1, 2. Ngu sihi silo asi hi fanelako kulwa naso?

KUKHUKHELA ka masiku a Abhele wo lulama kala nyamsi, malanda o lulama ma lwa ni kusimama me thumela Jehovha. Mpostoli Paulo a gete Makristu a Vahebheru a txi khene: “Mi rwate sixaniso sa kulwa ko nemela ni kupandisa” ti to mi zama kumana kuamukeleka ka Txizimu ni kumana makatekwa a txona. (Vahebheru 10:32-34) Ene a fananisile yimbi ya Makristu ni mapalisana a Magriki a kale o fana ni kututuma ni kupeka txibhakela. (Vahebheru 12:1, 4) Nyamsi, hi ka livilo lo mana wutomi wo mbina magwito. Kambe ku ni mlala awu a lavako ku hi phazamisa ni ku hi tekela makatekwa athu a mbimo yi yi tako.

² Yimbi yo hisa ngutu yi hi ku nayo i yimbi yo lwa ni Sathane ni mafu akwe. (Vaefesu 6:12) Ti ni lisima ti to hi tiwonela ti to hi si tshapelwi ngu tigondo ta mafu awa ni marindi a vathu. Hi fanete hi tiwonela kambe ka simaho so biha so fana ni kudhaha fola, mbangi ni simwane so nga  soneso ni wudevi ni wugelegele. Hi fanete hi lwa kambe ni dikhodho.—2 Vakorinto 10:3-6; Vakolosa 3:5-9.

3. Jehovha a hi vhunisa ku txani ti to hi xula valala vathu?

³ Valala vathu va ni mtamo ngutu; ina hi nga sikota ku va xula? Tona hi nga m’baba, kambe hi nga sikota! Mpostoli Paulo a ti fananisile ni mpeki wa txibhakela mbimo yi a nga khene: “Kambe kha ni lwisi ku nga no peketela diphuho.” (1 Vakorinto 9:26) Aku mpeki wa txibhakela a lwako ni mpeki kulowe wa txibhakela, nanathu ti lava hi lwa ni valala vathu. Jehovha wa hi vhuna ni ku hi gondisa mamahelo a kona ngu kuthumisa Bhiblia. Ene a tshumela a hi vhuna ngu kuthumisa mabhuku aya ma nga seketelwa ka Bhiblia, mitshangano ya dibanza, ya txigava ni ya m’ganga. Ina wa yi thumisa yotshe gondiselelo yoneyo? I di ti to khu yi thumisi, khu na mbi lwa ni mlala wako u na nga mpeki wa txibhakela wo peka diphuho.

4. Hi nga mahisa ku txani ti to hi si xulwi ngu mlala?

⁴ Mbimo yotshe ti lava hi tula maso. Ngu ku txani? Nguko valala vathu va nga hi xasela na hi sa tirinzela mwendo mbimo yi hi ku ni dikhodho. Bhiblia ya hi tsanisa ni ku hi txharihisa. Yi womba tiya: “U nga xulwe ngu kubiha, kambe xula kubiha ngu wunene.” (Varoma 12:21) Hi txi simama hi lwa ni m’bihi, hi nga xula! Hambiketo, hi txo thuka hi ema kulwa, Sathane, mafu akwe ni dikhodho va nga hi xula. Se hi nga emeni. U nga thuke u hetwa mtamo se u wisa mawoko ako!—1 Pedro 5:9.

5. a) Ngu tihi ti hi fanelako hi ti khumbula ti to hi amukelwa ngu Jehovha? b) Mba mani ava i ku sikombiso sa mu ka Bhiblia va hi no gonda ngu vona?

