Txixambanyo ngu thembisa ti to u na hetisisa to kari u nga ti womba. Ngu mtolovelo txixambanyo txi fakazwa ngu Txizimu, txona txi nga va ngu mapswi mwendo kumaha ngu kubhalwa.

Se vamwani va nga pimisa ti to ti bihile kumaha txixambanyo ngu ku Jesu a nga womba tiya: “U nga xambanye ni ka kudotho . . . Kambe ku womba-wombani kwanu, ‘Inna’, a na ve i di ‘Inna’, ‘Ahim-him’ a na ve i di ‘Ahim-him’; totshe ti ti engetelwako ka tiya, ti huma ngu ka M’bihi.” (Mat. 5:33-37) Jesu a txi ti ziva ti to mlayo wa Mosi wu txi kombela ti to ve maha sixambanyo ni ku va ti maha toneto. (Gen. 14:22, 23; Eks. 22:10, 11) Ene a txi tiziva ti to Jehovha apune wa maha sixambanyo. (Vaheb. 6:13-17) Se Jesu a si lavi kuwomba ti to kha ha fanela kumaha sixambanyo. Kambe ene a txo hi txharihisa ti to hi si mahi nyamxambanye. Hi fanete kuteka kumaha txixambanyo i ti timhaka to sawuleka, nguko hi fanete kumaha ati hi ti wombako.

Se u nga maha txani ngako va txi ku kukombela kumaha txixambanyo? Kukhata tsaniseka ti to u na maha ti u no ti xambanya. Ngako u si tsaniseki ti nga va tshuku kwa mbi maha txixambanyo. Dipswi da Txizimu da hi txharihisa di txi kha dona: “I txhuku kwa mbi xambanya, kupinda kuxambanya u si gwiti u maha.” (Ekl. 5:5) Ngu msana xolisisa matshina a milayo a Bhiblia a ya ma yelanako ni txixambanyo, u gwita u thumisa livhalo lako ali li nga trenarwa ngu Bhiblia kasi kumaha txisungo txa ti to u na xambanya mwendo nem. Ngu yahi matshina a kona?

Sixambanyo simwani si tsimbitisana ni kudhunda ka Txizimu. Ngu txikombiso, Tifakazi ta Jehovha ta sinara mbimo yi ti txhadhako, kusinara koneko kuva txixambanyo. Ava va tekanako va fakaza masoni ka Jehovha ti to va na randana, ve khatalelana, ve xoniphana kala ku za ve hambaniswa ngu lifo. Mipatwa yimwani kha yi wombi mapswi o fana ni yawa, hambiketo va xambanya masoni ka Txizimu. Ngu msana se vona ve va mwamna ni msikati, ni ku va fanete kuhanya votshe kala ku za ve hambaniswa ngu lifo. (Gen. 2:24; 1 Vak. 7:39) Kumaha txixambanyo txa mtxhadho ta fanela nguko ti yelana ni kudhunda ka Txizimu.

Sixambanyo simwani sa lwisana ni kudhunda ka Txizimu. Mkristu wa ditshuri kha fanela kumaha txixambanyo kasi kulwela ditiko mwendo kulandula likholo lakwe ka Txizimu. Nguko a txi maha toneto a na va a txi ndaka milayo ya Txizimu. Makristu kha ma lumbi “ditiko” ngu toneto kha ma ti beteli ka kulwisana ka ditiko.—Joh. 15:19; Isaya 2:4; Jak. 1:27.

Simwani sixambanyo si ya ngu livhalo la m’thu. Mbimo yimwani ti nga lava hi xolisisa txixambanyo txo kari ngu kuya ngu ti Jesu a nga womba  to khene “Tshumetelani ka Khezari asi i ku sa Khezari, ni ka Txizimu asi i ku sa Txizimu.”—Luka 20:25.

Ngu txikombiso, a hi nge Mkristu o maha pasaporte, ka kumaha pasaporte yoneyo ti na lava e maha txixambanyo. I di ti to txixambanyo txonetxo txi pata kumaha to kari ati ti lwisanako ni kudhunda ka Txizimu, livhalo lakwe ali li nga trenarwa ngu Bhiblia li na mbi tumelela kumaha txixambanyo. Se mfumo wu nga txitxa mapswi ti to livhalo lakwe li mu tumelela kumaha txixambanyo txonetxo.

Kumaha txixambanyo a txi txi nga txitxwa mapswi a kona ti na va ti txi yelana ni ditshina da mlayo adi di ku ka Varoma 13:1 adi di ku: “M’thu ni m’thu a na engise wukoma.” Se Mkristu a nga wona ti to kha ta biha kumaha txixambanyo a txi txi nga txitxwa mapswi, ngu kumaha toneto hi na va hi txi maha ati Txizimu txi rumako tona.

Hi fanete hi thumisa livhalo lathu ngako hi txi kombelwa kumaha jesto yo kari, yo fana ni ku guleta diwoko ti to hi maha txixambanyo. Varoma ni va Kita va txi xambanya ngu ku guleta mawoko awe ve xambanyela txizimu txa tiyimbi kasi ku tsanisekisa kuthembeka ka ti va ti wombako. Vagriki ni vona va txi guleta diwoko ve kombisa nzumani mbimo yi va nga txi maha txixambanyo. Vona va txi kholwa ti to ku ni txizimu atxi txi wonako ti va nga ti womba ni ku ati va ti mahako va na ti xamulela ngu tona.

Ditshuri ti to dilanda da Jehovha kha di na kumaha txixambanyo ka maemblema o fana ni mabhandera ni simwani si yelanako ni wukhozeli wa makuhu. Hani ngako u txo kombelwa Tribhunali ti to u sanzeka diwoko dako ka Bhiblia ti to u xambanya ti to u na womba ditshuri? Ka txiemo txonetxo, awe u nga sawula kumaha txixambanyo txonetxo, nguko amu ka Bhiblia ka wombwa ngu vathu ava va nga maha txixambanyo ngu kuthumisa majesto aya ma nga tumelelwa ngu Txizimu. (Gen. 24:2, 3, 9; 47:29-31) Ti ni lisima kukhumbula ti to kumaha txixambanyo txonetxo u na u txi thembisa Txizimu ti to u na womba dotshe ditshuri. Ngu toneto u fanete kutiemisela kuwomba dotshe ditshuri ka siwotiso asi va no kumaha.

Aku hi ningako lisima wuxaka wathu ni Jehovha hi fanete kumaha mkombelo na hi si si kumaha txixambanyo tximwani ni tximwani, kasi kutsaniseka ti to ti na mbi lwisana ni livhalo lathu mwendo matshina a milayo a Bhiblia. Ngako u txi sunga kumaha txixambanyo u fanete kutsaniseka ti to u na txi hetisisa.—1 Pedro 2:12.