Xamulo i ahim-him, Bhiblia ni matimu kha ma kombisi ti to eto ti txi maheka.

Nzila yi ndimana yiya yi nga hunduluxelwa ngu yona yi ti maha ti woneka nga ka mbimo ya Paulo ku ni va nga ti bhabhatiswa ngu kota ya va nga fa. Ngu txikombiso, Bhiblia yo Sawuleka yi womba tiya: “Ngako vafi va si wuki, nji txani vathu va txi ti bhabhatiselwa ngu vona kani?”

Txigondi tximwani txi dhanwako ku i Gregory Lockwood txi wombile ti to mhaka ya kubhabhatiswa “ngu kota ya vakufa” kha yi nga ho amu ka Bhiblia hambi ni ka matimu. Txigondi tximwani txi dhanwako ku i Gordon D. Fee txa tumelelana ni mhaka yiya. Txona txi bhate ti to ka Bhiblia ni ka matimu mamwani kha yi nga ho bhabhatiso ya lixaka liya. Ene a tshumete e womba ti to ka Testamentu ya Yiphya kha ti ngaho ti kombisako ti to eto ti txi mahwa ka titxhetxhe.

Bhiblia yi womba to vagondiswa va Jesu va ndi na ya ‘phindula vamatiko votshe ve maha vagondiswa vakwe, ve va bhabhatisa . . , va txi va gondisa kuvekisa totshe tiya a nga va leleta tona.’ (Mat. 28:19, 20) Na m’thu a si se bhabhatiswa a ti fanete e gonda ngu Jehovha ni Jesu ni kutshumela e va engisa. M’thu wu a nga ti fite a si na ku timaha toneto, ni ku Mkristu awu a hanyako a si na ku va tshunda kumaha eto.—Ekl. 9:5, 10; Joh. 4:1; 1 Vak. 1:14-16.

Se Paulo a txi lava kuwomba txani?

Vathu vamwani va Vakorinto va si kholwi to ku na va ni kuwuka ka vafi. (1 Vak. 15:12) Paulo a txi va kaneta. Ene a wombile ti to “yotshe mbimo na fa.” Hambiketo a txi nga txi hanya. Ti si nga ni mhaka ni ku a nga ti manana ni tiphango, a txi na fa ene a ndi na wuswa e va txivangwa txa moya kufana ni Jesu.—1 Vak. 15:30-32, 42-44.

Vathu Vakorinto ti txi lava ve tiziva ti to ava i ku vasawuleki va ndi na manana ni sikarato mbimo yotshe, ni ku va ndi na fa se i di kona va no wuswa. Kubhabhatiswa “ngu ka Kristu” ti pata “kubhabhatiswa kufana kwakwe.” (Var. 6:3) Eto ti womba ti to ava va nga sawulwa va ndi na wonisana ni sikarato ve fa se i di kona va no wuswa ve ya nzumani.

Ku di pindile malembe mambidi Jesu a di bhabhatisilwe matini a gete vagondisa vakwe ti to va ndi na ‘amukela txibhabhatiso txi ani ni no txi amukela.’ (Marku 10:38, 39) Jesu a si njo bhabhatiswa matini. Ene a txi lava kuwomba ti to ku simama kwakwe a di thembekile ku ndi na mu maha e dawa. Paulo a bhalete vasawuleki a txi khene: “Akuwa hi xanisekako kumweko nayo, ti komba ti to kha ditshuri hi na dhumiswa kumweko nayo kambe.” (Var. 8:16, 17; 2 Vak. 4:17) Se ni vona va ndi na xaniseka ve fa, i di kona va no wuswa ve ya nzumani.

Ngu toneto mapswi a Paulo ma ti fanete ku me bhaliswa tiya: “Ngako i si nga toneto, nji txani va ndi no wuyelwa ngu txona ava va bhabhatiswako ngu txikongomelo txo ve fa kani? Ngako vafi va si wuki, ngu kutxani vathu va txi bhabhatiswa ngu txikongomelo txiya kani?”