1. Ngu yihi lungelo hi ku nayo?

I LUNGELO ya hombe kuva ka sengeletano ya Jehovha! Hi va ka paradhise ya moya a yi nga tala ngu vathu vo dikha a va va ku ni litsako. Ina awe u tipfa u si nga ni lisima ka sengelatano ya Jehovha?

2. Paulo a fananisile txani ka mapapilo akwe?

² Hi nga gonda to tala ka txifananiso atxi Paulo a nga txi thumisa ka mapapilo akwe. Ka mapapilo onewo Paulo a fananisile dibanza ni mmidi wa m’thu. A tshumete e fananisa m’thu mmwani ni mmwani ni sihango sa mmidi.—Var. 12:4-8; 1 Vak. 12:12-27; Vaef. 4:16.

3. Ngu tihi tigondo ta tiraru ati hi no bhula ngu tona ka gondo yiya?

³ Ka gondo yiya hi na bhula ngu tigondo tiraru a ti hi nga ti manako ka txifananiso txa Paulo. Yo khata, hi na gonda * ti to mmwani ni mmwani a ni lisima masoni ka Jehovha. Ya wumbidi, hi na bhula ngu ti to hi nga maha txani ngako hi txi tipfa hi si nga va txilo dibanzani. Ya wuraru, hi na wona to ngu kutxani ti di ni lisima kuzumba hi di bhisi hi txi maha mthumo awu mmwani ni mmwani aku nawu dibanzani.

4. Hi gonda txani ka Varoma 12:4, 5?

⁴ Gondo yo khata hi yi manako ka txifaniso txa Paulo ngu  ti to mmwani ni mmwani a ni lisima ka mwaya wa Jehovha. Paulo a khatile txikombiso txakwe ngu kuwomba tiya: “Kufana ni ku hi ku ni sihango sasingi ka mmidi wumwewo, kambe sihango siya si si mahiko m’thumo wumwewo, ngu toneto nanathu, hambiku hi ku vangi, hi mmidi wumwewo ngu ka Kristu, se mmwani ni mmwane njihango txa mkwawe.” (Var. 12:4, 5) Paulo a txi lava kuwomba txani ngu toneto, ene a txi lava kukhene hambiku hi ku ni mithumo yo hambana dibanzani otshethu hi va lisima.

5. Ngu sihi “sihiwa” asi Jehovha a nga ninga dibanza?

⁵ U txi alakanya ngu vai ku va lisima ka Jehovha ti nga maha u txi pimisa ngu va va thangelako. (1 Vat. 5:12; Vaheb. 13:17) Ditshuri ti to ngu kuthumisa Kristu, Jehovha a ningile dibanza “sihiwa ka vathu.” (Vaef. 4:8) Vanathu vonevo i ku “sihiwa” kupata siro sa Mmidi wu wu Fumako, va vhuni va kona, siru sa Komisawu, vawoneleli va sigava, vagondisi va sikola sa sengeletano madhota a dibanza ni malanda a wuthumeli. Votshe vanathu vonevo va sawutwe ngu moya wo sawuleka ti to ve khatalela tinvuta ta Jehovha ni kuthumela dibanza.—1 Pedro 5:2, 3.

6. Ngu kuya ku 1 Vatesalonika 2:6-8, vanathu ava va nga sawulwa ngu moya wo sawuleka va maha txani?

⁶ Vanathu va nga sawulwa ngu moya wo sawuleka va maha mithumo yo hamba-hambana. Kota siro so hamba-hambana si vhunako mmidi votshe, vanathu va nga sawulwa ngu moya wo sawuleka ni vona va thuma ngutu ti to ve vhuna dibanza. Vona kha va ti laveli nduma. Hahanze keto vona va maha totshe to ve aka ni kutsanisa dibanza. (Lera 1 Vatesalonika 2:6-8.) Ha bonga Jehovha ngu kona ha ka vavamna va va moya ava va khatalako ngu vamwani!

7. Vanathu va va ku ka mthumo wa mbimo yotshe va wuyelwa ngu txani?

⁷ Vamwani dibanzani va nga sawula ti to ve thuma kota varumiwa, vanyaphandule vo sawuleka ni vanyaphandule va mbimo yotshe. Phela vanathu vo tala ha mafuni kotshe va sawute ku va ka mthumo wa mbimo yotshe, wo txhumayela ni kumaha vagondiswa. Vona va vhunile vathu vo tala ti to ve va vagondiswa va Jesu Kristu. Hambiku vanathu vonevo va ku ka mthumo wa mbimo yotshe va si nga ni sawe Jehovha wa va ninga makatekwa o tala. (Marku 10:29, 30) Ha va randa ngutu vanathu vonevo ni ku ha bonga ku va hi di navo mabanzani!

