1. Ngu tihi ati ti ningako ngutu litsako?

 JEHOVHA a lava ti to hi tsaka, toneto hi tiziva nguko litsako wumwewo wa mihando ya moya wo sawuleka. (Vag. 5:22) Aku kuha i kateko ngutu kupinda kuhiwa, ha tsaka ngutu ngako hi txi ti ningetela ka mithumo ya Mfumo ni kuvhuna vamwani ngu tinzila to hambana-hambana.—Mith. 20:35.

2-3. a) Nga ha ti nga kombiswa ngu kona ka Vagalatiya 6:4, ngu tihi tinzila ta timbidi ati ti nga hi vhunako ti to hi simama hi va ni litsako ka mthumo wa Jehovha? b) Hi na bhula ngu txani ka gondo yiya?

² Nga ha ti nga kombiswa ku kona ka Vagalatiya 6:4, mpostoli Paulo a womba tinzila timbidi ati ti nga hi vhunako ti to hi simama hi va ni litsako. (Yi Lere.) Yo khata, txikongomelo txathu txi fanete txi va txo hi ninga Jehovha totshe ti hi nga ti kotako. Ngako hi txi maha toneto hi na mana litsako. (Mat. 22:36-38) Ya wumbidi, hi fanete kuvayilela ku ti fananisa ni vamwani. Hi fanete kubonga Jehovha ngu totshe ti hi ti kotako kumaha, ngu konaha ka dihanyo da dinene di hi ku nado, trenamento ni wusikoti wathu. Phela totshe ti hi ku nato ti ta ngu kwakwe. Kambe, ngako vamwani va di ni wusikoti wo kari ka mithumo yimwani ya Mfumo hi fanete kutsaka navo. Nguko vona va thumisa wusikoti wawe kasi kudhumisa Jehovha, i si nga kutigela mwendo kutiguleta ngu wona.

³ Ka gondo yiya hi na wona ti to hi nga maha txani ngako hi txi wona nga kha hi sikoti kumaha nga ha hi nga txi lava ngu kona. Hi na tshumela hi wona to hi nga ti thumisisa kutxani tiningo ti hi nga vako hi di nato ni kugonda ka sikombiso sa vamwani.

4. Ngu tihi ti nga mahako vamwani ve godhola? Ningela txikombiso.

⁴ Malanda mamwani a Jehovha ta ma karatela kutumela ti to hi nga totshe va nga ti mahako ngu konaha ka kukula ngu tanga  mwendo malwati. Atiya ngu ti ti humelelako ni mwanathu Carol, ene a vile ni lungelo yo thuma amu ku ni ni txilaveko. Ka mbimo yoneyo, ene a vile ni lungelo yo tsimbitisa 35 wa sigondo sa Bhiblia ni kuvhuna vamwani ve hokelela ko tiningetela ni kubhabhatiswa. Carol a txi humelela ngutu ka mthumo wakwe wo txhumayela. Ngu kutsimbila ka mbimo ene a beletwe ngu malwati aya ma mmahako ti to mbimo yo lapha e zumbela mtini. Ene a womba tiya: “Ani na tiziva ti to ngu konaha ka malwati kha ni na kusikota kumaha nga ha vamwani va mahako ngu kona. Eto ti ni maha ni tipfa ni sa thembeka ngutu kufana ni vamwani. Ani kha ni sikoti kumaha totshe ti ni ti lavako kumaha. Se eto ta ni maha ni godhola.” Carol a lava kumaha totshe ati a nga ti kotako ka Jehovha. Eto ta bongeka ngutu. Hi nga tsaniseka ti to Txizimu txathu txa wuxinji txa wu tsakela moya wonewo.

5. a) Ngu tihi ati hi fanelako ku ti khumbula ngako hi txi godhola ngu kuva hi si hokeleli ati hi ti lavako. b) Nga ha ti kombiswako ngu kona ka mfota, mwanathu wule a kombisisa kutxani ti to a maha totshe ti a nga ti kotako ka mthumo wa Jehovha?

