1. Ngu yahi makungo aya hi nga ti vekelako ona?

 KOTA Makristu a ditshuri athu ha mu dhunda ngutu Jehovha, ni ku hi lava ku mthumo awu hi mu mahelako wu va wo sawuleka ngutu. Ti to hi maha totshe ati hi ti kotako ka Jehovha hi fanete hi ti vekela makungo o fana ni ku sakulela tifanelo ta Wukristu, hi gonda wusikoti wo kari ni kulava tinzila to vhuneta vamwani. *

2. Ngu kutxani hi di fanete ku ti vekela makungo a moya ni kutshumela hi ma hokelela?

² Ngu kutxani hi di fanete hi kula ngu didhawa da moya? Txa lisima ngutu, ngu ti to athu hi lava kutsakisa Jehovha. Jehovha wa tsaka ngako hi txi thumisa wusikoti wathu ti to hi seketela mfumo. Kuengetela ka toneto, hi lava kukula ngu didhawa da moya ti to hi vhuna vanathu. (1 Vat. 4:9, 10) Ti si nga ni mhaka ni ti to i kale hi txi thumela Jehovha mwendo nem hotshethu hi nga simama hi kula ngu didhawa da moya. He wone to hi nga wuyeliswa kutxani ngu txialakanyiso atxi Paulo a nga ninga Timoti.

3. Nga ha ti nga kombiswa ngu kona ka 1 Timoti 4:12-16, ngu tihi a ti Paulo a nga kuzeta Timoti ti to e ti maha?

³ Mbimo yi Paulo a nga bhalela Timoti, ene se i ti dijaha da mtamo adi di nga ti ni wusikoti. Hambiketo, Paulo a mu kuzetile ti to e simama e kula ngu didhawa da moya. (Lera 1 Timoti 4:12-16.) Mbimo yi u alakanyisisako ngu ti Paulo a nga gela Timoti, ene a txi lava ti to e kula ngu didhawa da moya ngu tinzila  timbidi: Ene a txi lava ti to Timoti e sakulela tifanelo ta Wukristu to fana ni lirando, likholo ni ku va ni mahanyelo o basa. Ni ku a txi lava kambe ti to e tiningetela ko lera, ko kuzeta ni kugondisa. He wone ti to txikombiso txa Timoti txi nga hi vhunisa kutxani kutivekela makungo a ya hi nga ma hokelelako ni ku toneto ti nga hi vhunisa kutxani ti to hi kula ngu didhawa da moya. Hi na tshumela hi wona tinzila timwani to hi andisa mthumo wathu ka Jehovha.

4. Ngu kuya ngu Vafilipiya 2:19-22, ngu tihi ti nga maha ti to Timoti e va dilanda da lisima da Jehovha?

⁴ Ngu tihi ti nga maha Timoti ku e va dilanda da dinene da Jehovha? Tifanelo takwe ta Wukristu. (Lera Vafilipiya 2:19-22.) Ngu kuya ngu ti Paulo a nga womba a txi gela Timoti, hi nga ti wona ti to Timoti i ti m’thu wo tiveka hahatshi, wo thembeka, wo dhunda kuthuma ni ku a txi thembwa ngu mabanza. A ti ni lirando, ni ku a txi khatala ngu Makristu kulowe. Ngu toneto, Paulo a txi mu dhunda ni ku kha kana-kana ku mu ninga siavelo so karata. (1 Vak. 4:17) Ngu ha kufanako ngako hi txi sakulela tifanelo a ti Jehovha ati dhundako hi na va va lisima kwakwe ni ku ene a na hi thumisa ngutu dibanzani.—Mas. 25:9; 138:6.

5. a) U nga mahisa kutxani ti to u ti vekela dikungo do sakulela fanelo yo kari ya Wukristu? b) Nga ha ti nga kombiswa ngu kona ka mfota, mwanathu wule a kombisisa kutxani ti to a thuma kasi kuhokelela dikungo dakwe do kombisa wuxinji ka vamwani?

⁵ Sawula dikungo ti to u di hokelela. Maha mkombelo kasi kuwona amu u fanelako kutshukwatisa kona ka wutomi wako. Sawula fanelo yo kari ayi lavako kuthumela ka yona. Ngu txikombiso, ina awe u lava kusakulela fanelo yo kombisa wuxinji mwendo kukulisa minavelo yo thumela vanathu? Ina u lava kutshukwatisa kova m’thu wo dikha mwendo wo divalela? I di toneto, u nga kombela mngana wako ti to e kuvhuna u wona mu u nga tshukwatisako kona.—Mav. 27:6.

