TXIENGE 1
“Ni na tsimbila ni lava yile yo mwalala”
Alakanya nvuta yi yi nga mwalala. Ti nga maha yi to ko dya diphunde, se yi timetana ni mtxhambi. A ha yi ku kona kha yi sikoti kuwona mtxhambi nem m’dyisi. Amu yi ku kona yi ha phangoni ko dyiwa ngu sihari sa txitinga nguko se wusiko. Ngu msana yi pfa dipswi di yi di zivako adi yi nga di tolovela, i ku dipswi da m’dyisi. M’dyisi e tutuma e ya yi gula, e yi khutarela mawokoni kwakwe e tsula nayo mtini.
JEHOVHA makhambi o tala a ti fananisa ni m’dyisi wa mnene. Ka Bhiblia wa hi thembisa tiya: “Ni na lava tinvuta tangu, kambe ni na wuya nato.”—Ezekhiyele 34:11, 12.
“Tinvuta ta wudyiselo wangu”
Mba mani tinvuta ta Jehovha? Ngu mapswi o koma ngu votshe va va mu randako ni ku mu khozela. Bhiblia yi womba tiya: “Ngonani anu hi ta khozela ni ku nama! A hi khizameni masoni ka MKOMA awu a nga hi vanga. Ene i Txizimu txathu, se athu hi ngamu yakwe; hi tinvuta ta mtxhambi wu ene a wu dyisako.” (Masalmo 95:6, 7) Kufana ni tinvuta ta ditshuri ati ti londiselako m’dyisi wa tona, vakhozeli va Jehovha ni vona va londisela M’dyisi wawe. Ina ti womba to kha va mahi tiphazamo? Ahim-him. Vathu va Txizimu ni vona mbimo yimwani va thuka ve va “tinvuta . . . tile ti nga hangalaka,” “tinvuta ti ti nga mwalala,” ni “tinvuta ta kuhangalaka.” (Ezekhiyele 34:12; Matewu 15:24; 1 Pedro 2:25) Hambiketo, ngako m’thu a txi mwalaleka, Jehovha kha tshukuli a txi khene hi nga wa txilo kambe.
Ina awe u wona Jehovha i di ngadi m’dyisi wako? Hi ti zivisa kutxani ti to Jehovha ngene m’dyisi nyamsi? He wone sivangelo siraru:
Ene wa hi dyisa ngu didhawa da moya. Jehovha a khene: “Ni na ti dyisela ka makhalo a manene . . . ti na otela ka txibala txa txinene, kambe ti na dya ka wudyiselo wa kunona.” (Ezekhiyele 34:14) Jehovha kha khali kudivala ku hi ninga sakudya sa sinene sa moya asi hi si lavako. Ina u khala kupfa m’wombawombo, gondo yo kari ya Muwoneleli mwendo vhidhiyo ayi yi nga va xamulo ya mikombelo yako? Ina u ti woni to Jehovha wa khatala ngu ngawe?
Ene wa hi vhikela ni ku hi vhuna. Jehovha a thembisa tiya: “Ni na lava yile yo mwalala, kambe ni na wuyisa yile yo penga, ni txi tsanisa yile yo khudukiswa.” (Ezekhiyele 34:16) Jehovha wa tsanisa ava va nga godhola ni va va vilelako. Ene wa thuma tile ti nga dayiswa, e ti vhuna ngako ti di dayisilwe, mbimo yimwani a nga thumisa vanathu ti to e ti vhuna. E wuyisa a ti ti nga mwalaleka ati ti nga thukako ti txi tipfa i si nga ta txilo.
Jehovha wa khatala ngu tinvuta takwe. Ene a khene: “Ni na ti wuyisa ngu ka otshe makhalo ale ti nga hangalaka ka ona.” A tshumela a txi khene: “Ni na tsimbila ni lava yile yo mwalala.” (Ezekhiyele 34:12, 16) Ka Jehovha nvuta yo mwalala kha ti wombi to yi na gwitisa toneto. Ngako nvuta yi txi mwala ene wa ti ziva, se wa tsimbila e yi xota ngako a txi yi mana wa tsaka ngutu. (Matewu 18:12-14) Phela ene a womba a txi: “tinvuta tangu, tinvuta ta wudyiselo wangu.” (Ezekhiyele 34:31) Awe u mmweyo wa tinvuta toneto.
Ka Jehovha nvuta yo mwalala kha ti wombi to yi na gwitisa toneto. Ene wa tsaka mbimo yi a yi manako
“Hi tshumetele ka txiemo txile hi nga ti ka txona kale”
Ngu kutxani Jehovha a txi kuramba ti to u tshumelela kwakwe? Nguko ene a lava ti to u tsaka. Ene a thembisa ti to a na nisa “mati a makatekwa” ka tinvuta takwe. (Ezekhiyele 34:26) Atiya hi nga makuhu, nguko awe u ti woni eto ti txi maheka kwako.
Hi nga khumbula ati u nga ti pfisa tona mbimo yi u nga khata kugonda ngu Jehovha. Ngu txikombiso, u ti pfisile kutxani mbimo yi u nga khata kugonda ngu ditina da Txizimu ni sikongomelo sa txona? Alakanya litsako ali u nga txi li mana mbimo yi u nga txi tsaka ni vanathu ka mitshangano ya hombe. Mbimo yi u nga ti txhumayela u mana m’thu awu a kombisako kutsakela, ina khu ya wuya mtini u di tsakile?
Phela ta koteka ku tshumela u mana litsako lonelo. Dilanda dimwani da Txizimu di kombete tiya ka Jehovha: “Awe MKOMA, hi wuyisele kwako, kasi ku hi txi tshumelela kwako ngu ditshuri, hi tshumetele ka txiemo txile hi nga ti ka txona kale.” (Sidilo 5:21) Jehovha a xamute mkombelo wakwe, se vathu va Txizimu va tshumete ve mu thumela ngu litsako. (Nehemiya 8:17) Jehovha nene a na maha to fana ngu ngawe.
Hambiketo kutshumela ka Jehovha ti nga thuka ti kukaratela. He wone simwani sa sikarato a si u nga mananako naso ni ku u nga si xulisa kutxani.
