1. Ngu tihi to tsakisa ati vaphya vo tala va nga sikota ku ti hokelela?

 DILEMBE ni dilembe mazana-zana a vaphya ma bhabhatiswa ti to ve va Makristu. Ina awe u ti vekete makungo onewo? I di toneto vanathu dibanzani va tsaka ngutu ngu ngawe ni ku Jehovha nene wa tsaka ngutu. (Mav. 27:11) Alakanya ngu totshe ti u nga timaha kasi ku u sikota ku hokelela ko bhabhatiswa. Awe u gondile Bhiblia ngu kuhiseka ti nga maha ku dingana malembe o tala. Awe u tsanisekile ti to Bhiblia ngu ditshuri dipswi da Txizimu. I singa eto basi awe u gondile kuranda nyamne wa Bhiblia i ku Jehovha. Lirando lonelo ngu Jehovha li kute ha koza u tiningetela kwakwe ni ku tshumela u bhabhatiswa. Hi nga pfa ku tsakisa ka tona!

2. Hi na bhula ngu txani ka gondo yiya?

 ² Kha ti kanakanisi ti to likholo lako li dukilwe ngu tinzila to hambana-hambana mbimo yi u nga txi maha mizamo yo hokelela ku bhabhatiswa. Aku u yako u txi kula u na manana ni siduko simwani. Sathani a na zama ku holisa lirando lako ngu Jehovha ni ku maha to u hambuka ka tinzila takwe. (Vaef. 4:14) U nga tumele eto ti maheka. I txani txi no kuvhuna ti to u simama u di thembekile ka Jehovha ni ku hetisisa txixambanyo txako txo mthumela? U fanete kusimama u kula ngu didhawa da moya ‘u ya masoni ka tigondo to hetiseka’ ta Wukristu. (Vaheb. 6:1) Se u nga ti kotisa kutxani kumaha toneto?

3. Ngu tihi ati otshe Makristu ma fanelako ku timaha msana ka bhabhatiso?

³ Msana ko bhabhatiswa hotshethu ti lava hi londisa txialakanyiso atxi Mpostoli Paulo a nga ninga Makristu kulowe khe Efesu.  Ene a ma kuzetile ti to me va ni “wuthu wa ku hetiseka” kota Makristu. (Vaef. 4:13) Ti fana ni ku a txo womba ti to ‘hi fanete hi kula ngu didhawa da moya.’ Ti to hi pfisisa tiya Paulo a fananisile kukula ngu didhawa da moya ni kukula ka mwanana. Vaveleki va tsakiswa ngutu ngu mwanana wo ngadi ku velekwa ni ku va ti guleta ngu ngene. Kambe ene kha nambi zumbela ku va mwanana. Ngu kutsimbila ka mbimo ene ti na lava e “leka ta wanana.” (1 Vak. 13:11) Ti ngu ha ku fanako ni Makristu. Msana ko bhabhatiswa hi fanete kusimama hi kula ngu didhawa da moya. He woni tinzila ati ti nga hi vhunako ku hi sikota ku maha toneto.

4. Ngu yihi yimwani ya tifanelo ayi yi no hi vhuna ku kula ngu didhawa da moya? Txhamusela. (Vafilipiya 1:9)

⁴ Kulisa lirando lako ngu Jehovha. Awe se wa mu randa ngutu Jehovha kambe lirando lako ngu ngene li nga engeteleka. Ngu nzila muni? Mpostoli Paulo a wombile yimweyo ya tinzila ka dibhuku da Vafilipiya 1:9. (Yi lere.) Paulo a khongete ti to lirando la Vafilipiya li “kula ditshiku ni ditshiku.” Se hi nga kulisa lirando lathu. Hi nga maha toneto ngu kuxola “wuzivi ni wutxhari” mbimo yi hi yako hi txi ziva Jehovha hi na ya hi mu randa ngutu ni ku hi na ninga lisima tifanelo takwe ni nzila yi a mahako ngu yona to maha. Ditshiku ni ditshiku hi na lava ku tshukwatisa wuthu wathu kasi ku hi mu tsakisa ni ku hi nambi la kumaha txilo atxi txi no mu henyisa. Hi na maha totshe hi ti kotako kasi ku pfisisa ati a lavako to hi ti maha ni ku tshumela e hi vhuna ti to hi na mahisa kutxani.

