“Tifakazi ti txi kombisa wunene hambi ni ka timbwa tangu. Ditshiku dimwani Elaine, mmweyo wa va nga di ka txikarinyana a ningile mabhiskotu ka siwana sangu sa simbidi. Khukhela dona ditshiku edo, ni txi nga za hi pinda ngu hale, siwana sangu si txi lava kutshuketa kasi ku si ya mana mabhiskotu.

“Kupindile mitxhima ni mitxhima, hi txi pinda ngu hale ka sikarinyana ni txi bhulanyana navo ni siwana si txi ningwa mabhiskotu. Kambe ni si lavi wuxaka navo. Ni ti ni ma 70 wa malembe mbimo yoneyo, kambe ni si ti zivi kwati Tifakazi ta Jehovha. Ati ti nga ti mahwa ngu titxhetxhe to tala ti ni hetile mtamo, se ni sungile kugonda Bhiblia ni pune.

“Ka mbimo yoneyo, ni txi wona Tifakazi timwani ka madhoropa mamwani ti txi txhumayela ngu sikarinyana. Ni vona i ti vathu va vanene. Vona va ti bhisi va txi gondisa vathu ngu ta Bhiblia se ngu toneto ni khatile ku va themba.

“Ditshiku dimwani Elaine a ni wotisile tiya: ‘Ina wa kholwa ti to sihari sihiwa si hi nga ningwa ngu Txizimu? ’ Ni to xamula ni txi, ‘Ina na kholwa.’ Se Elaine a ni kombile Isaya 11:6-9. Khukhela koneho ni lavile kugonda to tala ngu Bhiblia, hambiketo ni si si kutxhatxheka ti to ni nga teka mabhuku.’

“Ka masiku ya ma nga londisela ni ti va ni mabhulo ni Elaine kumweko ni mwamna wakwe Brent, mayelano ni Bhiblia. Vona va ni kombete ti to ni ya lera dibhuku da Matewu kala ka dibhuku da Mithumo, kasi kuziva ti to ti womba txani kuva Mkristu. Se ani ni mahile toneto. Kha ta swela, ni khatile kugonda Bhiblia ni Brent ni msikati wakwe Elaine. Eto ti vile ngu hagari ka dilembe da 2016.

“Ni txi yi tsakela ngutu gondo yangu ya Bhiblia ayi hi nga txi maha divhiki ni divhiki kumweko ni ku ya mitshanganoni. Ni ti woni i di makatekwa kugonda ati Bhiblia yi ti wombako. Ku di pindile dilembe ni bhabhatisilwe. Konkuwa ni ni 79 wa malembe, ani na ti ziva ti to ni ka nzila ya ditshuri. Jehovha a ni katekisile ngu ku ni ndindela ka sengeletano yakwe.”