1. I ve dihi didungula da Isaya ka Vaisrayeli kulowe?

 MPROFETI Isaya a dhani Jehovha kota “Txizimu txa Ditshuri.” Dipswi adi di ku “ditshuri” di txi hunduluxelwa di womba ku “Amen.” (Isaya 65:16) Dipswi adi di ku “Amen” di womba ku “ti na maheke,” mwendo “ngu ditshuri.” Dipswi adi di ku “Amen” di txi thumiswa mu ka Bhiblia mayelano ni Jehovha ni Jesu, di womba ti to mhaka yi yi nga wombwa ditshuri. Didungula da Isaya ka va Vaisrayeli di txi tiveka hakubasani to totshe ti Jehovha ati thembisako ta maheka. Jehovha ati kombisile toneto ngu kuhetisisa sotshe sithembiso sakwe.

2. Ngu txani hi nga thembako sithembiso sa Jehovha mayelano ni wumangwana wathu ni ku ngu sihi siwotiso hi no bhula ngu sona?

² Ina hi ngava ni themba ayi yi fanako ngu sithembiso sa Jehovha ngu wumangwana wathu? Ku di pindile 800 wa malembe ka timbimo ta Isaya, Paulo a txhamusete to ngu kutxani sithembiso sa Txizimu mbimo yotshe i di so thembeka. Paulo a hi tsanisekisile a txi: “Kha ti koteki to Txizimu txi hi kanganyisa.” (Vaheb. 6:18) Kufana ni txisima txi si vhelisiko mati ya manene ni ya sawuti ngu mbimo yimweyo, Jehovha i ku txisima txa ditshuri kha na kuwomba makuhu. Ngu toneto, hi ngava ni kuthemba ka ti to totshe ti Jehovha a hi gelako ditshuri, kupata ni sotshe sithembiso si a hi gelako ngu wumangwana wathu. Ka gondo yiya, hi na wona siwotiso asi si londiselako: Nji txani txi Jehovha a nga hi thembisa ku hi ninga mbimo yi yi tako? Ngu txihi txitsanisekiso txi Jehovha a nga hi ninga txi kombisako to, sithembiso sakwe si na maheka ngu ditshuri?

3. a) Ngu txihi txithembiso txi dhundwako ngutu ngu malanda a Jehovha? (Mtuletelo 21:3, 4) b) Va angulisa kutxani vamwani ava hi va bhulelako ngu txithembiso txonetxo?

³ Txithembiso txi hi no bhula ngu txona txa dhundwa ngu otshe malanda a Jehovha ya ha mafuni kotshe. (Lera Mtuletelo 21:3, 4.) Jehovha a thembisa ti to ku ni mbimo yi ku no “mbi swa ku txi maneka kambe lifo, hambi kudila, hambi tihuwa, hambi kupandiseka.” Wungi wathu ha thumisa ndimana yiya yo tsakisa yi womba-wombako mayelano ni wutomi wathu wa Paradhise mbimo yi hi txhumayelako. Va angulisa kutxani vamwani mbimo yi hi va bhulelako ngu txithembiso txonetxo? Vona va thuka va womba tiya: “Ina na tiwona toneto?”

4. a) Ngu tihi ti Jehovha a nga ti tiziva ni ku tiwona ngu kale? b) Hahanze ko maha sithembiso dwe, ngu tihi timwani ti Jehovha a nga hi ninga?

⁴ Ti ha kubasani ti to, mbimo yi Jehovha a nga huhutela mpostoli Johani ku e bhala mayelano ni txithembiso txo ta hanya Paradhise, Jehovha a txi ti ziva ti to nyamsi hi ndina va hi txi bhulela vamwani mayelano ni themba yoneyo mbimo yi hi txhumayelako mahungu a manene ya Mfumo. Jehovha a ti woni kale ti to, ti ndina karatela vavangi ku kholwa txithembiso txiya txa “timhaka ta tiphya.” (Isaya 42:9; 60:2; 2 Vak. 4:3, 4) Hi nga va vhunisa kutxani vamwani ti to ve tsaniseka to makatekwa ya ma nga bhalwa ka Mtuletelo 21:3, 4 ma na hetiseka? Ni ku athu hi nga tsaniseka ngu nzila muni? Jehovha a hi ningile sivangelo so pfala sa ti to hi themba to a na hetisisa sithembiso sakwe. Ngu sihi sivangelo soneso?