5-6. Ngu tihi ti nga hi vhunako ti to hi kulisa lirando lathu ngu Jehovha? Txhamusela.

⁵ Hi nga kulisa lirando lathu ngu Jehovha ngu kuziva kwati mwanana wakwe awu a mu etetelako ngu ku hetiseka. (Vaheb. 1:3) Yimweyo ya tinzila ya yinene yo ziva Jesu ngu gonda ka Tievhangeli ta mune. Ina u sakulete kulera Bhiblia ditshiku ni ditshiku? I di to ahim-him ti ngo txani u txi khata kona kuwa? Mbimo yi u lerako mayelano ni Jesu wonisisa kwati tifanelo takwe. Ene a si karati, ngu txikombiso ene atxi gula vanana atxi va khalahatshisa ha mmidi kwakwe. (Marku 10:13-16) Jesu ati ni lirando ni txingana ngu toneto vagondiswa vakwe va ti pfite va di txhusekile kuwomba ati va nga txi tipfisa tona. (Mat. 16:22) Ka mhaka yiya Jesu a tekelela Tate wakwe wa nzumani. Jehovha nene kha karati. Hi nga womba-womba nayo ngu mkombelo yotshe mbimo, mbimo yi hi mahako mkombelo hi nga mu gela ta mbiluni kwathu. Hi tsaniseka ti to ene kha na mbi hi bhongela nguko ene wa hi randa ngutu ni ku wa khatala ngu ngathu.—1 Pedro 5:7.

⁶ Jesu atxi pfela wusiwana vathu. Mpostoli Matewu a wombile tiya: “Ngako Jesu a di woni dibutho da vathu, a to va pfela wusiwana, nguko va ti ti karate ni kurereka, nga tinvuta to mbi na m’dyisi.” (Mat. 9:36) Se Jehovha a ti pfisa kutxani? Jesu a tshumela e womba tiya: “Tate wanu wa nzumani kha ti lavi ti to ni mmweyo wa va vavadotho e mwalala.” (Mat. 18:14) Hi nga wona kutsakisa ka tona! Mbimo yi hi gondako ngu Jesu lirando lathu ngu Jehovha la kula.

7. Ku va ni wungana ni Makristu ya ma nga vitwa ti nga ku vhunisa kutxani?

⁷ U nga tshumela u kulisa lirando lako ni kukula ngu didhawa da moya ngu ku va ni wungana ni vanathu ava va nga vitwa dibanzani kwako. Wona nzila yi va tsakako ngu yona. Vona kha va tisoli ngu kuva va di mahile txisungo txo thumela Jehovha. Va wotise ngu maexperiyensia aya va nga manana nawo ka mthumo wa Jehovha. Ngako u txi lava kumaha txisungo txa lisima u nga kombela txivhuno kwawe. Phela Bhiblia yi womba ti to “ku di ni valayeli vavangi, ku ni kutsana.”—Mav. 11:14.

8. Nji txani u nga txi mahako ngako u di ni ku kana-kana ka tigondo to kari ta Bhiblia?

 ⁸ Xula ku kana-kana. Nga ha ti nga wombwa ngu kona ka  paragrafu 2 Sathani a na zama ku kukhulumetela ti to u si kuli ngu didhawa da moya. Yimwani ya tinzila ayi a nga yi thumisako ngu maha to u kanakana mayelano ni tigondo to kari ta mu ka Bhiblia. Ngu txikombiso, vathu vamwani va nga zama ku ku kholwisa ti to Txizimu hi nga txona txi nga hi vanga kambe hi to humelela ngu kona ha ka Evolução i ku gondo ya ti to silo si to ti tumbunukela sipune. Ti nga maha u si khali ku alakanyisisa ngu gondo yoneyo mbimo yi u ti ngadi wa m’dotho, kambe konkuwa u yako u txi kula ti nga maha ti lava u wonisana ni mhaka yiya txikolwani. Ati vagondisi va ti wombako mayelano ni Evolução ti nga maha ti txi maneka nga ta pfisiseka. Hambi keto ti nga maha u wona to va si khali ku ti ha mbimo yo alakanyisisa ngu ti to ngu ditshuri ku ni mvangi. Khumbula ti dibhuku da Mavingu 18:17 yi ti wombako: “Awule a khatisako kuangula, a nga a maneka ditshurini; aniko a txita mmwani e ta mkaneta.” Hahanze ko tutumela kutumela ati ti gondiswako txikolwani khata ngu xolisisa kwati ditshuri adi di ku mu ka Bhiblia. Maha wu xolisisi ka mabhuku yathu. U nga tshumela u bhula ni vanathu ava kale va nga txi kholwa ka gondo ya Evolução. U nga va kombela ve ku gela to nji txani txi nga va tsanisekisa ti to ngu ditshuri ku ni mvangi awu a hi randako. Mabhulo oneyo ma na ku vhuna ti to u kholwa ka ti i ku ditshuri.

