1. Ngu yihi wuyelo hi yi manako ngako hi txi bhulela vamwani ngu ti hi nga gondisa tona “ditshuri”?

 “U DI zivisile kutxani ditshuri?” Ti ha kubasani ti to awe u khala ku xamula txiwotiso txonetxo makhambi o tala. Atxiya txiwotiso txo khata atxi hi nga txi wotisako nga ku hi txi la ku ziva mwanathu wo kari. Athu ha dhunda ngutu kuziva ati vanathu va nga gondisa tona ditshuri ve tshumela ve randa Jehovha ni ku nanathu ha dhunda ngutu ku bhulela vamwani ngu nzila yi ditshuri i ku da lisima ngu yona kwathu. (Var. 1:11) Mabhulo oneyo ma hi vhuna ku zumba hi txi pimisa ngu lisima la ku va mmweyo wa Tifakazi ta Jehovha. Ni ku eto ti tshumela ti hi vhuna to hi ya masoni hi txi tiemisela “ku hanya mu ka ditshuri” ti wombako ku hanya ngu nzila ayi Jehovha a no yi tsakela ni ku maha ti to e hi ninga makatekwa akwe.—3 Joh. 4.

2. Hi na bhula ngu txani ka gondo yiya?

² Ka gondo yiya hi na wuseta sivangelo so kari asi si hi mahako hi randa ngutu ditshuri. Hi na tshumela hi wona ti to hi na mahisa kutxani ti to hi simama hi kombisa ti to ha randa ningo yiya ya lisima. Ti ha kubasani ti to atiya ti na hi vhuna ku hi ya masoni hi kombisa kubonga a ti Jehovha a nga hi mahela tona i ku ku hi ndindela ka ditshuri. (Joh. 6:44) Ni ku ti na hi vhuna kumana mtamo wo simama hi txhumayela ditshuri diya ka vamwani.

3. Ngu txihi txivangelo txa lisima ngutu txo hi randa ditshuri?

³ Athu ha randa ditshuri ngu sivangelo so tala. Txa lisima ngutu ngu ku athu hi randa Jehovha i ku txisima txa dotshe ditshuri. Ka gondo yathu ya Bhiblia hi zivile Jehovha i singa  kota Nyamitamo, Mvangi wa nzuma ni mafu dwe kambe kota Tate wathu wa lirando awu a khatalako ngutu ngu ngathu. (1 Pedro 5:7) Hi gondile to Txizimu, “Txizimu txa wumbilu ni kupfela, wo swela kuhenya kambe wo tala ngu wuha ni kuthembeka.” (Eks. 34:6) Jehovha wa randa wululami. (Isaya 61:8) Ngu toneto ta mu panda ngutu nga ku atxi hi wona hi txi xaniseka se ene a ti emisete ku gumisa kotshe ku xaniseka ngu mbimo ya kona. (Jer. 29:11) Eto ta tsakisa ngutu! Ngu toneto kha ti hi xamalisi ti to ngu kutxani hi txi mu randa ngutu Jehovha!

4-5. Ngu kutxani Mpostoli Paulo a di fananisile themba yathu ni hangi?

⁴ Ngu txihi tximwani txivangelo txi hi mahako ti to hi randa ditshuri? Ditshuri da hi tisela wuyelo yo tala. Ngu txikombiso ditshuri da mu ka Bhiblia di pata themba ya wu mangwana. Mpostoli Paulo a junyatisile mhaka yiya mbimo yi a nga womba tiya: “Txithembiso txiya, kwathu, txi fana ni hangi ya moya, ayi i ku kutsana ni kuthembeka.” (Vaheb. 6:19) Kufana ni hangi ayi yi rikhisako ngalava themba yathu ayi yi nga seketelwa mu ka Bhiblia yi nga yi rikhisa nga ku hi txi manana ni sikarato ka wutomi.

⁵ Ahawa Mpostoli Paulo atxi womba-womba ngu themba ayi vasawuleki va ku nayo yo hanya nzumani. Kambe mapswi awa ma thuma hambi ka Makristu aya ma ku ni themba yo hanya ngu ha ku si gumiko ka paradhise ha mafuni. (Joh. 3:16) Ngu ditshuri kugonda mayelano ni themba yiya ya wutomi wo mbi guma ti hi maha hi pfisisa ti to kasi hi hanyela txani.

