di di humako ngu ka Txizimu di txi va di di nga sawuleka kambe di sawulekile ngu ditshuri. Ku hangalasilwe tikopiya to tala ta diBhibhele ngu tidimi ta mazana. Hambi ku diBhibhele i ku da kale, da yelana ni timhaka ta siyensia. Vabhali va dona va 40 kha va nga va ni ku kanetana. * I si ngeto basi, diBhibhele di ni mxowo wa lirando lo xamatisa la Txizimu, ni ku di ni mtamo wo hundula wutomi wa vathu ti to veva ni mahanyelo a manene. Titxhamuselo tiya ti kholwisa vathu va timiliyoni ti to diBhibhele Dipswi da Txizimu.​—Gonda 1 Vatesalonika 2:13.

DiBhibhele di wombawomba ngutu ngu mahungu a manene a ti to Txizimu txi ni txikongomelo txa lirando ngu vathu. Mibhalo yi txhamusela nzila yi lungelo ya m’thu yo hanya ka mafu a paradhise yi nga mwalala ngu yona ku khatani ka matimu a vathu ni nzila yi paradhise yi no tshumela yi wuyiselwa ngu yona.​—Gonda Mtuletelo 21:4, 5.

Kambe Dipswi da Txizimu di ni milayo ni matshina a milayo ni si alakanyiso. Ku engetela koneho diBhibhele di ni sikombiso sa nzila yi Txizimu txi va ñolako ngu yona vathu, kambe ka sikombiso soneso hi gonda ti to Txizimu m’thu wo zumbisa ku txani. Ngu koneho, diBhibhele di nga ku vhuna ti to u ziva Txizimu. Di tshumela di txhamusela nzila yi u nga vako mngana wa txona ngu yona.​—Gonda Masalmo 19:7, 11; Jakobe 2:23; 4:8.

Dibroxura diya di na ku vhuna ku u pfisisa diBhibhele ngu ku thumisa mamahelo ya ma nga thumiswa ngu Jesu. Ka mbimo ya yingi atxi wombawomba ngu tindimana a txi tshumela a txi “txhamusela mibhalo.”​—Gonda Luka 24:27, 45.

Nda tidotho ti ti tsakisako ku fana ni mahungu a manene ya ma tako ngu ka Txizimu. Kambe vathu vamwane kha va ma tsakeli niku vamwane va ma nyenya. U nga gumi mtamo. Themba yako yo tidila ngu wutomi wo mbi guma u yi mana ngu ku ziva Txizimu.​—Gonda Johane 17:3.