8. Ngu kutxani votshe va va txhumayelako mahungu a Mfumo i di va lisima ka Jehovha?

⁸ Ina i vanathu va va thangelako ni va va ku ka mthumo wa mbimo yotshe va ku ni lisima ka Jehovha? Ahim-him. Mwanathu mmwani ni mmwani awu a txhumayelako mahungu a Mfumo mbwa lisima ka Txizimu ni ka dibanza. (Var. 10:15; 1 Vak. 3:6-9) Phela mthumo wa lisima awu mabanza otshe ma wu mahako ngu maha vagondiswa va mkoma wathu Jesu Kristu. (Mat. 28:19, 20; 1 Tim. 2:4) Votshe dibanzani kupata ni vahuweleli vo mbi bhabhatiswa, vathangetisa mthumo wo txhumayela.—Mat. 24:14.

9. Ngu kutxani vanathu va txisikati i di va lisima dibanzani?

⁹ Jehovha a ningile mithumo ya lisima vanathu va txisikati dibanzani. Ene wa ninga lisima vavasikati ava va nga tekwa, vaveleki, tinoni ni vanathu va txisikati ava va nga mbi tekwa ava va mu thumelako ngu kuthembeka. Makhambi o tala Bhiblia ya womba-womba ngu vavasikati ava va nga tsakisa Txizimu. Vona va khumbulwa ngu txikombiso txawe txa txinene txo kombisa wuzivi,  likholo, kuhiseka, txibindi, wuha ni mithumo ya yinene. (Luka 8:2, 3; Mith. 16:14, 15; Var. 16:3, 6; Vaf. 4:3; Vaheb. 11:11, 31, 35) Ha bonga ngutu Jehovha kuva a di ningile vanathu vava va txisikati mabanzani kwathu, ava va kombisako tifanelo tiya ta tinene!

10. Ngu kutxani vanathu va va nga kumba i di va lisima kwathu?

¹⁰ I kateko kuva ni vanathu vo kumba dibanzani. Ka mabanza mamwani ku ni vanathu vo kumba ava va nga thumela Jehovha malembe o tala. Kambe ku ni vamwani vo kumba ava va ku ngadi kugonda ditshuri. Votshe vanathu vava ti nga maha va txi manana ni txikarato txa malwati ngu kona ha ka tanga. Sikarato soneso si nga va maha va si mahi to tala dibanzani ni ku va si txhumayeli ngu ha va ti lavako ngu kona. Hambiketo, vanathu va maha totshe ti ti va ti kotako ka mthumo wo txhumayela ni ku va thumisa mthamo wawe ti to ve gondisa ni kutsanisa vamwani! Se hotshethu ha wuyelwa ngu mthumo wawe. Ni ku ngu ditshuri vona mba lisima ka Jehovha ni kwathu.—Mav. 16:31.

11-12. Ku va ni vanathu va i ku ngadi vaphya dibanzani ti hi vhuna ngu nzila yihi?

¹¹ Alakanya ngu vaphya ava hi ku nayo dibanzani. Aku va kulako ka mafu yawa ma fumwako ngu Sathani ni kutala ngu tigondo ta makuhu, vona va manana ni sikarato. (1 Joh. 5:19) Hambiketo, ha tsaniswa hi txi wona vaphya vonevo va txi xamula mitshanganoni, va txi txhumayela ni kuemela likholo lawe ngu kutsana. Anu vaphya mi va lisima ngutu ka sengeletano ya Jehovha!—Mas. 8:2.

¹² Hambiketo, vanathu vo tala kha va tsaniseki ti to mba lisima dibanzani. Nji txani txi hi vhunako kuwona ti to hotshethu hu va lisima dibanzani? A hi ti woneni.

13-14. Nji txani txi mahako vamwani ve tipfa i si nga va txilo dibanzani?

