MAHORANA o kari ma ti ko tsimbila ka didhoropa da Baguio khe Filipinas. Ona ma woni txikarinyana txa mabhuku, kambe kha va txitshuketela. Mwanathu Helen mmweyo wa va va nga ti ka txikarinyana a to va komba maseko. Kambe mahorana ale kha ma ema, kambe ma tsakile ngu ku Helen a nga ma komba maseko.

Mbimo yi mahorana ale ma nga ti ka xapa ma txi tshumela mtini, ma woni ma letera a jw.org ma nga ti ka Nyumba ya Mfumo. Se me khumbula to maletera ale ma ti ma woni khe ka txikarinyana. Ona ma emile me ya wona mbimo ni masiku ya kuñolwako ngu ona mitshangano ka Nyumba yile ya Mfumo.

Mahorana ale ma yite me ya xalela mitshangano ayi yi nga londisela. Mbimo yile ma nga hoka, va ti ya wona Helen. Me khumbula to ngene wule a nga va komba maseko. Helen a womba tiya: “Mbimo yi ma nga ni tela, ni ti thava ni txi pimisa to kutilava ni to maha to biha.” Kambe ona ma mu txhamusete ati ti nga maheka.

Mahorana ale ma yi tsakete mitshangano, ni ku ma tipfite nga mo va mtini. Mbimo yi va nga wona to vanathu va ti ko basisa Nyumbani ya Mfumo msana ka mitshangano, ni ona ma kombete kuvhuneta. Dimwedo da mahorana kha diswi di txi zumba Filipinas, kambe adi dimwani di ngadi di txi xalela mitshangano ni ku da gonda Bhiblia, totshe ngu mhaka ya maseko!