1. Ngu kona ha ka txani Txialakanyiso i di ditshiku da lisima ngutu ka dilembe? (Luka 22:19, 20)

 KA VATHU va Jehovha, Txialakanyiso txa lifo la Jesu ditshiku da lisima ngutu ka dilembe. Ngu txona dwe tximahakalo txi Jesu ngu kukongoma a nga gela vagondiswa vakwe ti to ve txi alakanya. (Lera Luka 22:19, 20.) Ngu kona ha ka sivangelo so tala, athu hi di emete ngu maso o bhilivila ditshiku da Txialakanyiso. A hi woni simwani sa sivangelo soneso.

2. Nji txani txi mahako ti to ditshiku da Txialakanyiso di va do sawuleka ngutu kwathu?

² Txialakanyiso txi hi vhuna ku khumbula lisima la digandelo da Jesu Kristu. Txi tshumela txi hi khumbutisa ti to hi nga kombisisa kutxani kubonga digandelo donedo. (2 Vak. 5:14, 15) Hahanze keto, ka txialakanyiso hi ni mkhanjo wo “thavelelana.” (Var. 1:12) Otshe malembe, vamwani ka vanathu va va nga hola ngu didhawa da moya va maneka ka txialakanyiso. Vamwani ka vona ngu kona ha ka lirando li va kombiswako mbimo yi va amukelwako, va maha txisungo txo tshumelela ka Jehovha. Ni ku vavangi va xamala ngutu ngu ti va ti wonako ni ku ti pfa, se ve maha txisungo txo khata kugonda Bhiblia. Totshe eto ti maha Txialakanyiso txi va txo sawuleka ngutu kwathu.

3. Hi kombisa wumwewo ngu nzila muni ka ditshiku da Txialakanyiso? (Wona ni mfota.)

³ Pimisa kambe ngu kuva kumweko ni vanathu ka makhalo o hambana-hambana hamafuni kotshe ngu ditshiku da Txialakanyiso. Ka ditshiku donedo, mbimo yi ditambo di yako di swa ka makhalo o hambana-hambana hamafuni kotshe, Tifakazi ta Jehovha ta tshangana. Hotshethu hi engisela Dhixkursu yi  kombisako lisima la mterulo. Hi embelela tindando timbidi, hi pindisa dipawa ni vhinya hi tshumela hi womba ti to “amen” ngu mbilu yotshe ka mune wa mikombelo ayi yi mahwako. Mndani ka 24 wa maora ka ditshiku dileya, otshe mabanza ma nava ma di mahile ati ti fanako. Ina wa alakanyisisa ngu litsako li Jehovha ni Jesu va li pfako mbimo yi va hi wonako hi txi tshangana hamafuni kotshe hi txi va ninga wudhumo?

4. Hi na bhula ngu txani ka gondo yiya?

⁴ Ka gondo yiya hi na bhula ngu siwotiso siya: Hi nga lulamisela ngu nzila muni mbilu yathu para ditshiku da Txialakanyiso? Hi nga va vhunisa kutxani vamwani ti to ve wuyelwa ka tximahakalo txonetxo? Ni ti to hi nga va vhunisa kutxani ava va nga hola ngu didhawa da moya? Tixamulo ta siwotiso siya ti na hi vhuna ku hi zumba hi di lungekile para ditshiku diya do sawuleka.

HI NGA LULAMISELA NGU NZILA MUNI MBILU YATHU PARA DITSHIKU DA TXALAKANYISO?

5. a) Ngu kutxani ti txi lava hi alakanyisisa ngu lisima la mterulo? (Masalmo 49:7, 8) b) Nji txani txi u nga txi gonda ka vhidhiyo yi yi ku, Ngu kutxani Jesu a di fite?

⁵ Nzila yimwani ya lisima ayi hi nga lulamiselako ngu yona mbilu yathu para ditshiku da Txialakanyiso, ngu alakanyisisa ngu lisima la digandelo da mterulo wa Jesu Kristu. Kha txi ngaho txi hi ndi no txi maha kasi ku hi ti hulukisa ka mterulo ni lifo. (Lera Masalmo 49:7, 8; wona kambe vhidhiyo ayi i ku Ngu kutxani Jesu a di fite?) a Jehovha a rumete Jesu kasiku e ta ningela wutomi wakwe ti to e hi hulukisa. Jehovha kumweko ni Jesu va mahile mizamo ya hombe. (Var. 6:23) Mbimo yi hi yako masoni hi alakanyisisa ngu ti Jehovha ni Jesu va nga hi mahela, kubonga kwathu mterulo ku naya kuengeteleka. A hi woneni timhaka timwani ti nga pateka ka mterulo ati Jehovha ni Jesu ti nga va nemelela. Kambe ku khata, nji txani mterulo?