¹³ Gondo ya wumbidi ayi hi yi manako ka txifananiso txa Paulo yi hi vhuna kuwona txikarato atxi vathu vamwani va ku natxo nyamsi,  vona va tipfa i si nga va txilo dibazanni. Paulo a bhate tiya: “Hambi idiku mkondo wo womba wu txi: ‘Akuwa ni singa dianza, kha ni lumbi mmidi,’ nga ti si koteki kuva i singa txihango txa wona mmidi. Nzeve ni yona, hambi idiku yo womba, yi txi: ‘Ani, akuwa ni singa diso, kha ni nga txihango txa mmidi,’ nga ti si koteki kuva i singa txihango txa wona mmidi.” (1 Vak. 12:15, 16) Paulo a txi lava kuwomba txani ngu mapswi yawa?

¹⁴ Ngako u txi ti dinganisela ni vamwani banzani u na tipfa u si nga wa txilo. Vamwani dibazani va nga va ni ningo yo gondiswa kwati, yo maha kwati mithumo mwendo kumaha kwati maendo a wudyisi. Se awe u nga ti wona nga khu na ku sikota kumaha ti ti fanako. Eto ti nga kombisa ti to wa tiveka hahatshi. (Vaf. 2:3) Kambe tiwonele. Ngako u txi zumbela kutidinganisela ni vamwani u nga gwitisela kugodhola se u tipfa u si nga wa txilo. Nga ha Paulo a nga womba ngu kona u nga hokela ha ko pimisa ti to mthumo wu u wu mahako dibanzani hi nga wa txilo. Nji txani txi nga kuvhunako ti to u xula mialakanyo yoneyo?

15. Ngu kuya ngu 1 Vakorinto 12:4-11, ngu tihi hi fanelako kutiziva ngu tiningo ti hi ku nato?

¹⁵ Alakanya ngu tiya: Ka mbimo ya Makristu o khata, Jehovha a ningile Makristu mamwani tiningo ta moya wo sawuleka, kambe hi nga otshe Makristu ma nga amukela tiningo to fana. (Lera 1 Vakorinto 12:4-11.) Jehovha a va ningile tiningo ni wusikoti wo hambana-hambana, kambe otshe Makristu ma ti ni lisima ka Jehovha. Nyamsi moya wo sawuleka kha wu hi ningi wusikoti wo maha sidiwukiso. Kambe, mhaka hi nga yona yi ya yimweyo, hi nga otshethu hi ku ni tiningo to fana, kambe hotshethu hi va lisima masoni ka Jehovha.

16. Ngu txihi txialakanyiso txa mpostoli Paulo a txi hi fanelako ku txi engisa?

¹⁶ Hahanze ko tidinganisa ni vamwani hi fanete kuengisa txialakanyiso txa Paulo txo khene: “M’thu ni m’thu a na wonisise mithumo yakwe, se ngu kona a no sikota ku ti  dhumisa ngu mithumo yakwe dwe, i si nga ngu ku ti dinganisa ni vamwani.”—Vag. 6:4.

17. Ngu yihi wuyelo yo londisa txialakanyiso txa Paulo?

¹⁷ Ngako hi txi engisa txialakanyiso txa Paulo txo wonisisa mithumo yathu, hi na ti wona to nathu hi ni ningo ni wusikoti wo kari wa lisima. Ngu txikombiso didhota do kari di nga wona nga kha di na wusikoti wo veka mwomba-wombo wo tsakia, hambiketo di nga wona to da humelela ka mthumo wo txhumayela. Mwendo di nga tumbula to kha di na wusikoti wo maha kwati mthumo kufana ni madhota mamwani a dibanza. Hambiketo ti nga maha di txi ziwa ngu lirando ni kutshuketeleka, aha vanathu ti va hehukela kutshuketa ve ya kombela txivhuno. Ti nga maha kambe di txi ziwa ngu wunene ni wuha. (Vaheb. 13:2, 16) Ngako hi txi wonisisa a ti hi ti kotako kumaha, hi na tsaka ngu mthumo wathu awu hi wu mahelako dibanza. Toneto ti na hi vhuna ku hi si baveli ava va ku ni wusikoti wo hambana ni wathu.

18. Nji txani txi hi vhunako ti to hi tshukwatisa wusikoti wathu wo txhumayela?

¹⁸ Ti si nga ni mhaka ni mthumo wu hi ku nawo dibanzani, mmwani ni mmwani wathu a fanete ku e ti karata ti to e wu maha kwati ni kutshukwatisa wusikoti wakwe. Ngu kuthumisa sengeletano yakwe Jehovha wa hi gondisa ti to hi tshukwatisa wusikoti wathu. Ngu txi kombiso, mitshangano yathu ya hagari ka divhiki ya hi vhuna ti to hi tshukwatisa wusikoti wathu wo gondisa. Ina u ti karatela kuthumisa ati u ti gondako ka mitshangano yoneyo?

