HI NGA fananisa kuvilela ni mrwalo wo nemela mbiluni kwathu. (Mav. 12:25) Ina u khala kumanana ni sikarato asi si nga kumaha u vilela ngutu u si tizivi ti to u na maha txani? I di toneto, khu nga wekha, ti nga maha wungi wathu hi txi khala kukhatalela dixaka dathu adi di nga lwala ngu mbimo yo lapha. Mwendo kuva hi di wonisanile ni tiphango ta mtumbuluko, hambi kufelwa ngu dixaka. Se ngu txihi atxi txi nga hi vhunako ti to hi wonisana ni kuvilela koneko? *

Hi nga gonda to tala mayelano ni kuwonisana ni kuvilela ngu kuxolisisa txikombiso txa Dhavhidha. Ene a wonisanile ni sikarato so tala ka wutomi wakwe, mbimo yimwani a ti lava ni kudawa. (1 Sam. 17:34, 35; 18:10, 11) Ngu tihi ti nga vhuna Dhavhidha ti to e wonisana ni kuvilela? Hi nga mu tekelelisa kutxani?

Dhavhidha a txi wonisana ni kuvilela ko tala ngu mbimo ya yimweyo. He wone ngu txikombiso ati ti nga maheka mbimo a nga ti tutuma Sawule awu a nga txi lava ku mu daya. Mbimo yi ene ni masotxhwa akwe va nga wuya ngu yimbini va di ta mana ti to valala va di handile silo sawe, ve hisetela tinyumba tawe, ve teka ni timwaya tawe. Dhavhidha a ti pfisisile kutxani? Bhiblia yi womba tiya: “Dhavhidha ni vathu vale a nga ti navo va to peketela tihuwa ve dila, kala kuza ve guma mtamo wo dila.” Kupandiseka ka Dhavhidha kha ka gwitela eho, vavamna ava a nga ti va themba va txi lava ku “m’balisela ngu marigwi.” (1 Sam. 30:1-6) Se Dhavhidha ti txi lava e wonisana ni sikarato siraru ngu mbimo ya yimweyo. Mwaya wakwe wu ti haphangoni, ene a txi thava e pimisa ti to vavamna vale va ndi na mu daya ni ku Mkoma Sawule nene a txi mu xota kasi ku mu daya. Ina wa alakanya nzila yi Dhavhidha a nga tipfa ngu yona?

Ngu tihi ati Dhavhidha a nga gwita e ti maha? Ene ngu txikuluveta a to “tsana ka Mkoma, Txizimu txakwe.” A ti mahisile kutxani toneto? Ene a to maha mkombelo ka Jehovha e kombela txivhuno, ni kualakanyisisa ngu nzila ayi Jehovha a nga mu vhuna ka mbimo ayi yi nga pinda. (1 Sam. 17:37; Mas. 18:2, 6) Dhavhidha a tshumete e wona ti to a ti fanete kulava mkongomiso ka Jehovha. Msana kova Dhavhidha a ti amukete mkongomiso wa Jehovha, ene a to maha ati a nga gelwa. Kota wuyelo, Jehovha a va katekisile ngu ku va vhuna ti to ve ya khulula timwaya tawe ni ku teka silo sawe si si nga di handilwe. (1 Sam. 30:7-9, 18, 19) U ti woni timhaka tiraru ati Dhavhidha a nga ti maha? Ene a mahile mkombelo e lava txivhuno, e alakanyisisa ngu nzila Jehovha a nga mu vhuna ngu yona ka mbimo ayi yi nga pinda ni kutshumela e londisa mkongomiso awu a nga ningwa ngu Jehovha. Athu hi nga mu etetelisa kutxani Dhavhidha, he wone tinzila tiraru.

