Ka txiemo txonetxo vanathu va nga wona mtxhadho wule wo khata wu di gumile ngako wamwamna a txi tshumela e txhadha, ni ku va na wona mtxhadho wonewo wa wuphya wu di ha mlayoni ngu kuya ngu wukoma. Ti to hi pfisisa kwati mhaka yiya, he wone a ti Jesu a nga womba mayelano ni mhaka yiya.

Ngu kuya ngu dibhuku da Matewu 19:9, Jesu a wombile txivangelo tximwetxo dwe txi nga seketelwa amu ka mibhalo txo maha dhivhorsio. Ene a wombile tiya: “Awule a tovelako msikati wakwe, hahanze ka kuva a sa tekana nayo ngu mlayo, ngu msana a txi teka mmwani, a maha txionho txa wugango.” Ngu kuya ngu mapswi a Jesu hi gonda ti to 1) wugango ngu txona txivangelo txa tximwetxo dwe txi nga seketelwa amu ka Bhiblia txo m’thu e maha dhivhorsio ni ku 2) hi gonda ti to wamwamna awu a mahako dhivhorsio i si nga ngu txivangelo txo seketelwa amu ka Bhiblia a maha wugango. *

Ina Jesu a txi lava kuwomba ti to ngako wamwamna a txi maha wugango e tshumela e dhivhorsiyara msikati wakwe, ina Bhiblia yi nga mu tumelela ti to e tshumela e txhadha? Ti na ya ngu wamsikati wule a nga gohelwa, ngako a si mu divaleli a nga maha dhivhorsio ngu msana mmwani ni mmwani ngako a txi ti lava a nga tshumela e txhadha ni mmwani.

Kambe ti nga maha awule wamsikati a nga gohelwa a txi lava ti to mtxhadho wu simama ngu kusawula kudivalela mwamna wakwe. Se hani ngako awu wamwamna awu a nga maha wugango a txi lamba e xota tinzila to maha dhivhorsio a sa pfana ni msikati wakwe ko? Aku msikati wakwe a nga tiemisela ku mu divalela Bhiblia kha yi mu tumeleli ti to e ya txhadha mmwani wamsikati. Ngako a txi sinzisa e ya txhadha mmwani wa msikati a na va txi maha wugango da wumbidi a ti ti no mu maha ti to e tshumela e ya ka komisawu ya wulamuli.—1 Vak. 5:1, 2; 6:9, 10.

Vanathu va wu wonisa kutxani mtxhadho awu wa kale wu nga dhivhorsiyarwa wu sa seketelwa amu ka Bhiblia ni ku va wonisa kutxani awu wa wuphya? Ina va nga txi tekwa kota mwamna ni msikati avale va mtxhadho wule wu nga mbi seketelwa amu ka Bhiblia? Ina wu a nga gohelwa a ngadi ni mkhanjo wo divalela mwendo kwa mbi divalela mwamna wakwe wule a nga mu gohela? Ina mtxhadho awu wa wuphya wu wonwa kota wugango?

Mapfisiselo athu a kale i di a ti to mtxhadho awu wa wuphya wu txi tekwa kota wugango ngako awu a nga gohelwa a txi ngadi a txi hanya, a sa txhadha ni ku a sa maha wugango. Kambe Jesu kha womba-womba ngu wule a nga gohelwa mbimo yi a womba ngu dhivhorsio ni kutshumela u txhadha. Hahanze keto ene a txhamusete ti to wamwamna awu a mahako dhivhorsio ti sa seketelwa amu ka Bhiblia e tshumela e txhadha a maha wugango.

 Ka txiemo txonetxo, ngako wamwamna eneyo a txo maha dhivhorsio e tshumela e txhadha, mtxhadho wule wo khata kha wu kontwi kambe. Ngako wamwamna a txi maha dhivhorsio e txhadha ni mmwani wamsikati kha ku na mkhanjo wa ti to awule a nga gohelwa e divalela mwendo kwa mbi divalela. Ngu toneto, ene kha na mbi karateka ngu kupimisa ti to wa mu divalela mwendo kha na mbi mu divalela. I singeto dwe, vanathu va na mbi wona mtxhadho wule wa wuphya ngu kuya ngu ti to awule wamsikati a nga gohelwa wa hanya, a tshumete e txhadha, a mahile wugango mwendo nem. *

Ka txikombiso txi hi nga bhula ngu txona awu wamwamna a mahile wugango ati ti nga maha ti to e maha dhivhorsio. Se hani ngako awu wamwamna a sa maha wugango kambe e maha dhivhorsio e tshumela e txhadha? Hani ngako kambe, awule wamwamna a txi maha dhivhorsio i si nga kuva a di mahile wugango, kambe e ya maha wugango msana ka kuva a di mahile dhivhorsio e tshumela e txhadha kuveti msikati wakwe a di tiemisete ku mu divalela? Ina msikati wa kale a nga mu divalela? Ka sotshe sikombiso soneso, kumaha dhivhorsio ni ku tshumela e txhadha ati i ku wugango ti maha ti to mtxhadho wo khata si kontwi kambe. Awu wa wuphya wu ha mlayoni ngu kuya ngu wukoma. Nga ha ti nga kombiswa ngu kona ka A Sentinela ya 1 ka Fevereiro wa 1980 ka pajina 32 yi wombile tiya: “Konkuwa a ka mtxhadho wa wuphya, a nge sikoti kutshumela e ya ka mtxhadho wo khata, nguko se kumahilwe dhivhorsio, wugango ni kutshumela kutxhadhwa kambe.”

Mapfisiselo yawa a maphya kha ma mahi ti to kusawuleka ka mtxhadho ku hunguka, ni ku kha ti mahi ti to txionho txa wugango hi txi tekela hahatshi. Wamwamna awu a dhivhorsiarako msikati wakwe ti sa seketelwa amu ka Bhiblia e tshumela e teka mmwani ene a na faneleka kuva ka komisawu ya wulamuli ngu konaha ka kuva a di mahile txionho txa wugango. (Ngako awu a ku ya txhadha nayo nene i di Mkristu nene a na bela ka komisawu wa wulamuli ngu konaha kova a di mahile wugango.) Hambiku mtxhadho wa wuphya wu na mbi tekwa kota wugango, wona kha wa seketelwa amu ka Bhiblia ni ku mwanathu kha na mbi faneleka kumana malungelo dibanzani kala ku za nduma yakwe yi tenganyana. Eto ti pata kualakanyisisa ngu txiemo txa mwanathu wule a nga mu leka, awu ti nga mahako a txi karateka. Ni ku ti nga maha a di siyetwe vanana ava ti nga mahako va si nga ni tate.—Mal. 2:14-16.

Ngu kona ha ka wuyelo yo panda ayi yi tiswako ngu dhivhorsio ni kutshumela u txhadha ti sa seketelwa amu ka Bhiblia, Makristu ma sawula ku va ni mawonelo a Jehovha mayelano ni mtxhadho i ku ti to wu sawulekile.—Ekl. 5:4, 5; Vaheb. 13:4.