Mwanathu wo randeka:

Nga ha u ti zivako ngu kona, Bhiblia yi womba-womba ngutu ngu vathu. Wungi wawe i vavamna ni vavasikati ava va nga manana ni sikarato. Vona i ti vathu va “kuxaniseka kufana ni nathu.” (Jakobe 5:17) Vamwani va txi tsinzavetwa ngu sikarato ni kuvilela. Kuveti vamwani va ti mahetwe to biha ngu vanathu kulowe. Kambe ku ni va va nga txi xaniseka ngu kona ha ka tiphazamo tawe.

Ngu mhaka yeto, vamwani va ti emile kuthumela Jehovha. Ina va to ko mu leka da magwito? Ahim-him. Va vangi va ti ka txiemo txo fana ni txa m’bhali wa Masalmo, a nga kombela a txi khene: “Ni pepesekile kufana ni nvuta yo mwalala; tsimbita, mwendo xota txithumi txiya txako, nguko ani kha na divala sirumo sako.” (Masalmo 119:176) Ina awe u ti pfisa toneto?

Jehovha kha divali sithumi sakwe asi si nga leka mtxhambi si ya kule. Hahanze keto, ene wa tsimbila a txi xola, ngu txitalo a maha toneto ngu kuthumisa vanathu. Wona txikombiso txa nzila yi Jehovha a nga vhuna ngu yona Jobe, awu a nga manana ni sikarato so tala so fana ni kuluzekelwa ngu tithomba, maxaka akwe ni kuwelwa ngu mtungu wa malwati a hombe. Jobe a tshumete e timisela mapswi o thola mbilu a vathu va nga ti fanete ku mu vhuna. Kambe, ene kha tshuralela Jehovha, hambiku a nga huma ha nzila ngu mbimonyana. (Jobe 1:22; 2:10) Jehovha a mahile txani ti to Jobe e wuyisa mapimo akwe?

Ditshiku dimwani Jehovha a vhunile Jobe ngu kuthumisa mkhozeli kulowe awu a nga ti dhanwa ku Elihu. Mbimo yi Jobe a nga womba ati a nga ti ti pfisa tona, Elihu a engisete se e gwita e womba-womba. Ene a wombile txani? Ene kha sola-sola mwendo kuzama ku mu kuzeta ngu kuthumisa mapswi o thela tingana. Ina Elihu a ti woni i di wa tshuku kupinda Jobe? Ahim-him! Ngu kususumetwa ngu moya wo sawuleka ene a wombile tiya: “Ni tile ngu ka Txizimu kufana ni nawe; ngu dimwani didhawa nani ni to wumbwa.” E tshumela e mu tsanisa a txi khene: “Khu na mbi thava kudhukisela kwangu, hambi dianza dangu kha di na mbi ku nemela.” (Jobe 33:6, 7) Elihu kha gixetela Jobe, kambe a mu ningile sialakanyiso ngu lirando ni txitsaniso a txi Jobe a nga ti txi lava.

Mwanathu, nanathu hi tekelete Elihu mbimo yi hi nga lulamisela dibroxura diya. Hi khatile ngu kuengisela, hi alakanyisisa kha kwati ngu siemo ni ti ava va nga ema kuthumela Jehovha va ti wombako. (Mavingu 18:13) Se, ngu msana hi kombete Jehovha e hi vhuna hi xolisisa kha kwati matimu ya mu ka Bhiblia a nzila yi Jehovha a nga vhuna ngu yona vathu vakwe kale ava va nga manana ni siemo si si fanako. Ngu magwito hi tshanganisile matimu onewo ni yawa a ngweno ti to hi bhala dibroxura diya. Ha kukombela ngu mbilu ku u xolisisa dibroxura diya. Mwanathu hi lava kukugela ti to ha kuranda ngutu.

Mmidi wu wu Fumako wa Tifakazi ta Jehovha