6. U nga maha txani ti o u hokela fanelo yo kari ayi u lavako ku yi sakulela?

⁶ Zama kuhokelela dikungo dako. U nga mahisa kutxani toneto? Yimweyo ya tinzila ngu gonda ngu fanelo ayi u lavako ku yi hokelela. A hi nge u sungile kuthumela ka fanelo yo divalela vamwani. Ti nga lava u khata ngu kugonda ka sikombiso sa vamwani ava va nga divalela vamwani ni va va nga mbi divalela. Wona txikombiso txa Jesu. Ene a txi kombisa  kudivalela vamwani. (Luka 7:47, 48) Ni ku ene a si veki mapimo ka tiphazamo tawe kambe atxi wona ta tinene ati va ti mahako. Vafarisi va txi wona vathu i si nga va txilo, vona va txi “kanyisa vakwawe.” (Luka 18:9) Msana ko alakanyisisa ngu sikombiso siya u nga ti wotisa tiya: ‘Ngu tihi ti ni ti wonako ka vamwani. Ngu tihi tifanelo tawe ati ni vekako mapimo ka tona?’ Ngako ti txi kukaratela kudivalela vamwani bhala tifanelo ta tinene ati vanathu va ku nato. U gwita u ti wotisa tiya: ‘Jesu a mu wonisa kutxani m’thu wuwa? Ina a da mu divalela?’ U txi maha toneto ti na kuvhuna kululamisa mapimiselo ako. Ti nga karata ku divalela mwanathu awu a nga hi henyisa. Kambe ngako hi txi thumela ka toneto ti na hi hehukela kudivalela.

7. Ngu kuya ngu Mavingu 22:29, Jehovha ava thumisisa kutxani vanathu ava va ku ni wusikoti nyamsi?

⁷ Dimwani dikungo adi u nga di hokelelako ngu gonda mithumo ti to u vhuneta sengeletano. Kulaveka vathumi vo tala ti to ku akwa ma Bhetele, tinyumba to ñola mitshangano ya hombe, ni Tinyumba ta Mfumo. Vanathu vo tala va gonda mithumo yoneyo ngu kugonda ka vanathu ava va ku ni experiyensia. Nga ha ti nga kombiswa ngu kona ka mfota vanathu va txisikati ni vavamna va gonda mithumo ayi yi lavekako ti to kuwusetwa Tinyumba ta Mfumo ni to ñola mitshangano ya hombe. Ngu kuthumisa tinzila tiya, Jehovha “Mkoma wa totshe timbimo” ni Jesu Kristu “Mfumeli wa vakoma” va hetisisa mthumo wo xamalisa ngu kuthumisa vanathu ava va wu zivako kwati mthumo. (1 Tim. 1:17; 6:15; lera Mavingu 22:29.) Athu hi lava kuthuma ngutu ni kuthumisa wusikoti wathu ti to hi dhumisa Jehovha, i si nga ku ti dhumisa athu hipune.—Joh. 8:54.

8. U nga maha txani ti to u ti vekela dikungo do sakulela wusikoti wo kari?

⁸ Sawula dikungo do kari ti to u di hokelela. Ina ku ni wusikoti awu u nga wu sakulelako? Kombela madhota a dibanzani kwako mwendo muwoneleli wa txigava kasi ku ve kuvhuna kuwona amu u nga tshukwatisako kona. Ngu txikombiso ti nga maha u txi wona ti to tilava ku u tshukwatisa wusikoti wako wo womba-womba ni wo gondisa, i di toneto va kombele ti to ve kuvhuna to ngu tihi tigondo a ti u nga thumelako ka tona. Se teka mazambo kasi u tshukwatisa. U nga ti mahisa kutxani toneto?

9. U nga maha txani ti to u hokelela dikungo do gonda wusikoti wo kari?

⁹ Lwela kuhokelela dikungo dako. A hi nge awe u lava kutshukwatisa wusikoti wo gondisa. Ti nga lava u gonda kha kwati dibroxura di di ku Hisekela kulera ni kugondisa. Ngako u txi ningwa txiavelo ka mitshangano ya hagari ka divhiki, u nga kombela mwanathu ti to e ku engisela mbimo yi u lulamiselako txienge txako ni kutshumela e kuninga mawonelo aya ma no kuvhuna kutshukwatisa. Awe u fanete kuziva ngu kuva m’thu wo dhunda kuthuma ni kuthembeka i si nga kona ha ka wusikoti wako.—Mav. 21:5; 2 Vak. 8:22.

