Ina u lerile kwati misungo ya timhaka ta marevhista a Muwoneleli a dilembe diya? A hi wone mwendo u nga si kota kuxamula siwotiso si si londiselako:

Hi fanete ku va ñola ngu nzila yihi vasawuleki?

Ditshuri ti to hi fanete kutekelela likholo lawe, hambiketo kha ha fanela ku va ñola ngu nzila yo sawuleka. Athu kha hi lavi “kuxamalela vathu.” (Judha 16, NM) Kha hi va wotisi mayelano ni ta themba yawe.—w20.01, diphepha 29.

Nji txani txi nga kutsanisekisako ti to Jehovha wa kuziva kwati?

Bhiblia yi womba ti to Jehovha a ku woni u se velekwa, ni ku ene wa xamula mikombelo yako. Ene wa ti ziva ati u ti alakanyako ni ti ti ku mbiluni kwako, ni ku simaho sako si nga mu tsakisa mwendo ku mu henyisa. (1 Mak. 28:9; Mav. 27:11) Ene ngene a nga kundindela kwakwe.—w20.02, maphepha 12.

Ngu sihi sikombiso sa sinene so ziva mbimo ya yinene ya kuwomba-womba ni ya kumalala?

Hi nga womba-womba ni Jehovha hi di txhusekile. Hi nga womba-womba ngako m’thu a txi huma hanzila. Madhota ma fanete kukawuka ngako m’thu a txi lava txialakanyiso. Kha hi lavi kuwomba-womba mwendo kulava kuziva to tala mayelano ni ti wu mahiswako tona mthumo wathu amu ku tsimbiswako. Kha hi womba-wombi ngu ti i ku txihunja.—w20.03, maphepha 20-21.

Humbi ayi yi nga wombwa ka dibhuku da Joyeli 2 yi hambanisa kutxani ni humbi yi yi wombwako ka Mtuletelo ndima 9?

Dibhuku da Joyeli 2:20-29 di womba ti to Txizimu txi yisa kule humbi ni ku a ndi na tshumetela malembe yale humbi yi nga xasela. Msana keto, Txizimu txi ndi na tshakunuta moya wa txona. Wuprofeti wonewo wu hetisekile mbimo yi Bhabhilona a nga dhumela Israyeli wu gwita wu ta hetiseka kambe ka malembe ya ma nga londisela. Dibhuku da Mtuletelo 9:1-11 di womba-womba ngu vasawuleki ava va emelwako ngu humbi ava va txhumayelako ti to Txizimu txi na lamula mafu yawa a Sathani, eto ti maha ku vathu va va emako ni Sathani va txi nyeka-nyeka.—w20.04, maphepha 3-6.

I mani mfumeli wa wuphemba nyamsi?

I Rússia kumweko ni matiko ya ma emako nayo. Vona va fuma amu ku manekako vathu va Txizimu ni kutshumela ve va xanisa, ve tiveka hakubasani ti to mbalala va Txizimu. Mfumeli wa wuphemba wa simama e lwisana ni mfumeli wa wulambwe.—w20.05, diphepha 13.

Ina tifanelo ti ti wombwako ka dibhuku da Vagalatiya 5:22, 23 ngu tona basi ti mahako txienge txa “mihando ya Moya”?

Ahim-him. Moya wo sawuleka wa hi vhuna ku hi sakulela timwani tifanelo to fana ni wululami. (Vaef. 5:8, 9)—w20.06, maphepha 17.

Ngu yihi phango yo kombisa silo sako ka internet?

Asi u kombisako ka internet ti nga maha vathu ve pimisa ti to wo gwira ngu si u ku naso, i si nga ti to wo tiveka hahatshi.—w20.07, maphepha 6-7.

Ngu tihi ati vatxhumayeli wa mahungu a Mfumo va nga ti gondako ka vadoti va sihaka?

Vona va dota amu si dyelako kona sihaka. Vona va ziva kuthumisa kwati tifarameti tawe. Va dota hambi ku txi peka moya. Nathu hi nga maha ti ti fanako hi txi txhumayela.—w20.09, maphepha 5.

Hi nga vhunisa kutxani sigondo sa Bhiblia ku si kulisa lirando lawe ngu Jehovha?

Hi nga va kuzeta kulera Bhiblia ni kualakanyisisa ngu ti va ti gondako. Hi nga va gondisa ku ve maha mkombelo.—w20.11, maphepha 4.

Mba mani va patekako ka ‘votshe va no tshumela ve hanya ngu ka Kristu’?—1 Vak. 15:22.

Paulo a si wombi ti to vosthe vathu va na wuswa ngu ka vafi? Ene a ti womba-womba ngu va “va nga sawulekiswa ngu Jesu Kristu.” (1 Vak. 1:2; 15:18)—w20.12, maphepha 5-6.

Nji txani atxi va no txi maha ava va no “hinduluswa txiemo. Ngu txikhatianyana txo fana ni kuphanima ka diso ngu kuvetwa ka mpundu wo gwitisa”?—1 Vak. 15:51-53.

Vona va na fuma ni Kristu ve dyisa vathu ngu ndoga ya simbi. (Mtu. 2:26, 27)—w20.12, maphepha 12-13.