NGAKO malembe nyana msana u to ko endela txitondolo txa Sangir Besar, khe Indonésia u ti woni vanathu vavararu vatxisikati khe praya. Vona va ziwa ngutu ka txitondolo txile, ngu mthumo wawe wo vhuna vathu kupfisisa Bhiblia. Kambe ka mbimo yile vona va txi maha mthumo wo hambana.

Kukhata, vona va bete mndani ka mati, ve gula marigwi ve huma nawo hahanze. Mamwani marigwi i ti a hombe, ma txi dingana ni bhola yo joga ngu yona. Ngu msana, vavasikati vale va khalahatshile ka sibhankwana, ve teka tihamela ve fayetela marigwi me maha a madotho me dingana ni dianda da khukhu. Msana keto va pakete marigwi va nga ti fayetete, ve rwala ve tsula nawo mu va nga txi zumba kona. Ngu msana, va theletete marigwi ka masaka, a ya ti nga txi koteka ku me betwa ka mkamiyawu me ya thumiswa ko maha sitarato.

Mmweyo wa vanathu vonevo i ti Hulda. Siemo sakwe si mtumelete ku e heta mbimo yo lapha a txi maha mthumo wule kupinda vamwani. Ngu mtoloveto, ene a txi thumisa male yi a nga txi yi mana kasi kukhatelela silaveko sa ditshiku ni ditshiku sa mwaya wakwe. Kambe konku, atxi lava ku veka male kasi ku yi thumisa ka timwani. Atxi lava tablet kasi ku bela ka JW Library^®. Hulda a txi ti ziva ti to mavhidhiyo ni simwani asi a ndi no si mana ka aplikativho yiya, si ndi na m’vhuna kutshukwatisa mthumo wo txhumayela ni kupfisisa Bhiblia.

Hulda a thumile maora mambidi ngu ditshiku kudingana mtxima ni hafu, a txi fayetela marigwi o dingana kutata txikamiyawana. Ngu magwito a mani male yo xava tablet.

Ene a wombile tiya: “Hambi ku ni nga txipfa kupanda ni kukarala ngu kufayetela marigwi, ni ti divate totshe eto mbimo yi ni nga khata kuthumisa tablet ya yiphya kasi ku yi ni vhuna ku ni maha mthumo wa wunene ko txhumayela, ni kululamisela mitshangano ngu nzila yo hehuka.” A tshumete e womba ti to makhatoni ka COVID-19, tablet yi mu vhuni, a ku yotshe mitshangano ya dibanza yi nga txi ñolwa ngu ka fone. Ha tsaka ngutu aku mwanathu Hulda, a nga hokelela makungo akwe.