1-2. Ngu kutxani hi nga tipfako nga Jehovha kha xamuli mikombelo yathu?

 “VEKA ka MKOMA minavelo yako ene a na kuninga kuxuva ka mbilu yako.” (Mas. 37:4) Hi nga wona txithembiso txo tsakisa! Ina hi fanete ku emela to Jehovha e hi ninga sotshe si hi mu kombelako ngu txikuluveta? Ngu kutxani hi di fanete ku ti maha txiwotiso txiya? Wona sikombiso asi si londisako. Mwanathu wa txisikati wu a si se kutxhadha, a maha mkombelo kasi kubela ka Txikolwa txa Vatxhumayeli va Mfumo. Kambe kupinda malembe o tala a si se kurambwa. Mwanathu wa jovhem a maha mkombelo ka Jehovha ti to e hanya ka malwati ya a ku nawo kasi ku e ti kota kumaha to engeteleka dibanzani. Kambe kha tshukwali ka malwati akwe. Vaveleki va i ku Makristu va maha mkombelo kasi ku mwanana wawe e simama ka ditshuri. Kambe mwanana wawe a sunga kuema kuthumela Jehovha.

² Ti nga maha nawe u di kombete to kari ka Jehovha, kambe kwa ti amukela. Eto ti nga kumaha u pimisa to Jehovha a xamula mikombelo ya vamwani, kambe yako nem. Mwendo u pimisa to tiho u nga ti maha to biha. Mwanathu wa txisikati wu a dhanwako ku i Janice b a ti pfite ngu nzila ayi yi fanako. Ene ni mwamna wakwe va txi maha mkombelo mayelano ni ku navela kwawe ko ya thuma Bhetele. Ene a womba tiya: “Ni txi tsaniseka to hi ndi nava Bhetele i si nga kale.” Kambe ku pindile malembe mpatwa wu si rambwi. Janice a womba tiya: “Ni pandisekile ni kukarateka. Ni txi ti wotisa to nji txani ni nga mahela Jehovha koza hi si rambwi. Ni ti mahile mkombelo wo kongoma  mayelano ni Bhetele, se ngu kutxani a si xamuli mkombelo wangu?”

3. Hi na bhula ngu txani ka gondo yiya?

³ Mbimo yimwani hi nga ti wotisa to ina Jehovha wa engisa mikombelo yathu? Hambi vavamna vo thembeka va timbimo ti ti nga pinda va txi ti maha txiwotiso txonetxo. (Jobe 30:20; Mas. 22:2; Hab. 1:2) Nji txani txi nga ku tsanisekisako ti to Jehovha a na xamula mikombelo yako? (Mas. 65:2) Kasi kuxamula txiwotiso txonetxo hi na khata ngu wona ti pontu ati ti londiselako: 1) Ngu tihi ti hi nga ti emelako ka Jehovha? 2) Ngu tihi ti Jehovha ati emelako kwathu? 3) Ngu kutxani ti nga lavako ku hi tshukwatisa ti hi ti kombelako?

4. Ngu kuya ngu Jeremiya 29:12, ngu tihi ti Jehovha a thembisako kutimaha?

⁴ Jehovha a thembisa kuengisa mikombelo yathu. (Lera Jeremiya 29:12.) Txizimu txathu txa varanda vakhozeli va txona vo thembeka, ngu toneto kha txi na mbi thuma txi leka kuengisa mikombelo yawe. (Mas. 10:17; 37:28) Kambe eto kha ti wombi to a na hi ninga sotshe si hi si kombelako. Timwanyani ti hi ti kombelako ti na lava hi emela mafu a maphya kasi ku hi ta ti mana.

5. Ngu tihi ti Jehovha ati alakanyako mbimo yi a engisako mikombelo yathu? Txhamusela.

⁵ Jehovha a yelanisa ti hi ti kombelako ni makungo akwe. (Isaya 55:8, 9) Yimweyo ya makungo oneyo ngu ku tata mafu ngu vathu ava va ku ni litsako ni wumwewo hahatshi ka mfumo wakwe. Kambe Sathani a womba to ta tshuku ngu ku vathu ve ti fuma. (Gen. 3:1-5) Jehovha a tumelete ku vathu ve ti fuma, kasi kukombisa to a ti Sathani a ti wombako makuho. Kambe mfumo wa vathu wu vangile sikarato so tala asi hi wonisanako naso nyamsi. (Ekl. 8:9) Ha ti pfisisa to Jehovha kha na mbi thavisa sotshe sikarato si hi wonisako naso konkuwa. I ti ku Jehovha o thavisa sikarato konku, vamwani va ndi na pimisa to vathu va si kota ku ti fuma nguko kha ku na wubihi.

