GONDO 3
NDANDO 124 Kuthembeka
Jehovha a na kuvhuna ngako u txi wonisana ni sikarato
“[Jehovha] wa ku ninga kutsana ka masiku ako.”—ISAYA 33:6, NM.
TXIKONGOMELO TXA GONDO
Kuziva ti hi fanelako kutimaha kasi ku hi amukela txivhuno txa Jehovha mbimo yi hi wonisanako ni sikarato.
1-2. Ngu sihi sikarato asi malanda o thembeka a Jehovha a ma nga thukako me wonisana naso?
NGAKO timhaka to karata ngutu ti txi humelela wutomi wathu wu nga txitxa konaha ni konaha. Ngu txikombiso, mwanathu mwani a dhanwako ku i Luis, a dhokodhela a mgete ti to ati ni malwati a câncer. Niku a tshumete a m’gela ti to a no hanya mitxima nyana dwe. Monika ni mwamna wakwe va txi pateka ka mithumo ya yingi ya moya. Kambe ditshiku dimwani a tumbute ti to mwamna wakwe, awu a nga txi thuma kota didhota, atxi maha txionho kusisalani kudingana malembe o tala. Olivia i ku mwanathu wa txisikati wu a nga mbi txhadha, ti sungile ku e khukha mtini kwakwe ngu mhaka ya txingulo atxi txi nga ti tiya txi tshuketela. Mbimo yi a nga tshumela e wuya, a ti ta mana mti wakwe wu di hoxokete. Ngu txikuluveta, wutomi wa vathu vava wu txitxile konaha ni konaha. Ina awe u ta nga humelelwa ngu timhaka to fana ni tiya? Ina awe u ta nga wonisana ni txiemo atxi txi nga txitxa wutomi wako ngu mbimo nyana ya yidotho?
2 Hambi hi di malanda o thembeka a Jehovha, ha manana ni siduko ni sikarato sa wutomi asi si humelelako vathu votshe hamafuni. Hahanze keto, mbimo yimwani ti nga lava hi wonisana ni kuwukelwa ni kuxaniswa ngu vale va nyenyako vathu va Txizimu. Jehovha kha hi vhikeli ka sotshe siduko soneso, kambe ene, mbimo yotshe a thembisa ti to a na hi vhuna. (Isaya 41:10) Ngu kuvhunwa ngu ngene, hi nga simama hi di tsakile, hi maha sisungo sa sinene ni kusimama hi di thembekile hambi ka timbimo to karata ngutu. Ka gondo yiya hi na bhula ngu 4 wa tinzila ati Jehovha a hi vhunako ngu tona ngako hi txi wonisana ni sikarato sa hombe ka wutomi wathu. Hi na tshumela hi wona to hi fanete kumaha txani kasi ku hi amukela txivhuno txi ene a hi ningako txona.
JEHOVHA A NA KUVHIKELA
3. Nji txani txi nga wonekako txi txi karata ku txi maha mbimo yi hi wonisanako ni sikarato?
3 Txikarato. Mbimo yi hi pindako ngu ka txiemo txo nemela ti nga hi karatela ku pimisa kwati ni kutshumela hi maha sisungo. Ti nga maha u karateka ngutu mbiluni kwako ngu txiemo txiya. Ti nga maha mapimo athu me nemelwa ngu kuvilela. Ti nga maha u tipfa nga u tsimbila ka nzila yi yi ngo phum ngu hunguva, aha u si ti ziviko to u naya hani. Wona nzila yi vanathu va vambidi va txisikati hi nga bhula ngu vona makhatoni va nga tipfa ngu yona. Olivia a womba tiya: “Msana ko txingulo txi ti xasete mti wangu, ani ni ti pfite ni di nokha ni kutshumela ni karateka.” Monika a txi womba-womba ngu mahanyelo o biha ya ma nga ti ni mwamna wakwe a khene: “Eto ti ni jujile ngutu msungo. Niku ti txi ni panda ngutu mbiluni kwangu. Ti txi ni karatela ngutu hambi kumaha mithumo yo hehuka ya ditshiku ni ditshiku. Timhaka ati ti nga txi woneka nga kha ti na ku ni humelela ti ni humelete.” Jehovha a hi thembisa ngu nzila muni ku hi vhuna ngako hi txi tipfa hi di hoka?
