1. a) Ngu tihi ati Jehovha a thembisako ku hi mahela? b) Ti womba txani ku “themba MKOMA”? (Wona ka “Titxhamuselo txa mapswi o karata.”)

 JEHOVHA wa thembisa kuninga wumangwana wa wunene ka votshe vale va mu thembako. I si nga kale ene a na kugumisa malwati, kudila, kupandiseka ni lifo. (Mtu. 21:3, 4) Ene a na vhuna “vo thutha” ava va vekako themba kwakwe ti to ve pateka ko txitxa mafu hawa me va paradhise. (Mas. 37:9-11) Ene a na tshumela e maha ti to ti koteka ku mmwani ni mmwani wathu e va ni wuxaka ni nene. Ni ku wuxaka wonewo wu na va wa wunene ngutu kupinda awu hi ku nawo ninene konkuwa. Ngu ditshuri eyo i themba yo tsakisa. Kambe ngu kutxani hi txi tsaniseka ti to toneto ti na maheka? Nguko mbimo yotshe Jehovha wa hetisisa ati a ti wombako. Ngu toneto hi ni txivangelo txo pfala txo hi “themba MKOMA.” * (Mas. 27:14) Hi kombisa ti to ha veka themba yathu ka Jehovha ngu kurinzela ngu kutimisela ni litsako kala kuza Jehovha e hetisisa sithembiso sakwe.—Isaya 55:10, 11.

2. Ngu txihi txithembiso atxi Jehovha a nga txi hetisisa?

² Jehovha a ti kombisile ti to ene wa hetisisa sithembiso sakwe. Wona txikombiso txiya. Ka dibhuku da Mtuletelo Jehovha a thembisile ti to ka timbimo tathu Jehovha a ndi na sengeleta vathu va tixaka totshe, va tidimi totshe, va matiko otshe ti to ve patana ka wukhozeli wa ditshuri. Nyamsi vathu vonevo va dhanwa ku “dibutho da hombe.” (Mtu. 7:9, 10) Vathu vonevo kupateka vavamna, vavasikati, vanana, va tixaka to hambana-hambana, va tidimi to hambana-hambana, va wusikoti  wo hambana-hambana ni ku vona va patana ve mwaya wumwewo wa wukhozeli hamafuni kotshe. (Mas. 133:1; Joh. 10:16) Ni ku vathu vonevo va dibutho da hombe vatxhumayeli vo hiseka. Mbimo yotshe vona va tiemisete kutxhumayela mayelano ni ti to i si nga kale ma nata mafu a maphya. (Mat. 28:19, 20; Mtu. 14:6, 7; 22:17) Ti hakubasani ti to i di ti to awe u wa dibutho da hombe themba ya ti to i si nga kale hi na ta va ka mafu a maphya nja lisima ngutu kwako.

3. Ngu txihi txikongomelo txa Sathani?

³ Sathani a lava ti to hi luza themba yathu. Txikongomelo txakwe ngu kumaha ti to u si kholwi ka sithembiso sa Jehovha ni ku u pimisa ti to ene kha ku khataleli. Se ngako Sathani a txi sikota ku hi luzisa themba yathu hi na guma mtamo ni ku hi nga thuka hi leka kuthumela Jehovha. Nga ha hi no ti wona ngu kona Sathani a zamile kuluzisa themba Jobe ni kuzama ku mmaha ti to e leka Jehovha.

4. Hi na bhula ngu txani ka gondo yiya? (Jobe 1:9-12)

⁴ Ka gondo yiya hi na wona makhinga a ya Sathani a nga ma thumisa kasi kuzama kumaha Jobe e leka kuthumela Jehovha. (Lera Jobe 1:9-12.) Hi na tshumela hi wona ti to hi nga gonda txani ka txikombiso txa Jobe, ni ku ngu kutxani hi sa fanela kudivala ti to Jehovha wa hi randa ni ku a na hetisisa sithembiso sakwe.

5-6. Ngu tihi ati ti nga mahekela Jobe ngu mbimo ya yidotho?

⁵ Jobe a di ni wutomi wo zumbiseka. Ene ati ni wuxaka wa hombe ni Jehovha. Ati ni mwaya awu wu nga txi pfana ni ku a di ganyile ngutu. (Jobe 1:1-5) Kambe ngu ditshiku da dimwedo dwe, ene a luzile sotshe, kukhata a luzile tithomba takwe. (Jobe 1:13-17) Ngu msana vanana vakwe votshe va datwe. Hi nga pimisa ngu dikhombo donedo! Phela vaveleki va karateka ngutu ngako va txi felwa ngu mwanana wawe. Kambe alakanya nzila Jobe ni msikati wawe va nga tipfa ngu mbimo yi va nga ziva ti to votshe vanana va 10 va di datwe! Se ha tipfisisa ti to ngu kutxani Jobe a di vharute siambalo sakwe e khalahatsha hahatshi a txi dila!—Jobe 1:18-20.