5. Ngu sihi sivangelo hi ku naso so themba txithembiso txa Txizimu ngu paradhise ni ku hi si mana hayi?

⁵ Hi mana sivangelo so themba txithembiso txa Jehovha txa Paradhise ka mavhersikulo ma londetako. Hi gonda tiya: “Awule a nga txi maneka a di khalahatshile ha txikhaloni txa wukoma a ti khene: ‘Wonani: Sotshe na si hindula si txi maha sa siphya.’ Se a to engeta a txi khene: ‘Bhala, nguko mapswi awa ngo thembeka ni a ditshuri.’ A to engeta kambe a txi khene: ‘Ona mapswi awa ma tatisekile. Ani ngani Alfa ni Omega, ngani Makhato ni Magwito.’”—Mtu. 21:5, 6a.

6. Ngu kutxani sitsanisekiso si ku ka Mtuletelo 21:5, 6 si txi tsanisa themba yathu ka txithembiso txa Txizimu?

⁶ Ngu kutxani tindimana tiya ta Bhiblia ti txi tsanisa themba yathu ka txithembiso txa Txizimu? Dibhuku di di ku Revelação—Seu Grandioso Clímax Está Próximo di womba tiya mayelano ni mavhersikulo yawa: “Ti fana ni ku Jehovha a txo sayina ka vathu vakwe ku a na hetisisa sotshe sithembiso sakwe.” b Sithembiso sa Jehovha si bhatwe ka Mtuletelo 21:3, 4. Kambe ka mavhersikulo 5 ni 6, hi mana asinatura ya Jehovha, i ku ha a thembisako to totshe ngu ditshuri ti na hetiseka. Wona nzila yi Jehovha a hi tsanisekisako ngu yona to hi nga mthemba.

7. I mani a womba-wombako makhatoni ka vhersikulo 5 ni ku ngu kutxani i di ta lisima?

⁷ Txitsanisekiso txa Txizimu ka vhersikulo 5, txi khata ngu kuwomba to: “Awule a nga ti maneka a di khalahatshile ha txikhaloni txa wukoma, a ti khene.” (Mtu. 21:5a) Atiya nda lisima ngutu, nguko adiya dimwedo da makhambi a di a nga womba-womba a pune ka dibhuku da Mtuletelo. Txitsanisekiso txiya hi txi mana ka Jehovha apune, i si nga ngu kuthumisa ngelozi mwendo Jesu Kristu awu a nga wuswa ka vakufa. Ditshuri diya di tiveka hakubasani to hi nga themba mapswi ya ma londiselako. Ngu kutxani? Nguko Jehovha “Txizimu a txi txi si wombiko makuho.” (Tit. 1:2) Ngu toneto, mapswi ya hi nga ma gonda ka Mtuletelo 21:5, 6 ma na hetiseka ngu ditshuri.

8. Ngu tihi ti Jehovha a ti wombako, ti kombisako to Txithembiso txakwe txi na hetiseka? (Isaya 46:10)

⁸ A hi woni txhamuselo ya dipswi “Wonani.” (Mtu. 21:5) Dipswi di di ku “wonani” di nga hunduluxelwa ngu Txigriki, di thumisilwe ka kungi ka dibhuku da Mtuletelo. Direferensiya dimwani di womba ti to dipswi di ku wonani “i nzila yo maha ti to awu a gondako e veka mapimo ka ti ti londiselako.” Ngu tihi ti ti londiselako? Jehovha a womba tiya: “Sotshe na si hundula si txi maha sa siphya.” Ditshuri ku Jehovha a womba-womba mayelano ni ku txitxa aku ku no maheka mbimo yi yi tako, kambe kwakwe a womba-womba nga txithembiso txiya se txi hetisekile.—Lera Isaya 46:10.

9. a) Mapswi ya ma ku “sotshe na si hundula si txi maha sa siphya” ma womba-womba ngu timhaka timbidi ti Jehovha a no ti maha. Ngu tihi? b) Nji txani txi no maheka ka “nzuma” ni “mafu” aya ma kuho nyamsi?