4. Ngu kuya ngu Vafilipiya 4:6, 7, ngu tihi ti Jehovha a thembisako ku hi mahela?
4 Ngu tihi ti Jehovha ati mahako. Ene a thembisa ku hi ninga ati Bhiblia yi ti dhanako ku “kuthutha ka Txizimu.” (Lera Vafilipiya 4:6, 7.) Kuthutha koneko ngu rula, ni kuzenga aku ku nga manwako ngu va i ku vangana va Jehovha dwe. Kuthutha koneko “kupinda wotshe wuzivi” ni ku kutshumela ku va mtamo ngutu kupinda totshe ti hi nga ti pimisako. Ina u ti nga maha mkombelo wo hiseka ka Jehovha msana keto u pfa kurula ka hombe moyani kwako? I di eto, awe wa kuziva “kuthutha ka Txizimu.”
5. Kuthutha ka Txizimu kuveketa ngu nzila muni mialakanyo ni mbilu yathu?
5 Ka Vafilipiya hi tshumela hi gonda ti to kuthutha ka Txizimu “ku na veketa” mwendo kuvhikela “timbilu tathu ni mialakanyo yathu.” Dipswi da Txigriki adi di nga hunduluxelwa di txi “kuveketa” di txi thumiswa wusotxhwani di txi womba masotxhwa aya ma nga txi vhikela didhoropa kasiku di si xaselwi. Vahanyi va didhoropa donedo va txi otela ngu kurula va txi ziva ti to ku ni masotxhwa aya ma nga ti vekilwe kasi kuwonelela matimbani. Ngu ha kufanako, ngako kuthutha ka Txizimu ku txi veketa timbilu tathu ni mialakanyo yathu, athu hi pfa kurula hi txi ziva ti to hi xayisekile. (Mas. 4:8) Ngu toneto ti nga maheka ni Ana, hambiku txiemo txakwe txi nga mbi tekela kutxitxa, ene a simamile e pfa kurula. (1 Sam. 1:16-18) Mbimo yi hi pfako kurula ta hi hehukela kupimisa kwati ni kumaha sisungo sa sinene.
Maha mkombelo ka Jehovha kala u pfa “kuthutha ka Txizimu” ku txi veketa mbilu yako ni mialakanyo yako (Wona paragrafu 4-6)
6. Hi nga maha txani kasiku hi pfa kuthutha ka Txizimu? (Wona ni mfota.)
6 Ngu tihi ti hi fanelako ku ti maha. Ngako u txi wonisana ni txiemo txo karata ngutu, dhana disotxhwa do fanekisela. U nga mahisa kutxani? Maha mkombelo ka Jehovha kala u pfa kuthutha aku ku tako ngu kwakwe. (Luka 11:9; 1 Vat. 5:17) Luis awu hi nga bhula ngu ngene a txhamusela nzila yi ene ni msikati wakwe Ana va nga wonisana ni txiziviso txa ti to a to salelwa ngu masiku a madotho kasiku e fa. Ene a wombile tiya: “Ka mbimo yo fana ni yoneyo, ta karata ngutu kumaha sisungo mayelano ni nzila yi hi nga thumwako ngu yona ni timwani. Kambe mikombelo yi nga hi vhuna ku hi va ni kuthutha ka mbimo yoneyo.” Luis ni msikati wakwe va wombile ti to va txi maha mkombelo ngu kuhiseka ve kombela ti to Jehovha e va ninga kuthutha, mbilu yo rula, ni wutxhari kasiku ve kota kumaha sisungo sa sinene. Niku ngu toneto Luis a nga txi ti pfisa tona. Se ngako u txi pinda ngu ka txiemo txo karata ngutu ka wutomi wako, simama u maha mkombelo se u na pfa kuthutha ka Jehovha aku ku no veketa mbilu yako ni mialakanyo.—Var. 12:12.
JEHOVHA A NA KUTSANISA
7. Ngu yahi matipfelo ya hi nga vako nawo ngako hi txi wonisana ni siemo so karata?
7 Txikarato. Ngako hi txi manana ni sikarato hi nga khata kupimisa ni kumaha timhaka ngu nzila yi hi nga mbi tolovela kumaha ngu yona. Kufana ni ngalava yi pekwako ngu moya wa hombe yi txi rethwa ngu mavimbi yi txi ya khe ni khe, nathu hi nga ti pfa hi txi xaniswa ngu matipfelo o hambana-hambana o londiselana. Ana awu hi nga womba-womba ngene msana a txhamusela ti to msana ko mwamna wakwe a di fite mbimo yimwani ni yimwani a txi ti pfa ngu nzila yo hambana. Ene a txhamusela tiya: “Mbimo yimwani ni txi ti pfa ni di karatekile ngutu ni ku ni txi alakanya ti to ati ni nga pinda ngu ka tona ti sa fanela ku ti ni humelela. Mbimo yimwani ni txi swireka ngutu ngu ku va mwamna wangu a di fite.” Ana a txi tshumela e ti pfa a di ekha ni kupandiseka ngu kwa mbi ti kota kumaha to kari ati mwamna wakwe a nga txi mmahela. Mbimo yimwani a txi ti pfa nga a hagari ka moya lineneni. Jehovha a nga hi vhunisa kutxani ngako hi txi ti pfa hi txi xulwa ngu matipfelo athu?
