TXIENGE 5

Tshumelela ka “M’dyisi ni Muwoneleti wa mimoya yanu.”

TXHAYA

Ina awe u manana ni sikarato so fana ni si hi nga bhula ngu sona ka dibroxura diya? I di toneto, u nga thave. Ku ni malanda o tala a Jehovha a timbimo ta kale ni ta ngweno ma nga manana ni sikarato so fana. Kufana ni vona va nga mana txivhuno txa Jehovha ti to ve xula sikarato, na nawe u nga sikota.

Jehovha a na kuvhuna ku u tshumelela kwakwe

TSANISEKA ti to Jehovha a na kuvhuna ti to u tshumelela kwakwe. Ene a na kuvhuna kuwonisana ni kuvilela kwako, ni ku mana kudikha mbiluni aku ku tiswako ngu kuva ni livhalo la linene. Se u na tshumela u kuzeteleka kuthumela Jehovha kumweko ni vakhozeli kuloni. Txiemo txako txi na fana ni txa Makristu o khata aya ma nga bhalelwa tiya ngu mpostoli Pedro: “Mi ti ti fana ni tinvuta ta kuhangalaka, aniko akuwa mi tshumete mi wuya ka M’dyisi ni Muwoneleti wa mimoya yanu.”—1 Pedro 2:25.

Kutshumelela ka Jehovha ngu tona i ku ta tinene ngutu ati u nga ti mahako. Ngu kutxani? Eto ti na tsakisa Jehovha. (Mavingu 27:11) Nga ha u ti zivako ngu kona Jehovha a ni matipfelo, se ati hi mahako ta mu gwesa. Ditshuri ti to, ene kha sinzisi ku hi mu randa ni ku mu thumela. (Dhewuteronome 30:19, 20) Mzivi mmwani wa matimu a Bhiblia a bhate tiya: “Ditimba da mbilu yathu di tulelwa mndani. Mbilu kha yi na txiñolo txo tulela hahanze.” Ngako hi txi sawula kuthumela Jehovha ngu kona ha ka lirando li hi ku nalo ngu ngene, hi tula matimba a mbiluni kwathu. Mbimo yi hi mahako toneto, hi ninga Jehovha txilo txa lisima ngutu, i ku kuthembeka kwathu. Ene wa tsaka ngutu ngu toneto. Ngu ditshuri, kha ti nga ho timwani to tsakisa ngutu kupinda kukhozela Jehovha nguko wa fanelwa ngu toneto.—Mithumo 20:35; Mtuletelo 4:11.

Hahanze keto, ngako u txi tshumelela ka Jehovha, txilaveko txako txa moya txi na khatalelwa. (Matewu 5:3) Ngu nzila yihi? Vathu va ditiko va ti wotisa ku: ‘Kasi hi hanyela txani?’ Vona va ni nzala yo ziva tixamulo ta siwotiso mayelano ni txikongomelo txa wutomi. Vathu va ni txilaveko txonetxo, nguko Jehovha a va mahisile toneto. Ene a hi vangile ngu nzila yo hi mana litsako ngako hi txi mu thumela. Hi nge li mani litsako la hombe lo pinda ali li manwako ngu kuziva ti to hi khozela Jehovha ngu kona ha ka lirando.—Masalmo 63:1-5.

Khumbula to a lava ku awe u tshumelela kwakwe. Hi ti zivisa kutxani toneto? Alakanya ngu tiya: Kumahilwe mikombelo kasi ku dibroxura diya di mahwa. Ti nga maha awe u di kombilwe didroxura ngu didhota mwendo mwanathu koloni. Se u di tsakete u za u di lera se u tiemisela kumaha to kari. Totshe tiya ti kombisa ti to Jehovha kha ku divala. Ene ngu lirando a ku ndindela kwakwe.—Johani 6:44.

Hi nga mana kuthaveleleka kuziva ti to Jehovha kha divali malanda akwe aya ma nga mwalala. Mwanathu awu a dhanwako ku i Donna a ti woni eto. Ene a wombile tiya: “Ni lekile kuthumela Jehovha kudotho-kudotho, kambe ni khatile kualakanyisisa ngu Masalmo 139:23, 24 ayi yi ku khene: ‘Ni xolisise, Txizimu, kasi kuziva mbilu yangu; ni duke kasi kuziva mialakanyo yangu. Wona ti to mwendo ni tsimbila ngu nzila yo biha u txi ni tsimbitisa ngu nzila yi ni yisako ka wutomi wo mbi guma.’ Ni ti ti ziva ti to kha ni lumbi ditiko, phela ti txi ni karatela kuhanya hahanze ka sengeletano, ni txi ti ziva kambe ti to ani ni lumba sengeletano. Ni khatile kuwona to Jehovha kha ni leka; ti txo lava ni tshumelela kwakwe dwe. Na tsaka kuva ni di mahile toneto!”

“Ni khatile kuwona to Jehovha kha ni leka; ti txo lava ni tshumelela kwakwe dwe”

Hi kombela ti to Jehovha e kuvhuna u tshumela u va ni “kutsaka ka MKOMA.” (Nehemiya 8:10) Khu na mbi ti sola ngu kuva u di tshumete ka Jehovha.

Tixamulo ta siwotiso asi u nga ti wotisako ngako u txi lava kutshumelela ka Jehovha

NI NA KHATELA HANI?