⁵ Ngako mbimo yimwani u txi godhola ngako u si tikoti kuhokelela to kari ka mthumo wako, ti wotise tiya: ‘Ngu tihi a ti Jehovha a ti kombelako kwangu.’ Ene a kombela ti to u maha ati u nga ti kotako kona kuwa. Alakanyisisa ngu tiya. Mwanathu mmwani aku ni kona mu ka 80 wa malembe a godhola ngu kupimisa ti to ene kha swi e maha to tala nga ha a nga txi maha ngu kona mbimo yi a nga ti ma 40 wa malembe. Ene a pimisa ti to hambi ku a mahako totshe ti a nga tikotako konakuwa kha ti eneli para kutsakisa Jehovha. Ina toneto ditshuri? Ahim-him, nguko aku mbimo yi a nga ti ni ma 40 wa malembe a nga txi maha totshe ti a nga txi ti kota, ni konkuwa wa simama e maha totshe ati kotako hambi ku a ku ka ma 80 wa malembe. Se hi nga khathu kha ema kuthumela Jehovha nga ha a ti kotako ngu kona. Se ngako hi txi tipfa nga kha hi mahi totshe ti hi nga tikotako ti to hi tsakisa Jehovha, hi fanete kukhumbula ti to Jehovha ngene a tizivako ati ti mu tsakisako i si nga athu. Se ngako hi txi maha totshe ti hi nga ti kotako, Jehovha a na hi gela tiya: “Ngu tona!”—Fananisa ni Matewu 25:20-23.

6. Hi gonda txani ka txikombiso txa Maria?

⁶ Ti na hi hehukela kumana litsako ngako hi txi veka mapimo ka ti hi ti kotako ku ti hokelela i si nga ka ti hi si ti kotiko. Wona txikombiso txa mwanathu Maria awu aku ni malwati aya ma mahako ti to asi mahi to tala ka mthumo wa Jehovha. Makhatoni a ti ni txitrese ni ku a txi ti wona a si vhuni txilo. Kambe mbimo yi a nga ziva mwanathu dibanzani awu a si humiko mtini ngu konaha ka malwati, Maria a tekile dizambo do mu vhuna. Ene a womba tiya: “Ni mahile programa yo txhumayela nayo ngu kuthumisa fone ni kubhala mapasi.” Ene a tshumela e womba tiya: “Yotshe mbimo ayi ni nga txi thuma nayo ni txi wuya mtini ni di tsakile ngu kuziva ti to ni mahile txo kari kasi kuvhuna mwanathu.” Nanathu hi nga engetela litsako ngu kuveka mapimo ka ti hi ti kotako kumaha i si nga ti hi ti tandako. Se hi maha txani ngako hi di ni wusikoti ni ngako hi txi humelela ka mithumo yo kari ya Mfumo.

7. Ngu txihi txialakanyiso a txi Pedro a nga ninga Makristu kulowe?

⁷ Ka dipapilo dakwe do khata, mpostoli Pedro a kuzetile Makristu kulowe ti to me thumisa tiningo ti ma nga ti nato ni wusikoti wawe ti to ve aka vanawe. Mpostoli Pedro a bhate tiya: “Kota vaxayisi vavanene va tikateko ta Txizimu, mmwani ni mmwani kwanu a na vhune vakwawe ngu txiningo txi a nga hiwa.” (1 Pedro 4:10) Kha fanela kuleka kuthumisa tiningo tathu ngu kupimisa ti to ti nga maha vanathu vamwani ve hi bavela mwendo ku ve godhola. Nguko, ngako hi si thumisi tiningo ti hi ku nato  hi na mbi va hi txi ninga Jehovha nga ha hi ti kotako ngu kona.

