GONDO 4
NDANDO 30 Tate wangu, Txizimu txangu ni mngana wangu
Jehovha wa kuranda ngutu
“MKOMA ana ni wumbilu.”—JAK. 5:11.
TXIKONGOMELO TXA GONDO
I ngu nzila muni lirando la Jehovha li nga hi tshuketisako ngutu kwakwe, hi ti pfa hi di vhikelekile ni ku hi ninga mtamo.
1. U alakanya ti to Jehovha mbwo zumbisa kutxani?
INA u ti nga alakanya ngu ti Jehovha a nga zumbisa tona? Ngako u txi maha mkombelo, u alakanya Jehovha i di m’thu wo zumbisa kutxani? Ditshuri ti to athu kha hi na ku m’wona Jehovha, kambe Bhiblia yi kombisa tinzila to tala ati a nga zumbisa tona. Bhiblia yi dhana Jehovha kota “liwoningo ni m’vhikeli” ni “mndilo wu wu hisako.” (Mas. 84:11; Vaheb. 12:29) Ka m’woniso, mprofeti Ezekhiyele a kombisile Jehovha i di wo fana ni dirigwi da safira, koporo yo phatima ni wulaho wa nzumani. (Eze. 1:26-28) Nzila yi Jehovha a kombiswako ngu yona ka Bhiblia yi nga hi xamatisa ngutu mwendo ku ti pfa hi di vadotho ngutu kwakwe.
2. Ngu kutxani ti nga hi karatelako kutshuketa ka Jehovha?
2 Aku ti si kotekiko kuwona Jehovha ti nga hi karatela ngutu ku kholwa ti to wa hi randa. Yimwani mbimo ti nga hi karatela ngutu ku kholwa ti to Jehovha wa hi randa nguko ti nga maha hi di xuphekile ngutu ka wutomi wathu. Ti nga maha vamwani va sa ngava ni tate wu a nga va kombisa lirando. Jehovha wa pfisisa matipfelo athu ni ku wa ti ziva ti to ngu kutxani ti nga mahako ti txi hi karatela kutshuketa kwakwe. Kasi ku hi vhuna, a thumisa Bhiblia kasi ku hi komba ti to ene Txizimu txa lirando.
3. Ngu kutxani i di ta lisima ngutu kuya masoni hi gonda mayelano ni lirando la Jehovha
3 Lirando li kombisa ti Jehovha a nga zumbisa tona. Bhiblia yi womba ti to “Txizimu, lirando.” (1 Joh. 4:8) Lirando ngu lona li susumetelako Jehovha ka totshe ti ati mahako. Lirando la Jehovha nda hombe ngutu ni ku li ni mtamo li tshumela li vhuna hambi vale va si m’thumeliko. (Mat. 5:44, 45) Ka gondo yiya hi na gonda mayelano ni Jehovha ni lirando lakwe. Mbimo yi hi yako masoni hi gonda ngu Txizimu txathu hi na ya masoni hi txi randa ngutu.
JEHOVHA WA HI RANDA NGUTU
4. Lirando la Jehovha li kumaha u ti pfa ngu nzila muni? (Wona ni mfota.)
4 “MKOMA ana ni wumbilu.” (Jak. 5:11) Ka Bhiblia, Jehovha ati fananisa ni mame awu a ku ni lirando. (Isaya 66:12, 13) Alakanya mame awu a khatalelako kwati mwanana wakwe, ngu lirando ene wa m’beleka e tshumela e womba-womba nayo kha kwati. Ngako a txi dila mwendo a txi pfa kupanda ene a maha totshe ati a ti kotako kasiku e va ni si a si lavako. Ngako hi txi xaniseka, hi nga tsaniseka ti to Jehovha wa hi randa. M’bhali wa Masalmo a wombile tiya: “Hagari ka sikarato si si nga ni talela mapimoni kwangu, awe u ni khongotete ni txi mana kutsaka.”—Mas. 94:19
“Kufana ni mwanana a thavelelwako ngu mame wakwe, ngu toneto, ani ni na mi thavelela.” (Wona paragrafu 4)