6. Ngu kutxani hi di fanete kutsaniseka ti to Jehovha mbimo yotshe a na maha timhaka ngu nzila ya lirando ni ya wululami?

⁶ Jehovha a nga xamula mikombelo yo fana ngu tinzila to hambana. Ngu txikombiso, mbimo yi Mkoma Ezekhiyele a nga txi lwala, a kombete txivhuno ka Jehovha ku e mu hanyisa. Jehovha a mu hanyisile. (2 Vafu. 20:1-6) Ku hambana nito, mbimo yi mpostoli Paulo a nga kombela Jehovha ku e mu thavisa “m’pa ha mmidini,” ti nga mahako i di malwati, Jehovha kha wu thavisa. (2 Vak. 12:7-9) Wona txikombiso txa Jakobe ni Pedro. Mkoma Herodha, a txi lava kuva daya ngu wumbidi wawe. Dibanza di va kombelete ngu kuhiseka, hambi keto Jakobe a datwe, kambe Pedro a hulukiswa ngu ngelozi. (Mith. 12:1-11) Se hi nga ti wotisa to: ‘Ngu kutxani Jehovha a di hulukisile Pedro e tumelela to Jakobe e dawa.’ Bhiblia kha yi wombi to ngu kutxani. c Kambe ti hi nga tsanisekako ka tona, ngu ti to “totshe tinzila ta Txizimu ti lulamile.” (Dhewut. 32:4) Ni ku ha tiziva to Pedro ni Jakobe va txi randwa ngu Txizimu. (Mtu. 21:14) Mbimo yimwani ti nga maha Jehovha a si xamuli mikombelo yathu ngu nzila yi hi nga ti yi emete. Kambe a ku hi thembako to, nzila yi Jehovha a xamulako ngu yona mikombelo yathu, mbimo yotshe, nja lirando ni wululami, hi na mbi ngura-ngura ngu nzila yi a nga yi sawula kuxamula ngu yona mikombelo yathu.—Jobe 33:13.

7. Ngu tihi ti hi fanelako ku ti vayilela, niku ngu kutxani?

⁷ Hi lava kuzama kuvayilela kufananisa txiemo txathu ni txa vamwani. Ngu  txikombiso, hi nga kombela Jehovha ku e hi vhuna ngu nzila yo kongoma, kambe mkombelo wathu wu si xamulwi. Ngu msana, hi tumbula to mmwani a mahile mkombelo awu wu fanako, ti woneka nga Jehovha a mu xamute. Mwanathu wa txisikati awu a dhanwako ku i Ana, a humeletwe ngu ti ti fanako. A mahile mkombelo, kasi ku mwamna wakwe Matewu, e hanya ka malwati ya a nga ti nawo a câncro. Ngu mbimo yoneyo ya yimweyo, ku ti ni vanathu vambidi va txisikati ava va nga kula ngu tanga va nga txi lwisana ni malwati ya ma fanako. Ana a khongete ngutu ngu mwamna wakwe ni vanathu vava va vambidi. Vanathu vava vavambidi va hanyile, kambe mwamna wakwe a fite. Makhatoni Ana a ti wotisile to ina vanathu vava va hanyile ngu kuva va di vhunwi ngu Jehovha? I di toneto, ngu kutxani Jehovha a nga mbi xamula mikombelo yo mwamna wakwe e hanya? Ditshuri ti to kha hi na kuwomba to ngu kutxani vanathu vava va di hanyile. Ati hi ti zivako ngu ti to Jehovha a na fuvisa kotshe kuxaniseka, ni ku a ti emete ngu maso o bhilivila ku ta wusa vangana vakwe ava va nga fa.—Jobe 14:15.

8. a) Ngu kuya Isaya 43:2, Jehovha a hi vhuna ngu nzila muni? b) Mkombelo wu nga hi vhunisa kutxani mbimo yi hi wonisanako ni sikarato? (Wona vhidhiyo yi yi ku Mkombelo wa hi vhuna kuwonisana ni sikarato.)

⁸ Jehovha mbimo yotshe a na hi vhuna. Kota Tate wathu wa lirando, Jehovha kha tsaki a txi hi wona hi txi xupheka. (Isaya 63:9) Hambiketo, ene kha tsiveli sotshe sikarato si singa hi welako, asi si nga fananiswako ni mnambo mwendo mndilo. (Lera Isaya 43:2.) Kambe Ene wa hi thembisa ku hi vhuna “kupinda” ka sikarato. Niku kha na mbi tumelela ku sikarato si hi wonisanako naso si hi tsivela ku hi mthumela. Jehovha wa hi ninga moya wakwe wo sawuleka kasi ku wu hi vhuna kutsanisela. (Luka 11:13; Vaf. 4:13) Kota wuyelo, hi nga tsaniseka ti to mbimo yotshe hi nava ni si hi si lavako kasi ku hi kota kutsanisela ni ku simama hi di thembekile kwakwe. d

