“WUNENE wa vanathu ngu wona wu nga ni maha ni tsakela ditshuri.” Kuwomba Lisa a txi bhula ngu ti ti nga mu maha e gonda ditshuri. * Eto ngu ti nga maheka ni Anne, ene a womba tiya: “Wunene wa vanathu wu nga ni gwesa.” Votshe vanathu vava va dhunda kulera ni kualakanyisisa ngu ti va ti gondako, kambe wunene ngu wona wu nga va gwesa ngutu.

Hi kombisisa kutxani wunene kasi hi gwesa timbilu ta vathu? Hi na wona tinzila timbidi. I ku ti hi ti womba-wombako ni ti hi mahako. Hi na tshumela hi wona to mba mani ava hi nga va kombisako wunene.

Wamsikati wo fana ni wu a nga txhamuselwa ka Mavingu 31 a ni “mlayo wa wunene” txisofuni kwakwe. (Mav. 31:26, NM) Ene a tumela “mlayo” wuwa ti to wu fuma mawomba-wombelo akwe. Vaveleki va fanete kuva ni mlayo wuwa txisofuni kwakwe. Vaveleki va tiziva ti to ngako va txi womba-womba ngu nzila yo mbi komisa wunene, vanana va na godhola. Ni ku ngako va txi womba-womba ngu nzila yo dhukisela ni kwa mbi kombisa lirando vanana va na mbi engisa. Se ti to vaveleki va sikota kuva ni mawomba-wombelo o tshambisela ni kutsakisa va maha totshe ti va nga tikotako ti to ve thumisa wunene va txi womba-womba.

Hambi i di ti to khu nga mveleki awe u nga leka mlayo wa wunene wu fuma txisofu txako. Hi nga ti mahisa kutxani toneto? Hi nga yi mana xamulo ka Mavingu 31:26 ayi yi ku khene: “Txisofu txakwe a txi tula ngu wutxhari.” Atiya tipata kusawula kwati mapswi ni nzila yi hi no womba-womba ngu yona. Se hi fanete ku ti wotisa tiya: ‘Ina ati ni lavako kuwomba ti na henyisa, mwendo ti na maha kuva ni kurula?’ (Mav. 15:1) Ngu ditshuri ndinene kupimisa hi si se khata kuwomba-womba.

Divingwa dimwani di womba tiya: “Vaho vo kari mapswi awe ma ku nga tshoka ya ditxhari.” (Mav. 12:18) Ngako hi txi tiha mbimo yo alakanyisisa ngu nzila ayi mapswi athu ni nzila ayi hi womba-wombako ngu yona yi nga gwesako ngu yona vamwani ti na hi vhuna ti to hi thumisa mawomba-wombelo a manene. Ina, ngako hi txi thumisa “mlayo wa wunene” ti na hi vhuna ti to hi si thumisi mapswi thola ni o swira. (Vaef. 4:31, 32) Hi na vhaleta mawomba-wombelo o mbi tsakisa ngu a wunene, ava ma akako ni kutsakisa. Jehovha a hi vekete txikombiso txa txinene mbimo yi a nga tsanisa Elija awu a nga txi thava. Ngelozi yi nga ti emela Jehovha yi womba-wombile ni Elija ngu “dipswi to thutha, da wukheta.” (1 Vafu. 19:12) Ditshuri ti to kukombisa wunene kha ti gwiteli ka nzila ayi hi womba-wombako ngu yona dwe. Kambe ni ti hi ti mahako, hi nga mahisa kutxani?

Hi nga kombisa ti to ha etetela Jehovha ngu nzila ayi hi womba-wombako ngu yona ni kukombisa wunene ngu simaho sathu. (Vaef. 4:32; 5:1, 2) Lisa awu hi nga womba-womba ngu ngene, a womba-wombile ngu wunene awu a nga kombiswa ngu Tifakazi ta Jehovha. Ene a womba tiya: “Ditshiku dimwani mwaya wathu ti lavile wu rura konaha ni konaha. Se mpatwa wumwani wa tifakazi wu tile wu ta hi  vhuna kurura. Ka mbimo yoneyo nem ni si kukhata kugonda Bhiblia.” Simaho siya sa sinene si mahile ti to Lisa e tsakela ditshuri.

Anne awu a nga wombwa makhatoni a kombisile kubonga wunene awu a nga kombiswa ngu Tifakazi ta Jehovha. Ene a womba tiya: “Aku ditiko diya di nga tala ngu wubihi ti txi ni karatela kuthemba vathu. Mbimo yi ni nga ziva Tifakazi ta Jehovha ni ti wotisile ti to ngu kutxani va di ni kombisile wunene wo nga tiya. Wunene awu m’gondisi wangu wa Bhiblia a nga ni komba wu ni mahile ti to ni mu themba.” Yi vile yihi wuyelo? Ene a womba tiya: “Ngu kutsimbila ka mbimo ni khatile kualakanyisisa kwati ngu ti ni nga txi ti gonda.”

