Ka wukhongeli wotshe ku ni vathu ava va ku ni timbilu tatinene. Ta tsakisa akuwa Txizimu txi va wonako vathu vonevo ni ku va khatalela. Kambe ati ti pandako ngu ti to wukhongeli wu thumiswa ngu nzila yo biha. (2 Vakorinto 4:3, 4; 11:13-15) Ngu kuya ngu m’biko wa madungula wu womba ti to wukhongeli wumwane wa tipata ka wuterorismo, ku yayarelwa ka lixaka, tiyimbi ni ku xaniswa ka vanana. Toneto ta va pfisa ku panda vathu ava va tumelako ka Txizimu ngu timbilu tawe totshe!​—Gonda Matewu 24:3-5, 11, 12.

Wukhongeli wa ditshuri wu dhumisa Txizimu kasi wa makuhu kha txi wu tsakeli. Wukhongeli wa makuhu wu gondisa ti ti ku walo mu ka diBhibhele ku pata ni tigondo ta makuhu madingano ni Txizimu ni vafi. Kambe Jehovha a lava ti to vathu ve ziva ditshuri madingano ni nene.​—Gonda Ezekieli 18:4; 1 Timoti 2:3-5.

Atxi txi tsakisako ngu ti to Txizimu kha txi kanganyiswi ngu wukhongeli awu wu ku kha wona, wa txi dhunda kasi ngu ditshuri da kona wu dhunda mafu a Sathane. (Jakobe 4:4) Dipswi da Txizimu di txhamusela wotshe wukhongeli wa makuhu kota “Bhabhilona wa Hombe”. Bhabhilona i di m’ti wa kale ahawa wukhongeli wa makuhu wu nga khatela kona msana ka ndambi ya Nowa. I si nga kale Txizimu txi na wu gumisa ngu txikuluveta wukhongeli wotshe awu wu kanganyisako ni ku nemetisela vathu.​—Gonda Mtuletelo 17:1, 2, 5, 16, 17; 18:8.

Mahungu a manene kha ma gwiteli eho. Jehovha kha va divala vathu ava va ku ni timbilu tatinene ava va nga hangalaka ka wukhongeli wa makuhu ka mafu otshe. Ene a sengeleta vathu vonevo ngu ku va gondisa ditshuri.​—Gonda Mika 4:2, 5.

Jehovha wa khatala ngu vathu ava va lavako ku ziva ditshuri ni ku maha ati i ku tatinene. Ene ava txharihisa ti to ve ti hambanisa ni wukhongeli wa makuhu. Vathu ava va randako Txizimu va ti emisete ku maha ku txitxa ko kari kasi ku txi tsakisa.​—Gonda Mtuletelo 18:4.

Ka dizana da malembe o khata, mbimo yi vathu va nga engisa madungula a manene ka vapostoli, va ma amukete ngu litsako. Jehovha ava gondisile nzila ya yiphya yo hanya, yo tsakisa, yi ku ni txikongomelo ni themba. Vona nji kombiso txa txinene kwathu ngu ku va tumete madungula a manene, ngu ku veka Jehovha wukhaloni wo khata ka wutomi wawe.​—Gonda 1 Vatesalonika 1:8, 9; 2:13.

Jehovha wa va amukela ngu manza mambidi ava va lekako wukhongeli wa makuhu ve titshanganisa ni mwaya wa vakhozeli vakwe. Ku nga ti u txi amukela txirambo txa Jehovha txa lirando u nava mngana wakwe, u maha txiro txa txiphya txa mwaya awu wu ku ni lirando wa vakhozeli va Jehovha ni ku mana wutomi wo mbi guma.​—Gonda Marku 10:29, 30; 2 Vakorinto 6:17, 18.

Mbimo yi ku no loviswa wukhongeli wa makuhu, Txizimu txi na hi khulula ka kunemelelwa ha mafuni kotshe. Wukhongeli wa makuhu kha wu na mbi kanganyisa kambe vathu hambi ku va hambanisa. Vathu votshe va nava va di patanile ka wukhongeli wumwewo basi wa Txizimu txa ditshuri.​—Gonda Mtuletelo 18:20, 21; 21:3, 4.