6-7. Ngu yihi wuyelo ayi Yvonne a nga yi mana ngu kugonda ditshuri mayelano ni wumangwana?

⁶ Wona txikombiso txa mwanathu wa txisikati awu a dhanwako ku i Yvonne. Ene kha kuliswa ngu vaveleki ava i ku Tifakazi ta Jehovha, se mbimo yi i ti ngadi mwanana atxi thava ngutu lifo. Ene a womba ti to a khala ku lera mapswi o kari aya ma nga si khukhi msungoni kwakwe aya ma nga ti womba tiya: “Ditshiku dimwani u na wuka u di fite.” Ene a womba tiya: “Mapswi oneyo ma txi ni maha ni pwata wukohe ni txi pimisa ngu wu mangwana. Ani ni txi kholwa ti to hi hanyela kufa dwe. Se ni txi tiwotisa ti to ni hanyela txani? Nguko ani ni si lavi kufa!”

⁷ Ngu kutsimbila ka mbimo, Yvonne a txhumayetwe ngu Tifakazi ta Jehovha. Ene a womba tiya: “Ni khatile ku kholwa ti to ni nga hanya ngu ha ku si gumiko ka paradhise ha mafuni.” Ngu yihi wuyelo ayi Yvonne a nga yi mana ngu gonda ditshuri? Ene a tshumela e womba tiya: “Kuthava kufa ni ku karateka ngu wu mangwana kha ti swi ti ni pwatisa wukohe.” Nga ha u nga ti wonako ngu kona ditshuri nda lisima ngutu ka Yvonne, ni ku ene wa mana ngutu litsako ngaku a txi txhumayela vamwani ngu themba ya wumangwana.—1 Tim. 4:16.

8-9. a) Ka txidinganiso txa Jesu m’thu wule a kombisile kutxani to a ti ninga lisima txuma txi a nga txi mana? b) Ditshuri di ni lisima muni kwako?

⁸ Ditshuri da mu ka Bhiblia di pata mahungu a manene mayelano ni Mfumo wa Txizimu. Jesu a fananisile Mfumo wa Txizimu ni txuma txi txi nga siswa. Nga ha ti nga bhalwa ngu kona ha ka Matewu 13:44, Jesu a wombile tiya: “Mfumo wa nzumani wu fana ni txuma txi txi nga siswa thembweni ko kari, txuma txi m’thu a nga txi tumbula, se e engeta e txi sisa. Kambe kutsakani kwakwe, a to tsula eya xavisa sotshe si a ku naso e xava thembwe yile.” Wona to ahawa m’thu wuwa hi nga ku a to tsimbila e lava txuma. Kambe ene a to yi mana ngu txitshuketi se e maha totshe ti a nga ti  kota to a si luzekelwi ngu yona. Ngu ditshuri ene a xavisile sotshe si a nga ti naso. Ngu kutxani? Ngu ku ene atxi ziva ti to txuma txiya i ti txa lisima ngutu tatinene ku pinda sotshe si a nga di naso.

⁹ Ina nanawe u tipfa ngu nzila yoneyo? Kha ti kanakanisi! Athu ha tiziva ti to kha ti ngaho ti mafu yawa ma nga hi ningako to pinda litsako ali hi li manako ngu thumela Jehovha, ni ku tshumela hi ta mana mkhanjo wo ta hanya mbimo yi yi tako ngu ha ku si gumiko hahatshi ka Mfumo wa Txizimu. Kha ti ngaho ti i ku ta lisima ngutu kupinda lungelo yi hi ku nayo yo wa ni wuxaka wa wunene ni Jehovha. Litsako lathu li tiswa ngu ku “mtsakisa ka totshe timhaka.”—Vakl. 1:10.

10-11. Ngu tihi ati ti nga susumetela Michael ti to e maha kutxitxa ka wutomi wakwe?