⁵ Hi txi lava kuamukelwa ni ku katekiswa ngu Jehovha, ti lava hi khumbula ti to hi lwela txani. Vahebheru 11:6 yi khene: “Awule a tshuketelako hafuhi ka Txizimu, a fanete kukholwa ti to txona txi ho, ni ti to txa ninga txhatxhazelo ka vale va txi lavako.” Kulava Jehovha ngu ditshuri ti womba kulwela ku amukelwa ngu ngene. (Mithumo 15:17) Amu ka Bhiblia, ku ni sikombiso sa singi sa vathu ava va nga maha toneto. Vamwane vawe i Jakobe, Rakeli, Josefa ni Paulo. Votshe va manani ni siduko so karata so fana ni ku va ni dikhodho ni kulwala. Kambe vona va xute. Txikombiso txawe txi kombisa ti to nanathu hi txo lwa ngu mtamo hi nga mana kateko ya Jehovha. He woni.

6. Nji txani txi nga vhuna Jakobe ti to e tsanisela ni ku a wuyetwe ngu txani? (Wona mfota wu wu ku makhatoni.)

⁶ Jakobe wa mwamna wo thembeka, a tsanisete ni kulwa nguko a ti randa Jehovha ni kuninga lisima wuxaka wawe. Ngu mbilu yotshe a ti themba txithembiso txa Jehovha txo katekisa vanana vakwe. (Genesisi 28:3, 4) Mbimo yi a nga ti ni kona mu ka 100 wa malembe, Jakobe a lwite ni ngelozi ti to e mana makatekwa a Jehovha. (Lera Genesisi 32:24-28.) Ina ene a ti ni mtamo wo za e lwa ni ngelozi? Ahim-him! Kambe ene a ti tiemisete a txi kombisa ti to a zama ku mana makatekwa! Jehovha a katekisile Jakobe e  tshumela e m’txitxa ditina a txi khene i Israeli ati ti wombako ti to “awu a lwako ni Txizimu”. Jakobe a amuketwe ni ku katekiswa ngu Jehovha. Nanathu hi lava toneto.

7. a) Ngu yihi mhaka yo karata ayi Rakeli a nga ti nayo? b) Nji txani atxi Rakeli a nga txi maha? Ene a katekisilwe ngu nzila yihi?

⁷ Rakeli awu i nga ti ene khonikhoni ya Jakobe a ti emete ngu mbilu yotshe ti to e mana makatekwa aya Jehovha a nga thembisa Jakobe. Kambe ku ti ni mhaka yo kari. Rakeli i ti txifule. Kaleko, kwa mbi veleka i ti tingana ta hombe ka wamsikati. Nji txani txi nga vhuna Rakeli ti to e tsanisela? Kha nga va ni dikhodho. A simamile e khongela ka Jehovha. Jehovha a engisile mkombelo wa Rakeli, se ngu kutsimbila ka mbimo a vite ni mwanana. Ngu toneto a nga khene: “Ani ni lwite ni mkoma wangu . . .  kambe se ni humelete.”—Genesisi 30:8, 20-24.

8. Ngu sihi sikarato asi Josefa a nga va naso? Ene njikombiso txa txinene kwathu ngu nzila yihi?

⁸ Txikombiso txa Jakobe ni Rakeli ti nga maha txi di vhuni mwanana wawe Josefa ti to e wonisana ni sikarato sa wutomi. Mbimo yi Josefa a nga va ni 17 wa malembe txikwete txi khatile kudima ngu m’hini. Vakoma vakwe ava va nga txi m’bavela va mxavisile e ya va txibotxhwa. A zumbile jele ka Egipta na a singa ni mnando. (Genesisi 37:23-28; 39:7-9, 20, 21) Josefa njikombiso txa txinene nguko kha nga za e guma mtamo, se e lava kuphota. Ngu mhaka muni? Nguku a nga txi ninga lisima wuxaka wakwe ni Jehovha. (Levhi 19:18; Varoma 12:17-21) Hambi i di ti to hi xuphekile hi di ngadi vadotho mwendo hambi ni konkuwa hi txi ngadi  hi txi xupheka, ti lava hi tsanisela. Hi txi maha toneto hi nga tsaniseka ti to Jehovha a na hi katekisa.—Lera Genesisi 39:21-23.

