1. Ngu txihi tximwetxo txa sivangelo atxi txi mahako ti to mwaya wa Jehovha wu va ni wumwewo?

HA TSAKA ngu kupateka ka mwaya wa Jehovha. Ngu kutxani mwaya wonewo wu di ni kudikha ni wumwewo? Tximwetxo txa sivangelo ngu ti to mmwani ni mmwani a maha ti a nga ti kotako ti to e xonipha wusungo awu Jehovha a nga wu veka. Phela ngako hi txi xonipha wusungo awu Jehovha a nga wu veka wumwewo wathu wu na engeteleka.

2. Ngu sihi siwotiso asi hi no bhula ngu sona ka gondo yiya?

² Ka gondo yiya hi na bhula ngu va Jehovha a nga va veka kuva misungo dibanzani. Hi na tshumela hi mana tixamulo ta siwotiso asi si londiselako: Ngu wuhi mthumo awu Jehovha a nga ninga vavasikati dibanzani? Ina ditshuri ti to votshe vanathu va txiwamna misungo ka vanathu va txisikati dibanzani? Ina ku va msungo dibanzani ta fana ni ku msungo ha mwayani? Kukhata he bhuleni ngu ti hi fanelako ku va wonisa tona vanathu va txisikati.

3. Hi nga kombisisa kutxani kubonga mthumo awu vanathu va txisikati va wu mahako?

³ Ha va bonga ngutu vanathu vatxisikati ava va thumako ngutu ti to ve khatalela timwaya tawe, ve txhumayela mahungu a manene ni ku vhuneta ka mithumo yimwani dibanzani. Hi nga kombisa kubonga kwathu ngu kualakanyisisa ngu nzila ayi Jehovha ni Jesu va va wonako ngu yona vanathu vavasikati.  Hi nga tshumela hi wuyelwa ngu nzila ayi mpostoli Paulo a nga ñola ngu yona vanathu va txisikati.

4. Bhiblia yi ti kombisa kutxani ti to Jehovha wa ninga lisima vavasikati kufana ni majaha?

⁴ Bhiblia yi ti veka hakubasani ti to Jehovha wa ninga lisima vavasikati kufana ni vavamna. Ngu txikombiso, ka timbimo ta Makristu o khata Jehovha a ningile moya wo sawuleka vavasikati kumweko ni vavamna mtamo wo maha sidiwukiso so fana ni kuwomba-womba ngu tidimi. (Mith. 2:1-4, 15-18) Votshe, vavasikati kumweko ni majaha va sawutwe ti to me ya fuma ni Kristu nzumani. (Vag. 3:26-29) Vavasikati kumweko ni vavamna va na mana hakhelo ya wutomi wo mbi na magwito ha mafuni. (Mtu. 7:9, 10, 13-15) Ni votshe kumweko ni vavamna va ningilwe mthumo wo txhumayela mahungu a manene. (Mat. 28:19, 20) Dibhuku da mithumo di womba-womba ngu wamsikati awu a nga ti dhanwa ku i Prisila awu nga ti thuma kumweko ni mwamna wakwe Akila ni ku a vhuni kutxhamusela kwati Bhiblia wamwamna mmwani a nga ti gondile ngutu a nga ti dhanwa ku Apolosi.—Mith. 18:24-26.

5. Dibhuku da Luka 10:38, 39, 42, di ti kombisisa kutxani ti to Jesu a txi xonipha vavasikati?

⁵ Jesu a txi xonipha vavasikati ni ku va teka i di va lisima. Ene a si londisi sihena sa Vafarisi ava nga si xoniphi vavasikati ni ku nem va si lavi kuwomba-womba nawo amu ku ku ni vathu ngutu-ngutu ku va gondisa timhaka ta moya. Hahanze keto ene a txi gondisa votshe timhaka to tshima ta moya. * (Lera Luka 10:38, 39, 42.) Jesu a tshumete e tumelela ku vavasikati ve tsimbila-tsimbila nayo ka maendo akwe o txhumayela. (Luka 8:1-3) Ni ku Jesu a rumete vavasikati ti to ve ya zivisa vapostoli ta kuwuka kwakwe.—Joh. 20:16-18.

6. Paulo a ti kombisile kutxani ti to wa xonipha vavasikati?

⁶ Mpostoli Paulo a khumbutisile Timoti ti to e xonipha vavasikati. Ene a gete Timoti ti to e ñola vavasikati va hombe nga va ‘vamame vakwe’ ni ku e angula mahorana nga ‘tindiyakwe.’ (1 Tim. 5:1, 2) Paulo a vhunile Timoti ti to e va Mkristu wo vitwa, hambiketo ene a ti ti ziva ti to a ene a ti gondisilwe “Mibhalo yo sawuleka” ngu mame wakwe ni kokwani wakwe. (2 Tim. 1:5; 3:14, 15) Mbimo yi Paulo a nga bhalela Varoma a wombile matina a vavasikati vo kari. Ene kha gwitela ko womba-womba ngu mthumo wu va nga ti wu maha dwe, kambe a kombisile kubonga.—Var. 16:1-4, 6, 12; Vaf. 4:3.

