1. Ngu kutxani Jesu a di kombete Jehovha ti to e woneleli valondeteli vakwe?

 KA WUSIKU wo gwita na Jesu a si se fa a mahile mkombelo ka Tate wakwe wa nzumani. Ene a kombete Jehovha ti to e wonelela valondeteli vakwe. (Joh. 17:15, 20) Ditshuri ti to Jehovha kukhukhela kale wa khatalela ni kuvhikela vathu vakwe. Hambiketo Jesu a txi ti ziva ti to valondeteli vakwe va ndi na wukelwa ngu Sathani. Se Jesu a woni ti to vona va ndi na lava txivhuno txa Jehovha kasi ku va si xulwi ngu Sathani.

2. Ngu kuya ngu dibhuku da Masalmo 33:18-20, ngu kutxani hi sa fanela kuthava ngako hi txi manana ni sikarato?

² Mafu awa a Sathani ma tate ngu sikarato asi si khinyavezako Makristu a ditshuri nyamsi. Sikarato soneso si nga hi maha hi godhola hambi ku hi maha ti hi karatela kusimama hi di thembekile ka Jehovha. Kambe nga ha hi no ti wona ngu kona ka gondo yiya, kha ha fanela kuthava txilo. Jehovha wa hi wona, ene wa si wona sikarato asi hi mananako naso ni ku a tiemisete ku hi vhuna ti to hi wonisana naso. Konkuwa he woni sikombiso simbidi sa mu ka Bhiblia asi si kombisako ti to ngu ditshuri Jehovha, wa ‘xayisa ava va mthavako.’—Lera Masalmo 33:18-20.

3. Ngu ka sihi siemo hi nga tipfako hi singa ni wathu?

³ Hambiku hi lumbako mwaya wa vakhozeli va Jehovha wa ha mafuni kotshe, mbimo yimwani hi nga tipfa hi si nga ni wathu. Ngu txikombiso, ava i ku ngadi majovhem va nga tipfa va di vokha ngako va txi txhamusela ati va ti kholwako masoni ka vagondi kulowe txikolwani mwendo ngako va txi txitxa veya ka dibanza dimwani. Vamwani kwathu hi nga karateka mwendo kulwisana ni mipimiso yo tipfa nga kha hi nga va txilo, hi txi pimisa to kha hi nga ni wathu wo hi vhuna. Ni ku hi nga kana-kana  kugela vamwani ati hi ti pfisako tona hi txi pimisa to kha va na mbi tipfisisa ati hi tipfisako tona. Mbimo yimwani ti nga maha hi wona nga kha ngaho wu a khatalako ngu ngathu. Ngako hi txi zumbela ku ti pfisa toneto, hi nga vilela mwendo kukarateka. Kambe Jehovha kha lavi hi tipfa ngu nzila yiya, ngu kutxani hi txi womba toneto?

4. Ngu kutxani Elija a di wombile ti to: “Ngani nokha ni nga sala”?

⁴ Wona txikombiso txa mprofeti Elija. Ene hetile kona mu ka 40 wa masiku a di kubaramani, a txi tutuma Jezebheli awu a nga ti mu lava txitimwi ni hahatshi kasi ku mu daya. (1 Vafu. 19:1-9) Ngu magwito mbimo yi a nga ti kubaramani ka diphala ene a wombile tiya a txi gela Jehovha: “Ngani nokha ni nga sala.” (1 Vafu. 19:10) Phela ku ti ni vamwani vaprofeti. Ngu txikombiso, Obhadhiya a tekile 100 wa vaprofeti e ya va sisa kasi va si dawi ngu Jezabheli. (1 Vafu. 18:7, 13) Se ngu kutxani Elija a di wombile ti to a ti ekha? Ina a ti pimisa ti to vaprofeti ava Obhadhiya a nga sisa va fite? Ina ti nga maha a di tipfite ekha nguku vamwani va nga mbi ema ni nene ka wukhozeli mbimo yi Jehovha a nga ti kombisa to ngene Txizimu txa ditshuri khe mmangoni wa Karmeli? Ina a txo pimisa ti to a walo a nga txi ti ziva ti to ene a ha phangoni? Mwendo kupimisa ku a walo a khatalako ngu ngene? Bhiblia kha yi txhamuseli ti to ngu kutxani Elija a nga ti tipfa a di ekha. Kambe athu ha tiziva ti to Jehovha a si mu woni si nga ni wakwe. Ni ku ene a txi tiziva ti to a nga maha txani kasi ku mu vhuna.

