Mbimo yi hi gondako Bhiblia hi nga maha wuxolisisi kasi ku hi pfisisa kha kwati ati hi ti gondako. Kha hi lavi ku gonda kasi ku ziva ti ti ku mu ka Bhiblia dwe. Kambe hi lava ku mana tithomba ta moya mayelano ni wuthu wa Jehovha i ku ti ti no kulisa lirando lathu ngu ngene. Kasi ku maha toneto hi nga ti wotisa tiya: ‘M’bhalo wuwa wa Bhiblia wu ni gondisa txani ngu Jehovha?’

Ngu txikombiso u nga zama ku mana to engeteleka mayelano ni nzila yi Jehovha a kombisako ngu yona lirando, wuzivi, wululami ni mtamo wakwe. Hambiketo wuthu wa Jehovha kha wu gwiteli ka tifanelo tiya dwe. Wu pata tifanelo timwani to tsakisa. Hi nga ti mana hayi to engeteleka mayelano ni tifanelo toneto?

Ku ni kona mu ko pinda 50 wa tifanelo ti manekako ka Índice das Publicações da Torre de Vigia ka msungo mhaka wu ku “Jehovha” ni ka sisungwana mhaka “Matina ya tifanelo.” Maha wuxolisisi mayelano ni didungula di u di gondako. (Ngako u di ni Mkongomiso wa Tifakazi ta Jehovha wo maha wuxolisisi ngu Txitxhangana, lavetela msungo mhaka wu wu ku “Yehovha Xikwembu” se u ya ka txisungwana mhaka txi ku “Timfanelo Ta Yehovha.”)