10. Ningela txikombiso txa nzila hi nga simamako hi kulisa wusikoti wo kari awu hi wu lavako.

¹⁰ Hani ngako wusikoti awu u zamako ku wu sakulela i di wona u ku ni txikarato ngutu ka wona? U nga godholi! Mwanathu mmwani a dhanwako ku i Garry a ti theletela mati mbimo yi a nga txi zama kulera mitshanganoni eto ti txi mu maha e theleka tingana. Hambiketo, ene a simamile e ti ningetela. Ene a womba ti to ngu kona ha ka trenamento ayi a nga yi  mana ene wa sikota kuveka miwomba-wombo dibanzani ni ka mitshangano ya hombe.

11. Kufana ni Timoti, nji txani txi no hi vhuna ti to hi amukela mithumo yimwani dibanzani?

¹¹ Ina ngu ditshuri Timoti a engetete ngutu wusikoti kota m’gondisi? Bhiblia kha yi wombi txilo ngu tona. Kambe ha tsaniseka ti to Timoti a si koti kukhatalela wusikoti wakwe kota m’gondisi ngu kona ha kulondisa txialakanyiso txa Paulo. (2 Tim. 3:10) Ngu ha kufanako, nanathu ngako hi txi tshukwatisa wusikoti wathu hi na va hi di lungekile kasi kuamukela mithumo yimwani dibanzani.

12. Ina awe u khala kuamukela txivhuno txa vamwani?

¹² Hotshethu ha wuyelwa ngu txivhuno a txi hi ningwako ngu vamwani. Ngako hi di sibhejela, ha tsaka ngako hi txi endelwa ngu didhota adi di ka Makomisawu o womba-womba ni sibhejela mwendo ku di thumako ka Mitxawa yo Pfuxela Valwati. Ngako hi txi manana ni sikarato ka wutomi ha tsaka ngutu ngako didhota di txi tiha mbimo yo di hi engisela ni kutshumela di hi thavelela. Ngako hi txi lava kuvhunwa ko tsimbitisa txigondo txa Bhiblia ha tsaka ngutu ngako nyaphandule awu a ku ni wusikoti a txi ta hi vhuna ni ku hi ninga mawonelo o tsimbitisa sigondo. Vanathu vonevo va ti tsakela ngutu ku hi vhuna. Nanathu hi nga li mana litsako lonelo ngako hi txi tiha mbimo yo vhuna vamwani. Jesu a wombile: “Kuha i kateko ya hombe ngutu kupinda kuhiwa.” (Mith. 20:35) Ngako u txi lava ti to mthumo wako wo vhuna vamwani wu engeteleka, nji txani txi nga kuvhunako ti to u hokelela makungo onewo?

13. Ngako u txi lava ku ti vekela dikungo do kari ngu tihi ati u fanelako ku ti khumbula?

¹³ Ti nga maha awe u txi lava kuhokelela makungo o kari dibanzani. Kambe ti nga kukaratela kuhokelela makungo onewo ngako u si ti vekeli dikungo do kari ngu kukongoma. Ngu toneto sawula dikungo do kongoma i ku ti to u ziva to ngu tihi ati u lavako ku ti hokelela. U nga tshumela u bhala dikungo donedo ngu ku maha ngu bhala plano yo kombisa ti to u lava ku di hokelelisa kutxani.

14. Mbimo yi hi ti vekelako makungo ngu kutxani hi di fanete kukhumbula ti to txiemo txa txitxa?

¹⁴ Mbimo yi hi ti vekelako makungo hi fanete kukhumbula ti to txiemo txi nga txitxa. Ngu txikombiso, Mpostoli Paulo a vhunetile ko simeka dibanza da diphya khe Tesalonika. Ha ti  ziva ti to ene a ti ni makungo o simama kona kheya kasi kuvhuna Makristu ale a maphya. Kambe vakaneti va mahile ti to Paulo e khukha didhoropani mule. (Mith. 17:1-5, 10) I ti ku Paulo a to ko simama didhoropani mule ene a ti vekile haphangoni Makristu kulowe. Kambe ene ka rereka. Hahanze keto, ene a sikoti kutsimbitisana ni txiemo. Ngu kutsimbila ka mbimo ene a rumete Timoti ti to e ya khatalela vanathu va khe Tesalonika. (1 Vat. 3:1-3) Kha ti kana-kanisi ti to Vatesalonika va tsakile ngutu ngu kuziva ti to Timoti a di tiemisete ku ya vhuneta amu ku nga di ni txilaveko.