19. U nga maha txani ti to u faneleka kuya ka Txikolwa txa vatxhumayeli va Mfumo?

¹⁹ Txikolwa txa va txhumayeli va Mfumo i ningo yimwani ayi yi hi vhunako. Txikolwa txonetxo kubela vanathu va txisikati ni va txiwamna ava va ku ka mthumo wa mbimo yotshe ava va ku ni malembe o khukhela 23 kala 65 wa malembe. Ti nga maha u txi ti wona u si faneleki kuya ka txikolwa txiya. Hahanze ko lavetela sivangelo asi si kumahako u ti wona u si faneleki alakanyisisa ngu ti ti ku mahako u lava kuya ka txikolwa txiya. Ti mahele makungo aya ma no kumaha u faneleka. Ngako u txi ti karata Jehovha a nga kuvhuna u hokelela timhaka ti u nga si pimisi to u nga ti hokelela.

20. Hi nga gonda txa ka Varoma 12:6-8?

²⁰ Gondo ya wuraru ayi hi yi manako ka txifananiso txa Paulo yi ka Varoma 12:6-8. (Yi lere.) Ka tindimana tiya Paulo a kombisa ti to mmwani ni mmwani a na ni tiningo takwe. Kambe ahawa Paulo a junyatisa ti to mmwani ni mmwani a fanete kuthumisa tiningo takwe ti to e aka ni kutsanisa dibanza.

21-22. Hi nga gonda txani ka txikombiso txa Roberto ni Felice?

²¹ Wona txikombiso txa mwanathu Roberto. * Msana ko va a di thumile kota murumiwa ka matiko a hahanze, ene a mani txiavelo txo ya thuma Bhetele ditikoni kwakwe. Hambiku va nga mu tsanisekisa ti to kutxitxa ka txiavelo hi nga ti to a to maha to biha ene a womba tiya: “Ni zumbile mitxima yo tala ni txi tipfa ni si nga wa txilo. Ku hokile mbimo yi ninga pimisa kuleka kuthuma Bhetele.” A tshumete e li manisa kutxani litsako? Didhota dimwani di mu khumbutisile ti to txiavelo tximwani ni tximwani atxi Jehovha a nga hi ninga txi hi lulamisela ku hi ta hetisisa kwati txiavelo txi hi ku natxo konkuwa. Roberto a woni to a ti fanete kuleka kupimisa ngu ti ti  nga pinda, kambe a veka mapimo ka ti a nga ti kotako kumaha konkuwa.

²² Mwanathu Felice Episcopo a mananile ni txikarato txi txi fanako. Ngu 1956 ene ni msikati wakwe va gradhuwarile ka Txikolwa txa Gileadhe ve ya thuma kota varumiwa khe Bolívia. Ngu 1964 vona va ve ni mwanana. Mwanathu Felice a khene: “Ti hi karatete kuleka txiavelo a txi hi nga txi txi dhunda ngutu. Phela kugumile dilembe ni txi tipfa mnando. Kambe ngu kuvhunwa ngu Jehovha ni txitxile mawonelo. Se ni khatile kuhetisisa wutixamuleli wangu wa wuphya wo va tate.” Ina awe u ka txikarato txi txi fanako ni txa Roberto ni Felice? Ina u gumile mtamo ngu kuva u si ngako ka txiavelo a txi u nga ti ka txona kale? I di toneto, ati ti nga kuvhunako ti to u mana litsako, ngu veka mapimo ka ti u nga tikotako kumaha konku. Zumba u di bhisi, u thumisa wusikoti wako ti to u vhuna vamwani, eto ti na kuvhuna ti to u zumba u di tsakile ni kuaka dibanza.

23. Hi fanete kutiha mbimo yo maha txani? Hi na ta bhula ngu txani ka gondo yi yi londiselako?

²³ Mmwani ni mmwani wathu a ni lisima ka Jehovha. Ene a lava ti to hi va siro sa mwaya wumwewo. Ngako hi txi ti ha mbimo yo alakanyisisa ngu ti hi tikotako kumaha ni kutikaratela ku ti hetisisa kha hi na mbi tipfa nga kha hi nga va txilo dibanzani! Se hi nga va wonisa kutxani vamwani dibanzani? Hi nga kombisisa kutxani ti to mba lisima? Ka gondo yi yi londisela hi na bhula ngu mhaka yiya.