8. Ngu kuya ngu dibhuku da 1 Vakorinto 4:6, 7 ngu kutxani hi di fanete kuvayilela kugwira ngu tiningo ati hi ku nato?

⁸ Athu hi fanete kuthumisa tiningo tathu nga ha hi nga kotako ngu kona, kambe hi fanete kutiwonela ti to hi si gwiri ngu tona. (Lera 1 Vakorinto 4:6, 7.) Ngu txikombiso, ti nga maha u di ningo yo khata sigondo sa Bhiblia. Awe khwa fanela kuleka kuthumisa ningo yoneyo, kambe ku ni kuhambana ka kuthumisa ningo ngu nzila ya yinene ni kugwira ngu yona. A hi nge awe u mani experiyensia kutxhumayelani ahawa u nga khata gondo ya Bhiblia. Se awe u nga tsakela kubhulela vanathu va grupu yanu. Mbimo yi mi tshanganako ni vanathu ka grupu yanu, u ya mana ti to ku ni mwanathu awu a bhulako ngu experiyensia a nga manana nayo mbimo yi a nga ningela direvhista. Ene a vile ni experiyensia ko ningela direvhista kuveti awe u vile nayo ko khata gondo ya Bhiblia. Se u na maha txani? Awe wa tiziva ti to vanathu va na tsaniswa ngutu ngu experiyensia yako, kambe ti nga maha u rinzela kala mbimo yimwani ti to u ta kontarela experiyensia yoneyo, kasi ku ti si woneki nga ayi yako ngu yona yo tsakisa ngutu se u wila litsako la mwanathu wule. U txi maha toneto u na va u txi kombisa wunene. Hambiketo u nga leke kuthumisa ningo ayi u ku nayo.

9. Hi nga ti thumisisa kutxani tiningo tathu?

⁹ Hi fanete kukhumbula ti to wotshe wusikoti wa mavelekwa awu hi ku nawo wu ta ngu ka Jehovha. Se hi fanete kuthumisa tiningo toneto kasi kuaka ngu tona dibanza i si nga kutiguleta. (Vaf. 2:3) Ngako hi txi thumisa mtamo wathu ni wusikoti ti to hi dhumisa Txizimu hi na mana txivangelo txo hi tsaka, i si nga kulava kupala vamwani mwendo kulava kukombisa ti to hi va tshuku ku va pinda. Hi lava kuthumisa tiningo tathu ti to hi dhumisa Jehovha.

10. Ngu kutxani i si ngako tatinene ku ti dinganisa ni vamwani?

¹⁰ Ngako hi si ti woneli hi nga wela ka mlawo wo fananisa wusikoti wu hi ku nawo ni vale va si ngako nawo. Ngu txikombiso ti nga maha mwanathu a ti ni ningo yo veka kwati miwomba-wombo se mbiluni kwakwe ti nga maha e tekela hahatshi mwanathu wule a si ngako ni ningo yo veka kwati miwomba-wombo. Kambe ti nga maha mwanathu eneyo asi ngako ni ningo yoneyo ati ni tiningo timwani to fana ni ku va ni wuha, kugondisa kwati vanana vakwe ni kuhiseka ka mthumo wo txhumayela. I kateko ya hombe ngutu ku va ni vanathu vo tala ava va ku ni tiningo to tala ati va ti thumisako ti to ve thumela Jehovha!

11. Ngu kutxani hi di fanete kulondisa txikombiso txa Jesu?

¹¹ Hambiku hi fanelako kuvayilela ku ti fananisa ni vamwani, hi nga gonda ka sikombiso sa vamwani. A hi nga wona txikombiso txa Jesu, hambi ku a nga di hetisekile athu hi nga sikota kugonda ka txikombiso txakwe txo tshura ni ka ti a nga ti maha. (1 Pedro 2:21) Ngako hi txi maha totshe ti hi nga ti kotako ti to hi londisa txikombiso txakwe, hi na va malanda a Jehovha a manene ni ku hi na maha kwati mthumo wathu.

12-13. Hi nga gonda txani ka Mkoma Dhavhidha?

¹² Amu ka Bhiblia hi nga mana sikombiso so tala sa malanda a Jehovha aya hambiku ma nga sa hetiseka i ku sikombiso kwathu. (Vaheb. 6:12) Alakanya ngu Mkoma Dhavhidha, Jehovha a mu dhane ku i ti wo ‘randeka ka mbilu yakwe.’ (Mith. 13:22) Dhavhidha a sa hetiseka, ngu toneto a mahile tiphazamo to tala, hambiketo ene txikombiso txa txinene kwathu. Ngu kutxani? Nguko mbimo yi a nga kawukwa kha lava ku tiemelela. Hahanze keto ene a tumete txivhuno atxi a nga ningwa e tshumela a ti sola ka sionho sakwe. Ku vile yihi wuyelo? Jehovha a mu divalete.—Mas. 51:3, 4, 10-12.

