Tixamulo ta siwotiso sa vagondi
Ina Mkristu a fanete kuzumba ni txibhamu ti to e ti vhikela ngu txona ka vathu vamwane?
Makristu ma maha totshe ati ma nga ti kotako ti to me ti vhikela. Kambe kha ma ndaki matshina a milayo ya Bhiblia. Bhiblia yi kombisa ti to ti bihile ku Mkristu e thumisa txibhamu, wulahu, dibhere mwendo tinzanga ti to e ti vhikela ngu sona ka vathu vamwane. Alakanyisisa ngu tiya:
Wutomi wa vathu wu sawulekile ka Jehovha. M’bhali wa Masalmu a bhati tiya mayelano ni Jehovha: “Awe u txisima txi txi ningako wutomi.” (Masalmu 36:9, NM) Kambe ngako Mkristu a txi sawula ku ti vhikela mwendo kuvhikela mti wakwe, ti na lava e maha totshe ati a nga ti kotako ti to a si ve ni mnando wa mnoha. I ku ti to, ku si dawi m’thu ngu mhaka yakwe.—Dheuteronome 22:8; Masalmu 51:14.
Ditshuri ti to txihi ni txihi atxi m’thu a nga txi thumisako ti to e ti vhikela ngu txona, txi nga daya m’thu. Kambe, ta hehuka ngutu kumaha phango ngu txibhamu. * (Wona txhamuselo ya hahatshi.) I singeto basi, ngako txigevenga txi txo xasela m’thu wu se a ku ni txibhamu, eho ku nga fa wamweyo.
Ka wusiku wu a ndino dawa ngu wona, Jesu a gete vagondiswa vakwe ti to ve teka matxhari, kambe eto ti si wombi tona ti to i ti o ti vhikela ngu ona. (Luka 22:36, 38) Kambe a ti lava ku va gondisa gondo ya lisima. Ngu yihi gondo ya kona? Ya yi to va sa fanela kulwa hambi va txi xaselwa ngu vathu va va ku ni matxhari. (Luka 22:52) Ka wona wusiku wule, Pedro a wite nzeve ya txithumi txa mphaxeli wa hombe. Se Jesu a nje khene: “Tshumeta ditxhari dako msavani ka dona.” Ka yoneyo mbimo Jesu wombile ditshina dimwedo da mlayo awu wu nga hi vhunako ni nyamsi. A ti khene: “Votshe vale va na kuthumisa ditxhari, va na loviswa ngu ditxhari.”—Matewu 26:51, 52.
Makristu a ditshuri ma thumisa ati Bhiblia yi nga ti womba ka Mika 4:3, yi khene: “Va na tshula mabhere awe ve ma maha misuka, ni matxhari awe me maha tisikela.” Makristu a ditshuri ma ziwa ngu ku va o rula. Ona ma londisela mapswi a Txizimu aya ma nga wombwa ngu Paulo a nga khene “mi nga tshumeteleni kubiha ngu kubiha, kambe zamani kumaha ti i ku tatinene masoni ka votshe vathu”. (Varoma 12:17, 18) Mpostoli Paulo a mananile ni sigevenga ni makhamba, kambe ene kha ndaka milayo ya Txizimu ti to e tivhikela. (2 Vakorinto 11:26) Kambe ene a ti themba Jehovha ni ku a ti wu ziva mlayo wa Bhiblia wu wu ku khene: “Wuzivi wa vhuna kupinda matxhari.”—Eklesiaste 9:18.