6. Nji txani txi txi nga ti pateka ka mterulo?

⁶ Mterulo mtengo awu wu hakelwako kasi kukhulula m’thu mwendo kuxava txo maha da wumbidi kambe. Wamwamna wo khata Adhamu i ti wo pelela mbimo yi a nga vangwa. Mbimo yi a nga maha txionho, ene ni liveleko lakwe va luzile mkhanjo wo hanya ngu ha ku si gumiko. Se kasi kuhakela asi Adhamu a nga ti si luzile, Jesu a ningete wutomi wakwe wo pelela kota digandelo. Mbimo yi a nga ti hamafuni, Jesu “kha maha txionho, ni txisofu txakwe kha txa womba makuho.” (1 Pedro 2:22) Mbimo yi Jesu a nga fa, i ti wo pelela kufana ni Adhamu a si se maha txionho. Ngu toneto, ngu kuningela wutomi wakwe kota digandelo, Jesu a sikoti kuhakela mtengo wa wutomi wo pelela awu wu nga luzwa ngu Adhamu.—1 Vak. 15:45; 1 Tim. 2:6.

7. Ngu sihi siduko si Jesu a nga manana naso mbimo yi a nga ti hamafuni?

⁷ Mbimo yi Jesu a nga ti hamafuni, ene a engisile Jehovha ka totshe hambi mbimo yi ti nga txi karata. Jesu i ti mwanana wo pelela, vaveleki vakwe va sa pelela, hambi keto, a txi va engisa. (Luka 2:51) Mbimo yi i nga ti ngadi jovhem, Jesu ti lavile e lamba m’kuzetelo wa vamwani wo a si engise vaveleki vakwe mwendo kwa mbi thembeka ka Jehovha. Mbimo yi i nga ti wa hombe ti lavile e vayilela m’kuzetelo wa Sathani, awu a nga ti lava ti to a si engise Jehovha. (Mat. 4:1-11) Sathani a ti ti emisete kumaha ti to Jesu e onha kasiku a si ti koti kuhakela mtengo wa mterulo.

8. Ngu sihi simwani sikarato si Jesu ti nga lava e wonisana naso?

⁸ Mbimo yi a nga ti ka mthumo wakwe wo txhumayela hamafuni, Jesu a wonisanile ni simwani sikarato. Valala vakwe va m’wukete ni ku va zamile ku m’daya. (Luka 4:28, 29; 13:31) Hahanze keto, ti lavile e wonisana ni kwa mbi pelela ka vagondiswa vakwe. (Marku 9:33, 34) Mbimo  yi a nga txi thethiswa, Jesu a xanisilwe ni ku tseketselwa. Ngu magwito, Jesu a datwe ngu nzila ya tshofu ngutu ni yo pandisa. (Vaheb. 12:1-3) Timbimo to gwitisa ta wutomi wakwe a wonisanile nato ekha a si nga ni kuvhikelwa ngu Jehovha. b—Mat. 27:46.

9. U ti pfisa kutxani ngako u txi alakanyisisa ngu kuxaniseka ka Jesu? (1 Pedro 1:8)

⁹ Ditshuri ti to Jesu a xanisekile ngutu kasiku e ningela wutomi wakwe ti to e hi khulula ka txionho ni lifo. Mbimo yi hi pimisako ngu kotshe kuxaniseka ku Jesu a nga di ti emisete kuwonisana nako ngu kona ha kwathu, eto ti hi maha hi va ni lirando la hombe ngutu ngu ngene.—Lera 1 Pedro 1:8.

10. Mterulo wu m’gwesile ngu nzila muni Jehovha?

¹⁰ Ngu tihi ti Jehovha a nga ti tumelela kasiku Jesu e kota kuhakela mtengo wa mterulo? Phela Jehovha ni Jesu va ni wungana wa hafuhi ngutu wa ku va tate ni mwanana. (Mav. 8:30) Se hi nga pimisa ngu nzila yi ti nga mkaratela ngu yona Jehovha kuwona mwanana wakwe a txi pinda ngu ka sikarato so tala hamafuni. Ti hakubasani ti to Jehovha a karatekile ngutu mbimo yi a nga txi wona mwanana wakwe a txi ñolwa ngu nzila yo biha, a txi wonwa i si nga wa txilo ni kuxaniswa.

11. Ngu tihi ati ti nga hi vhunako kupfisisa nzila yi Jehovha a nga ti pfa ngu yona mbimo yi Jesu a nga fa?

¹¹ Vaveleki va va nga felwa ngu mwanana va kuziva kupanda ku kukuho ngu kuluzekelwa koneko. Athu ha kholwa ngutu ka kuwuswa ka vafi. Hambiku hi ku ni likholo lonelo, ngako m’thu a txi fa, ha pandiseka ngutu timbiluni kwathu. Eto ti hi vhuna kupfisisa nzila Jehovha a nga ti pfa ngu yona mbimo yi a nga wona mwanana wakwe wo dhundeka a txi xaniseka ni kufa. c—Mat. 3:17.

