TXIENGE 4
Mnando—‘Ni basise ka sotshe sionho sangu’
“Mthumo wa wuphya awu ni nga wu mana wu txi ni betela male yo tala, kambe wu ni mahile ni ti betela ka mithumo ya ditiko. Ni khatile kupateka ka mikhuwo ya ditiko, ka ta politika ni vekile ni kukhata kuya txhetxheni. Ni emile kuthumela Jehovha kudingana 40 wa malembe. Aku mbimo yi nga txi ya yi tsula, ni pimisile ti to Jehovha a nge ni divaleli. Ani nipune ni txi pimisa ti to ni nge sikoti kutidivalela, nguko ani phela ni ti di ziva ditshuri ni gwita ni di leka.” Ayawa mapswi a Marta.
KUTIPFA mnando ti nga ku nemelela ngutu. Mkoma Dhavhidha a bhate tiya: “Sioho sathu si tshutshutile si ni khubhunyetile ni msungo; sa ni kama kufana ni mrwalo wo nemela ngutu.” (Masalmo 38:4) Makristu mamwani ma xutwe ngu kupandiseka ngu kona ha ko pimisa ti to Jehovha a nge va divaleli. (2 Vakorinto 2:7) Ina eto ditshuri? Hambi u di mahile sionho sa hombe, ina ti womba to Jehovha a nge sikoti kukudivalela? Ahim-him!
“Sekoko ngonani, hi ta wombawombisana”
Jehovha kha tsukuli ava va nga ti sola. Phela ene wa tsimbila a va xota! Ka txidinganiso txa Jesu txa mwanana wu wo sakana ni tithomba takwe, Jehovha a fananiswa ni tate wa lirando awu mwanana wakwe a nga khuka mtini kwawe e ya xakela tithomba takwe. Ngu mbimo, dijaha dile di wile mtini. Bhiblia yi womba tiya: “Se ene a di ngadi kule, tate wakwe a to mu wona, a txi mu pfela wusiwana, a to tutuma a txi ya mu wukarela ngu mu ka thamo, a txi mu pswopswa.” (Luka 15:11-20) Ina awe u lava kutshuketa hafuhi ni Jehovha kambe u tipfa u “di ngadi kule” ni nene? Kufana ni tate wule ka txidinganiso txa Jesu, Jehovha nene wa kupfela wusiwana. Ene a tiemisete kukuamukela.
Se ngako awe u txi pimisa ku sionho sako nza hombe ngutu ni ku Jehovha a nge kudivaleli? Mwanathu, khumbula mapswi a Jehovha a ya ma ku ka Isaya 1:18 a ya ma ku: “Sekoko ngonani, hi ta wombawombisana, kuwomba MKOMA, hambi ngako sionho sanu si di mi bhilivilisile mifana ni txiwunguwungu, si na basa kufana ni hunguva.” Ina ngu toneto, hambi sionho so nga kori yo bhilivila ka nguwo yo basa, Jehovha a nga si basisa.
Jehovha kha tsakeli ku hi zumba hi di ni livhalo ali li hi karatako. Se u nga mahisa kutxani ti to u mana kuhumula ni livhalo lo basa ali li tiswako ngu kudivalelwa ngu Jehovha? Alakanya ngu timhaka timbidi a ti Mkoma Dhavhidha a nga maha. Kukhata ati khene: “Ni na ti tshanza ka MKOMA, sihambunyeto sangu.” (Masalmo 32:5) Khumbula to Jehovha se a ku rambile ku ya kwakwe ngu mkombelo u “wombawombisana” nayo. Amukela txirambo txonetxo. Gela Jehovha sigoho sako ni kuwomba matipfelo ako. Ngu toneto Dhavidha a ti khene: “Ni basise ka sotshe sionho sangu . . . Awe Txizimu khu nyenyi mbilu yi yi pandisekako ni kutiveka hahatshi.”—Masalmo 51:2, 17.
Txa wumbidi, Dhavhidha a mani txivhuno txa muemeli wa Txizimu i nga ti mprofeti Nathani. (2 Samuwele 12:13) Nyamsi, Jehovha a hi ningile madhota a dibanza aya ma nga gondiswa kuvhuna ava va nga tisola ti to ve wuseta wuxaka wawe ni Jehovha. Ngako u txi tshuketela madhota ona ma na thumisa mibhalo ni ku ku mahela mimkombelo ti to me ku tsanisa, kasi ku u sikota kuhungula kupanda ti to u hanya ngu didhawa da moya.—Jakobe 5:14-16.
Jehovha a lava ku u va ni livhalo lo basa
“A katekile awule sionho sakwe si nga divalelwa”
Ti nga maha ti txi kukaratela ngutu kuwomba sionho sako ka Jehova ni ku tshuketela madhota. Dhavhidha nene a ti pfisile toneto. Ene a zumbile mbimo a di ‘malate’ a si wombi sionho sakwe. (Masalmo 32:3) Kambe a gwitile e wona wuyelo ya yinene yo womba sionho sakwe ni kutxitxa dihanyo.
Wuyelo ya hombe ayi Dhavhidha a nga yi mana ngu va a di wusetile litsako lakwe. Ene a bhate tiya: “A katekile awule sionho sakwe si nga divalelwa, awule minando yakwe yi nga divalelwa.” (Masalmo 32:1) A tshumete a txi khongela a txi khene: “MKOMA, tula txisofu txangu; kasi ku ni na sikota kuhuwelela wudhumo wako.” (Masalmo 51:15) Aku Jehovha a nga mu divalela sionho sakwe, se e va ni livhalo lo basa Dhavhidha a kombisile kubonga Jehovha ngu kugela vamwani ngu ngene.
Jehova a lava ku awe u mana litsako ali litiswako ngu kuva ni livhalo lo basa. Ene a lava ti to u gela vamwani mayelano ni nene ni sikongomelo sakwe, i si nga kuzumbela kutipfa mnando, kambe ngu kukholwa ni litsako la hombe. (Masalmo 65:1-4) Khumbula mapswi akwe o khene: “Mi na mana divalelo ya sionho sanu. Se Mkoma Txizimu a na mi wuyisela mbimo ya kuhumula.”—Mithumo 3:19, 20.
Eto ti humelete Marta. Ene a womba tiya: “Mwanana wangu a txi ni rumelela marevhista a Muwoneleli ni Khenjemuka!. Kudotho-kudotho ni khatile kukhumbula Jehovha. Ati ti nga ni karatela ngutu ngu kombela Jehovha ku e ni divalela sionho sangu. Kambe, ngu magwito ni kombete Jehovha e ni divalela sionho sangu. Nem u nge kholwi, phela ni hetile 40 wa malembe ni di hambanile ni Jehovha. Ani ni txikombiso txa ti to m’thu a nga sikota kutshumela e thumela ni kurandwa ngu Jehovha hambi a di hetile malembe o tala.”