8. Ngu kuya ngu Isaya 33:6, ngu tihi ti Jehovha a hi thembisako?
8 Ngu tihi ti Jehovha a ti mahako. Jehovha a thembisa ku hi tsanisa ngu didhawa da moya ni da matipfelo. (Lera Isaya 33:6, NM.) Ngu txikombiso, ngako ku di ni moya wa hombe hagari ka linene, dibhoti ngu mtoloveto di rethwa kuya khe ni khe. Kasiku mabhoti a mangi me mana kupinda ka txiemo txonetxo ma ni tisimbi ngu hahatshi ka mati ati ti ma tsanisako. Tisimbi toneto ti tsanisa dibhoti ti to di si xulwi ngu mavimbi ngu nzila yoneyo vathu va ti pfa va di vhikelekile va di ka liendo lo tshamba. Txo xamatisa ngu ti to wungi wa tisimbi toneto ti maha mthumo wa tona mbimo yi dibhoti di ku kutsimbilani. Ngu ha kufanako, Jehovha a na hi tsanisa ngu didhawa da moya ni da matipfelo ngako hi txi simama hi txi mthumela hi di thembekile hambi hi txi wonisana ni sikarato.
Thumisa tifarameti to maha wuxolisisi kasiku u simama u di tsani ngu didhawa da matipfelo ni da moya (Wona paragrafu 8-9)
9. Tifarameti tathu to maha wuxolisisi ti nga hi vhunisa kutxani ti to hi simama hi di tsani? (Wona ni mfota.)
9 Ngu tihi ti hi fanelako ku ti maha. Ngako u txi ti pfa nga u hagari ka moya wa hombe ngu didhawa da matipfelo, maha totshe ti u nga ti kotako kasi kusimama ni txiemiso txako txa timhaka ta moya. Ditshuri ti to ti nga maha u si ti koti kumaha totshe ti u nga txi sikota kumaha kale. Kambe khumbula ti to Jehovha kha emeli u maha to pinda ti u ti kotako ku ti maha. (Fananisa ni Luka 21:1-4.) U nga leke ku ti vekela mbimo kasi kumaha gondo yako upune ni kualakanyisisa. Ngu kutxani? Nguko ngu kuthumisa sengeletano yakwe, Jehovha a hi ninga tigondo ni mavhidhiyo kasi ku hi vhuna kuwonisana ni matipfelo yathu ngako hi di hagari ka sikarato. Kasi kumana ati ti nga ku kuvhunako, awe u nga thumisa tifarameti to maha wuxolisisi ati ti manekako ngu lidimi lako. To fa ni JW Library®, Índice das Publicações da Torre de Vigia ni Mkongomiso wa Tifakazi ta Jehovha wo maha wuxolisisi. Monica awu hi nga bhula ngu ngene a txhamusela ti to mbimo yotshe a tutumela ka tifarameti to maha wuxolisisi ngako a txi pfa ti to matipfelo o biha ma khata ku m’xula. Ngu txikombiso, ene a txi tolovela kumaha wuxolisisi ngu dipswi di di ku “txitsikivi.” Yimwani mbimo a txi xolisisa ngu dipswi di di ku “wukanganyisi” ni di di ku “wuthembeki.” Se konaho a txi simama e lera kala e ti pfa kwati. Ene a txhamusela tiya: “Mbimo yi ni nga khata kumaha wuxolisisi, ni ti pfiti ni gumile mtamo. Kudotho-kudotho ni khatile kupepa, ni pfa nga Jehovha o ni singarela. Mbimo yi ni nga txi ya masoni ni lera ni pfisisile ti to Jehovha a txi ma pfisisa otshe matipfelo angu ni ku a txi ni vhuna.” Kupfa txivhuno txa Jehovha ti na kuvhuna ku u simama u di tsani mbimo yi u mananako ni sikarato.—Mas. 119:143, 144.