5. Ngu tihi ati Jehovha a nga maha kasi kutsanisekisa ti to Elija a singa ekha?

⁵ Jehovha a vhunile Elija ngu tinzila to hambana-hambana. Ene a mkombete to e mu gela ta mbiluni ngu ku m’wotisa siwotiso siya makhambi mambidi: “Wo maha txani hawa?” (1 Vafu. 19:9, 13) Jehovha a engisete Elija mbimo yi a nga ti womba ta mbiluni kwakwe. Jehovha a xamute Elija ngu ku ti kombekisa kwakwe ni kukombisa ti to ene Njizimu txa mtamo. A tshumete e tsanisekisa Elija ti to ku ni vamwani ava ni vona va nga ti khozela Jehovha. (1 Vafu. 19:11, 12, 18) Ti ha kubasani ti to msana kova Elija a di gete Jehovha ta mbiluni kwakwe,  ni kutshumela e wona xamulo yakwe, a mahile ku hefu! Jehovha a ningile Elija siavelo sa lisima. Ngu txikombiso, ene a kombete ti to e ya tota Hazazeli kota mkoma wa Asiriya, Jehu kota mkoma wa Israyeli ni Elixa kota mprofeti. (1 Vafu. 19:15, 16) Kuva Jehovha a di ningile Elixa siavelo siya ti m’vhuni ku e veka mapimo ka timhaka ta lisima, i si nga kuzumbela kupimisa ngu sikarato asi a mananako naso. Jehovha a tshumete e mninga mngana i ku Elixa. Awe u nga maha txani ti to u amukela txivhuno txa Jehovha ngako u txi tipfa nga khu nga ni wako?

6. Ngu tihi ati u nga ti kombelako ngako u txi tipfa u si nga ni wako? (Masalmo 62:8)

⁶ Jehovha wa kuramba ti to u womba-womba nayo ngu mkombelo. Ene wa si wona sikarato asi u mananako naso ni ku wa kutsanisekisa ti to a na engisela mikombelo yako yotshe mbimo. (1 Vat. 5:17) Jehovha wa tsaka ngutu kuengisela mikombelo ya vakhozeli vakwe. (Mav. 15:8) Se ngu tihi ati u nga ti kombelako ngako u txi tipfa u singa ni wako? Kufana ni Elija, gela Jehovha ta mbiluni kwako. (Lera Masalmo 62:8.) M’gele ati ti ku karatako ni nzila yi u tipfako ngu yona. Kombela Jehovha ti to e kuvhuna kuwonisana ni matipfelo onewo. Ngu txikombiso, ti nga maha u txi tipfa u di wekha, mwendo kuva ni dizowa do txhumayela txikolwani. I di toneto, kombela Jehovha e kuninga txibindi txo u kota kutxhumayela. U nga tshumela u mu kombela wutxhari kasi u sikota kutxhamusela ati u ti kholwako ngu txixonipho. (Luka 21:14, 15) Ngako u txi manana ni txikarato txo tipfa u singa wa txilo, kombela Jehovha e ku ninga mtamo wo ya bhulela Mkristu awu a nga vitwa ngu didhawa da moya. U nga tshumela u kombela Jehovha e vhuna Mkristu wule u ku ya m’gela ta mbiluni kwako ti to e pfisisa sikarato asi u mananako naso. Gela Jehovha ta mbiluni kwako u wona nzila yi a xamulako ngu yona mikombelo yako ni kukombela txivhuno ka vamwani. U txi maha toneto, khu na mbi tipfa u di wekha.