⁶ Sathani a tshumete a xasela Jobe ngu malwati o thisa. (Jobe 2:6-8; 7:5) Jobe i di m’thu awu a nga txi xoniphwa ngutu amu a nga ti zumba kona. Vathu txi tsula kwakwe ti to ve ya kombela wusungukati. (Jobe 31:18) Kambe konkuwa ngu konaha ka dikhombo di di nga mu welela a txi nyenywa ngu maxaka akwe, vangana vakwe hambi ku sithumi sakwe!—Jobe 19:13, 14, 16.

7. a) Jobe a txi pimisa ti to makhombo akwe ma txi ta ngu ka mani, kambe ngu tihi a nga lamba ku timaha? b) Ngu sihi sikarato asi Makristu ma nga mananako naso nyamsi, so fana ni si si kombiswako ka mfota?

⁷ Sathani a txi lava kumaha Jobe e pimisa ti to aku a nga txi xaniseka a ti ko henyisa Jehovha. Ngu txikombiso, Sathani a thumisile moya kasi kuhoxota nyumba amu va nga ti kona vanana va Jobe va txi susula. (Jobe 1:18, 19) Ene a tshumete e maha ti to ku ta mndilo ngu nzumani wu ta hisa sifuyo ni sithumi sa Jobe. (Jobe 1:16) Aku mndilo ni moya si nga txi ta ngu nzumani, Jobe a pimisile ti to makhombo onewo ma txi ta ngu ka Jehovha. Se Jobe a pimisile ti to ti nga maha i di Jehovha a nga tisa makhombo onewo. Hambiketo, Jehovha kha ruka Txizimu. Ene a tumete ti to ka otshe malembe a kuhanya kwakwe a katekisilwe ngu Jehovha. Se ene a pimisile ti to aku a nga tumela makatekwa a Jehovha, a ti fanete e tumela ni makhombo aya ma nga txi mu wela. Se ene a wombile tiya: “Di na  guletwa ditina da MKOMA.” (Jobe 1:20, 21; 2:10) Kala mbimo yoneyo ene a sikoti kuwonisana ni sikarato sa kuluzekelwa ngu tithomba takwe, vanana vakwe ni malwati. Kambe Sathani txi ngadi txi mu tisela timwani.

8. Ngu yahi makhinga mamwani a ya Jehovha a nga ma thumisa kasi kuwukela Jobe?

⁸ Sathani a tshumete e thumisa makhinga mamwani. Ene a thumisile vavamna vararu ava va nga txi tigela ku mbangana va Jobe, ava va nga maha Jobe e tipfa i di mgwanda wa khiya. Vona va txi kholwa ti to kuza Jobe e manana ni sikarato so nga tiya, ku ni to kari a nga ti maha to biha. (Jobe 22:5-9) Vona va zamile ku mu maha e kholwa ti to hambi i di ti to i singa m’bihi ti si sizi txilo kukhozela Txizimu. (Jobe 4:18; 22:2, 3; 25:4) Phela txikongomelo txawe i ti kumaha Jobe e kana-kana ti to Jehovha wa mu randa, kha khatali ngu m’thu ni ku kha ti sizi txilo kuthumela Jehovha. Atiya ti di mahile ti to Jobe e ti wona nga kha ku na themba.

9. Nji txani txi nga vhuna Jobe ti to e va ni txibindi ni mtamo?

⁹ Alakanya Jobe a di khalahatshile dikhumani atxi pfa kupanda ka hombe. (Jobe 2:8) Vangana vakwe va txi mu wukela va txi kha vona kha ta vhuna txilo kuthumela Jehovha. Jobe ati kukaratekani ka hombe ngutu, a txi pfa kupanda ka malwati ya a nga ti nawo ni kudila vanana vakwe va nga ti dakwe. Makhatoni kha womba txilo. (Jobe 2:13–3:1) I di ti to vangana va Jobe va txi pimisa ti to akule a malalako a na tshuralela Mvangi wakwe, va ti hosile. Se Jobe a to guleta msungo wakwe e wonetela vangana vale vakwe e va gela tiya: “Kala kuza ni fa, kha ni na mbi dhuka ni leka ditshuri dangu.” (Jobe 27:5) Ngu tihi ati ti nga vhuna Jobe ti to e va ni txibindi ni kutshumela e wonisana ni txikarato txileya? Hambiku a nga ti karatekile ngutu kha luza themba ya ti to Jehovha a txi mu randa ni ku a ndi na mu vhuna ka sikarato sakwe. Ene a txi  themba ti to hambi a txo fa, Jehovha a ndi na mu wusa.—Jobe 14:13-15.