12. Nji txani hi fanelako ku txi maha ka mavhiki ya ma londiselako Txialakanyiso?

¹² Ti ngo txani kukhukhela ka konku u gonda mayelano ni mterulo ka gondo yako upune mwendo ka wukhozeli wa mwaya? Thumisa Mkongomiso wa Tifakazi ta Jehovha wo maha wuxolisisi mwendo dibhuku dimwani kasi kumana to engeteleka mayelano ni mterulo. d Tshumela u londisa programa ya kulera Bhiblia ya Txialakanyiso yi manekako ka txibhukwana txa mitshangano txa Mahanyelo athu a Wukristu ni mthumo wo txhumayela. Niku ka ditshiku da  Txialakanyiso, u nga divale kuxalela wukhozeli wa ni mixo wo sawuleka. Ngako hi txi lulamisela mbilu yathu para Txialakanyiso, hi nga sikota kuvhuna vamwani ti to ve wuyelwa ngu tximahakalo txonetxo.—Ezra 7:10.

VHUNA VAMWANI

13. Njitxani txo khata txi hi fanelako ku txi maha kasiku hi vhuna vamwani ti to ve maneka ka Txialakanyiso?

¹³ Hi nga va vhunisa kutxani vamwani ti to ve wuyelwa ka Txialakanyiso? Ti hakubasani ti to txo khata ku txi maha ngu ramba vamwani. Ni ku hahanze ko ramba vathu va hi va manako hi di kutxhumayelani, hi nga maha lista ya va hi lavako ku va ramba, vo fana ni maxaka, vakolega va mthumoni, vakolega va txikolwani ni vamwani. Hambi hi si nga ni sirambo sasingi so ganjwa hi nga rumela link ngu kuthumisa matelefone. Ngu magwito hi nga xamala ngutu ngu mtengo wa vathu ava va ngo tumela.—Ekl. 11:6.

14. Ngu kutxani kuningela txirambo atxi txi lumbako m’thu apune ti txi maha kutxitxa ka hombe?

¹⁴ Ngako m’thu a txi amukela txirambo atxi txi lumbako ene, eto ti nga maha kutxitxa ka hombe ka m’thu eneyo. Mwanathu mmwani wa txisikati a xamate ngutu mbimo yi mwamna wakwe wu i si nga ku fakazi ya Jehovha a nga m’gela ti to a na tsula ka Txialakanyiso. Ngu kutxani a di xamate? Nguko ene a ti m’rambile makhambi a mangi ka Txialakanyiso, kambe a si khali ku kanda. Nji txani txi nga maheka ka dikhambi diya? Mwamna wakwe a amukete txirambo txa didhota adi va nga ti zivana, se a xalete Txialakanyiso txa dilembe dile ni ka malembe mamwani ya ma nga londisela.

15. Ngu tihi ti hi fanelako ku ti tekela hamsungo ngako hi txi ramba m’thu ka Txialakanyiso?

¹⁵ Khumbula ti to avale hi va rambako va nga thuka ve va ni siwotiso so kari, ngutu-ngutu va si khali kuya ka Nyumba ya Mfumo. I nga va ta tinene kualakanyisisa ngu siwotiso si va nga thukako ve hi mahela ni ku hi fanete ku ti lulamisela kasiku hi ziva ku si xamula. (Vakl. 4:6) Ngu txikombiso, vamwani va nga ti wotisa tiya: ‘Wu na tsimbitisa kutxani mtshangano wa kona? Wu na teka mbimo muni? Ina ni nga ambala nga ti ni ti lavisako tona? Ina ku na laveka misengo yo kari?’ Ngako hi txi ramba m’thu ka Txialakanyiso, hi nga m’wotisa tiya: “Ina u ni txiwotiso?” Se koneho u xamula ati m’thu a lavako  ku ti ziva. Hi nga tshumela hi thumisa vhidhiyo ayi yi ku, Khumbula lifo la Jesu ni yi yi ku Ku mahwa txani Nyumbani ya Mfumo? kasi ku vhuna m’thu e pfisisa ti to kumahwa txani ka mitshangano yathu. Hahanze keto, gondo 28 ya dibhuku di di ku, Hanya wutomi wo tsakisa kala kupinduka! yi ni ti pontu ta lisima ati hi nga ti thumisako hi txi bhula ni vathu.