M’thu wu a lwalako a kalamuka kudotho-kudotho. Ngu ha kufanako ti to Mkristu e wuka e hanya ti lava e khata ngu kudya sakudya sa moya sidotho-sidotho ditshiku ni ditshiku. U nga ti wone nga ti lava u dya sa singi ngu mbimo yimweyo. Kutilava u nga duketa kukhata ngu kuheta mbimonyana u txi lera Bhiblia, dimwedo da mabhuku athu, kubela ka site yathu mwendo kuxalela mavhidhiyo a Broacasting. U nga tshumela u si sweli kukhata kuya mitshanganoni. Txa lisima ngutu maha mkombela ka Jehovha. ‘Veka masoni ka Txizimu kotshe kukarateka kwako, nguko txona txa mi khatalela.’—1 Pedro 5:7.

Eeva a womba tiya: “Msana ka kuva ni di zumbile mbimo yo lapha ni emile kukhozela Jehovha, ni ti thava ni kumaha mkombelo. Mbimo ni nga mana txibindi txo maha mkombelo didhota dimwani da hafuhi hale di ni endete. Dona di ni vhunile kuwona to Jehovha kha ni tshukula. Ene a ni kuzetile ku ni khata kulera Bhiblia ditshiku ni ditshiku. Msana kova ni dikhatile kulera Bhiblia ni mani mtamo wo ya mitshanganoni. Ngu mbimo ni khatile kuya kutxhumayelani. Na tsaka kuziva to Jehovha kha ni tsukula.”

INA VANATHU VA NI AMUKELA?

Tsaniseka ti to vanathu dibanzani va na kuamukela ngu manza mambidi. Vona na mbi kukonanisela, hahanze keto va na kutsanisekisa ti to va kuranda ni ku va na kutsanisa.—Vahebheru 10:24, 25.

Javier a khene: “Ni txi pimisa ngu kuya mitshanganoni ni ti pfa tingana. Ni ti pimisa to vanathu va na mbi rendera. Kambe, mwanathu mmwani wa txisikati wo kumba awu ni nga gwitisa kuwonana nayo mitshanganoni 30 wa malembe msana a ni tete a ta khene: ‘Hoya-hoya mwanangu!’ Eto ti ni gwesile ngutu. Ni pfite ngu ditshuri ti to ni to ko wuya mtini.”

Marco a womba tiya: “Ni yile mitshanganoni ni ya zumba ka dibhanku da msana ti to ni si wonwi ngu m’thu. Kambe, vamwani va ni tumbute hambiku ni nga gwita kuta mitshanganoni ni di ngadi m’dotho. Vona va ni hoyozete ve ta ni bharasara ni pfite kudikha mbiluni. Ni ti pfite nga nova mtini ta ditshuri.”

MADHOTA MA NA NI VHUNISA KUTXANI?

Madhota ma na kuñola ngu wunene. Vona va na kundunduzela nguku u nga khata kuwuseta “lirando lako lo khata.” (Mtuletelo 2:4) Vona va na kuvhuna u lulamisa sionho si u nga vako u di mahile, kambe va na maha eto ngu “moya wa wumbilu.” (Vagalatiya 6:1, NM; Mavingu 28:13) Madhota ma nga kombela m’thu ku e ta gonda ni nawe mabhuku o fana ni di di ku Hanya wutomi wo tsakisa kala kupinduka! mwendo a di di ku ‘Achegue-se a Jeová.’ Tsaniseka ti to madhota ma na kuvhuna ka totshe ti ti lavekako.—Isaya 32:1, 2.

Victor a womba tiya: “Ka 8 wa malembe ya ni nga heta ni di hote, madhota ma ti ni xota. Ditshiku dimwani, didhota do kari di ni kombile mifota ayi hi nga thavisa hi di hotshe. Mifota yile yi ni khumbutisile timhaka to tsakisa, se ni khata kupimisa ngu litsako ali ni nga txi lipfa mbimo yi ni ga ti thumela Jehovha. Madhota ma ni vhunile ku ni tshumela ni hanya ngu didhawa da moya.”

Txizimu txi na kutsanisa

Txibhukwana txathu txa tindando txa Embelelela Jehovha ngu litsako, txi na ni tindako ati ti nga ku tsanisako ni ku kuthavelela mbimo yi u zamako kuwuka ngu didhawa da moya. Ngu txikombiso wona mapswi ya ndando ya 38. Yona yi seketetwe ka mapswi ya ma manekako ka 1 Pedro 5:10, yona yi ni msungo mhaka wu wu ku: “Txizimu txi na kutsanisa.”

Ku ni txivangelo txo bonga Jehovha

A hi humisile mu mtemani.

Ditshuri wa hi dhunda ngu mbilu yotshe

U mthembisile ku mranda Mkoma

A na kuvhuna to’ timisela

Ngu lirando u nga li kombisa.
Jehovha a ningete Jes’ wo dhundeka;

A ta hi fela ngu kota yathu.

Kha hi kanakani a na hi ha mtamo,

A lava ti to u humelela.

Kha li divali likholo lawe;

A na va xayisa vathu vakwe.

(KORU)

Jehovha ‘ku xavilegu mnoha wa Jesu.

‘to u lumba ene,a na va ni nawe

A na kubhiyelelani ku kuthangela.

A na kutsanisani ku kuvhikela.