5. Lirando lo thembeka la Jehovha li txhamusela txani kwako?
5 Jehovha a ni wunene. (Mas. 103:8) Ene kha hi tsukule hambi hi txi maha tiphazamo. Makhambi o tala va Israyeli va henyisile Jehovha. Hambiketo mbimo yi va nga txi ti sola Jehovha a kombisile lirando lakwe lo thembeka kwawe ni ku va gela tiya: “Ngako u nga randeka masoni kwangu, kambe u dhundekile, se ani ni ku randile.” (Isaya 43:4, 5) Lirando la Jehovha kha la txitxa, athu mbimo yotshe hi nga mthemba. Hambi hi di mahile txionho txa hombe, Jehovha kha hi tsukule. Ngako hi txi ti sola hi tshumelela ka Jehovha hi na wona ti to a nga txi ya masoni e hi randa. Ene a thembisa ‘ku hi divalela.’ (Isaya 55:7) Bhiblia yi womba ti to ngako hi txi ti sola ti txi huma mbiluni hi na mana “divalelo ya sionho sathu.”—Mith. 3:19.
6. Zakariya 2:8 yi hi gondisa txani mayelano ni Jehovha?
6 Lera Zakariya 2:8. Jehovha a hi fananisa ni pfhaka ya diso dakwe. Diso tximaha txa wukhuxo ngutu ni ku nja lisima ngutu ka mmidi wathu. Se ti fana ni loko Jehovha a txi womba to: “Awu a no mi mahela to biha, a nava a txi mahela to biha tximaha txa lisima ngutu kwangu.” Ngu kona ha ka lirando lakwe ngu ngathu, Jehovha wa ma pfisisa matipfelo athu ni ku wa ti lava ngutu ku hi vhikela. Ngako hi txi xaniseka, nene wa xaniseka. Ngu toneto hi nga khongela ngu kuthemba hi txi: “Ni xayise kufana ni ndololo ya diso dako.”—Mas. 17:8.
7. Ngu kutxani hi di fanete kutsanisa themba yathu ka lirando la Jehovha ngu ngathu?
7 Jehovha a lava ti to u tsaniseka ti to ene wa kuranda. Kambe wa ti ziva ti to ngu kona ha ka ti ti nga thuka ti kuhumelela, u nga kana-kana ti to wa kuranda. Mwendo ti nga maha u txi wonisana ni txiemo txo karata atxi txi nga dukako themba yako ya ti to Jehovha wa kuranda. Se nji txani txi nga tsanisako themba yako? Ngu khumbula ati Jehovha a li kombisako tona lirando ngu Jesu, ngu vasawuleki ni ngu ngathu.
JEHOVAH A LI KOMBISISA KUTXANI LIRANDO LAKWE?
8. Ngu kutxani a nga txi tsaniseka ti to Tate wakwe a txi m’randa?
8 Kudingana tibhiliyoni ta malembe, Jehovha ni Jesu va zumbile kumweko nzumani ni ku va kombisanile lirando la hombe ngutu. Jehovha a ti vekile hakubasani ti to a txi m’randa Jesu nga ha hi ti gondako ngu kona ka Matewu 17:5. Jehovha a di wombile basi to: ‘Awuwa ngu wu ni tsakiswako ngutu ngu ngene.’ Kambe ti txi lava hi ti ziva ati a m’randisako tona Jesu. Ngu toneto ene a wombile ti to Jesu i “mwanana wakwe wo randeka ngutu.” Jehovha a txi ti guleta ngutu ngu Jesu ngutu-ngutu a ku a nga ti ti emisete kuningela wutomi wakwe. (Vaef. 1:7 ) Jesu a si kanakani ti to Tate wakwe a txi m’randa. Ene a txi tsaniseka ngutu ka lirando la Jehovha ni ku a womba-wombile makhambi a mangi ti to Tate wakwe a txi m’randa.—Joh. 3:35; 10:17; 17:24.
9. Ngu yahi mapswi aya ma kombisako lirando la Jehovha ngu vasawuleki? Txhamusela. (Varoma 5:5)
9 Jehovha a tshumela e kombisa lirando lakwe ngu vasawuleki. (Lera Varoma 5:5.) Wona mapswi aya ma ku: “li thetwe” timbiluni kwathu. Direferensiya dimwani di fananisa mapswi yawa ni “kuthelwa ngu mati.” Txikombiso txonetxo txi veka hakubasani nzila yi Jehovha a va randako ngu yona vasawuleki. Ni ku vona va ti ziva ti to ‘va randeka ka Txizimu.’ (Judha 1) Mpostoli Johani a wombile ti a nga ti ti pfisa tona mbimo yi a nga bhala tiya: “Wonani lirando la kuxamalisa la Tate; a nga hi ninga mathomo a ku hi maha vanana va Txizimu!” (1 Joh. 3:1) Ina Jehovha a randa vasawuleki dwe? Ahim-him, Jehovha a ti kombisile ti to wa hi randa hotshethu.