15. I ngu nzila muni makungo athu ma nga txitxako ngu kona ha ka kutxitxa ka siemo? Ningela txikombiso.

¹⁵ Hi nga gonda txani ka ti ti nga humelela Paulo khe Tesalonika? Ti nga maha hi txi lava kuhokelela malungelo o kari dibanzani, kambe hi nga thuka hi manana ni txiemo a atxi txi no hi maha hi si amukeli txiavelo txonetxo. (Ekl. 9:11) I di ti to ngu toneto ti ku humelelako, zama kulava makungo aya u nga ma hokelelako. Atiya ngu ti ti nga mahekela Ted ni msikati wakwe Hiedi. Ngu kona ha ka malwati ti lavile ve ema kuthuma Bhetele. Kambe ngu konaha ka lirando ali va nga ti nalo ngu Jehovha ti va vhunile ti to ve lava tinzila timwani to andisa mthumo wawe ka Jehovha. Vona va khatile ngu kuthuma kota vanyaphandule, ngu kutsimbila ka mbimo va sawutwe ti to ve ya va vanyaphandule vo sawuleka. Ni ku Ted a trenarilwe ti to e va muwoneleli wa txigava wo vhaleta. Ngu kutsimbila ka mbimo Ted a hokete ka tanga ayi a fanelako kuema kuthuma kota muwoneleli wa txigava. Vona va ti woni ti to va si na kusimama ka txiavelo txile. Hambiketo, kha va godhola, vona va tumbute ti to va nga simama ve thumela Jehovha ngu tinzila timwani. Ted a womba tiya: “Athu hi gondile ti to ku ni tinzila to tala to engetela mthumo wathu ka Jehovha.”

16. Hi nga gonda txani ka Vagalatiya 6:4?

¹⁶ Athu hi nge sikoti kukongomisa totshe ati ti humelelako ka wutomi wathu. Ngu toneto, ti ni lisima kukhumbula ti to Jehovha kha hi randi ngu konaha ka siavelo sathu. Ni kha ha fanela ku ti fananisa ni vamwani ava va ku ni siavelo asi hi si ngako naso. Hiedi a womba tiya: “Ngako u txi fananisa wutomi wako ni ti ti humelelako ka wutomi wa vamwani litsako lako li na guma.” (Lera Vagalatiya 6:4.) Ngu toneto nda lisima kuxola tinzila timwani to andisa mthumo wako ka Jehovha. *

17. U nga maha txani ti to u faneleka kuamukela siavelo so kari dibanzani?

¹⁷ Ti to hi amukela siavelo so kari dibanzani  hi fanete kuhehukukisa wutomi ni kwa mbi maha sikweneti ti si sungi. Ti vekele makungo a ma dotho aya ma no kuvhuna kuhokelela makungo a hombe. Ngu txikombiso ngako u txi lava kuva nyaphandule wa mbimo yotshe u nga ti vekela makungo o thuma kota nyaphandule wo vhuneta ngu mbimo yo kari. Ngako di kungo dako i di ku va dilanda da wuthumeli, u nga heta mbimo yo tala u txi txhumayela, u pfuxela ava vo lwala mwendo vo kumba va dibanzani kwanu. Ati u no ti gonda ka mithumo yoneyo ti na kuvhuna ti to u mana malungelo mbimo yi yi tako. Se tiemisele kumaha ti u ti kotako ka txiavelo tximwani ni tximwani.—Var. 12:11.

18. Nga ha ti nga kombiswa ngu kona ka mfota u gonda txani ka mwanathu Beverley?

¹⁸ Kukula ngu tanga kha ti hi vhaleli ti to hi ti vekela ni kuhokelela makungo a moya. Wona txikombiso txa mwanathu Beverley awu a ku ni 75 wa malembe, ene a ti ni malwati ma nga txi mu maha ti to ti mu karatela kutsimbila. Kambe ene a txi tilava ngutu kupateka ka ditima do ningela txirambo txa Txialakanyiso. Ene a ti vekele makungo o kongoma. Mbimo a nga sikota kuhokelela makungo o pateka ka ditima da Txialakanyiso ene a tsakile ngutu. Txikombiso txakwe txi susumetete vamwani ti to ni vona ve hiseka ka mthumo wo txhumayela. Jehovha wa ninga lisima mthumo awu wu mahwako ngu vanathu ava va nga kula ngu tanga, hambi ti txi woneka nga mthumo awu va wu mahako mbudotho.—Mas. 71:17, 18.

19. Ngu tihi ati ti nga hi vhunako ti to hi hokelela makungo a moya?

¹⁹ Tivekele makungo aya u no sikota ku ma hokelela. Sakulela tifanelo ati ti no kumaha u va wa lisima ka Jehovha. Gonda mithumo ayi yi no kuvhuna ti to u thumela Txizimu ni sengeletano ya txona. Xota tinzila to thumela vanathu. * Kufana ni Timoti, Jehovha a na kukatekisa ti to “kukula kwako ka mithumo ya yinene ku . . . ti komba ka votshe.”—1 Tim. 4:15.