Makristu ma ninga lisima wutomi kupinda silo sa nyama. Ha ti ziva ti to wutomi wa m’thu “kha wu tsaniswi ngu si a ku naso.” (Luka 12:15) Ngu toneto, ngako hi txi manana ni sigevenga asi si ku ni sibhamu, hi zama kuwombawomba ngu nzila ya yinene ni kwa mbi lwisana naso. Se ngako hi txi wona ti to eto kha ti thumi, hi londisa txialakanyiso txa Jesu a nga khene: “Mi nga lambeleni m’thu wo biha.” Eto ti txhamusela ti to hi na ninga txigevenga txi teka asi txi si lavako. (Matewu 5:39, 40; Luka 6:29) * (Wona txhamuselo ya hahatshi.) I tshuko kwa mbi duka txiziva ngu kubeta mkondo. Ti nga maha txi renganyana ngako hi txi londisela txialakanyiso txiya txa Bhiblia: “Ku ti kulisa ngu tithomba, hi nga si si tsakelwako ngu Tate.” (1 Johane 2:16) Hi nga tshumela hi maneka hi di vhikelekile ngako vaakelani vathu va txi hi ziva ti to hi Tifakazi ta Jehovha ti ti lwelako kudikha.—Mavingwa 18:10.
Makristu ma xonipha livhalo la vamwane. (Varoma 14:21) Vanathu vamwane va nga thuka ve karateka ngu kuziva ti to mwanathu wo kari a ni txibhamu txo tivhikela ngu txona ka vathu vamwane. Se lirando liya hi ku nalo ngu vanathu li na maha ti to hi si lavi kudayisa mavhalo awe. Ti womba txani toneto? Ti womba ti to hi nga tumela kwa mbi va ni sibhamu hambi athu hi txi wona ti to kha ti nga ni mhaka.—1 Vakorinto 10:32, 33; 13:4, 5.
Makristu ma lava ku va sikombiso sa sinene. (2 Vakorinto 4:2; 1 Pedro 5:2, 3) Ngako madhota ma txi ziva ti to ku ni mwanathu wu a ku ni txibhamu txo tivhikela ngu txona ka vathu, ma na mu ninga txialakanyiso txa mu ka Bhiblia. Se ngako ene a txi banga kuleka txibhamu, a na mbi va txikombiso txa txinene dibanzani. Eto ti la kuwomba ti to a na mbi thuka e va ni wutixamuleli wo kari mwendo kumana malungelo. Ti mahisa toneto ka mwanathu awu a thumisako txibhamu ka mthumo wakwe wo ti hanyisa. Ti nga va ta tinene kulavetela mthumo wumwane. *—Wona txhamuselo ya hahatshi.
Mkristu a fanete e maha txisungo apune ti to a na ti vhikelisa ku txani ene ni mwaya ni silo sakwe kupata ni ha a thumako kona. Kambe txisungo txakwe kha txa fanela txi ndaka matshina a milayo ya Bhiblia. Txizimu txathu txo txhariha, txi hi ningile matshina onewo a milayo nguku txi hi dhundako. Ngu toneto, Makristu aya ma ku ni wuxaka wo tsana ni Jehovha ma sawula kwa mbi va ni txibhamu ti to me ti vhikela ka vathu vamwane. Ma ti ziva ti to ngako ma txi themba Txizimu ni kulondisela matshina a milayo ya Bhiblia ka wutomi wawe, ona ma na mana kuvhikeleka ka ditshuri.—Masalmu 97:10; Mavingwa 1:33; 2:6, 7.
Ngu mbimo ya xanisa ya hombe, Makristu ma na mbi duketa ku ti lwela, kambe ma na themba Jehovha
^ par. 3 Ti nga maha Mkristu e wona i di tshuko ku va ni txibhamu (kufana ni wulaho) ti to e tivhikela ka sihari sa txitinga ni kuxota ngu txona. Kambe ngako txi di gwitile kuthuma, ndinene kuzumba txi di txhatxheletwe ka wukhalo wo sisala ngutu wu tshumela wu khotwa. Ka makhalo mamwane, txibhamu txo xota ngu txona, txi lava maphepha a wukoma, ndinene kuengisa mlayo wa wukoma.—Varoma 13:1.
^ par. 6 Ti to u mana to tala mayelano ni nzila yo ti vhikela ka sigevenga, wona msungo wu wu khene “Como evitar o estupro”, ka Despertai! de 8 de março de 1993.
^ par. 2 Ti to u mana to tala mayelano ni mthumo wu wu lavako ti to u ñola txibhamu wona A Sentinela de 1.° de novembro de 2005, diphepha 31; ni ya 15 de janeiro de 1984, maphepha 25-26.