7. Ngu sihi siwotiso asi hi no bhula ngu sona?

⁷ Nga ha hi nga ti wona ngu kona, kha ku nga ho ahawa Bhiblia yi kombisako ti to vavasikati va hahatshi ka vavamna. Vanathu va txisikati i thomba, ni ku madhota ma ti ziva ti to vanathu vatxisikati va vhuneka to dibanzani ku va ni wumwewo ni kudikha. Kambe ku ni siwotiso asi hi fanelako ku si xamula so fana ni siya: Ngu kutxani Jehovha a txi lava ku vavasikati ve sunga difadhuko ka siemo so kari? Aku i ku vavamna dwe va vako madhota ni malanda a wuthumeli, ina ti lava kuwomba ti to mwanathu mmwani ni mmwani wa txiwamna msungo wa vanathu va txisikati?

8. Ngu kuya ngu dibhuku da Vaefesu 5:23, ina votshe vanathu va txiwamna misungo ya vanathu va txisikati dibanzani? Txhamusela.

⁸ Xamulo i ahim-him. Mwanathu wa txiwamna hi nga msungo wa vanathu votshe vatxisikati dibanzani, msungo ngu Kristu. (Lera  Vaefesu 5:23.) Ha mwayani wamwamna msungo ka msikati wakwe. Mwanana wa mfana awu a nga bhabhatiswa hi nga msungo ka mame wakwe. (Vaef. 6:1, 2) Ku va msungo dibanzani kha ti fani ni ku va msungo ha mwayani. (1 Vat. 5:12; Vaheb. 13:17) Dihorana adi di nga huma m’ti di fanete di xonipha vaveleki va dona kumweko ni madhota. Hambiketo kufana ni vanathu va txiwamna dona di simama di hahatshi ka wusungo wa Kristu.

9. Ngu kutxani wamsikati ti txi lava e fenengeta msungo a txi maha mithumo yo kari?

⁹ Ditshuri ti to Jehovha a vekile vavamna ti to ve thangela ka ta wukhozeli ni kugondisa dibanzani, ni wutixamuleli wonewo kha ninga vanathu va txisikati. (1 Tim. 2:12) Ngu kutxani? Ti to ku si vi ni vhilinganya dibanzani. Ditshuri ti to ku ni siemo asi ti lavako ku mwanathu wa txisikati e maha mithumo ayi yi mahwako ngu vanathu va txiwamna, kambe Jehovha a lava ti to e fenengeta msungo. * (1 Vak. 11:4-7) Jehovha kha geli vavasikati ti to ve fenengeta msungo ngu kulava ku va veka hahatshi, kambe ene a va ninga lungelo yo ve kombisa ti to va tiveka hahatshi ka wusungo awu ene a nga wu veka. Konkuwa he bhule ngu txiwotiso txiya: Ava i ku msungo ha mwayani ni dibanzani, va fanete ve wu wonisa kutxani wusungo wawe?

10. Nji txani txi nga mahako ku didhota di mahela txisungo dibanza?

¹⁰ Madhota ma randa Kristu ni “tinvuta” ati Jehovha ni Jesu va nga tiveka manzani kwawe. (Joh. 21:15-17) Ngu kulava kuvhuna dibanza ti nga maha didhota di fananisa wutixamuleli awu di ku nawo ni wu tate a ku nawo  ha mwayani. Ene a nga pimisa ti to aku tate a mahako sisungo asi si vhikelako mwaya nene a nga maha sisungo asi si no vhikela tinvuta ta Txizimu. Vanathu vamwani va nga lava ti to didhota di maha toneto, ngu ku di kombela ku di va mahela sisungo. Kambe, ina wutixamuleli awu didhota di ku nawo wa fana ni wu msungo wa mwaya wu ku nawo?

11. Ngu kuhi kuyelana ku kuho ka wutixamuleli wa msungo wa mwaya ni wa didhota?

¹¹ Mpostoli Paulo a wombile ti to kuho kuyelana ka wutixamuleli awu msungo wa mwaya wu ku nawo ni wu didhota di ku nawo. (1 Tim. 3:4, 5) Ngu txikombiso, Jehovha a lava ti to mwaya wu engisa msungo wa mwaya. (Vakl. 3:20) Ene a lava ti to dibanza di engisa madhota. Jehovha a rinzela ti to misungo ya timwaya kumweko di madhota ve tsaniseka ti to ava va va khatalelako va dya ngu didhawa da moya. A tshumela e lava ti to ava va va khatalelako ve tipfa va txi randwa. Kufana ni misungo ya timwaya, madhota ma tsaniseka ti to ava va va khatalelako va mana txivhuno ngu timbimo ta sikarato. (Jak. 2:15-17) I si ngeto dwe, Jehovha a lava ti to madhota ni misungo ya timwaya yi vhuna ava va va khatalelako ti to ve vekisa milayo yakwe, kambe kha va fanela ku ve “ndaka muhingano wa tile ti nga bhalwa” amu ka Bhiblia.—1 Vak. 4:6.