⁹ He xolisisi mapswi ya ma manekako ka ndimana ayi yi londiselako ya Mtuletelo 21:5: “Sotshe na si hundula si txi maha sa siphya.” Ka kapitulo yiya, mapswi yawa ma womba timhaka timbidi ti Jehovha a ti txitxako mwendo ku ti wuseta. Yo khata, Jehovha a na gumisa mafu yawa o biha. Ya wumbidi, Jehovha a na tisa mafu a maphya. Ka Mtuletelo 21:1, hi gonda tiya: “Nguko nzuma yo khata ni mafu o khata si ti fuvile.” “Nzuma yo khata” kuwombwa mifumo ayi yi kuzetelwako ngu Sathani ni madhimoni akwe. (Mat. 4:8, 9; 1 Joh. 5:19) Ati ti nga bhalwa ka Bhiblia ti ku, “mafu” kuwombwa vathu, ava va hanyako ha mafuni. (Gen. 11:1; Mas. 96:1) Ngu toneto , “mafu o khata” kuwombwa vathu vo biha nyamsi. Jehovha kha na mbi gwitela basi ko txitxa mwendo ko lungisa “nzuma” ni “mafu” asi si kuho nyamsi, kambe a na si hiyela e tshumela e si vhaleta. Ene a na vhaleta nzuma ni mafu aya ma ku ho nyamsi ngu “nzuma ya yiphya ni mafu a maphya” i ku ti to a na veka Mfumo wa wuphya, wu no fuma vathu vavanene.

10. Ngu tihi ti Jehovha a no ti hundula ti ve tiphya?

¹⁰ Ngu kulondisa, ka Mtuletelo 21:5, hi gonda ngu ti Jehovha a ti wombako mayelano ni ti a no ti hundula ti va ta tiphya. Wona to Jehovha kha nga womba tiya: “Ni hundula sotshe si i ku sa siphya.” Kambe a di khene “Sotshe na si hundula si va sa siphya.” Jehovha a na hundula sotshe si va so pelela, i ku mafu ni vathu. Nga ha a nga womba ngu kona Isaya, otshe mafu ma na hunduka me fana ni jaradhi ya Edheni. Se mmweyo ni mmweyo wathu a na hunduka e va m’thu wamphya wo pelela. Silima,maphanzeve ni mabhofu va na hanyiswa ni ku vafi va na wuswa.—Isaya 25:8; 35:1-7.

11. Ngu tihi ti Jehovha a nga ruma Johani ku e bhala ni ku ngu txihi txivangelo?

¹¹ Ngu tihi kambe ati ti mahako txienge txa sithembiso sa Txizimu? Jehovha a gete tiya mpostoli Johani: “Bhala, nguko mapswi awa ngo thembeka ni a ditshuri.” (Mtu. 21:5) Jehovha kha nga ruma mpostoli Johani ku e “bhala” dwe, kambe a mningile txivangelo. A di khene: “Nguko mapswi awa ngo thembeka ni a ditshuri.” Tiwombako to dipswi da Txizimu ndo thembeka ni ku nda ditshuri. Ha kombisa kubonga nguku mpostoli a nga tumela txirumo txo “bhala.” Kota wuyelo ha sikota kualakanyisisa ngu txithembiso txa Paradhise ni ku alakanyisisa ngu makatekwa ya hi ma emelako.

12. Ngu kutxani Jehovha a di ni fanelo yo womba to: “Mapswi awa ma tatisekile!”

¹² Msana keto Txizimu txi wombile txani? “Mapswi yawa ma tatisekile!” (Mtu. 21:6) Ka mapswi yawa Jehovha a womba-womba nga sithembiso  sakwe sa Paradhise se si hetisekile. Jehovha a ni fanelo yo womba-womba ngu nzila yoneyo nguko kha txi ngaho atxi txi nga m’tsivelako ku e hetisisa txikongomelo txakwe. Jehovha wa hi ninga txitsanisekiso mayelano ni txithembiso txakwe txi txi londiselako. Ngu txihi?