9. Hi nga txi etetelisa ku txani txikombiso txa Jakobe, Rakeli ni Josefa?

⁹ Ni nyamsi hi nga thuka hi manana ni sikarato so biha. Ti nga maha hi txi karatwa ngu txisawu-sawu, wubihi, kupoyilelwa mwendo kubavelwa. Hahanze ko guma mtamo, khumbula ati ti nga vhuna Jakobe, Rakeli ni Josefa ti to ve simama ve thumela Jehovha ngu litsako. Txizimu txi va tsanisile ni ku va katekisa nguku va nga txi ninga lisima wuxaka wawe natxo. I singeto basi, vona va ti maha ngu kuya ngu ti va nga tikombela ka Jehovha. Hi hanya ka masiku a magwito. Ngu toneto, hi nga va etetela ngu kutsanisa themba yathu ya mbimo yi yi tako! Ina awe u tiemisete kulwa mwendo ku ti karatela ku amukelwa ngu Jehovha?

10, 11. a) Ngu ku txani hi di fanete kulwa ti to hi mana makatekwa a Txizimu? b) Nji txani atxi txi no hi vhuna kusawula a ti i ku ta tinene?

¹⁰ Ngu ku txani mbimo yimwane ti txi laveka ku hi lwa ti to hi mana makatekwa ya Txizimu? Nguko kha ha hetiseka, ni ku ti nga maheka i di ti to ti lava hi lwa ni minavelo yo biha. Vamwane va lwa ti to ve dhunda mthumo wo txhumayela. Vamwane ti lava ve lwa ni timhaka ta dihanyo mwendo ngu kuva va txi tipfa va di vokha. Vathu vamwane ta va karatela kudivalela m’thu wo kari wu a nga va gohela. Ti singa ni mhaka ni ti to hi ni mbimo muni hi txi thumela Jehovha, hotshethu ti lava hi lwa ni ti ti hi tsivelako kuthumela Txizimu.

¹¹ Ditshuri ngu ti to ti nga maheka ti karata kumaha ati i ku ta tinene, ngutu-ngutu hi txi lwa ni minavelo yo biha. (Jeremiya 17:9) Ti di ngeto, maha mkombelo ka Jehovha u kombela moya wo sawuleka. Mkombelo ni moya wo sawuleka si nga kuvhuna ti to u mana mtamo wo u maha ti i ku ta tinene kasiku u mana makatekwa ya Txizimu. Hanya ngu kutumelelana ni mikombelo yako. Duketa kulera Bhiblia ditshiku ni ditshiku ni ku ti siyela mbimo ya ti to u maha gondo yako upune ni wukhozeli wa mwaya.—Lera Masalmu 119:32.

12, 13. Vanathu vambidi va vhunisilwe ku txani kulwisana ni minavelo yo biha?

¹² Bhiblia, moya wo sawuleka ni mabhuku a Wukristu si vhuni vanathu va vangi ti to ve xula minavelo yo biha. Ndise sikombiso simwane: mphya mmwane a lerile msungu wa mhaka wa direvhista da Despertai! da 8 wa dezembro wa 2003 wu wu ku khene “Como vencer desejos errados?”. A gwitile a txi khene txani? A ti khene “ni lwa ni mialakanyo yo biha. Mbimo yi ni nga lera ti to ‘ka vamwane yimbi yo lwa ni minavelo yo biha nja hombe ngutu’, ni ti pfite ni di navo. Ni ti tumbute ti to ni nga nokha.” Mphya wuwa a tshumete e vhuneka kambe ngu kulera msungo wa mhaka wumwane wu wu ku ka Despertai! wa 8 ka Outubro wa 2003 wu wu ku khene “Deus aprova estilos de vida alternativos?”.  Koneho a woni ti to vamwane va lwa ni mialakanyo yo biha kudingana malembe o tala, kufana ni “mpa ha mmidini”. (2 Vakorinto 12:7) Hambiketo, vona va lwite ti to ve va ni wutomi awu wu tsakisako masoni ka Txizimu. Va ni themba ya mbimo yi yi tako. Mphya eneyo a vhunekile ngutu. A ti khene: “Ditshiku ni ditshiku ni nga sikota kuthembeka ka Jehovha. Se na m’bonga ngutu aku ni kotako kulwa ni ditiko diya do biha.”

