TXIENGE 2
Kuvilela—“Ka otshe makhalo ha kamwa”
June a womba tiya: “Msana ka 25 wa malembe hi di txhadhile ani ni mwamna wangu hi lekanile. Vanana vathu ve gwita ve leka ditshuri. Ani ni to belelwa ngu malwati a hombe, ni tshumela ni lwala ngu txitrese. Ngu mhaka ya toneto, ni ti pfite nga ko txhota ku ni fa basi nguko se ni di xulekile. Ni emile ku ya mitshanganoni ni hola ngu didhawa da moya.”
KUVILELA nda hotshethu, hambi vakhozeli va Txizimu. M’bhali wa Masalmo a bhate tiya: ‘sikarato si . . . ni talete mapimoni kwangu.’ (Masalmo 94:19) Ni ku Jesu a wombile to ka masiku a magwito “kuvilela ngu sa wutomi wuwa” ti ndi na maha ti karata kuthumela Jehovha. (Luka 21:34) Awe ko, u ti pfisa kutxani? Ina u tipfa u txi tsinzavetwa ngu sikarato sa timale, sikarato sa mwaya mwendo ngu malwati? Jehovha a nga kuvhunisa kutxani ti to u wonisana naso?
“Mtamo wuwa wa hombe”
Athu hi nge sikoti kuwonisana ni kuvilela hokha. Mpostoli Paulo a bhate tiya: “Ka otshe makhalo ha kamwa.” “Ha kana-kana . . . ; ha vengelwa [ginyalatwa, NM].” Kambe, a gwitile a txi khene athu “kha hi gumi mtamo,” “kha hi rereki” ni ku “kha hi fuviswi.” Nji txani txi hi vhunako ku hi timisela? Ngu kona ha ka “mtamo wuwa wa hombe” awu wu tako ngu ka Jehovha Txizimu.—2 Vakorinto 4:7-9.
Alakanya makhambi ya u nga amukela “mtamo wuwa wa hombe.” Ina u nga khumbula ditshiku di u nga engisela m’wombawombo awu wu nga kuvhuna kuwona lirando lo thembeka la Jehovha? Ina likholo lako li engetelekile mbimo yi u nga txi gondisa vamwani ngu Paradhise? Ngako hi txi ya mitshanganoni ni kutxhumayelani hi mana mtamo wo tsanisela sikarato sa wutomi, hi mana kudikha mbiluni se hi kota kuthumela Jehovha ngu litsako.
“Duketani mipune mi txi ti wona to MKOMA mbwa mnene”
Jehovha a hi kombela ku hi thangetisa Mfumo ni kuzumba hi di bhisi hi txi mu thumela. (Matewu 6:33; Luka 13:24) Se u na maha txani ngako kukanetwa, malwati, mwendo sikarato so hambana-hambana se si di ku hetile mtamo? Mwendo ku ngako mthumo wako wu txi kudyela yotshe mbimo yi u nga txi na yi thumisela timhaka ta moya? Sikarato soneso si kumaha u sala u si nga ni mbimo nem mtamo. Ti nga maha u di wotisile to ina Jehovha wa tsakela ta tidotho ati ni ti mahako?
Jehovha wa pfisisa. Ene kha lavi ku hi maha to pinda ti hi si ti kotiko. Ni ku ene wa pfisisa to ti teka mbimo ti to hi kalamuka ka sikarato si hi mananako naso.—Masalmo 103:13, 14.
Wona txikombiso txa nzila yi Jehovha a nga khatalela ngu yona mprofeti Elija. Ku ni mbimo yi Elija a nga thava e guma mtamo ha koza e thava e ya txitingani, ina Jehovha a mu bhongete e mu gela ku a ti fanete e tshumela e ya maha mthumo wakwe? Ahim-him. Jehovha a rumete ngelozi ti to yi ya mu wusa ngu lirando ni ku mu ninga sakudya. Hambikeko, ku di pindile 40 wa masiku a ti ngadi godhote. Jehovha a mahile txani tximwani ti to e mu vhuna? Txo khata Jehovha a ti kombisile ti to a ni mtamo wa ku a nga mu vhikela. Txa wumbidi, Jehovha a mu tsanisile ngu “dipswi do thutha, da wukheta.” Ngu magwito Jehovha a mgete to ku ti ngadi ni vamwani ava ni vona va nga ti khozela Txizimu. Se, Elija a tshumete e thumela Jehovha ngu kuhiseka. (1 Vafumeli 19:1-19) Hi nga gonda txani? Mbimo yi Elija a nga ti manana ni sikarato Jehovha a mu vhunile ngu nzila ya lirando. Jehovha kha txitxa, Ene wa hi khatalela kufana ni kale.
Awe pimisa ngu ti u nga ti kotako kumaha ka Jehovha. U nga pimisi ti to ati u nga ti ti kota kumaha kale u nga ti kota ni nyamsi. Wona txikombiso txiya: Mtutumi awu i ku kale a di emile kutuma a nge sikoti kutshumela e wuyisa txikale txakwe nyamsi ngu nyamsi. Hahanze keto, a khata kudotho-kudotho kala kuza e wuyisa txikale txakwe. Makristu ma fana ni vatutumi. Ona ma tutuma ngu txikongomelo txo kari. (1 Vakorinto 9:24-27) Ngu toneto, duketa ku ti vekela makungo aya u ti wonako ti to u na sikota ku ma hokolela. Ngu txikombiso, u nga ti vekela makungo o ya mitshanganoni. Kombela Jehovha ku e kuvhuna u hokelela makungo onewo. Mbimo yi u yako u txi wuyela u na ‘duka upune u txi ti wona to MKOMA mbwa mnene.’ (Masalmo 34:8) Khumbula ti to totshe ti u ti mahelako Jehovha hambi i do kova ta tidotho, kwakwe nda lisima.—Luka 21:1-4.
Jehovha kha rinzeli ku hi maha to pinda ti hi nga ti kotako
“Txivhuno txi ni nga txi txi lava”
Jehovha a vhunisile kutxhani June ku e wuyela? Ene a womba tiya: “Ni ti khongela ka Jehovha mbimo yotshe ni kombela txivhuno. Se mamanyamne wangu a ni gete ti to ku ni mtshangano wa txigava hafuhi. Se ni sawute ditshiku dimwedo ti to ni tsula. Ni ti ya mana litsako la hombe kutshumela ni ya va ni vathu va Jehovha! Mtshangano wonewo i ti txivhuno txi ni nga txi txi lava. Konkuwa ni tsakile kutshumela ni thumela Jehova kambe. Na ti ziva to kasi ni hanyela txani. Konkuwa na ti wona ti to hi nga ta tinene ku va nyatxokhe. Na tsaka ku va ni di wile i di ngadi mbimo.”