13. Ngu kutxani Jehovha a di wombile to: “Ani ngani Alfa ni Omega”?

¹³ Nga ha hi nga tiwona ngu kona makhatoni, Jehovha ngene a pune a nga womba-womba kuraru ni Johani ka miwoniso. (Mtu. 1:8; 21:5, 6; 22:13) Ka otshe makhambi a mararu, Jehovha a wombawombile ti ti fanako a txi khene: “Ani ngani Alfa ni Omega.” Alfa i letra yo khata ka abhesedhariyo ya Txigriki, ni ku Omega i letra yo gwita. Jehovha a thumisile mapswi “Alfa ni Omega” kasiku hi vhuna ku pfisisa to, ngaku a txi khata to maha a na ti hetisisa.

14. a) Ningela txikombiso txa mbimo yi Jehovha a nga womba to “Alfa” ni mbimo yi a no womba to “Omega.” b) Ngu txihi txitsanisekiso txi manekako ka Genesisi 2:1-3?

¹⁴ Msana ko Jehovha a di wumbile Adhamu ni Eva, a va gete makungo akwe ngu vathu ni mafu. Bhiblia yi womba tiya: “Se Txizimu txi to va katekisa txi va gela ku kha txona: ‘Velekanani mi txi anda, mi tala ha mafuni mi txi ma fuma.’” (Gen. 1:28) Ngu mbimo yoneyo, Jehovha a wombile to “Alfa.” A ti vekile ha kubasani to a txo khata makungo akwe: Ku ndina hoka mbimo yo lihunzu lo pelela lo engisa la Adhamu ni Eva li tata mafu, li ma hundula me va Paradhise. Ka mbimo yoneyo ya Paradhise, Jehovha a na womba to “Omega.” Msana ko hetisisa kumaha “nzuma ni mafu ni sotshe si si nga tumbulukiswa,” Jehovha a ningete txi tsanisekiso txi manekako ka Genesisi 2:1-3. (Lera.) Jehovha a katekisile ditshiku da wutxhanu ni mambidi, atxi di sawulekisa.  Tiwomba txani toneto? Jehovha a txi tsanisekisa ti to a na hetisisa makungo akwe mayelano ni vathu ni mafu. Ti ndi na hetiseka magwito ka ditshiku da wutxhanu ni mambidi.

15. Ngu kutxani Sathani ti nga maha a di pimisile ti to adi ni wusikoti wo tsivela ku Jehovha e hetisisa makungo akwe?

¹⁵ Msana ko Adhamu ni Evha va di wukete Txizimu, vona va ve vaonhi niku va tshapelisile txionho txonetxo ni lifo ka votshe vanana vakwe. (Var. 5:12) Se eto ti ndi na woneka nga Sathani a onhetete txikongomelo txa Txizimu txo tata mafu ngu vathu vo pelela a va va txi engisako. Ti woneka nga Sathani a mahile ku ti si koteki to Jehovha a womba to “Omega.” Ti nga maha Sathani a di pimisile ti to Jehovha kha na tinzila timwani ati a nga ti thumisako. Ti nga maha kambe Sathani a di pimisile ti to Jehovha a ndi na daya Adhamu ni Evha se a wumba mpatwa wumwani wo pelela kasi kuhetisisa txikongomelo txakwe ngu vathu. Kambe i di ku Jehovha a ti ko maha toneto, Sathani a di mlumbetile kota m’hembi. Ngu kutxani? Nguko, nga ha ti nga bhalwa ngu kona ka Genesisi 1:28, Jehovha a ti gete Adhamu ni Evha ti to vanana vawe va ndina tata mafu otshe.

16. Ngu kutxani Sathani a di pimisile ti to a ndi na lumbeta Jehovha kota wo tandeka?

¹⁶ Ngu yihi nzila yimwani yi Sathani ti nga mahako a di pimisile to Jehovha a nga yi thumisa? Ti nga maha Sathani a di pimisile ti to Jehovha a ndi na tumelela ku Adhamu ni Evha ve veleka vanana vo mbi pelela, ava va no mbi thuka va hokelela kupelela. (Ekl. 7:20; Var. 3:23) Se ngu nzila yoneyo, Sathani a di lumbetile Jehovha kota Txizimu txo mbi sikota ku hokelela makungo a txona. Ngu kutxani? Nguko Jehovha a do ko tumelela ku vanana va Adhamu ni Evha vo mbi pelela va si hokeleli kupelela ti ndina maha ku makungo akwe o tata Paradhise ngu vathu vo pelela ni va ku muengisa ma si hetiseki.

