GONDO 8
Ngu ku txani Txizimu txi txi tumelela wubihi ni kuxaniseka?
1. Wu bihi wu khatisile ku txani?
Txizimu txi tumelete vathu ku ve fuma mbimo yo laphanyana ku nava wufakazi wo va tandeka ku lulamisa sikarato sa vathu
Wubihi wu khatile ha mafuni mbimo yi Sathane a nga ta khata makuhu. Ku khatani Sathane i ti ngelozi yo hetiseka, kambe “kha zumba ha ditshurini.” (Johane 8:44) Ene a kulisile ku navela wukhozeli wu wu fanelako Txizimu basi. Sathane a hembete wamsikati wo khata Evha, ngu ku mkuzetela ku engisa ene i si nga Txizimu. Adhamu a seketete Evha ka kwa mbi engisa Txizimu. Txisungo txa Adhamu txi bhindute tixanisa ni lifo.—Gonda Genesisi 3:1-6, 19.
Mbimo yi Sathane a nga kuzetela Evha to a si engisi Txizimu, a txo khata ku tshuralela wukoma wa Txizimu mwendo txikhunja Txakwe txova Nyatxitimwi. Ku fana ni Sathane, wungi wa vathu va lamba ku fumwa ngu wukoma wa Txizimu. Ngu koneho Sathane a ti mahile “Mkoma wa mafu.”—Gonda Johane 14:30; 1 Johane 5:19.
2. Ina ku di kova ni txihoxo ka wuvangi wa Txizimu?
Yotshe mithumo ya Txizimu yi hetisekile. Vathu ni tingelozi ti nga vangwa ngu Txizimu va ti na sikota ku engisa ngu ku hetiseka. (Dheuteronome 32:4, 5) Txizimu txi hi mahile hi di ni mkhululeko wo sawula ku maha tatinene mwendo to biha. Mkhululeko wonewo wu hi tulela nzila yo kombisa lirando ka Txizimu.—Gonda Jakobe 1:13-15; 1 Johane 5:3.
3. Ngu ku txani Txizimu txi tumelela kuxaniseka ku hokela nyamsi?
Jehovha a tumelete ti to sindakamilayo si tshuralela wukoma wakwe ku dingana mbimonyana. Ngu txani? Ti to a kombisa to ku walo mizamo yo fuma hahanze kwakwe yi vhunako vathu. (Eklesiaste 7:29; 8:9) Toneto ti vekilwe ha kubasani msana ka 6.000 malembe ya matimu a vathu. Mifumo ya vathu yi tandekile ku heta tiyimbi, wugevenga, wubihi mwendo malwati.—Gonda Jeremiya 10:23; Varoma 9:17.
Ku hambana ni mfumo wa vathu, mfumo wa Txizimu wu wuyelisa ava va wu amukelako. (Isaya 48:17, 18) I si nga kale Jehovha a na heta wukoma wotshelele wa vathu. Ha mafuni ku no sala basi vathu va va sawulako ku fumwa ngu Txizimu.—Isaya 11:9.—Gonda Dhaniele 2:44.
4. Ku timisela ka Txizimu ku hi ninga mbimo yo maha txani?
Sathane a wombile ku a walo wu a nga thumelako Jehovha ngu ku ti dhunda. Ina khu tsakeli ku kombisa to oneyo makuhu? U nga si kota! Ku timisela ka Txizimu ku hiha mbimo yo kombisa to hi seketela ku fumwa ngu Txizimu mwendo ngu vathu. Nzila yi hi hanyako ngu yona yi komba wu hi sawulaku ene ku a hi fuma.—Gonda Jobe 1:8-12; Mavingwa 27:11.
5. Hi nga kombisa ngu nzila yihi ti to hi sawula Txizimu kuva mfumi wathu?
Ku sawula kwathu ngu kona ku nga kombisako ku hi lava Txizimu ti to txi va mfumi wathu
Hi nga komba to hi sawula Txizimu kuva mfumi wathu ngu ku gonda ngu wukhozeli wa ditshuri ni ku hanya ngu ku tumelelana nawo ngu ha Dipswi da Txizimu di wombako ngu kona i ku diBhibhele. (Johane 4:23) Hi nga lamba ku fumwa ngu Sathane ngu kwa mbi seketela tipolitika ni tiyimbi nga Jesu.—Gonda Johane 17:14.
Sathane a thumisa mtamo wakwe ku kuzeta mikhuwo yo biha ni yi yi ku ni dikhombo. Hi txi lamba mikhuwo yoneyo, maxaka athu ni vangana va nga hi nyekula mwendo ku hi kaneta. (1 Pedro 4:3, 4) Ngu toneto ti lava hi sawula. Ina hi na tipata ni vathu va va dhundako Txizimu? Ina hi na engisa milayo ya txona ya wutxhari ni lirando? Hi txi maha toneto hi nava hi txo kombisa ti to Sathane a txo hemba mbimo yi a nga khene a walo wu a nga thumelako Txizimu ti txi mnemelela.—Gonda 1 Vakorinto 6:9, 10; 15:33.
Lirando li Txizimu txi ku nalo ngu vathu wufakazi wa ti to txi na heta wubihi ni ku xaniseka. Ava va vakombisako ti to va ti themba a tiya, vana ta tidila ngu wutomi wombi guma.—Gonda Johane 3:16.