10. Ngu txihi txikombiso txa hombe txa lirando la Jehovha ngu ngawe?
10 Ngu yihi nzila ya hombe ayi Jehovha a kombisako ngu yona lirando? Mterulo, i ku wona txikombiso txa hombe txa lirando hamafuni kotshe. (Joh. 3:16; Var. 5:8) Jehovha a ningete mwanana wakwe wo dhundeka e tumelela ti to e fela votshe vathu ti to sionho sathu si divalelwa kasiku hi va vangana vakwe. (1 Joh. 4:10) Mbimo yi hi yako masoni hi txi alakanyisisa ngu mtengo wa mterulo awu Jehovha ni Jesu va nga wu hakela, hi ya masoni hi pfisisa lirando lawe ngu ngathu. (Vag. 2:20) Mterulo kha wa hakelwa ngu kona ka wululami wa Jehovha dwe, kambe wu haketwe ngu kona ha ka lirando lakwe. Jehovha a kombisile lirando lakwe ngu ngathu ngu kuningela mwanana wakwe Jesu kota digandelo. Jehovha a tumelete ti to Mwanana wakwe e xaniseka e fa ngu ngathu.
11. Hi gonda txani ka Jeremiya 31:3?
11 Nga ha hi nga ti wona ngu kona, Jehovha a maha totshe kasi kukombisa lirando lakwe. (Lera Jeremiya 31:1.) Ene a hi ndindete kwakwe ngu ku a hi randako. (Fananisa ni Dhewuteronome 7:7, 8.) Txi walo ni txa tximwetxo txi nga sikotako ku hi hambanisa ni lirando la Jehovha. (Var. 8:38, 39) U ti pfisa kutxani awe ngu lirando lonelo la Jehovha? A hi wone Masalmo kapitulo 23. A hi woni ti to Dhavhidha a ti pfisile kutxani ngu lirando ni kuxayiswa ngu Jehovha ni ti to awe u nga ti pfisa kutxani ngu nzila yi yi fanako.
U TI PFISA KUTXANI NGU LIRANDO LA JEHOVHA?
12. Masalmo 23 a kugwesa ngu nzila muni?
12 Lera Masalmo 23:1-6. Ka Masalmo 23 Dhavhidha a kombisile themba yakwe ya ti to Jehovha a txi m’randa ni ku m’xayisa. Ene a womba-wombile ngu wuxaka wa hafuhi wu a nga ti nawo ni Jehovha ni ku a m’dhani kota M’dyisi wakwe. Dhavhidha a txi ti pfa a di vhikelekile, e leka Jehovha e mkongomisa ni ku a txi mthemba ngutu. Dhavhidha a txi ti ziva ti to Jehovha a ndi na kombisa lirando lakwe kwakwe otshe masiku. Ngu kutxani Dhavhidha a nga ti ni themba yoneyo?
13. Ngu kutxani Dhavhidha a nga txi tsaniseka ti to Jehovha mbimo yotshe a ndi na m’khatalela.
13 “Kha ni na mbi pwata txilo.” Dhavhidha mbimo yotshe a ti pfite a txi xayiswa ngu Jehovha, ene a ti ni sotshe si a nga ti si lava. Txitimwi keto, Dhavhidha a txi ti ziva ti to Jehovha wa mtsakela ni ku i ti mngana wakwe. Ngu toneto, Dhavhidha a txi ti ziva ti to ti si khataliseki ati a ndi no wonisana nato Jehovha a ndi na m’khatalela. Themba yi Dhavhidha a nga ti nayo ngu lirando la Jehovha yi ti ni mtamo ngutu kupinda sotshe sikarato ni ku ngu toneto ti nga ti maha Dhavhidha e va ni litsako ni kueneliseka.—Mas. 16:11.