9. Ngu kuya ngu Jakobe 1:6, 7, ngu kutxani ti txi lava hi themba to Jehovha a na hi vhuna?

⁹ Jehovha a emela ti to hi mthemba. (Vaheb. 11:6) Mbimo yimwani ti nga tikomba nga sikarato sathu sa karata kuwonisana naso. Ti nga maha hi khata ku kanakana to ina Jehovha a na hi vhuna. Kambe Bhiblia ya hi tsanisekisa to ngu kona ha ka mtamo wa Txizimu hi na sikota ku “ndaka tibhiyo.” (Mas. 18:29) Hahanze ko zumbela kukanakana, hi fanete kumaha mkombelo ka Jehovha ngu likholo, hi txi themba ti to Jehovha, a na xamula mikombelo yathu.—Lera Jakobe 1:6, 7.

10. I ngu nzila muni hi nga hanyako ngu kutumelana ni mikombelo yathu? Ningela txikombiso.

¹⁰ Jehovha a emela to hi hanya ngu kutumelelana ni mikombelo yathu. Ngu txikombiso, mwanathu a nga kombela Jehovha to e m’vhuna ku e mana folga kasi ku e sikota kuxalela kongresu. I ngu nzila muni Jehovha a nga xamulako mkombelo wonewo? Ngu ku mu ninga txibindi atxi a txi lavako kasi ku e ya bhula ni Patrawu wakwe. Kambe mwanathu eneyo ngene a fanelako kutsula e ya bhula nayo. Ti nga lava e kombela ngu kuwuyeletela, mwendo ku txitxana txikala ni kolega wakwe. Ti nga maha e kombela kuwilwa m’holo ka masiku yale a nga ma kombela.

11. Ngu kutxani i di ta lisima ku hi maha mkombelo ngu kuwuyeletela ngu ti hi ti lavako?

¹¹ Jehovha a emela ku hi kombela ngu ku wuyeletela mayelano ni ti i ku ta lisima ngutu kwakwe. (1 Vat. 5:17) Nga ha Jesu a nga womba  ngu kona, yimwani ya mikombelo yathu kha yi na mbi xamulwa ngu txikuluveta. (Luka 11:9) Ngu toneto, u nga godholi, khongela ngu kuhiseka ni kuwuyeletela. (Luka 18:1-7) Ngako hi txi maha mkombelo ngu kuwuyeletela, hi komba Jehovha ti to ati hi ti kombelako nda lisima ngutu kwathu. Niku hi kombisa likholo ka wusikoti wu a ku nawo wo hi vhuna.

12. a) Ngu txihi txiwotiso txi hi fanelako ku ti maha mayelano ni mikombelo yathu, ni ku ngu kutxani? b) Hi nga tsanisekisa kutxani to mikombelo yathu ya kombisa txixonipho ngu Jehovha? (Wona dibhokiso di di ku “ Mikombelo yangu ya kombisa txixonipho ngu Jehovha?”)

¹² Ngako hi si mani ti hi nga ti kombela hi nga ti maha siwotiso siraru. Txo khata ngu txiya: ‘Ina ati ni ti kombelako ngu ti i ku ta tinene kwangu?’ Makhambi o tala hi nga pimisa to ati hi ti kombelako ngu ti i ku ta tinene kwathu. Kambe ati hi ti kombelako ti nga maha ti si hi vhuni ngu mbimo yo lapha. Ngako hi txi maha mkombelo ngu txikarato txo kari, ti nga maha ku di ni nzila ya tshuku yo pinda yi hi nga txi yi alakanya mbimo yi hi nga txi maha mkombelo. Niku timwani ti hi ti kombelako ti nga maha ti si tsimbitisani ni kudhunda ka Jehovha. (1 Joh. 5:14) Wona txikombiso txa vaveleki vale hi nga womba-womba ngu vona makhatoni. Vona va kombete Jehovha to mwanana wawe e simama ditshurini. Ti ti komba i di txikombelo txa txinene. Kambe Jehovha kha sinzisi ni wamweyo kwathu ku e mu thumela. Ene a lava ti to athu kumweko ni vanana vathu hi mthumela ngu ku ti dhundela. (Dhewut. 10:12, 13; 30:19, 20) Hahanze keto, vaveleki va di fanete kukombela Jehovha to e va vhuna ku ve sikota kugwesa mbilu ya mwanana wawe e susumeteleka kuranda Jehovha ni kuva mngana wakwe.—Mav. 22:6; Vaef. 6:4.

