GONDO 7
Nji txani Mfumo wa Txizimu?
1. Nji txani Mfumo wa Txizimu?
Nji txani atxi txi mahako Jesu ti to eva Mkoma wu a fanelekako?—MARKU 1:40-42.
Mfumo wa Txizimu wukoma wa nzumani. Wona wu na vhaleta wukoma wotshe wu wu ku ho wu tshumela wu maha ti to kuranda ka Txizimu ku maheka nzumani ni ha mafuni. Mahungu aya ma wombawombako ngu Mfumo wa Txizimu nga manene. Na i si nga kale, Mfumo wa Txizimu wu na enelisa txilaveko txa vathu txo lava wukoma wa wunene. Wu na tshanganisa vathu votshe ha mafuni.—Gonda Dhaniele 2:44; Matewu 6:9, 10; 24:14.
Mfumo wu fanete wu va ni mkoma. Jehovha a sawute mwanana wakwe Jesu kristu ti to eva Mkoma wa Mfumo wakwe.—Gonda Mtuletelo 11:15.
2. Ngu ku txani Jesu i di Mkoma wu a fanelekako?
Mwanana wa Txizimu Mkoma wu a fanelekako ngu ku mbwa mnene ni ku a lwela ku maha ti i ku tatinene. (Johane 1:14) Kambe a ni mtamo wo vhuna vathu nguku, a na fuma mafu a di nzumani. Msana kova a di wusilwe ka vakufa, a do kwelela eya nzumani e khalahatsha txineneni ka Jehovha e rinzela. (Vahebheru 10:12, 13) Ngu magwito Txizimu txi mu ningile mtamo a ti to a khata ku fuma.—Gonda Dhaniele 7:13, 14.
3. I mani wu a no fuma kumweko ni Jesu?
Jesu a na fuma ni mtxawa wu wu dhanwako ku “vasawuleki” nzumani. (Dhaniele 7:27) Vathu vo khata ku sawulwa i di vapostoli vo thembeka va Jesu. Jehovha a yite masoni e sawula vavamna ni vavasikati vo thembeka ti to ve va vasawuleki kala nyamsi. Ku fana ni Jesu, va wuswa ka vakufa va di ni mimidi ya moya.—Gonda Johane 14:1-3; 1 Vakorinto 15:42-44.
Vathu vangahi ava va yako nzumani? Jesu a ti khene “mtxhambi wa wudothonyana.” (Luka 12:32) Ngu magwito mtengo wawe wu nava 144.000. Kambe va na fuma mafu kumweko ni Jesu.—Gonda Mtuletelo 14:1.
4. Nji txani txi nga maheka mbimo yi Jesu a nga khata ku fuma?
Mfumo wa Txizimu wu khatile ku fuma ngu 1914. * Dizambo do khata a di Jesu a nga di teka mbimo yi a nga va Mkoma, ngu vinza Sathane ni madhimoni akwe ha mafuni. Sathane a to henya e khata ku vanga sikarato mafuni kotshe. (Mtuletelo 12:7-10, 12) Ku khukhela ngu mbimo yoneyo, sikarato si si welako vathu si yite masoni si engeteleka. Tiyimbi, tinzala, mitungu ni kuzinginikela ka mafu, etxo “txikombiso” txo khata txa ti to i si nga kale Mfumo wa Txizimu wu na lawula mafu otshe.—Gonda Luka 21:7, 10, 11, 31.
5. Nji txani a txi Mfumo wa Txizimu wu no ta txi maha?
Ngu ku thumisa mthumo wo txhumayela mafuni kotshe, Mfumo wa Txizimu wu sengeleta dibuthu da hombe da vathu ava va humako ka matiko otshe a va va ku ni wumwewo. Timiliyoni ta vathu va va ti vekako hahatshi se va fumwa ngu Jesu. Mfumo wa Txizimu wu na va vhikela mbimo yi wu no lovisa matsimbitiselo yo biha ya sa mafu ha mafuni. Kambe votshe ava va lavako ku wuyelwa ka mfumo wa Txizimu va fanete ve gonda kuva vathu va va no ta fumwa ngu Jesu ava va engisako.—Gonda Mtuletelo 7:9, 14, 16, 17.
Mfumo wonewo wu na hetisisa txikongomelo txo khata txa Txizimu madingano ni vathu ku dingana malembe a 1.000. Mafu otshe ma na va paradhise. Ngu magwito Jesu a na tshumeta Mfumo ka tate wakwe. (1 Vakorinto 15:24-26) Ina u ziva m’thu wo kari a wu u nga tsakelako ku mu gela ngu ta Mfumo wa Txizimu?—Gonda Masalmo 37:10, 11, 29.
^ par. 6 A ti to u mana ti ti nga engeteleka ngu nzila yi wuprofeti wa mu ka Di Bhibhele wu nga profeta ngu yona dilembe da 1914, gonda ka maphepha 215-218 ya dibhuku di di ku khene, Bhiblia yi nga hi gondisa txani?