JEHOVHA A NA KUSEKETELA
10. Hi nga thuka hi ti pfisa kutxani ngako hi txi pinda ngu ka txiemo txo karata ngutu?
10 Txikarato. Ngako u di pindile ngu ka txiemo txo karata ngutu ka wutomi wako ti nga maha masiku mamwani u di ti pfite u di godhote ngu didhawa da nyama ni da matipfelo. Ti nga maha u txi ti pfa nga m’tutumi wa hombe awu a nga khuduka txihango. Na u si se khuduka, u txi tutuma kwati, kambe konku ti lava u nzoda. Ti nga maha ti txi kukaratela kumaha timhaka ti kale ti nga txi kuhehukela ku ti maha. Ni ku ti nga maha u si nga ni minavelo yo maha ti kale u nga txi ti dhunda kumaha. Kufana ni Elija ti nga kukaratela hambi kuwuka ni ku ati u nga ti lavako ngu otela dwe. (1 Vafu. 19:5-7) Kambe ngu tihi ti Jehovha a thembisako ku hi mahela ngako hi txi ti pfisa toneto?
11. Ngu yihi yimwani nzila ayi Jehovha a hi vhunako ngu yona? (Masalmo 94:18)
11 Ngu tihi ti Jehovha a ti mahako. Ene a thembisa ti to a na kuseketela. (Lera Masalmo 94:18.) Kufana ni m’tutumi wu a nga ti khudusa a lavako txivhuno txa mmwani kasiku e kota kutsimbila, nathu hi lava txivhuno kasiku hi simama hi di tsani ka mthumo wa Jehovha. Ngu yoneyo mbimo Jehovha a hi tsanisekisako tiya: “Nguko ani, Mkoma Txizimu txako, ni kuñola ngu dianza dako da txinene, ni txi khani kwako: U nga thave, ani na kuvhuna.” (Isaya 41:13) Mkoma Dhavhidha a txi woni txivhuno txa Jehovha. Mbimo yi a nga txi wonisana ni sikarato kumweko ni valala vakwe, a gete tiya Jehovha: “Wa ni seketela ngu dianza dako da txinene.” (Mas. 18:35) Kambe Jehovha a hi seketela ngu nzila muni?
Tumela txivhuno txa maxaka ako, vangana ni madhota (Wona paragrafu 11-13)
12. Mba mani va Jehovha a nga va thumisako kasi ku hi vhuna ngako hi txi ti pfa hi di gumile mtamo?
12 Ngu mtoloveto Jehovha a thumisa vamwani kasi ku hi ninga txivhuno txi hi txi lavako. Ngu txikombiso, mbimo yi Dhavhidha a nga ti pfa a di gumile mtamo, kuve mngana wakwe Jonathani a nga mpfuxela kasi ku mtsanisa ni ku mninga txivhuno ngu didhawa da matipfelo. (1 Sam. 23:16, 17) Ngu ha kufanako, Jehovha a thumisile Elixa kasi kuvhuna Elija. (1 Vafu. 19:16, 21; 2 Vafu. 2:2) Nyamsi Jehovha a nga thumisa maxaka, vangana mwendo madhota kasi ku hi vhuna. Kambe mbimo yi hi wonisanako ni txiemo txo karata hi nga lava ku ti hambanisa ni vamwani. Hi lava kuzumba hokhelela ni ku eto ti tolovelekile. Kambe hi nga txi manisa kutxani txivhuno txa Jehovha?
13. Ngu tihi ti hi fanelako ku ti maha kasiku hi amukela txivhuno txa Jehovha? (Wona ni mfota.)
13 Ngu tihi ti hi fanelako ku ti maha. Lwana ni minavelo yo lava kuzumba wekha. Ngako hi txi zumba hokhelela hi khata kuveka mapimo ka sikarato sathu ni ka ti ti hi humelelako. Hi txi zumbela kupimisa ngu toneto, hi nga gwitisa kumaha sisungo so biha. (Mav. 18:1) Ditshuri ti to hotshethu mbimo yimwani ha lava mbimo yo zumba hokhelela ngutu-ngutu ngako hi txi lwisana ni txiemo txo karata. Kambe ngako hi txi zumba hokhelela ngu mbimo yo lapha hi nava kule ni vathu va Jehovha a va thumisako kasi ku hi ninga txivhuno. Se hambi mbimo yimwani ti txi karata kumaha toneto, amukela txivhuno txa maxaka, txa vangana vako ni txa madhota. Va woni i di nzila yi Jehovha a yi thumisako kasi ku kukuninga txivhuno.—Mav. 17:17; Isaya 32:1, 2.
