GONDO 5
Ngu yahi makungo a Txizimu ngu mafu?
1. Ngu ku txani Txizimu txi di vangile mafu?
Txizimu txi ningile vathu mafu. Ona, mwaya wathu. Ngu toneto vatekani vo khata, Adhamu ni Evha, kha va mahelwa ku ya zumba nzumani—Txizimu se txi ti mahile tingelozi ti to ti zumba nzumani. (Jobe 38:4, 7) Phela, Txizimu txi vekile m’thu wo khata ka paradhise yo tshura yi dhanwako ku i jaradhi ya Edheni. (Genesisi 2:15-17) Jehovha ati ningile Adhamu ni lixaka lotshe la vathu makungo a wutomi wo mbi guma ha mafuni.—Gonda Masalmo 37:29; 115:16.
Makhatoni, paradhise yi ti jaradhi ka Edheni dwe. Vatekani vo khata va ti fanete ve tata mafu ngu vanana vawe. Ngu ku tsimbila ka mbimo, va ndi na xayisa mafu otshe ve ma txitxa me va paradhise. (Genesisi 1:28) Txima, mafu kha ma na mbi fuviswa. Ona mana zumba i di m’ti wa vathu.—Gonda Masalmo 104:5.
2. Ngu ku txani konkuwa mafu i si nga paradhise?
Adhamu ni Evha kha va engisa Txizimu, se Jehovha a to va hinga mndani ka jaradhi. Paradhise yi to mwalala, se a walo wule a nga si kota ku yi wuseta. “Ni konkuwa, mafu ma mtamoni ka vathu vo biha” ku womba diBhibhele—Jobe 9:24.—Gonda Genesisi 3:23, 24.
Ina Jehovha ato tandeka ku hetisisa makungo akwe aku khatani ngu vathu? Ahim-him! Ene mbwa mitamo yotshe. Kha tandeki. (Isaya 45:18) Ana maha ti to lixaka la vathu li tshumela li mahisa ti a nga ti ti lavisile tona.—Gonda Masalmo 37:11, 34.
3. Ina paradhise yi na wuyiselwa ngu nzila yihi?
Paradhise yi na wuyiselwa ha mafuni mbimo yi Jesu a fumako kota Mfumeli wo sawulwa ngu Txizimu. Ka yimbi ayi yi dhanwaku Harmagedoni, Jesu ana thangela tingelozi se e hihirita votshe ava va lwisanako ni Txizimu. Ngu magwito, Jesu ana vhalela Sathane ku dingana 1.000 wa malembe. Vathu va Txizimu va na huluka ka yimbi yoneyo ngukusa va na tsimbitiswa ni ku vhikelwa ngu Jesu. Se vona va na tidila ngu wutomi wo mbi guma ka paradhise ha mafuni.—Gonda Mtuletelo 20:1-3; 21:3, 4.
4. Ku xaniseka ku na guma ditshiku?
Ina Txizimu txi na ku heta ditshiku ku xaniseka ha mafuni? Jesu a ningete “txikombiso” atxi txi no kombisa ku magwito ma hafuhi. Txiemo txa konkuwa txa mafu txi txi karatako wutomi wa vathu, txi komba ti to se hi hanya “ka magwito a matsimbitiselo a sa mafu.”—Gonda Matewu 24:3, 7-14, 21, 22.
Ngu mbimo ya 1.000 wa malembe Jesu a txi fuma ditiko adi nzumani, ene ana gumisa ku xaniseka kotshe. (Isaya 9:6, 7; 11:9) Hahanze kova Mfumeli, Jesu a na thuma kota Mʼprista wa Hombe, a na heta siwonho sa votshe ava va randako Txizimu. Ngu toneto, ngu ku thumisa Jesu, Txizimu txi na heta malwati, ku kumba ni lifo.—Gonda Isaya 25:8; 33:24.
5. I mani a no ta hanya ka Paradhise ayi yi tako?
Nyumbani ka Mfumo, u na zivana ni vathu ava va dhundako Txizimu ni va va lavako ku gonda ngu Txizimu ni ku txi tsakisa
Vathu va va engisako Txizimu va na hanya Paradhiseni. (1 Johane 2:17) Jesu a rumete vagondiswa vakwe ku lava vathu va timbilu tatinene ni ku va gondisa nzila yo mana ku amukelwa ngu Txizimu. Ni konkuwa, Jehovha a lungisela vathu va timiliyoni ti to ve ta va ni wutomi ka Paradhise yi yi tako ha mafuni. (Zefaniya 2:3) Ka Tinyumba ta Mfumo ta Tifakazi ta Jehovha, vathu va gonda kuva vavamna ni vatate vavanene ni ku va vavasikati ni vamame vavanene. Vanana ni vaveleki va khozela kumweko Txizimu ni ku gonda ti to va nga wuyeliswa ku txani ngu mahungu a manene.—Gonda Mika 4:1-4.