¹³ Hi nga gonda to tala ka txikombiso txa Dhavhidha ngu ku ti wotisa tiya: ‘Ngu tihi ni mahako mbimo yi ni ningwako txivhuno? Ina na kuluveta ni tumela tiphazamo ta mina mwendo ni tutumela kutiemelela? Ina ni tutumela kulumbeta vamwani mwendo ni zama kwa mbi tshumela ni phinda tiphazamo toneto ta timweto?’ U nga ti maha siwotiso si si fanako mbimo yi u gondako ngu sikombiso simwani a mu ka Bhiblia. Ina malanda onewo a Jehovha ma mananile ni sikarato so fana ni sako? Ngu tihi tifanelo ta tinene ati va nga ti kombisa mbimo yi va nga manana ni sikarato? Ka sikombiso si u nga gonda ngu sona, ngu tihi u nga tsakelako ku ti tekelela?

14. Ngu yihi wuyelo hi no yi mana ngu kutekelela sikombiso sa sinene sa vamwani?

¹⁴ Hi nga wuyelwa ngutu ngu kugonda ka sikombiso sa vanathu va totshe titanga. Ngu txikombiso, ina u nga pimisa ngu mwanathu wo kari dibanzani kwako awu a tsaniselako sikarato ngu kuthembeka? Ti nga maha a txi wonisana ni mkuzetelo wa walo, kukanetwa ngu maxaka mwendo malwati. Ina ku ni tifanelo ta tinene ati u nga ti tekelelako ka mwanathu eneyo? Ngako u txi gonda ka txikombiso txakwe u na wona tinzila ti ti no kuvhuna ka sikarato sako. I kateko ya hombe ngutu ku va ni vanathu ava i ku sikombiso sa sinene sa likholo asi hi nga si  tekelelako. Kutekelela sikombiso soneso, ngu ditshuri ti na hi ninga litsako!—Vaheb. 13:7; Jak. 1:2, 3.

15. Ngu txihi txialakanyiso atxi mpostoli Paulo a nga ninga Makristu kulowe atxi txi nga hi vhunako ti to hi simama ni litsako?

¹⁵ Mmwani ni mmwani wathu a fanete kumaha totshe ti a nga ti kotako ti to ku va ni kudikha dibanzani. He wone txikombiso txa Makristu o khata. Ona ma di ni tiningo ni siavelo so hambana-hambana. (1 Vak. 12:4, 7-11) Kambe ona ma si thumisi tiningo toneto kasi kupalisana ngu tona. Hahanze keto, Paulo a kuzetile Makristu ti to me thumisa tiningo toneto amu ti fanelako kuthumiswa kona i ku ‘kuaka mmidi wa Kristu.’ Paulo a tshumete e bhalela Vaefesu atiya: “Ngako txihango txihi ni txihi txi txi maha mthumo wa txona ngu fanelo, mmidi wotshe wa kula, wu txi ti aka ngu lirando.” (Vaef. 4:1-3, 11, 12, 16) Ava va nga engisa txialakanyiso txa Paulo, va ti karatile ti to ku va ni kudikha ni wumwewo dibanzani i ku tifanelo ati hi ti wonako ka mabanza a Wukristu nyamsi.

16. Ngu tihi ati hi fanelako kutiemisela kumaha? (Vahebheru 6:10)

¹⁶ Tiemisele kwa mbi ti dinganisela ni vamwani, hahanze keto gonda ka txikombiso txa Jesu ni kutshumela u etetela txikombiso txakwe. U nga tshumela u gonda ka sikombiso simwani sa Bhiblia ni simwani sa ngweno. Mbimo yi u simamako u maha mthumo wako ka Jehovha khumbula ti to ‘Txizimu kha txi nga ni tshofu. Kha txi na kudivala mthumo wako.’ (Lera Vahebheru 6:10.) Simama u mana litsako ngu kuthumela Jehovha, u tsaniseka ti to ene wa ninga lisima totshe ti u ti mahako ti to u mu tsakisa.