JEHOVHA A NA KUTHAVELELA
14. Ngu sihi siemo si si nga hi mahako hi thava?
14 Txikarato. Mbimo yimwani hi nga pinda ngu ka siemo si si nga hi mahako hi thava. Bhiblia yi womba-womba ngu malanda o thembeka a Jehovha aya ma nga karateka ngutu ni kuthava ngu mhaka ya valala ni ngu simwani sikarato. (Mas. 18:4; 55:1, 5) Ngu ha kufanako, ti nga maha hi wonisana ni kuxaniswa txikolwani, mthumoni, ngu va mwayani kwathu mwendo wukoma. Ni ku ti nga maha hi thava kufa ngu mhaka ya txikarato txo kari txa dihanyo. Ka timbimo toneto hi nga ti pfa hi sa vhikeleka kufana ni mwanana wo mama. Se Jehovha a hi vhunisa kutxani ka siemo so fana ni soneso?
15. Ngu txihi txitsanisekiso txi Masalmo 94:19 a hi ningako txona?
15 Ngu tihi ti Jehovha a ti mahako. Ene wa hi thavelela kasiku hi mana kuthutha. (Lera Masalmo 94:19.) Ku ti lava masalmo yawa ma nga kumaha u pimisa ngu mwanana wu a thavako ni kwa mbi ti kota kuotela ngu kona ha ka txingwala-ngwanda ni ku keluka ka nzuma. Hi nga alakanya ngu tate wa mwanana awu a hokako kwartu e m’gula e m’veka ha mmidi kala kuza e otela. Hambiku txingwala-ngwanda txi ku ngadi txi txi pfala, tate wa mwanana wa m’thavelela ni ku mmaha e ti pfa a di vhikelekile. Ngako hi txi wonisana ni sikarato sa hombe hi lava Tate wathu wa nzumani Jehovha kasiku e hi veka ha mmidi ko fanekisela kala me pinda matipfelo athu o biha. Kambe Jehovha a nga hi thavelela ngu nzila muni?
Tumela ti to Tate wako wa nzumani e kuthavelela ngu kuthumisa Bhiblia (Wona paragrafu 15-16)
16. Ngu tihi ti hi fanelako ku ti maha kasiku hi mana kuthavelelwa ngu Jehovha? (Wona ni mfota.)
16 Ngu tihi ti hi fanelako ku ti maha. Tihe mbimo yo va hafuhi ni Jehovha ngu kumaha mkombelo ni kugonda Dipswi dakwe. (Mas. 77:1, 12-14) Ngako u txi tolovela kumaha toneto, yotshe mbimo yi u pindako ngu ka txiemo txi txi kujujako msungo, txo khata ku txi maha i na va kulava txivhuno txa Tate wa nzumani. Gela Jehovha kotshe kuthava ni kukarateka kwako, se konaho u engisa ati a no kugela ngu kuthumisa Bhiblia. Ngu nzila yoneyo u na pfa kuthavelela aku ku tako ngu kwakwe. (Mas. 119:28) Ngako u txi thava awe u nga thavelelwa ngu kugonda madungula o kari amu ka Bhiblia. Ngu txikombiso u nga mana kutsaniswa ka dibhuku da Jobe, Masalmo, Mavingu ni mapswi a Jesu ma manekako ka Matewu kapitulo 6. Ngako u txi maha mkombelo ni kugonda Bhiblia, awe u na mana kuthavelelwa ku kutako ngu ka Jehovha.
17. Hi nga tsaniseka ka ti to txani?
17 Athu hi ngava ni kuthemba ti to mbimo yotshe Jehovha a na hi vhuna ngako hi txi wonisana ni timbimo to karata ka wutomi wathu. Athu gwita hi no va hokha. (Mas. 23:4; 94:14) Jehovha a thembisa ku hi vhikela, ku hi tsanisa, ku hi seketela, ni ku hi thavelela. Isaya 26:3 yi hi ninga txitsanisekiso tximwani mayelano ni Jehovha. Yona yi womba tiya: “Awe u na xayisa ngu kudikha awule mapimo akwe ma nga tsana kwako; nguko ene wa kuthemba.” Ngu toneto, themba Jehovha ni ku londola totshe ti a mahako kasi ku kuvhuna. Ngako u txi maha toneto, u na simama u di tsani hambi ka timbimo to karata.
U NGA XAMULISA KUTXANI?
-
Ngu ka sihi siemo hi lavako ngutu txivhuno txa Jehovha?
-
Ngu tihi muni wa tinzila ti Jehovha a hi vhunako ngu tona ngako hi txi wonisana ni sikarato?
-
Ngu tihi ti hi fanelako kumaha kasiku hi amukela txivhuno txa Jehovha?
NDANDO 12 Txizimu txa hombe, Jehovha
a Matina mamwani ma txitxilwe.