14. Jehovha a hi khatalela ngu nzila muni?
14 Jehovha wa hi khatalela ngutu ngu lirando ngutu-ngutu hi txi wonisana ni sikarato ka wutomi. Claire, a awu a thumako Bhetele kudingana 20 wa malembe a karatekile ngutu mbimo yi va hamwayani kwakwe va nga wonisana ni sikarato so londiselana. Tate wakwe a pekilwe ngu malwati a tromboze, mmweyo wa vananda vakwe wa txisikati e thaviswa dibanzani ni ku mwaya wu hingilwe ka nyumba yi wu nga txi zumba ka yona nguku wu si nga ni male yo hakela renda. Jehovha a kombisile ngu nzila muni ti to wa khatala ngu vona? Claire a womba tiya: “Jehovha a txi khatalela silaveko sa mwaya wangu sa ditshiku ni ditshiku. Makhambi a mangi Jehovha a txi hi ninga sasingi kupinda si hi nga txi si emela. Mbimo yimwani na khumbula nzila yi a nga ti ni xayisa ngu yona ni kuxayisa va hamwayani kwangu. Ni ku gwita ni di divate timbimo toneto, eto ti ni vhuna kusimama ni thumela Jehovha ngu litsako hambi ku txi humelela simwani sikarato ka wutomi wangu.”
15. Nji txani txi nga maha Dhavhidha ku e tshumela e va ni mtamo? (Wona ni mfota.)
15 “Wa xayisa moya wangu.” Mbimo yimwani Dhavhidha a txi guma mtamo ngu mhaka ya sotshe sikarato si a nga txi wonisana naso. (Mas. 18:4-6) Kambe ati ti nga ti mninga mtamo i ti lirando la Jehovha ni nzila yi a nga txi m’xayisa ngu yona. Ti txi fana ni ku va Jehovha a ti ko teka Dhavhidha e m’yisa “hagari ka lihunga lo nakana” ni ka “mati o tenga.” Ngu nzila yoneyo a txi tshumela e va ni mtamo ni ku a txi sikota kusimama e thumela Jehovha ngu litsako.—Mas. 18:28-32.
Hambi ka timbimo to karata ngutu ka wutomi wa Dhavhidha, lirando ni kuxayiswa ngu Jehovha, si mningile mtamo (Wona paragrafu 15)
16. Lirando la Jehovha li ku ninga mtamo ngu nzila muni?
16 Nyamsi ni kona, o va ngu txivhuno txa Jehovha dwe hi sikotako kusimama hi wonisana ni sikarato. Nga ha Bhiblia yi wombako ngu kona “wumbilu wa Mkoma ngu wona wu mahako ti to hi si fuviswi.” (Sid. 3:22; Vakl. 1:11) Wona txikombiso txa Raquel. Ene a karatekile ngutu mbimo yi mwamna wakwe a nga leka kuthumela Jehovha ni kutsukula mwaya ngu mbimo ya COVID-19. Jehovha a mvhunisile kutxani? Ene a womba tiya: “Jehovha a mahile totshe kasiku ni ti pfa ni di wo randeka. Ene a mahile ti to vangana vangu ve heta mbimo ni nani, ve ni tisela sakudya, ve ni rumelela mamesaji ni tindimana to ni tsanisa, ni ku ngu litsako la hombe va ti ni khumbutisa ti to Jehovha a ni nani ni ku wa ni xayisa. Mbimo yotshe na m’bonga Jehovha ngu ku va a di ni ningile mwaya wa hombe wo tala ngu lirando.”
17. Ngu kutxani Dhavhidha a nga si “thave txilo”?
17 “Nga ni si thave txilo, nguko awe Mkoma u ni nani.” Dhavhidha a ti ni valala vavangi va mtamo ni ku ngu makhambi a mangi wutomi wakwe wu ti phangoni. Hambiketo, ene a txi ti pfa a di vhikelekile ngu kona ha ka lirando la Jehovha. Yotshe mbimo a txi ti pfa ti to Jehovha a ti ni nene ni ku eto ti txi mninga mtamo. Ngu toneto ti nga mmaha e embelela a txi: “[Jehovha] a ni hulukisile kambe, aha ka dizowa dangu.” (Mas. 34:4) Mbimo yimwani Dhavhidha a txi telwa ngu dizowa da hombe ngutu, kambe a txi di xula nguko a txi tsaniseka ti to Jehovha wa m’randa.
