Ka gondo yiya hi gondile to ku ni mhaka ya lisima a yi hotshethu kumweko ni tingelozi hi patekako ka yona i ku kubasiswa ka ditina da Jehovha. Mafumelo a Jehovha ngu ona i ku a manene ngutu ni ku ma tsimbitisana ni kubasiswa ka ditina dawe. Ti si nga ni mhaka ti to m’thu wa simama a di thembekile ka Txizimu mwendo ahim him, ku basiswa ka ditina da Jehovha ngu yona mhaka ya lisima ngutu.

Ngu kutxani hi txi junyatisa ti to mhaka ya lisima ngutu ditina da Jehovha ni kubasiswa ka dona? He woni sivangelo siraru.

Txo khata, Sathani a nyetisete ditina da Jehovha kumweko ni nduma yakwe ka jaradhi ya Edheni. Txiwotiso txi Sathani a nga wotisa Eva txi kombisa ti to Jehovha Txizimu txi txi si nga ku ni wuha ni ku sileleto si a nga di va ningile i si nga sa sinene. Sathani a kanetile Jehovha ni ku womba ku ene m’hembi. A wombawombile makuhu ngu ditina da Jehovha. Ngu toneto ene a ve ‘Dhiyabhulosi’ ti wombako ku “m’hembi.” (Joh. 8:44) A ku Eva a nga kholwa makuhu a Sathani ene kha engisa Txizimu ni ku a wukete wukoma wa txona. (Gen. 3:1-6) Ni nyamsi Sathani a nga txi simama a womba-womba kubiha ngu ditina da Txizimu ni ku a simama a hangalasa makuhu mayelano ni wuthu wa txona. Se a va va kholwako makuhu oneyo ni vona kha va engisi Jehovha. Phela, ka vathu va Txizimu makuhu o wukela ditina do sawuleka da Jehovha ngu wona wubihi wa hombe ngutu. Edo ngu dona ditshina da kuxaniseka ni wubihi wotshe ha mafuni.

Txa wumbidi, kasi ku sotshe sivangwa si wuyelwa, Jehovha a ti emisete ku emela ditina dakwe ni ku di basisa ka otshe makuhu. Eto nda lisima ngutu ka Jehovha. Ene a womba tiya: “Ani ni na sawulekisa ditina dangu da hombe.” (Eze. 36:23) Ni ku Jesu a ti vekile ha kubasani a ti ti fanelako ku va ta lisima ngutu ka mkombelo wa otshe malanda o thembeka a Jehovha mbimo yi a nga khene: “Ditina dako di na sawulwe.” (Mat. 6:9) Bhiblia ya ti veka hakubasani ngu ku wuyeletela lisima la kudhumisa ditina da Jehovha. Wona sikombiso so kari: “Ningani MKOMA wudhumo awu wu fanelako ditina dakwe.” (1 Mak. 16:29; Mas. 96:8) “Embelelani wudhumo wa ditina da Txizimu.” (Mas. 66:2) “Ni na pfalisa ditina dako kala kupinduka.” (Mas. 86:12) Dikhambi dimwani di Jehovha a nga womba-womba ngu kukongoma a di khe nzumani i ve dithepelani ka Jerusalema mbimo yi Jesu a nga khene: “Tata dhumisa ditina dako.” Ngu toneto Jehovha a xamute a txi khene: “Ani ni di dhumisile, kambe na engeta ni di dhumisa!”—Joh. 12:28. a

Txa wuraru txikongomelo txa hombe txa Jehovha txi tsimbilelana ni ditina dakwe mwendo nduma yakwe. Wona tiya: Msana ka txiduko txo gwitisa ku di gumile mil wa malembe ya kufuma ka Jesu nji txani txi no londisa? Vathu ni tingilozi va na tipfa ngu nzila muni ngu mhaka yiya yo sawulekiswa  ka ditina da Jehovha? Kasi ku hi vhuna ku xamula txiwotiso txiya he khumbuleni timhaka timbidi a ti ti tsimbitisanako ni mhaka yiya. Kuthembeka ka vathu ni wukoma wa wuako wotshe. Ina i na va i di txikarato ka vathu vo thembeka ku ve simama ni kuthembeka kwawe? Ahim him. Vona va na va i di vo pelela niku va na va va di dukilwe da magwito. Wutomi wombi guma wu nava masoni kwawe. Ina ku na simama kuva ni mawonelo yo hambana hagari ka vathu mwendo tingelozi ngu kona ka wukoma wa wuako wotshe? Ahim him. Nguku wu hombe ni wululami wa mafumelo a Jehovha wu na va wu di emeli wu tsana ngu yotshe mbimo. Se kuwombwa txani ngu kubasiswa ka ditina da Jehovha?

Ditina da Jehovha di na va di di sawulekisilwe do pelela ni ku di na va di di basisilwe ka otshe makuhu. Ngu toneto ditina da Jehovha di na simama i di dona da lisima ngutu ka votshe vathu vakwe. Ngu kutxani? Nguku va na simama ve wona Jehovha a txi maha timhaka to xamalisa ngutu. Wona tiya: Nguku Jesu ngu ku tiveka hahatshi a na ningela wotshe mfumo ka Jehovha Txizimu, ‘txi txi va i di sotshe ka votshelele.” (1 Vak. 15:28) Msana keto vathu hamafuni va na tidila ngu ‘kuwulela mfumoni ka wudhumo wa vanana va Txizimu.” (Var. 8:21) Jehovha a na hetisisa txikongomelo txakwe txa mbimo yotshe txo kuva ni wumwewo ka vanana vakwe va hamafuni ni va nzumani—Vaef. 1:10.

Msana ko va ku di mahekile totshe tiya mwaya wa Jehovha wa hamafuni ni wa nzumani wu na tipfisa kutxani? Ngu ditshuri hi na simama hi txi tilava ngutu kudhumisa ditina da Jehovha. M’bhali wa masalmo a susumetetwe kubhala tiya: “Txi na dhumiswe Txizimu. . . Di na dhumiswe yotshe mbimo ditina da txona da wudhumo.” (Mas. 72:18, 19) Mbimo yotshe hi na simama hi va ni sivangelo so tsakisa so maha toneto.

Ditina da Jehovha di emela totshe ti ene i ku tona. Hi txi alakanyisisa ngu ditina da Jehovha ti hi khumbutisa lirando lakwe. (1 Joh. 4:8) Mbimo yotshe ha khumbula ti to Jehovha a hi wumbile ngu lirando, a hi ningile mterulo ngu lirando ni kukombisa wululami ngu nzila yi a fumako ngu yona ngu kona ha ka lirando. Kambe hi na simama hi pfa lirando li Jehovha a hi kombako lona ngu ha ku si gumiko. Hi na susumeteleka kutshuketa hafuhi ka Tate wathu ni ku embelela tindando to dhumisa ditina dakwe ngu ha ku si gumiko.—Mas. 73:28.