7. U gonda txani ka txikombiso txa Mauricio?

⁷ Jehovha a ningile hotshethu mthumo wa lisima ngutu ti to hi wu maha. Tsaniseka ti to Jehovha wa wu wona wotshe mthumo wako ni ku wa ninga lisima totshe ti u ti mahako kasi kukhatalela siavelo sako dibanzani ni ka mthumo wo txhumayela. (Mas. 110:3) U nga maha txani ti to u zumba u di bhisi ti to u si tipfi u di wekha? Wona txikombiso txa mwanathu mmwani a ku ngadi jovhem a dhanwako ku i Mauricio. * Msana kova a di bhabhatisilwe, mngana wakwe kudotho-kudotho a lekile ditshuri. Ene a womba tiya: “Ti ni pandile ngutu kuwona mngana wangu a txi leka ditshuri, ti ni mahile ni kana-kana to ina na hetisisa txixambanyo txangu txo thumela Jehovha ni simama ni lumba mwaya wakwe. Ngu toneto ni tipfite ni di nokha ni pimisa to kha ngaho awu a pfisisako txikarato  txangu.” Ngu tihi ati ti nga vhuna Mauricio? Ene a tshumela e womba tiya: “Ni engetete mbimo yi ni nga ti yi heta ni txi txhumayela. Atiya ti ni vhuni ti to ni si veki ngutu mapimo ka sikarato asi ni mananako naso. Ni txi mana litsako ni ku ni ti tshumela ni tipfa ni singa nokha mbimo yi ni nga ti thuma ni vamwani ka mthumo wo txhumayela.” Hambi ka timbimo ti ti si kotekiko kutxhumayela ngu mti ni mti hi nga sikota kutsaniswa ngu kutxhumayela ni vamwani ngu kuthumisa kubhala mapasi mwendo telefone. Ngu tihi timwani ati ti nga vhuna Mauricio? Ene a tshumela e womba tiya: “Ni ti zumba ni di bhisi ka mithumo ya dibanzani, ni txi lulamisela ni kuzama ku ya veka kwati maparte ya sigondo aya ni nga ti ningwa. Siavelo soneso si ni maha ni tipfa ni di wa lisima ka Jehovha ni ka vamwani.”

8. Hi nga tipfisa kutxani ngako sikarato si txo ta ngu kulondiselana?

⁸ Athu ha tiziva ti to hi na manana ni sikarato ka masiku awa a magwito. (2 Tim. 3:1) Hambiketo, mbimo yimwani sikarato soneso si nga ta ngu txitshuketi. Hi nga thuka hi manana ni sikarato so pwata so ti hanyisa ngu sona, kutumbula to hi na ni malwati a hombe mwendo kufelwa ngu dixaka. Ka timbimo toneto, hi nga tipfa hi txi nemelelwa ngutu ngu sikarato, ngutu-ngutu sikarato soneso si txo maha ngu kulondiselana. U nga divali, Jehovha wa tiwona, ene a na hi vhuna ti to hi timisela sikarato soneso.

9. Txhamusela simwani sa siduko asi Jobe a nga manana naso.

⁹ Wona txikombiso txa nzila yi Jehovha a nga vhuna ngu yona Jobe wamwamna wo thembeka. Ngu mbimo ya yidotho ene a wetwe ngu sikarato so panda ngutu. Ngu ditshiku da dimwedo a zivile ti to simahakalo so thisa si mahile ti to sifuyo sakwe ni sithumi sakwe si datwe, to panda ngutu kudatwe ni vanana vakwe. (Jobe 1:13-19) Msana keto, ti lavile e wonisana ni malwati o panda ngutu i nga ti silonda sa hombe asi si nga ti humelete ka mmidi wakwe wotshe. (Jobe 2:7) Sikarato siya si mahile Jobe e womba tiya: “Wutomi wangu na wu nyenya.”—Jobe 7:16.