Wona to Lisa ni Anne wa gwesekile ngutu ngu wunene awu va nga kombiswa ngu vanathu va dibanzani. Ni ku eto ti va vhunile ti to ve tsakela ditshuri ni kutshumela ve themba Jehovha kumweko ni vathu vakwe.

Vamwani va kombisa wunene ni ku va ni maseko ngu mtumbuluko wakwe. Kukombisa koneko ka wunene ko susumetelwa ngu ti m’thu  a nga kulisa tona mwendo ku mtumbuluko wakwe ngu nene. Kambe ngako hi txo susumetelwa ngu toneto dwe hi na va hi si kombisisa wunene awu wu tako ngu ka Txizimu.—Fananisa ni Mithumo 28:2.

Wunene wa ditshuri yimweyo ya mihando ya moya wa Txizimu. (Vag. 5:22, 23) Se ti wombako ti to hi lava moya wo sawuleka ti to hi si kota kusakulela fanelo yiya. Mbimo yi hi kombisako fanelo yi hi tekelela Jehovha ni Jesu. Ditshuri ti to kota Makristu athu ha khatala ngu vamwani. Kambe atxi txi hi susumetelako kukombisa wunene ngu vamwani lirando lathu ngu Jehovha ni ngu vamwani. Se wunene wathu hi fanelo ayi yi khukhelako mbiluni ni ku i fanelo ayi yi tsakisako Txizimu.

Ti tolovelekile kukombisa wunene ka va hi va zivako mwendo ka va ni wona va nga hi kombisa wunene. (2 Sam. 2:6) Yimweyo ya tinzila yo maha toneto ku va bonga. (Vakl. 3:15) Hi nga maha txani ngako hi txi ti wona nga m’thu wo kari kha fanelwi ngu kukombiswa wunene ngu ngathu?

Alakanyisisa ngu tiya: Jehovha wa hi vekela txikombiso txa txinene txi kombisa wunene hambi ka va va si faneliko. Ngu kuthumisa Bhiblia ene wa hi gondisa ku hi kombisa fanelo yiya ya yinene. Dipswi di di ku “wunene wu wu si hi faneliko” da thumiswa ka makhambi tala ka mibhalo ya Txigriki. Jehovha a hi kombisisa kutxani wunene?

Jehovha wa kombisa wunene ka vathu vo tala ngu ku va ninga asi va si lavako ti to ve hanya. (Mat. 5:45) Phela hambi mbimo yi hi nga si mu zivi Jehovha, ene a txi hi kombisa wunene. (Vaef. 2:4, 5, 8) Ngu txikombiso ene a ningile votshe vathu Mwanana wakwe wa mmweyo. Mpostoli Paulo a wombile ti to Jehovha a hi ningile mterulo ngu kona ha ka “kutala ka tikateko” takwe mwendo wunene wakwe awu wu si hi faneliko. (Vaef. 1:7) I singeto dwe, hambi hi txi thuka hi maha txionho ene wa simama e hi gondisa ni ku hi kongomisa. Gondo ayi Jehovha a hi ningako yi fana ni “dipshwi adi di tshutshako.” (Dhewut. 32:2) Athu hi nge sikoti kuhakela wotshe wunene awu Jehovha awu kombisako. I di ti to Jehovha asi hi kombisi wunene awu wu si faneliko nem hi si na themba ya mbimo yi yi tako.—Fananisa ni 1 Pedro 1:13.

Ti ha kubasani ti to nanathu hi lava kutekelela Jehovha. Ngako hi txi maha toneto, hi na mbi sawula ti to hi na kombisa wunene ka nombwe hi siya nombwe, nguko hi na lava kuetetela Jehovha hi kombisa fanelo yiya ya wunene. (1 Vat. 5:15) Ngako mbimo yotshe hi txi kombisa wunene hi na fana ni mndilo awu wu futumetako ka mbimo yo titila. Hi na tshumela hi va wuthavelo ka va ha mwayani kwathu, vakhozeli kulothi, vathumi kulothi, vagondi kulothi ni vavhizinyo vathu.

Alakanyisisa ngu va dibanzani kwanu ni vamwayani ava va nga wuyelwako ngu konaha ka wunene wako. Ti nga maha ku di ni m’thu wo kari dibanzani awu a nga lavako txivhuno ka mithumo yo kari yo fana ni kuvhuneta ko dima mwendo mithumo yimwani. I singeto dwe ngako u txi mana m’thu kutxhumayelani awu a lavako txivhuno u nga thumisa mkhanjo wonewo kasi kukombisa wunene.

He simameni hi etetela Jehovha ngu kuleka “mlayo wa wunene” wu kongomisa ati hi ti wombako ni ti hi ti mahako.