¹⁰ Kutala kwathu ti lavile hi maha ku txitxa ka hombe kasi ku tsakelwa ngu Jehovha. Vamwani kwathu ti lavile ve leka mithumo ya timale. Vamwani ti lavile ve leka ku thumela kuganya. Ni ku vamwani ti lavile ve txitxa otshe mahanyelo awe kasi ku ve tsakisa Jehovha. Atiya ngu ti Michael a nga maha. Ene kha kulela ditshurini. Kota dijaha ene atxi trenara kharati. Ene a womba tiya: “Ani ni txi lava kuva m’thu wa mathafu. Se mbimo yimwani ni txi tipfa ni ti txibonda tximwani.” Kambe mbimo yi a nga khata ku gonda Bhiblia Michael a gondile ngu nzila yi Jehovha a yi wonako ngu yona mhaka ya sibhakela. (Mas. 11:5) Michael a tshumela e womba tiya mayelano ni mpatwa wu wu nga mu gondela Bhiblia: “Vona kha va ni gela to ni ti fanete ku leka kulwa kharati; va to simama ve ni gondela Bhiblia.”

¹¹ Mbimo yi Michael a nga txi ya a txi gonda ngu Jehovha, lirando lakwe ngu ngene li txi ya li txi kula. Ene a gwesekile ngutu ngu wuxinji a wu Jehovha awu kombisako vakhozeli vakwe. Ngu mbimo, Michael a woni ti to ti txi lava e maha txisungo txo karata. Ene a womba tiya: “Ani ni txi ziva to kuleka kulwa kharati i ndi nava txisungo txo karata ka wutomi wangu, hambi keto ni txi ti ziva ti to eto ti na tsakisa Jehovha ni ku ni txi tsaniseka ti to ku thumela ene ngu tona i ku ta lisima ngutu ku pinda totshe.” Michael a kombisile to ti wa ninga lisima ditshuri se eto ti mu susumetete to e maha ku txitxa ka hombe ka wutomi.—Jak. 1:25.

12-13. I ngu nzila muni ditshuri da mu ka Bhiblia di nga vhuna ngu yona Mayli?

¹² Kasi ku kombisa lisima la ditshuri, Bhiblia yi fananisa ditshuri ni dilambu adi di woningako txidemani. (Mas. 119:105; Vaef. 5:8) Mayli, wa khe Azerbaijão, wa bonga ngutu liwoningo ali a nga li mana ka dipswi da Txizimu. Ene a kute ka mwaya wu wu nga hambana ngu wukhongeli. Tate wakwe i msulumana aniko mame wakwe a ka wukhongeli wa txijudha. Ene a womba tiya: “Hambi ku ni nga txi kholwa to Txizimu txi ho ku ni ti ni nga si ti pfisisi. Ni txi ti wotisa tiya: ‘Ngu kutxani Txizimu txi di mahile vathu ve xupheka wutomi wawe wotshe ngu magwito txi va teka ve ya hya nzumani?’ Aku vathu va nga txi womba ti to totshe tiya ti humelelako m’thu ngu randa ka Txizimu ni txi ti wotisa tiya: ‘Txizimu muni atxi txi nga tsakako ngu kuwona vathu va txi xaniseka kani?’”

¹³ Mayli a simamile e xota a tixamulo ta siwotiso sakwe. Ngu ku tsimbila ka mbimo ene a tumete gondo ya Bhiblia ni ku ene a bete ditshurini. Ene a womba tiya: “ Ati ni nga ti gonda mu ka Bhiblia ti ni vhuni ti to ni va m’thu a nga tsaka. Tixamulo ati ni nga txi ti mana mu ka Bhiblia ti ni ningile kudikha.” Kufana ni Mayli, hotshethu ha dhumisa Jehovha  Txizimu atxi “txi nga hi humisa txidemani, txi txi hi wuyisa liwoningoni ka txona ko xamalisa.”—1 Pedro 2:9.

14. U nga kombisisa kutxani ti to wa randa ngutu ditshuri? (Wona dibhokiso adi di ku: “ Ditshuri di tshumela di fananiswa.”)