1. Mkombelo. Yotshe mbimo yi u tipfako u txi karateka, kombela Jehovha ti to e ku ninga txivhuno ni wutxhari. Ngako hi txi maha mkombelo ka Jehovha, hi mu gela ati ti hi karatako ti na hi vhuna ku hi rula mrwalo. U nga maha mkombelo wo koma ngako txiemo txi u ku ka txona txi txi kutumelela kumaha toneto dwe. Ngako mbimo yotshe hi txi maha mkombelo hi na va hi txi etetela Dhavhidha awu a nga khene: “Mkoma, dirigwi dangu, ni mkhokhola wangu wo tsana, kambe mtxhatxhisi wangu; Txizimu txangu mkhokhola wangu, mbuthavelo wu ni thembako wona.” (Mas.  18:2) Ina ngu ditshuri mkombelo wu nga hi vhuna? Nyaphandule mmwani a dhanwako ku i Kahlia a womba tiya: “Msana kova ni di mahile mkombelo ni pfa kudikha, mkombelo wa ni vhuna ti to ni va ni mawonelo o fana ni a Jehovha. Ni ku ti ni vhuna ku ni m’themba ngutu.” Ngu ditshuri, mkombelo malulamiselo a Jehovha aya ma hi vhunako ti to hi wonisana ni kuvilela.

2. Kualakanyisisa ngu makhambi ya Jehovha a nga kuvhuna. Ngako u txi alakanyisisa ngu sotshe sikarato asi u nga manana naso ka wutomi wako. Ina wa yi wona nzila yi Jehovha a nga kuvhuna ngu yona? Ngako u txi alakanyisisa ngu nzila ayi Jehovha a hi vhunako ngu yona nyamsi ni nzila yi a nga vhuna ngu yona malanda akwe a kale, ti na hi ninga mtamo ni ku hi na m’themba ngutu. (Mas. 18:17-19) Didhota dimwani di dhanwako ku i Joshua di womba tiya: “Ani ni ni lista ya mikombelo ayi Jehovha a nga xamula. Atiya ti ni vhuna ku ni khumbula sotshe sikhati asi ni nga kombela to kari ka Jehovha ngu kukongoma e tshumela e ni xamula.” Ina, ngako hi txi alakanyisisa ngu nzila ayi Jehovha a nga hi vhuna ngu yona ti na hi ninga mtamo ni ku hi na sikota kuwonisana ni kuvilela.

3. Kulondisa mkongomiso. Na u si se maha txisungo ka txiemo txo kari u ku ka txona, kombela mkongomiso ka Jehovha awu hi nga wu manako amu ka Bhiblia. (Mas. 19:7, 11) Vo tala va woni ti to ngako va txi xolisisa m’bhalo wa kari, ta va vhuna ti to ve wu pfisisa kha kwati ni nzila ayi va nga wu thumisako ngu yona ka wutomi wawe. Didhota dimwani di dhanwako ku i Jarrod di womba tiya: “Ngako ni txi maha wuxolisisi ti ni vhuna ku ni wona nzila ayi m’bhalo wo kari ni nga wu thumisako ngu yona. Ni kutshumela ni pfisisa ati Jehovha a ni gelako. Eto ti vhuna ti to ni pfisisa kwati ati ni ti gondako ni kulondisa mkongomiso awu Jehovha ani ningako ngu kuthumisa Bhiblia.” Ngako hi txi lava mkongomiso wa Jehovha ni kutshumela hi wu londisa ti na hi vhuna ti to hi wonisana kwati ni kuvilela.

Dhavhidha a txi tipfisisa ti to kasi ku e wonisana ni kuvilela a ti fanete e kombela txivhuno ka Jehovha. Ene a bongile ngutu txivhuno a txi Jehovha a nga mu ninga aha ko za e womba tiya: “Ngu mhaka ya mtamo wako ni na ndaka tibhiyo. Txizimu ngu txona txi ni mahako wa mtamo.” Mbimo yimwani hi nga wona sikarato sathu i di sa hombe ngutu, kambe ngu kuvhunwa ngu Jehovha hi nga sikota ku si xula sikarato soneso. Ngako hi txi maha mkombelo ka Jehovha hi kombela txivhuno, hi alakanyisisa ngu totshe ti Jehovha a nga hi mahela ni kulondisa mkongomiso wakwe hi nga tsaniseka ti to ene a na hi ninga mtamo awu hi wu lavako ti to hi wonisana ni kuvilela!