10. Hi gonda txani ka ti ti nga humelela Jobe?

¹⁰ Ati ti nga humelela Jobe ti hi gondisa ti to Sathani a nge hi sinzisi kuleka Jehovha. Ni ku Jehovha mbimo yotshe wa si wona sikarato. Ti tshumela ti hi vhuna kupfisisa totshe ti ti patekako ka kusimama kwathu hi di thembekile. Konkuwa he wone tigondo ati hi nga thavisako ka txikombiso txa Jobe.

11. Ngako hi txi simama hi txi themba Jehovha hi na wuyelwa ngu txani?

¹¹ Jobe a ti vekile hakubasani ti to ngako hi txi themba Jehovha hi na sikota kutsanisela sikarato ni kutshumela hi sikota kukaneta Sathani. Yi na va yihi wuyelo? Mibhalo ya hi thembisa ti to ngako hi txi maha toneto Sathani a na dya hahatshi.—Lera Jakobe 4:7.

12. Themba ya kuwuswa ka vakufa, yi mu vhunisile kutxani Jobe?

¹² Kha ha fanela kuluza themba ya kuwuswa ka vakufa. Nga ha hi nga ti wona ngu kona ka gondo ayi yi nga pinda, Sathani a thumisa mlawo wa kuthava kufa kasi ku hi maha hi tshumelela msana. Sathani a pimisile ti to Jobe a ndi nda leka kuthumela Jehovha ngu kufela kuponisa wutomi wakwe. Kambe Sathani a poyilekile. Phela hambi ka mbimo yo karata ngutu ka wutomi wakwe kha ta mu maha e leka kuthumela Jehovha. Ene a txi veka themba ka wunene ni mtamo awu Jehovha a ku nawo ti to a ndi na mu vhuna ti to e timisela. Jobe a ni likholo la ti to hambi Jehovha a si gumisi sikarato sakwe ka mbimo yile, ene a ndi mu wusa mbimo ayi yi tako. Jobe adi ni likholo lo tsana ti to ava va nga fa va na wuswa ka vakufa. Nanathu ngako hi di ni likholo lo tsana la ti to ava va nga fa va na wuswa hi na mbi dhukiswa ngu kuthava kufa ha ko za hi tshumelela msana.

13. Ngu kutxani hi di fanete kutiwonela ka makhinga aya a Sathani a nga ma thumisa ka Jobe?

¹³ Hi fanete kuveka diso ka makhinga aya Sathani a nga ma thumisa kasi kuwukela Jobe, nguko a nga ma thumisa kwathu nathu. Wona ti Sathani a nga womba mayelano ni Jobe: “Sotshe sile wamwamna [kupata ni nathu] a ku naso, a na diha ngu wutomi wakwe.” (Jobe 2:4, 5) Se hi nga womba ti to Sathani a txi khene athu kha hi randi ngutu Jehovha ha ko za hi txi ningela wutomi wathu ngu ngene. Sathani a tshumela e lumbeta Jehovha a txi khene kha hi randi ni ku kha ningi lisima mizamo ayi hi mahako yo mu thumela. Se athu kha hi lavi kukanganyiswa ngu marindi a Sathani.

14. Sikarato si nga hi vhuna kutumbula txani? Ningela txikombiso.

¹⁴ Hi fanete kuwona siduko asi hi mananako naso kota nzila yo hi ti popola hipune. Sikarato asi Jobe a nga manana naso si mu vhunile ti to e wona a mu a nga ti tandeka kona ni kutshumela e lulamisa. Ene a tumbute ti to ati fanete kutiveka hahatshi. (Jobe 42:3) Nanathu hi nga gonda to tala mayelano ni nathu hipune ngako hi di ka sikarato. Mwanathu mmwani a dhanwako ku i Nikolay * awu a nga khotelwa jele hambi ku a nga di ni sikarato sa dihanyo a womba tiya: “Jele yi txi fana ni mtxhini wa Raio-X, yona yi txi ni vhuna kupopola tifanelo tangu ta Wukristu.” Ngako hi txi tumbula amu hi tandekako, hi fanete kumaha mizamo yo tshukwatisa.