18. Kuziva ti to Jehovha wa hi randa ti nga hi tsanisa ngu nzila muni ngako hi di ni dizowa?
18 Kuziva ti to Jehovha wa hi randa ti hi ninga mtamo ngu nzila muni ti to hi xula sikarato? Nyaphandule mmwani a dhanwako ku i Susi a txhamusela nzila yi ene ni mwamna wakwe va nga ti pfa ngu yona mbimo yi mwanana wawe wa mfana a nga ti daya. Ene womba tiya: “Ngako ku txi humelela to biha ka wutomi wako, eto ta kugwesa ni ku wa thava ku ku nga thuka kuhumelela timwani. Kambe lirando la Jehovha li hi mahile hi ti pfa hi di vhikelekile.” Raquel wu hi nga bhula ngu ngene msana a khumbula tiya: “Wusiku wumwani ni ti pfite ni di karatekile, ni pandiseka ni kuthava. Ni dite ni khongela ka Jehovha ngu dipswi do guleka. Ngu mbimo yoneyo Jehovha a rulisile mbilu yangu kufana ni mame awu a malatelako mwanana wakwe wa m’dotho ni ku ngu txikuluveka ni mane wukohe. Gwita ni di yi divate mbimo yile.” Didhota dimwedo di dhanwako ku i Tasos di hetile mune wa malembe jele ngu kulamba kutsula wusotxhwani. I ngu nzila muni a nga pfa lirando ni kuxayiswa ngu Jehovha? Ene a womba tiya: “Jehovha a ni ningile sotshe si ni nga txi si lava ni kupinda. Eto ti mahile ni mthemba ngutu. Hambiku jele i si nga ku wukhalo wo tsakisa, Jehovha a ni ningile litsako ngu kuthumisa moya wakwe wo sawuleka. Eto ti ni vhunile kuwona ti to mbimo yi ni nga txi ya ni themba Jehovha, lirando langu ngu ngene li txi ya li kula. Se ni khatile kuthuma kota nyaphandule wa mbimo yotshe kona jele mule.
ZUMBA HAFUHI NI TXIZIMU TXAKO TXA LIRANDO
19. a) Kuziva ti to Jehovha wa hi randa ti gwesa ngu nzila muni ati hi wombako ka mikombelo yathu? b) Ngu yihi ndimana ayi yi womba-wombako ngu lirando la Jehovha ayi yi gwesako ngutu mbilu yako? (Wona dikwadro adi di ku “ Tindimana ati ti hi vhunako kupfa lirando la Jehovha.”)
19 Otshe ma experiyensia ya hi nga ma wona ka gondo yiya ma kombisa ti to Jehovha, “Txizimu txa lirando” txi ni nathu! (2 Vak. 13:11) Txona txa khatala ngu mmweyo ni mmweyo wathu. Athu hi nga tsaniseka ti to “lirando la MKOMA li ranganyeta avale va mthembako.” (Mas. 32:10) Mbimo yi hi yako hi alakanyisisa ngu lirando li Jehovha a nga hi komba, hi na ya hi tshuketa ngutu kwakwe ni ku i na va wa ditshuri kwathu. Athu hi nga maha mkombelo ka Jehovha mbimo yotshe ni ku m’gela ti to ha li lava ngutu lirando lakwe. Hi nga tshumela hi gela Jehovha totshe ati ti hi karatako hi txi tsaniseka ti to ene wa hi pfisisa ni ku wa ti lava ngutu ku hi vhuna.—Mas. 145:18, 19.
20. Lirando la Jehovha li hi tshuketisa ngu nzila muni kwakwe?
20 Kufana ni ku ku txi titila hi tshuketako hatxikhu hi ora mndilo, hi lava kutshuketa ka lirando la Jehovha. Lirando la Jehovha li ni mtamo ngutu ni ku la tshumela li hi thavelela. Tula mbilu yako kasiku u pfa lirando la Jehovha ka wutomi wako. Niku ngako hi txi pfa lirando lonelo, hotshethu hi nga womba hi txi: “Na m’randa MKOMA.”—Mas. 116:1.
U NGA XAMULISA KUTXANI?
-
U nga li txhamusela ngu nzila muni lirando la Jehovha?
-
Ngu kutxani u nga tsanisekako ti to Jehovha wa kuranda ngutu?
-
Lirando la Jehovha li kumaha u ti pfa ngu nzila muni?
NDANDO 108 Txizimu i Lirando
a Matina mamwani ma txitxilwe.