13. Ngu kuya ngu Vahebheru 4:16 i ngu mbimo muni Jehovha a no hi vhuna? Txhamusela.

 ¹³ Txiwotiso txa wumbidi i nga va txiya: ‘Ina yiya i mbimo ya yinene yo Jehovha e xamula mikombelo yangu?’ Ti nga maha hi lava xamulo ya mikombelo yathu ngu txikuluveta. Kambe Jehovha wa yi ziva mbimo ya yinene yo hi vhuna. (Lera Vahebheru 4:16.) Ngako hi si amukeli xamulo ya mikombelo yathu ngu txikuluveta, ti nga maha hi pimisa to xamulo ya Jehovha i “Ahim him.” Kambe ti nga maha xamulo yakwe i di “Ema nyana.” Ngu txikombiso alakanya ngu mwanathu wa jovhem awu a nga kombela ku e hanyiswa ka malwati akwe. I ti ku Jehovha a to mu hanyisa ngu txidiwukiso, Sathani a di wombile to mwanathu wule o thumela Jehovha ngu ku a nga mu hanyisa. (Jobe 1:9-11; 2:4) Hahanze keto, Jehovha a vekile mbimo ayi a no hanyisa otshe malwati. (Isaya 33:24; Mtu. 21:3, 4) Yi si se hoka mbimo yoneyo, kha ha fanela ku emela kuhanyiswa ngu txidiwukiso. Ngu toneto, mwanathu wule a di kombete Jehovha ku e mu ninga mtamo ni kurula kasi ku e sikota kutsanisela malwati ni kusimama e m’thumela ngu kuthembeka.—Mas. 29:11.

14. U gonda txani ka txiperiyensiya txa Janice?

¹⁴ Khumbula txikombiso txa Janice awu a nga maha mkombelo kasi ku ya thuma Bhetele. Ku pindile 5 wa malembe kala e pfisisa nzila yi Jehovha a nga ti xamute ngu yona mikombelo yakwe. Ene a womba tiya: “Jehovha a thumisile mbimo yiya kasi ku ni gondisa ni ku ni vhuna ku ni va mkristu wo vitwa. Themba yangu kwakwe ti txi lava yi kula. Gondo yangu ni pune ti txi lava ni yi tshukwatisa. Ti txi lava ni va ni litsako ti si nga ni mhaka ni siemo si ni ku ka sona.” Ngu msana Janice ni mwamna wakwe va rambilwe ku ya thuma ka mthumo wa wuwoneleli wa txigava. Atxi khumbula ti ti  nga maheka msana, Janice a khene: “Jehovha a xamute mikombelo yangu, hambi ku i si nga ngu nzila yi ni nga ti yi emete. Ni swete nyana kasi kuwona kutsakisa ka xamulo yakwe, kambe na tsaka ngutu ngu kuva ni di woni lirando lakwe ni wunene wakwe.”

15. Ngu kutxani ti nga lavako hi andisa mikombelo yathu? (Wona ni mfota.)

¹⁵ Txiwotiso txa wuraru i nga va txiya: ‘Ina ni fanete kukombela timwani?’ Hambi ku i ku ta lisima kumaha mkombelo wo kongoma, kambe hi fanete kupfisisa kuranda ka Jehovha ni kuziva ati ati lavako kwathu. Wona txikombiso txa mwanathu wa txisikati awu a si se kutxhadha a nga maha mkombelo kasi ku e rambwa ka Txikolwa txa Vatxhumayeli va Mfumo. Ene atxi la kuya txikolwani kasi ku e vhuneta amu ku ku ni txilaveko txa hombe. Ngu toneto, mbimo yi a nga txi maha mkombelo kasi ku e rambwa kuya txikolwani ati fanete kukombela ka Jehovha ku e mu vhuna kuwona mikhanjo ayi yi kuho kasi kuandisa mthumo wakwe ka Jehovha. (Mith. 16:9, 10) Msana keto ene a ti fanete kumaha to yelana ni mkombelo wakwe, ngu kuwotisa muwoneleli wa txigava to ku ni dibanza hafuhi adi di ku ni txilaveko txa vanyaphandule. Mwendo kubhalela Bhetele e wotisa mu ku ku ni txilaveko txa vahuweleli. e

16. Hi nga tsaniseka ka tihi?

¹⁶ Nga ha hi nga gonda ngu kona, hi nga tsaniseka ti to Jehovha a na xamula mikombelo yathu ngu nzila ya lirando ni yo lulama. (Mas. 4:3; Isaya 30:18) Mbimo yimwani ti nga maha hi si mani xamulo yi hi nga ti yi emete. Kambe Jehovha kha na mbi thuka e leka kuxamula mikombelo yathu. Ene wa hi randa ngutu ni ku kha na mbi thuka e hi tsukula. (Mas. 9:10) Ngu toneto simama u “themba txona Txizimu yotshe mbimo” u txi txi gela ta mbiluni ngu mkombelo.—Mas. 62:8.