9. U gonda txani ka experiyensia ya Melissa?

⁹ Mwanathu mmwani wa txisikati a dhanwako Melissa a wuyetwe ngutu ngu kuva a di mahile wuxolisisi mayelano ni ti to ngu ditshuri ku ni mvangi. * Ene a womba tiya: “Txikolwani hi txi gonda ngu Evolução va yi txhamusela ngu nzila yo woneka nga nja ditshuri. Makhatoni ni thavile kumaha wuxolisisi ni txi pimisa ti to ti nga maha ati va ti gondisako mayelano ni Evolução i di ditshuri. Se ngu toneto ni txi thava kumaha wuxolisisi. Kambe ni pimisile ti to Jehovha kha ti lavi ti to athu hi va va makholwa-hava. Se ni mahile wuxolisisi ni gondile dibhuku adi di ku Existe um Criador Que Se Importa com Você? ni mabroxura ya ma ku A Vida—Teve um Criador? ni di di ku A origem da vida—Cinco perguntas que merecem resposta. Atiya ngu ti ni nga txi ti lava na ti sola kuva ni di swete kumaha tiya.”

10-11. Ngu txihi atxi txi nga hi vhunako ku hi simama hi di ni mahanyelo a manene? (1 Vatesalonika 4:3, 4)

 ¹⁰ Vayilela mahanyelo a nzambwa. Mbimo yi u yako u txi kula u hoka ka tanga yo khata kurumbuka i mbimo yi minavelo ya ta mataho yi hisako ngutu. Se Sathani a lava ti to u wa ka milayo yoneyo. Ngu txihi txi nga ku vhunako to u simama u di ni mahanyelo a manene? (Lera 1 Vatesalonika 4:3, 4.) Ka mikombelo yako u pune gela Jehovha ti u ti pfisako ngu tona. M’gele ngu mkombelo ti to e ku ninga mtamo. (Mat. 6:13) Khumbula to Jehovha a ti emisete ku ku vhuna, se ene kha nambi ku bhongela. (Mas. 103:13, 14) U nga tshumela u mana txivhuno tximwani ngu kulera Bhiblia. Melissa, awu hi nga womba-womba ngu ngene a wu a nga ti wonisana ni minavelo ya walo a womba tiya: “Kulera Bhiblia ditshiku ni ditshiku ti ni vhuni ti to ni sikota kulwa ni minavelo ya walo. Atiya ti tshumete ti ni khumbutisa ti to ani ni lumba Jehovha ni ku ni la ku thumela ene wutomi wangu wotshe.”—Mas. 119:9.

¹¹ U nga zame kululamisa timhaka wekha. Womba-womba ni vaveleki vako ngu sikarato a si u mananako naso. Kha ti hehuki kubwabwata ni vaveleki vako ngu sikarato so fana ni siya kambe tini lisima ku maha toneto. Melissa a womba tiya: “Ni khongete kasi ku va ni txibindi se ni gwita ni womba-womba ni papa mayelano ni mhaka yiya. Msana keto ni ti pfite ni di pepile. Ni ku ni txi ti ziva ti to Jehovha atxi ti guleta ngu ngani.”