15. Hi fanete kuriya nzeve ka mani? Ngu kutxani?

¹⁵ Hi fanete kuriya nzeve ka ti Jehovha a ti  wombako, i si nga ka ti valala vathu va ti wombako. Jobe a riyite nzeve mbimo Jehovha a nga txi womba-womba nayo. Jehovha a mahile Jobe e alakanyisisa. Hi nga khathu Jehovha a txo wotisa tiya Jobe: ‘Ina wa wuziva mtamo awu ni nga vanga ngu wona silo? Phela ani na si ziva sikarato sako, ina u pimisa ti to ni nga za ni kuleka?’ Jobe a xamute Jehovha ngu nzila yo kombisa kubonga ni kutiveka hahatshi. Ene a wombile tiya: “Ni ti engisile va txi womba ngu ngawe, se konkuwa, na kuwona ngu maso angu nipune.” (Jobe 42:5) Ti nga maha mbimo yi Jobe a nga womba mapswi yawa a ti mu di mkhumani, mmidi wakwe wu di tate ngu silonda ni ku adi makhomboni ko dila vanana vakwe. Hambiketo Jehovha a mu tsanisekisile ti to a txi mu randa ni ku a mu amukela.—Jobe 42:7, 8.

16. Ngu kuya ngu Isaya 49:15, 16, ngu tihi ati hi fanelako ku ti khumbula ngako hi txi manana ni sikarato?

¹⁶ Vathu nyamsi va nga hi ruketela ni ku hi ñola ngu nzila yo ho va hi si nga va txilo. Vona va nga zama ku hi bhumisa phungo mwendo kubhumisa phungo sengeletano yathu ngu ku hi ‘hembela ve lumbeta makuhu.’ (Mat. 5:11) Matimu a Jobe ma hi gondisa ti to Jehovha wa themba ti to athu hi na simama hi di thembekile kwakwe hambi hi txi manana ni sikarato. Jehovha wa hi randa ngutu, ni ku kha mbi tshotsha vale va vekako themba kwakwe. (Lera Isaya 49:15, 16.) Ngu toneto u nga riyi nzeve ka makuhu aya ma wombwako ngu valala va Txizimu. Mwanathu mmwani a dhanwako ku i James wa khe Turquia ene ni va hamwayani kwakwe va vile ni sikarato. Ene a womba tiya: “Hi tumbute ti to ngako hi txi engisela makuhu aya ma wombwako mayelano  ni Tifakazi ta Jehovha ti na hi godholisa. Ngu toneto hi veka mapimo ka Mfumo wa Txizimu ni ku simama hi va bhisi ka mthumo wo txhumayela. Ngu toneto ha simama hi va ni litsako.” Kufana ni Jobe, riya nzeve ka ti Jehovha a wombako. Hambi vathu va txi simama ve womba kubiha ngu ngathu hi na mbi guma themba.

17. U gonda txani ka malanda o thembeka aya ma nga wombwa ka Vahebheru ndima 11.

¹⁷ Jobe hi nga dona dilanda do thembeka da Jehovha adi di nga kombisa txibindi ni kutimisela hambiku a nga txi manana ni sikarato. Ka dipapilo di Paulo a nga bhalela Vahebheru, ene wombile ngu vamwani ava ni vona va nga kombisa kuthembeka ava a nga va dhana ku i “mtalo wa hombe wa tifakazi.” (Vaheb. 12:1) Votshe va mananile ni sikarato sa hombe, hambiketo va simamile va di thembekile masoni ka Jehovha. (Vaheb. 11:36-40) Ina kutimisela kwakwe ku vi mnyuko wa yimbwa? Ahim-him. Hambiku va nga mbi kuwona kuhetiseka ka sithembiso sa Txizimu vona va simamile ve veka themba yawe ka Jehovha. Aku va nga di ni kuthemba ti to Jehovha a txi va tsakela, vona va fite va txi tsaniseka ti to va ndi na kuwona kuhetiseka ka sithembiso sa Txizimu. (Vaheb. 11:4, 5) Se txikombiso txawe txi nga hi ninga mtamo wo hi simama hi veka themba yathu ka Jehovha.

18. Ngu tihi ati u nga tiemisela kumaha? (Vahebheru 11:6)

¹⁸ Nyamsi hi hanya ka timbimo ti wubihi wu ko ya wu txi engeteleka ngutu. (2 Tim. 3:13) Sathani khasi kugwita kuduka vathu va Txizimu. Ti si nga ni mhaka ni sikarato asi hi no manana naso, hotshethu he tiemiseleni ku simama hi thumela Jehovha hi txi tsaniseka ti to athu hi “vekile kuthemba kwathu ka Txizimu txi txi hanyako.” (1 Tim. 4:10) Khumbula ti to hakhelo ayi Jehovha a nga ninga Jobe yi kombisa ti to “[Jehovha] a na ni wumbilu ni divalelo.” (Jak. 5:11) Kufana ni Jobe, he simameni hi di thembekile ka Txizimu hi txi tsaniseka ti to ene a “ninga txhatxhazelo ka vale va txi lavako.”—Lera Vahebheru 11:6.