¹³ Wona txikombiso tximwane txa mwanathu mmwane wa Estados Unidos a ti khene: “Ni lava ku mibonga ngu sotshe sakudya sa moya asi mi hi ningako ngu mbimo ya yinene. Ni ti woni ti to misungo ya timhaka toneto ti bhaletwe ani. Se ku pinda malembe o tala ni txilwa ni mhaka yi ni ti zivako ti to Jehovha wa yi nyenya. Mbimo yimwane ni thuka ni lava ku karala ni si nge ngadi ni lwa. Na ti ziva ti to Jehovha wa divalela, kambe aku ni dhundako mhaka yoneyo yo biha ta ni karatela kulwa ni mhaka yoneyo. Kulwisana ni mhaka yoneyo ditshiku ni ditshiku ti xanisa wutomi wangu. . . . Msana ko lera mhaka yi yi ku “Você tem ‘um coração para conhecer’ a Jeová?” ka A Sentinela ya 15 wa março wa 2013, ni ti pfisisile ti to ngu ditshuri Jehovha a lava ku ni vhuna.”

14. a) Ina Paulo ti ti mu hehukela kulwisana ni sikarato sakwe? b) Hi nga di xulisa ku txani dikhodho dathu?

¹⁴ Lera Varoma 7:21-25. Mpostoli Paulo a ti ti ziva ngu ti ti nga mu humelela ti to ta karata kulwisana ni minavelo yo biha ni dikhodho. Kambe a ti ti ziva ti to a nga sikota kuxula yimbi loko a txi maha mkombelo ka Jehovha, ni ku tumela mterulo wa Jesu. Athu ko? Ina hi nga xula dikhodho adi hi ku nado? Inna. Kambe tsena hi txi etetela Paulo, hi si thembi mtamo wathu basi, kambe hi themba Jehovha ni ku va ni likholo ka mterulo.

15. Nji txani atxi txi no hi vhuna kusimama hi thembeka ni kutsanisela sikarato?

¹⁵ Yimwane mbimo Jehovha a nga tumelela mhaka yo kari ti to yi hi humelela kasiku e wona ti to ngu tihi i ku ta lisima kwathu. Ngu txikombiso, hi txo thuka hi lwala mwendo kulwala dixaka dathu mwendo txikarato txo kari, hi ndi na maha txani? Hi txi themba Jehovha, hi na mkombela ti to e hi ninga mtamo wo ya masoni hi thembeka, ni kutsaka hi tshumela hi va vangana vakwe. (Vafilipiya 4:13) Sikombiso sa vanathu va kale ni sa ngweno, si nga hi vhuna kuwona ti to ngako hi txi maha mkombelo, hi nga mana mtamo ni txibindi txo simama hi tsanisela.

16, 17. Ngu tihi ati hi nga ti emisela ku ti maha?

¹⁶ Sathane a na sinya makhara u txo thuka u gumelwa ngu themba. Ngu toneto, tiemiseli ku “ñolisisa asi i ku sasinene”. (1 Vatesalonika 5:21) Phela u nga m’xula Sathane, mafu akwe hambi minavelo yo biha! kambe ti to u m’xula ti lava u themba ti to Jehovha a na kuninga mtamo.—2 Vakorinto 4:7-9; Vagalatiya 6:9.

¹⁷ U nga karale, simama u lwa. Timisela. Ngu ditshuri u nga tsaniseka ti to Jehovha a na ‘hangalasa makatekwa o tala txitimwi kwako’ .—Malakiya 3:10.