12. Ngu tihi ati ti nga ku vhunako ti to u maha sisungo sa sinene?

¹² Kongomiswa ngu matshina a milayo a Bhiblia. Mbimo yi u yako u txi kula vaveleki vako va na ku tumelela ti to u maha sisungo u pune. Kambe konkuwa ku ni to tala ati u si ti ziviko. Se ngu tihi ti nga ku vhunako ti to u si mahi sisungo asi si no gwesa wuxaka wako ni Jehovha? (Mav. 22:3) Mwanathu mmwani wa txisikati a dhanwako ku i Kari a womba ti ti nga mu vhuna ti to e maha sisungo sa sinene. Ene a tumbute to Makristu ya ma nga vitwa ngu didhawa da moya kha ma dhependerwi ngu milayo ka txiemo tximwani ni tximwani. Ene a womba tiya: “Ti lava ni pfisisa matshina a milayo a Bhiblia i singa ku gwitela ka milayo dwe.” Se mbimo yi u lerako Bhiblia ti wotise tiya: ‘Ina ati ni ti lerako ti ni gela txani mayelano ni mapimiselo a Jehovha? Ina ku ni ditshina da mlayo adi di nga kongomisako mahanyelo a mina? I di toneto, u nga wuyeliswa kutxani nga ku u txi thumisa ditshina da mlayo donedo?’ (Mas. 19:7; Isaya 48:17, 18) Ngaku u txi lera ni ku alakanyisisa ngu matshina a milayo a kona ti na ku hehukela ku maha sisungo asi si tsakisako Jehovha. Mbimo yi u ya ko u txi kula ngu didhawa da moya u na wona ti to khu na mbi dhependerwa ngu milayo mbimo yotshe nguku se u na va u txi pfisisa mawonelo a Jehovha ngu mhaka yoneyo.

13. Kuva ni vangana va vanene ti nga ku vhuna ngu nzila muni? (Mavingu 13:20)

¹³ Sawula vangana ava va randako Jehovha. Nga ha hi nga tiwona ngu kona ngako u txi sawula vangana ava va dhundako Jehovha u na kula ngu didhawa da moya. (Lera Mavingu 13:20.) Mwanathu mmwani a dhanwako ku i Sara ku vile ni mbimo yi a nga ti luzile litsako. Kambe ku ni txi txi nga m’vhuna ti to e txitxa e tshumela e mana litsako. Ene a womba tiya: “Ni khatile kumaha vangana va vanene ngu mbimo ayi ni nga txi va lava ngutu. Ni txi lulamisela gondo ya Muwoneleli ni mwanathu mmwani wa txisikati. Mwanathu mmwani a ni vhuni ti to ni khata kuxamula mitshanganoni. Ngu kona ha ka ku vhunwa ngu vanathu vava ni khatile ku ninga ngutu lisima gondo yangu nipune ni ku tshumela ni hiseka ka mikombelo. Se ni khatile ku sakulela kuva ni wuxaka wo tsana ni Jehovha ni ku eto ti ni tisela litsako la hombe.”

14. Ngu tihi ti nga vhuna Julien ti to e maha vangana va vanene?

 ¹⁴ Nji txani txi nga ku vhunako ti to u mana vangana ava va nga ku vhunako ku kula ngu didhawa da moya? Julien, awu konku a thumako kota didhota a womba tiya: “Mbimo yi ni nga ti ngadi mphya ni mahile vangana va vanene mbimo yi ni nga txi txhumayela navo. Vanathu vava i ti vo hiseka ni ku va ni vhuni kuwona to mthumo wo txhumayela wa tsakisa. Se ni khatile ku tivekela makungo o va ka mthumo wa mbimo yotshe. Ni tshumete ni tumbula ti to ni txi luza ngutu ngu kuva ni txo gwitela ko maha wungana ni vale i nga di va tanga yangu dwe. Ngu kutsimbila ka mbimo ni tshumete ni maha vangana va vanene i ngadi vabhetelita. Txikombiso txawe txi ni vhunile ku ni tshukwatisa nzila yi ni sawulako ngu yona misakano ni ku atiya ti ni tshuketisile hafuhi ni Jehovha.”

15. Ngu txihi txialakanyiso atxi Paulo a nga ningela Timoti mayelano ni vangana? (2 Timoti 2:20-22)

¹⁵ Hani ngako u txi wona to kuheta mbimo ni mwanathu wo kari ti nga moxa wuxaka wako ni Jehovha? Paulo a txi ti ziva ti to vanathu vamwani ka dibanza da Wukristu do khata va si khatali ngu timhaka ta moya se ngu toneto a nga kuzeta Timoti ti to e hambana navo. (Lera 2 Timoti 2:20-22.) Wungana wathu ni Jehovha mbwa lisima ngutu se kha ha fanela ku tumelela ti to m’thu mmwani e moxa wuxaka wu hi ku nawo ni Jehovha awu hi nga heta malembe ni malembe hi txi wu sakulela.—Mas. 26:4.

