Tixamulo ta siwotiso sa vagondi
Nji txani “Dipswi da Txizimu” adi Paulo a nga khene “da hanya, di ni mtamo” ka Vahebheru 4:12?
Mhaka yi komba ti to Paulo a ti wombawomba ngu madungula a Txizimu mayelano ni txikongomelo txa txona atxi txi manekako amu ka Bhiblia.
Mbimo yo tala mabhuku athu ma txhamusela Vahebheru 4:12 kasi ku kombisa mtamo wa Bhiblia wo hundula wutomi wa m’thu. Toneto ditshuri, kambe hi nga wona timhaka timwane ati Paulo a nga thanga e ti womba ka tindima timwane. Paulo a ti vhuna Makristu a Vahebheru ti to me tsimbitisana ni sikongomelo sa Txizimu. Wungi wa sikongomelo soneso si manwi ka mibhalo yo basa. Ene a thumisile txikombiso txa Vaisraeli ava va nga huma ka wukhumbi wa Egipta. Vona va ndina wulela ka ‘ditiko adi di khulungako wulombe ni masi’. Ka ditiko donedo, va ndina mana kuhumula ka ditshuri.—Eksodha 3:8; Dheuteronome 12:9, 10.
Atxiya i ti txikongomelo txa Txizimu. Kambe Vaisraeli va tshuralete mkongomiso wa Jehovha va si vi ni likholo, ngu toneto ti nga maha wungi wawe va si wuleli kuhumulani ka Txizimu. (Mitengo 14:30; Joxuwa 14:6-10) Kambe Paulo a ti khene, txi ti nga di ho “txithembiso txa kuwulela kuhumulani ka Txizimu”. (Vahebheru 3:16-19; 4:1) Ti ha kubasani ti to “txithembiso” txonetxo njienge txa ti Txizimu txi nga ti kombisa mayelano ni txikongomelo txa txona. Kufana ni Makristu a Vahebheru nanathu hi nga gonda ngu txikongomelo txonetxo ni ku tsimbitisana natxo. Kasi ku yi khanyisa kwati, Paulo a seketete mhaka yakwe ka Genesisi 2:2 ni Masalmu 95:11.
Ta hi tsakisa kuziva ti to ‘yi ngadi ho themba yo wulela kuhumulani ka Txizimu’. Aku ti ku mu ka Bhiblia ha themba ti to ta koteka kuwulela kuhumulani koneko. Athu se hi tekile nzila yo ya kona, i singa ngu kulondisela Mlayo wa Mosi, kambe ngu kukombisa likholo ka Txizimu ni ku tsimbitisana ni txikongomelo txa txona. I singa athu hokha, vathu va timiliyoni va gonda Bhiblia se ve wona ati Txizimu txi nga tiwomba mayelano ni txikongomelo txa txona. Vamwane va wona i di tshuku kuteka mahanyelo a manene, ni kubhabhatiswa. Totshe tiya ti kombisa ti to “Dipswi da Txizimu da hanya, di ni mtamo”. Ati Txizimu txi nga ti txhamusela amu ka Bhiblia mayelano ni txikongomelo txa txona ti txitxile wutomi wathu, ni ku ti ngadi ti txi na kongomisa wutomi wathu.
