VO TALA va ma ziva matimu a Bhiblia a ti to Jesu a bethetwe ka phande kumweko ni sigevenga simbidi. (Mat. 27:35-38) Kambe, vamwani kha va kholwi toneto, vona kha va kholwi ati Bhiblia yi ti wombako ti to txirumbi txa Jesu txi lulamisetwe ti to txi ya kelelwa amu ka dithitha.—Marku 15:42-46.

Sigondi simwani kha si tumeli ti to m’thu awu a nga bethelwa ka phande kota txigevenga a nga va ni mkhanjo wo e thaviswa e ya tshotshwa amu ka dithitha. Jornalista mmwani a dhanwako ku i Ariel Sabar, a bhate tiya mayelano ni ti ti mahako vathu ve kana-kana ati Bhiblia yi ti wombako: “Kukhokhotelwa ha txihambanoni i ti xanisa ayi yi nga txi wela ka sigevenga sa hombe. Se vaxolisisi vamwani kha va kholwi ti to Varoma va ndi na tumelela m’thu ti to e ta teka dixaka dakwe.” Varoma va txi betela sigevenga ha phandeni kasi ku si xanisa ni ku msana keto mimidi yawe yi si thaviswi ni ku yi txi ta dyiwa ngu sihari, ni ku ngako ku txi sala marambu o kari ma txo ta hiyelwa me ya tshotshwa talani.

Kambe matimu mamwani ma womba ti to ku txi maheka timwani ati vo tala va si ti kholwiko. Ngu 1968, ku tumbutwe marambu a wamwamna awu a nga ti datwe ka timbimo ta Jesu. Marambu onewo ma manwi ka dithitha do kari hafuhi ni Jerusalema di nga txi lumba mwaya wa Vajudha. Marambu onewo ma di ka dikaxa do veka marambu, ka marambu onewo ku ti ni dirambu da txizinindi adi di nga di ni txipikiri txa 11 sentimetru atxi txi nga ti bethetwe ka dipulango. Sabar a tshumela e womba tiya: “Txizinindi txonetxo txi lumbako wamwamna a dhanwako ku i Yehochanan ti vhunile vathu ve wona ti to matimu a Bhiblia a ti to Jesu a thavisile ka phande e ya kelelwa ka dithitha ka ditshuri. Txizinindi txa Yehochanan txikombiso txa m’thu awu Varoma va nga tumelela maxaka akwe ti to me ta mu thavisa ve ya khelela.”

Nzila yi txizinindi txa Yehochanan txi nga ti bethetwe ngu yona txi maha vathu ve va ni mawonelo o hambana mayelano ni nzila yi Jesu a nga bethelwa ngu yona. Kambe ditshuri ngu diya: Ku ni sigevenga asi ku nga tumelelwa maxaka a kona ti to si thaviswa sirumbi sa kona ti to ve ya kelela. Se ati Bhiblia yi ti wombako ti to Jesu a ti ya kelelwa ka dithitha ta thembeka. Se ati ti nga tumbulwa ti tsanisekisa ati Bhiblia yi ti wombako.

Kambe ta lisima ngutu, ngu ti to Jehovha se adi profetile ati Jesu a ndi no tshotshiswa tona. Se kha ngaho awu a nga vhalelako ti to wuprofeti wa mu ka Bhiblia wu si hetiseki.—Isaya 53:9; 55:11.