16. Ngu yahi makungo aya u nga ti vekelako?

¹⁶ Tivekele makungo a manene. Sawula makungo aya ma no kulisa likholo lako ni ku kuvhuna ti to u ya masoni u kula ngu didhawa da moya. (Vaef. 3:16) Ngu txikombiso, u nga ti mahela txiemiso txa gondo yako u pune ni txo lera Bhiblia mbimo yotshe. (Mas. 1:2, 3) U nga tshumela u wona to u nga tshukwatisa ko khongela mbimo yotshe ni ku mikombelo yako yi fanete yi kombisa ti to wa vitwa ngu didhawa da moya. Timwani ti nga ku vhunako ngu sawula kwati misakano ayi u hungalako ngu yona ni ku tshumela u hungula mbimo yi u yi hetako u txi hungala. (Vaef. 5:15, 16) Ngako Jehovha atxi wona ti to wa maha totshe u nga ti kotako kasi kukula ngu didhawa da moya ene a na tsaka.

17. U wuyeliswa kutxani ngako u txi vhuna vamwani?

 ¹⁷ Ngaku u txi vhuna vamwani u na kula ngu didhawa da moya. Jesu a wombile tiya: “Kuha i kateko ya hombe ngutu kupinda kuhiwa.” (Mith. 20:35) U na wuyelwa ngutu nga ku u txi thumisa mbimo yi u ku nayo ni wuphya wako kasi kuvhuna vamwani. Ngu txikombiso, awe u nga ti vekela makungo o vhuna ava va nga kula ngu tanga ni va va ku ni sikarato sa dihanyo dibanzani. U nga maha toneto ngu va vhuneta ka mithumo ya hamwayani mwendo ngu ku va komba nzila yo thumisa sithumiswa sa eletroniko. Nga ku u di dijaha u nga ti vekela makungo o va dilanda da wuthumeli kasi kuvhuna vanathu dibanzani. (Vaf. 2:4) U nga tshumela u kombisa lirando ka vamwani ava i singako Tifakazi ngu va txhumayela mahungu a manene a Mfumo. (Mat. 9:36, 37) Ni ku ngako ti txi koteka u nga tivekela makungo o va ka mthumo wa mbimo yotshe.

18. I ngu nzila muni ku va ka mthumo wa mbimo yotshe ti nga ku vhunako ti to u kula ngu didhawa da moya?

¹⁸ Ku va ka mthumo wa mbimo yotshe ti nga ku ninga mkhanjo wa ti to u kula ngu didhawa da moya. Kuthuma kota nyaphandule ti nga tula matimba ya ti to u ya ka txikolwa txa vatxhumayeli va Mfumo. U nga tshumela u va ni mkhanjo wo thumela Bhetele mwendo ka mthumo wo aka. Nyaphandule mmwani wa txisikati awu aku nga di mphya a wombile tiya: “Kuheta mbimo ni di ka mthumo wo txhumayela ni vanathu va experiyenti ti ni vhuni ngutu ti to ni kula ngu didhawa da moya msana kova ni di bhabhatisilwe. Txikombiso txawe txi ni vhuni ti to ni kula a mu ka wuzivi wa Bhiblia ni ku tshumela ni tshukwatisa magondiselo angu.”

19. Ngu yahi makatekwa aya u no ma mana ngako u txi simama u kula ngu didhawa da moya?

¹⁹ Mbimo hi u yako hi txi kula ngu didhawa da moya u na mana makatekwa o tala. Awe khu na mbi thumisa wuphya wako ngu ku ti vekela makungo o mbi vhuna txilo. (1 Joh. 2:17) U na tshumela u huluka ka sikarato asi si tiswako ngu kumaha sisungo sa walo. Hahanze keto, u na mana litsako ni ku u na humelela. (Mav. 16:3) Txikombiso txako txa txi nene txi na kuzeta Makristu kuloni vaphya mwendo va vanga kula ngu tanga. (1 Tim. 4:12) Ni ku txa lisima ngutu, u na ti dila ngu kudikha ni ku eneliseka aku ku tiswako ngu tsakisa Jehovha ni ku va ni wuxaka wo tsana ni nene.—Mav. 23:15, 16.