10. Jehovha a mahile txani kasi kuvhuna Jobe ka sikarato sakwe? (Wona mfota wa kapa.)

¹⁰ Jehovha a txi khatalela Jobe. Aku Jehovha a nga txi mu randa ngutu Jobe, Ene a mu ningile asi si nga ti laveka ti to e timisela sikarato sakwe. Jehovha a womba-wombile ni Jobe, e mu khumbutisa ti to ene a ni wutxhari wo mbi na magwito, ni ku ene wa khatalela sivangwa sakwe. Ene a womba-wombile sihari so tala so xamalisa. (Jobe 38:1, 2; 39:9, 13, 19, 27; 40:15; 41:1, 2) Jehovha a tshumete e thumisa dijaha dimwani di nga ti dhanwa ku i Elihu ti to di tsanisa ni kuthavelela Jobe. Elihu a tshumete e mu tsanisekisa ti to Jehovha wa hakela vakhozeli vakwe ava va kombisako kutimisela. Hambiketo Jehovha a tshumete e susumetela Elihu ti to e ninga txivhuno Jobe. Elihu a vhuni Jobe ti to a si pimisi ngutu ngu ngene, ngu ku mu khumbutisa ti to athu hi vadotho ngutu hi txi dinganiswa ni Jehovha M’vangi wa mtumbuluko wotshe. (Jobe 37:14) Jehovha a tshumete e ninga txiavelo Jobe txo khongelela vavamna vale va vavararu ava va nga ti onhile. (Jobe 42:8-10) Jehovha a hi vhunisa kutxani nyamsi ngako hi txi wonisana ni sikarato?

11. Ngu tihi ati Bhiblia yi ti wombako ati ti nga hi thavelelako ngako hi txi manana ni sikarato?

¹¹ Jehovha kha womba-wombi ni nathu ngu kukongoma ngati a nga maha ni Jobe, kambe Ene wa womba-womba ni nathu ngu kuthumisa Dipswi dakwe i ku Bhiblia. (Var. 15:4) Ene wa hi thavelela ngu ku hi ninga themba ya mbimo yi yi tako. Wona to kari ati Bhiblia yi ti  wombako ati ti nga hi thavelelako ngako hi txi manana ni sikarato. Amu ka Bhiblia Jehovha wa hi tsanisekisa ti to kha txi ngaho txi no hi “hambanisa ni lirando la Txizimu” kupata ni sikarato asi hi nga mananako naso. (Var. 8:38, 39) Ene a tshumela e hi tsanisekisa ti to a “hafuhi ka vale va m’dhanako” ngu mkombelo. (Mas. 145:18) Jehovha wa hi tsanisekisa ti to ngako hi txi mthemba, hi nga tsanisela sotshe sikarato hi tshumela hi mana litsako hambi hi txi manana ni sikarato. (1 Vak. 10:13; Jak. 1:2, 12) Dipswi da Txizimu da hi khumbutisa ti to sikarato asi hi mananako naso nza mbimonyana si txi dinganiswa ni wutomi wo mbi guma awu hi no wu mana. (2 Vak. 4:16-18) Jehovha a tshumela e hi thembisa ti to a na thavisa ditshina da sotshe sikarato asi hi mananako naso i ku Sathani Dhawulosi ni votshe ava va mu seketelako. (Mas. 37:10) Ina ku ni mibhalo ayi u nga yi vekisa ha msungo ayi yi nga kuthavelelako ngako u txi manana ni sikarato?

12. Jehovha a lava ti to hi maha txani kasi ku hi wuyelwa ngu ti hi tigondako?

¹² Jehovha a lava ti to hi tiha mbimo yo gonda Bhiblia mbimo yotshe ni kualakanyisisa ngu ti hi ti gondako. Ngako hi txi thumisa ati hi ti gondako likholo lathu li na kula ni ku hi na tshuketa hafuhi ka Tate wathu wa nzumani. Hi txi maha toneto hi na mana mtamo wo tsanisela sikarato. Jehovha a tshumela e ningela moya wakwe wo sawuleka ka vale va thembako Dipswi dakwe. Ni ku moya wonewo wo sawuleka wu nga hi ninga mtamo “wa hombe ngutu” ti to hi wonisana ni sikarato simwani ni simwani.—2 Vak. 4:7-10.

13. Sakudya sa moya asi hi si manako ngu kuthumisa ‘txithumi txo thembeka na txi di ni wutxhari’ si hi vhunisa kutxani ti to hi tsanisela sikarato?

