GONDO 6
Ngu yihi themba yi yi ku ho ngu gu va kufa?
1. Ngu yahi mahungu a manene ngu vakufa?
Mbimo yi Jesu a nga hoka Bhetaniya hafuhi ni Jerusalema, mngana wakwe Lazaro a ti ni masiko a mune a di fite. Jesu atoya diyivani ka Lazaro, a di ni Marta ni Maria tindiya ta mufi. Ngu txikuluveta, dibutho di to sengeletana. Ina wa yi wona nzila yi Marta ni Mariya vanga ti tsakile ngu yona mbimo yi Jesu a nga wusa Lazaro?—Gonda Johane 11:21-24, 38-44.
Marta, a txi maziva mahungu a manene mayelano ni vakufa. A txi ti ziva ti to Jehovha a na wusa vakufa kuna tshumela ve hanya ha mafuni.—Gonda Jobe 14:14, 15.
2. Ngu txihi txiemo txa vakufa?
Txizimu txi gete Adhamu: “U lithulo u na tshumelela lithuloni.”—GENESISI 3:19.
Vathu va vangilwe ngu lithulo. (Genesisi 2:7; 3:19) Athu kha hi nga moya wu wu hanyako mndani ka mmidi wa nyama. Hi sivangwa sa nyama, ngu koneho hi di fite ku walo txi txi salako txi hanya. Hi txi fa, wuluvi wathu ni wona wafa, ni mapimo athu ma guma. Ngu koneho, Lazaro kha nga bhula ngu ti ti nga maheka a di fite nguko vakufa kha va zivi txilo.—Gonda Masalmo 146:4; Eklesiaste 9:5, 6, 10.
Ina Txizimu txa xanisa vathu ngu mndilo va di fite? Aku diBhibhele di wombako ti to vafi kha va zivi txilo, ti ha ku basani ti to gondo yiya ya makuhu yo hya mndiloni yi maha ti to vathu ve sola Txizimu ngu ti txi si ti mahiko. Gondo ya ku xaniswa ka vathu mndiloni yi xamukisa Txizimu.—Gonda Jeremiya 7:31.
3. Ina vakufa va nga wombawomba ni nathu?
Vakufa kha va wombawombi, kha va engisi. (Masalmo 115:17) Tingelozi timwane ti bihile ni ku ti wombawomba ni vathu ti txi ti maha va va nga fa. (2 Pedro 2:4) Jehovha kha ti lavi ku hi duketa ku wombawomba ni vakufa.—Gonda Dheuteronome 18:10, 11.
4. Mbamani ava va no ta wuswa ka vakufa?
Timiliyoni ta tingi ta vathu va va nga fa ti na ta wuswa ti hanya ha mafuni. Hambi vamwane va va nga mbi ziva Txizimu ni va va nga maha to biha vana ta wuswa.—Gonda Luka 23:43; Mithumo 24:15.
Ava va no wuswa vana ta gonda ditshuri madingano ni Txizimu ni ku kombisa likholo ka Jesu ngu ku mu engisa. (Mtuletelo 20:11-13) Ava va wuswako ka vakufa ve simama ve maha tatinene va na ta tidila ngu wutomi ha mafuni ngu ha ku si gumiko.—Gonda Johane 5:28, 29.
5. Mhaka ya ku wuswa ka vakufa yi hi komba txani ngu Jehovha?
Txizimu txi mahile ti to themba ya ku wuswa ka vakufa yi koteka ngu ku rumela mwanana wa txona ku ta hi fela. Ngu koneho, ku wuswa ka vakufa ku hi komba lirando ni wuxinji wa Jehovha wu wu nga si hi dingani. Vakufa va txo wuka, i mani awu u nga tsakelako ku mu wona?—Gonda Johane 3:16; Varoma 6:23.