16. Ngu sihi siwotiso si vavangi va xalelako Txialakanyiso va nga vako naso?

¹⁶ Msana ko xalela Txialakanyiso, vavangi ava va nga rambwa ti nga maha ve va ni siwotiso. Ti nga maha ve ti wotisa ti to ngu kutxani ni wammweyo a nga mbi dya dipawa nem kusela vhinya, mwendo ku ngu kutxani mtengo nyana wa wudotho wu di mahile toneto. Ti nga maha ve ti wotisa ti to Txialakanyiso txi mahwa makhambi mangahi? Ti nga maha ve ti wotisa ti to ina mitshangano ya Tifakazi ta Jehovha yi ñolwa ngu nzila yi yi fanako? Hambiku timhaka timwani ti txhamuselwako ka dhixkursu ya Txialakanyiso, ti nga maha m’thu a txi lava kuziva to engeteleka. Gondo ayi yi ku, “Hikwalaho Ka Yini Timbhoni Ta Yehovha Ti Nga Endli Xilalelo Xa Hosi Ku Fana Ni Tikereke Tin’wana?” yi manekako ka jw.org, yi nga hi vhuna kuxamula simwani sa siwotiso asi vathu va nga vako naso. Txi si se khata Txialakanyiso, txi txi tsimbila mwendo txi di gumile, hi lava kumaha totshe ti hi nga ti kotako kasi kuvhuna ava va ku ni “fanelo ya wutomi wo mbi guma” kasiku ve wuyelwa ngu mtshangano wonewo.—Mith. 13:48.

VHUNA VA VA NGA HOLA NGU DIDHAWA DA MOYA

17. Madhota ma nga va vhunisa kutxani avale va nga hola ngu didhawa da moya? (Ezekhiyele 34:12, 16)

¹⁷ Ka mbimo ya Txialakanyiso, madhota ma nga va khatalela ngu nzila muni ava va nga hola ngu didhawa da moya? Kombisani ti to anu ma khatala ngu vona. (Lera Ezekhiyele 34:12, 16.) Txi si se hoka Txialakanyiso, mahani mizamo yo bhula ni mtengo wo tshangana wa va va nga hola ngu didhawa da moya. Ti vekeni hakubasani ti to vona va randeka ngutu ni ku mi ti emisete ku va vhuna ka totshe ti va ti lavako. Va rambeni ti to ve maneka ka Txialakanyiso ni ku ngako va txi tsula, va amukeleni ngu lirando. Msana ka Txialakanyiso, simamani mi kombisa lirando ka vanathu vonevo vo dhundeka ni ku  mahani totshe ti mi nga ti kotako kasi ku va vhuna ti to ve tshumelela ka Jehovha.—1 Pedro 2:25.

18. Hotshethu hi nga va vhunisa kutxani ava va nga hola ngu didhawa da moya? (Varoma 12:10)

¹⁸ Hotshethu dibanzani hi nga va vhunisa kutxani ava va nga hola ngu didhawa da moya va tako ka Txialakanyiso? Hi nga maha toneto ngu ku hi ñola votshe va va nga hola ngu didhawa da moya ngu lirando, wunene ni txixonipho. (Lera Varoma 12:10.) Khumbula nzila yi ti nga vako ti di va karatete ngu yona vanathu vonevo ku ve tshumela ka Nyumba ya Mfumo. Ti nga maha va di thavile kwa mbi amukelwa ngu nzila ya yinene. e U nga wombe timhaka ti ti nga va thelako tingana mwendo ku ve karateka. (1 Vat. 5:11) Vanathu vonevo va m’randa Jehovha kufana ni nathu. Athu ha tsaka ngutu ngu kutshumela hi khozela Jehovha kumweko navo.—Mas. 119:176; Mith. 20:35.

19. Hi wuyelwa ngu nzila muni ngako hi txi khumbula lifo la Jesu?

¹⁹ Ta pfala ku va Jesu a di hi kombete ku hi khumbula lifo lakwe otshe malembe ni ku ha ti pfisisa ti to ngu kutxani toneto i di ta lisima ngutu kwathu. (Isaya 48:17, 18) Ngu txikombiso, lirando lathu ngu Jehovha ni Jesu la tsana ngutu, hi ni mkhanjo wo kombisa kubonga ngu ti va nga hi mahela ni ku ha tshumela hi va ni wungana wo tsana ngutu ni vanathu. Hahanze keto hi ni mkhanjo wo vhuna vamwani ku ve gonda to engeteleka mayelano ni mterulo ni ku ve va ni mkhanjo wo amukela makatekwa aya Jehovha a ma thembisako. Ngu toneto a hi maheni totshe ti hi nga ti kotako kasi ku hi ti lulamisela ka ditshiku da lisima ngutu da dilembe, i ku Txialakanyiso txa lifo la Kristu.