¹³ Ngu kuvhunwa ngu Jehovha ‘txithumi txo thembeka na txi di ni wutxhari’ txa humisa mabhuku o tala, mavhidhiyo ni wutxenje asi si hi vhunako ti to hi aka likholo lathu ni kuzumba hi di khenjemukile ngu didhawa da moya. (Mat. 24:45) Athu hi fanete ku si thumisa sakudya soneso hi ningwako. Mwanathu mmwani wa txisikati wa khe Estados Unidos a kombisile ti to ene wa bonga sakudya soneso sa moya. Ene a wombile tiya: “Ka 40 wa malembe aya ni nga heta ni txi thumela Jehovha ni mananile ni siduko so tala.” Tximwetxo txa siduko soneso ngu dawa ka kokwani wakwe e ngu motorixta awu a nga ti levile. Txiduko tximwani a nga manana natxo ngu lwalelwa ngu vaveleki vakwe aha va nga za ve luza ni ku ene a wonisani ni malwati ya cancro makhambi mambidi. Nji txani txi nga mvhuna ti to e timisela? Ene a tshumela  e womba tiya: “Mbimo yotshe Jehovha wa ni khatalela. Sakudya sa moya asi a ni ningako ngu kuthumisa txithumi txo thembeka, sa ni vhuna ti to ni timisela. Ngu toneto nani ni tipfa kufana ni Jobe awu a nga khene: ‘Kala kuza ni fa, na mbi leka ditshuri dangu!’”—Jobe 27:5.

14. Jehovha a thumisisa kutxani vakhozeli kulothi ti to ve hi vhuna hi di ka sikarato? (1 Vatesalonika 4:9)

¹⁴ Jehovha a trenara vathu vakwe ti to ve randana ni ku thavelelana ka timbimo ta sikarato. (2 Vak. 1:3, 4; lera 1 Vatesalonika 4:9.) Ngu kuetetela txikombiso txa Elihu vanathu va tiemisete ku hi vhuna ti to hi simama hi di thembekile hambi hi txi manana ni sikarato. (Mith. 14:22) Ngu txikombiso wona nzila yi vanathu va dibanza da Diane va nga mkuzeta ngu yona ti to e simama a di tiyile msana kova mwamna wakwe a di beletwe ngu malwati a hombe. Ene a womba tiya: “Ti txi karata ngutu, kambe hi di woni diwoko da Jehovha ni lirando ali a nga li kombisa ka timbimo tiya to karata. Dibanza dathu di tile di ta hi vhuna. Hi txi endelwa ni kufonelwa, ngu ditshuri vanathu va kombisile lirando la hombe. Aku ni si ti kotiko kutsimbitisa mmovha vanathu va txi maha totshe ti to ni ya mitshanganoni ni kutxhumayelani ngako ti txi koteka.” I kateko ya hombe kulumba mwaya wuwa wa moya awu wu ku ni lirando la hombe!

15. Ngu kutxani hi nga tsanisekako to athu hi na sikota kutsanisela sikarato?

¹⁵ Hotshethu ha wonisana ni sikarato. Hambiketo, nga ha hi nga ti wona ngu kona, athu hi na mbi wonisana ni sikarato soneso hokha. Kufana ni tate awu a ku ni lirando, Jehovha mbimo yotshe wa hi khatalela. A tiemisete kuengisa kudila kwathu ngako hi txi kombela txivhuno. (Isaya 43:2) Athu ha tsaniseka ti to hi nga sikota kuwonisana ni sikarato asi hi mananako naso nguko Jehovha a hi ha sotshe asi hi si lavako kasi ku hi wonisana ni sikarato soneso. Ene a hi ningile lungelo yo hi maha mkombelo kwakwe, a hi ningile Bhiblia ni sakudya so tala sa moya ni vanathu ava va hi vhunako ka timbimo to karata.

16. Hi nga maha txani ti to Jehovha e simama e hi khatalela?

¹⁶ Ha bonga ngutu aku Tate wathu a hi khatalelako! “MKOMA ngene kutsaka ka timbilu tathu.” (Mas. 33:21) Hi nga kombisa kubonga ngu kulondola sotshe sivhuno asi a hi ningako. Ni ku ku ni ti nathu hi fanelako ku ti maha ti to hi simama hi khatalelwa ngu Jehovha. I ku ti to hi fanete hi simama hi maha totshe ti hi nga ti kotako kasi ku hi engisa Jehovha ni kumaha ati i ku ta tinene masoni kwakwe. Hi txi maha toneto ene a na hi khatalela!—1 Pedro 3:12.