¹⁴ Asiya simwani sa sikombiso asi si kombisako lisima lo wa ha ditshurini. Kha ti kanakanisi ti to ku ni simwani sikombiso u si zivako. Ti ngo txani ka gondo yako upune u xola simwani sa sivangelo asi si ku mahako u randa ngutu ditshuri? Ngaku hi txi dhunda ngutu ditshuri hi na xota tinzila to kombisa to ngu ditshuri athu ha di randa ngutu.

15. Ngu yihi yimweyo ya tinzila hi nga kombisako ngu yona ti to athu ha randa ditshuri?

¹⁵ Hi nga kombisa ti to ha randa ditshuri nguko mbimo yotshe hi gonda Bhiblia ni ku lera mabhuku athu. Ti si nga ni mhaka ni ti to hi ngadi kukhata ku thumela Jehovha mwendo i kale hi txi mu thumela, mbimo yotshe ku ni to tala ati hi nga ti gondako. Direvhista do khata da Muwoneleli di wombile tiya: “Hamafuni hawa ku tate ngutu makuhu se ti nga karata ku tumbula ditshuri. Se ngaku u txi di mana ku laveka ku u simama u di xota. . . .  Ngaku u txi di manela u fanete kumaha mizamo yo di ñolisisa. U nga eneliseki ngu mana ditshuri dimwedo. . . . Simama u xota.” Kugonda ta karata, kambe nga ku hi txi maha mizamo hi na wuyelwa.

16. Ngu yahi magondelo aya u ma wonako ma txi ku wuyelisa? (Mavingu 2:4-6)

¹⁶ Hi nga hotshethu hi dhundako ku lera ni kugonda. Kambe Jehovha wa hi kuzeta ti to hi simama hi “xota” ni ku hi simama hi “lava” ditshuri kasi ku hi di pfisisa. (Lera Mavingu 2:4-6.) Nga ku hi txi maha mizamo yoneyo hi na wuyelwa ngutu. Corey a womba ti to mbimo yi a gondako Bhiblia a zama kugonda ndimana ngu ndimana. Ene a womba tiya: “Ani ni lera totshe titxhamuselo ta hahatshi, ni lera yotshe mibhalo yo longoloka ni kumaha wuxolisisi wo engeteleka. . . . Na wuyelwangutu ngu kuthumisa magondelo yawa.” Ti nga maha hi thumisa magondelo yo fana ni yawa mwendo yo hambana kambe hi nga kombisa to ha bonga ditshuri di hi nga di mana ngu ku tiha mbimo yo di gonda.—Mas. 1:1-3.

17. Ti womba txani ku hanya ngu ditshuri? (Jakobe 1:25)

¹⁷ Ditshuri ti to kha ta enela kugonda ditshuri basi. Kasi ku hi wuyelwa ngutu ngu dona hi fanete hi hanya ngu ditshuri, ti wombako kuthumisa ati hi ti gondako ka wutomi wathu. Hi txi maha toneto ngu kona hi no mana litsako la ditshuri. (Lera Jakobe 1:25.) Hi nga tsanisekisa kutxani ti to hi hanya ngu ditshuri? Mwanathu mmwani wa txiwamna a womba tiya: Ku ti xolisisa hipune ni kuwona amu hi nga tshukwatisako kona ti nga vhuna. Mpostoli Paulo a junyatisile mhaka eyo ngu womba tiya: “Ka ti hi nga hoka ka tona, he simamiseni hi tsimbila ngu nzila yimweyo.”—Vaf. 3:16.

18. Ngu kutxani hi txi maha totshe hi nga ti kotako to “hi hanya mu ka ditshuri”?

¹⁸ Alakanya ngu wuyelo ayi yi tiswako ngu ku maha totshe hi nga ti kotako to hi simama “hi hanya ka ditshuri”! Wuyelo yo hanya ka ditshuri kha ti gwiteli ko tshukwatisa wutomi wathu dwe kambe ti tshumela ti tsakisa Jehovha kumweko ni vanathu. (Mav. 27:11; 3 Joh. 4) Ngu ditshuri, asiya ngu sona sivangelo sa lisima ngutu asi si hi mahako ti to hi hanya ni ku randa ditshuri.