17. Mbimo yi Sathani ni mpatwa wo khata va nga wukela Jehovha, a lulamisile timhaka ngu nzila muni ni ku i nava yihi wuyelo yo gwita? (Wona ni mfota.)

¹⁷ Sathani a si ti alakanyi ti to Jehovha a ndina maha txani. Jehovha a ti ni nzila ya yinene yo hetisisa makungo akwe hambiku Sathani, Adhamu ni Eva va ngati mu wukete. (Mas. 92:5) Jehovha a tumelete to Adhamu ni Eva ve va ni vanana se ngu nzila yoneyo e kombisa ti to kha na ku thuka e hemba. Ni ku Jehovha a kombisile ti to, ngaku a txi womba to kari kha txi nga ho txi txi nga mtshivelako. Jehovha a simamile ni makungo akwe aku maha ti to kuva ni “liveleko ali li ndi no huluxa vanana  vo engisa va Adhamu ni Eva. (Gen. 3:15; 22:18) Liveleko lonelo li ndina ningela wutomi wa lona kota mterulo kasi kuhuluxa vathu. I ku ti Sathani a nga si ti rinzeli. Ngu kutxani? Nguko mterulo wu seketetwe ka lirando lo mbi guma. (Mat. 20:28; Joh. 3:16) Fanelo yiya ya lirando lo mbi guma Sathani kha nga nayo. Se ngu tihi ati ti no maheka ngu ma lulamiselo a mterulo? Ngu magwito ka 1000 wa malembe ya kufuma ka Kristu, Vanana va Adhamu ni Eva vo pelela ava va engisako Jehovha va na hanya ka Paradhise hamafuni nga ha txikongomelo txo khata txa Jehovha txi ngadi ngu kona. Ka mbimo yoneyo ti na va nga Jehovha o womba to “Omega.”

18. Ngu sihi sivangelo siraru si Txizimu txi hi ningako? (Wona dibhokiso di di ku “Sivangelo siraru asi si mahako hi themba txithembiso txa Jehovha.”)

¹⁸ Ngu kuya ngu ti hi nga ti gonda, ngu sihi sitsanisekiso hi nga bhulelako ava va si kholwiko ti to txithembiso txa Jehovha ngu Paradhise txi na hetiseka? Txo khata, ngene Jehovha apune a hi thembisako. Dibhuku da Mtuletelo di khene: “Awule a nga ti maneka a di khalahatshile ha txikhaloni ka wukoma, a ti khene: ‘Wonani: sotshe na si hindula si txi maha sa siphya.’” Ene ani wuzivi ni mtamo ni ku xuva ku hetisisa txithembiso txakwe. Txa wumbidi, ku hetisisa sithembiso sakwe nda ditshuri ngutu ka Jehovha aha ko kwakwe ti mahekile. Ene a womba a di tsani a txi: “Nguko mapswi awa ngo thembeka ni a ditshuri. . . . Ma tatisekile.” Txa wuraru, ngaku Jehovha a txi khata to maha, wa ti hetisisa nga ha mapswi awa ma kombisako ngu kona: “Ani ngani Alfa ni Omega.” Jehovha a na ti veka ha kubasani ti to Sathani m’hembi ni ku mbwo tandeka mbimo yotshe.

19. Ngaku vathu ti txi va karatela kukholwa ka txithembiso txa Txizimu ngu Paradhise, u nga maha txani?

¹⁹ Khumbula ti to, mbimo yi u bhulelako vamwani ngu sithembiso sa Txizimu kutxhumayelani, u tsanisa themba yako ngu sithembiso soneso. Se akuwa, u txo gonda ngu txithembiso txo tsakisa mayelano ni Paradhise yi yi tako nga ha ti bhalwa ngu kona ka Mtuletelo 21:4 se m’thu a txi khene: “Ina ni na tiwona toneto?” U nga maha txani? U nga m’gondela vhersikulo 5 ni 6 ni ku m’txhamusela ti yi ti wombako. M’kombe nzila yi Jehovha a xambanyako ngu yona ku hetisisa txithembiso txakwe kufana ni ku a txo sayina.—Isaya 65:16.