12-13. Ngu kuya ngu Varoma 7:2, ngu kuhi kuhambana ka wutixamuleli wa msungo wa mwaya ni wa didhota?

 ¹² Hambiketo, kuho kuhambana ka hombe ka wutixamuleli awu didhota di ku nawo ni wu msungo wa mwaya wu ku nawo. Ngu txikombiso, Jehovha a ningile madhota wutixamuleli wo lamula ni ku thavisa dibanzani ava va mahako sionho va si ti soli.—1 Vak. 5:11-13.

¹³ Jehovha a ningile wutixamuleli misungo ya timwaya awu a nga mbi wu ningela ka madhota. Ngu txikombiso, a ningile msungo wa mwaya wutixamuleli wo veka milayo ni kutsaniseka ti to ina mwaya wa yi engisa. (Lera Varoma 7:2.) Ni ku msungo wa mwaya wu nga veka mbimo ayi vanana va felako ku wuya ngu yona mtini. Ene a ni wutixamuleli wo kawuka vanana ngako va txi ndaka milayo ya ha mtini. (Vaef. 6:1) Kambe, msungo wa mwaya awu wu ku ni lirando wu na khata ngu kubhula ni msikati wu si se veka mlayo ha mtini nguko vona hi nga ngadi vathu vambidi, kambe “mmweyo dwe.” *—Mat. 19:6.

14. a) Ngu kuya ngu Marku 10:45, ngu kutxani Jehovha a di vekile Jesu kota msungo wa dibanza? b) Ngu wuhi mthumo awu Mmidi wu wu Fumako wu ku nawo? (Wona dibhokiso di di ku: “ Mthumo wa Mmidi wu wu Fumako.”)

¹⁴ Ngu kuthumisa mterulo Jehovha a xavile votshe vanathu dibanzani ni votshe va kombisako likholo kwawe. (Lera Marku 10:45; Mith. 20:28; 1 Vak. 15:21, 22) Se ta pfisiseka ku va a di sawute Jesu ku e va msungo wa dibanza nguko a ningete ku wutomi wakwe. Kota msungo wa dibanza ene a ni fanelo yo veka milayo ya mahanyelo, milayo ya ha mwayani ni va dibanzani ni kutshumela e tsaniseka  ti to ina ya engiswa kani. (Vag. 6:2) Kambe, Jesu kha gwiteli ko hi vekela milayo basi. Ene wa hi dyisa ni ku hi xayisa.—Vaef. 5:29.

15-16. Hi nga gonda txani ka ti vanathu Marley ni Benjamin va nga ti womba?

¹⁵ Vanathu va txisikati va kombisa ti to va xonipha wusungo wa Kristu ngu kuengisa mkongomiso wa vavamna ava ene a nga va veka ti to ve va thangela. Vanathu vo tala vatxisikati va tumelelana ni ti mwanathu Marley wa Estados Unidos a nga ti womba. Ene a khene: “Ani na yi xonipha fanelo yi ni ku nayo kota wamsikati ha mwayani ni dibanzani. Mbimo yotshe ni ti karatela kuxonipha lulamiselo ya wusungo ayi Jehovha a nga yi veka. Eto kha ti ni nemeleli nguko, mwamna wangu kumweko ni vanathu dibanzani va ni xonipha ni kubonga mthumo awu ni wu mahako.”

¹⁶ Vanathu va txiwamna va kombisa ti to va xonipha lulamiselo ya wusungo ngu ku va vathangeli va vanene ni ku xonipha vanathu vatxisikati. Benjamin, awu i ku mwanathu wa Inglaterra a womba tiya: “Ani na gonda to tala ka vanathu va txisikati ka tixamulo tawe mitshanganoni, ka magondelo awe ni ka nzila yi va txhumayelako ngu yona. Ani na ti wona ti to mthumo awu va wu mahako mbwa lisima.”

17. Ngu kutxani hi di fanete kuxonipha lulamiselo ya wusungo?

¹⁷ Ngako hotshethu, ti si nga ni mhaka ni ti to hi vavamna, hi vavasikati, hi misungo ya timwaya mwendo ku hi madhota hi txi txi xonipha wusungo awu Jehovha a nga wu veka hi maha ti to dibanzani ku va wukhalo wo tsakisa. Kambe, txa lisima ngutu eto ti tisa wudhumo ka Tate wathu wa lirando Jehovha.—Mas. 150:6.