Ni velekilwe ka didhorapa da Saint Paul di manekako Minnesota khe Estados Unidos da América ngu 1954, mwaya wathu wu txi khongela Católica. Mndani ka mame hi m’txhanu ani ni wa wumbidi. Ni gondile txikola txa Católica, ni ku hi di txhetxheni ngani ni nga txi rumwa ngu mfundisi. Kambe ni si zivi txilo ngu Bhiblia. Hambiku ni nga ti kholwa ti to ti nga maha Txizimu txi tiho ni ku va i di txona txi vanga sotshe, ni si kholwi ka timhaka ta txhetxhe.

Ni gondile wu advogado ka txikolwa txa William Mitchell. Ka dileme do khata ni endetwe ngu Tifakazi ta Jehovha. Va ni mani ni si nga ni mbimo ni txi tshwala ngu kutxhukuta simaha, se va tumete ku ni endela da wumbidi. Mbimo yi va nga wuya ni di ta va mahela siwotiso siya sa simbidi: “Ngu kutxani vathu va vanene va txi xaniseka?” ni ku “Hi nga li manisa kutxani litsako?” Se va ningile dibhuku di di ku “A Verdade Que Conduz à Vida Eterna ni Bhiblia ya Tradução do Novo Mundo das Escrituras Sagradas.” Ni tumete kugonda  navo Bhiblia. Gondo yi ni tute maso. Atxi txi nga ni tsakisa ngu gonda ti to Mfumo wa Txizimu ngu wona wu no lulamisa sikarato ha mafuni. Ni ti woni ti mfumo wa vathu wa xuleka ni ku wu maha ti to vathu ve xaniseka.

Ni bhabhatisilwe ngu 1982 didhoropani ka Saint Paul ka Mtshangano wa M’ganga awu wu nga ti ti khene “Ditshuri da Mfumo.” Ka divhiki di nga londisela, ni tshumete ni wuya kona hale ku nga ti mahilwe mtshangano ti to ni ta maha maezame. Ni pasile ngu Outubro wa kona, se kukhukhela koneko ni ti advogado.

Ka mtshangano wule wa m’ganga ku ti ni Mike Richardson, awu a nga txi ta ngu Bhetele. Ene a ni gete ti to ku ngadi ku tulwa hofisi ya timhaka ta mlayo. Ni khumbute mapswi a Muetiyopia aya ma ku ka Mithumo 8:36 se ni gwita ni ti wotisa tiya: ‘Nji txani txi ni vhalelako ku ya thuma Bhetele ka hofisa ya timhaka ta myalo?’ Se ni to rumela petisawu.

Vaveleki vangu kha va tsaka mbimo va nga ti ziva ti to ni Fakazi ya Jehovha. Papa a ni wotisile ti to ni na ganya txani ngu kuthumela sengeletano ya Tifakazi aku ni ku advogado. Ni mu txamuste ti to hi nga mthumo wo ganya male, va no ninga nyana ya sepu ngu mtxhima.

Msana ko heta contracto ya ha ni nga ti thuma kona, ni yile ni ya thuma Bhetele ya Brooklyn khe Nova York ngu 1984. Ni ti ya thuma ka hofisi ya timhaka ya mlayo. Txiavelo txi ni hehukete ngu ku se ni nga txi wu ziva mthumo.

Nyumba ya misakano ya Stanley ya khe Nova Jersey yi xavilwe ngu Novembro wa 1983. Vanathu va kombete kutumelelwa kuwuseta magezi ni simwani so fana ni maphayiphi o tsimbitisa nzambwa. Mbimo yi vanathu va nga manana ni wukoma va txhamusete ti to nyumba yile va txi yi lavela kumahela ka yona mitshangano ya hombe ya Tifakazi ta Jehovha. Eto ti wusile txivhunye. Mlayo wu si tumetisi ti to tinyumba ta wukhozeli ti maneka ka wukhalo wa mabhindu, se wukoma kha wa tumelela txikombelo txa vanathu. Vanathu va mahile txikombelo kambe kha va tumelelwa.

 Ka divhiki dangu do khata Bhetele, sengeletano yi tekile timhaka yi ti yisa wukomani ka hombe. Aku ni nga ti ngadi kuheta malembe mambidi ni txi thuma kota advogado ka Tribhunalii ya Saint Paul khe Minnesota, ni txi pfisisa kwati maxuxelo a timhaka. Mmweyo wa advogado wathu a wombile ti to nyumba yile ya thumiswa ku xalelisa mafilmi ni kutxhaya singwere. Se ngu kutxani yi si tumetiswi ku thumiswa ka timhaka ta wukhongeli? Wukoma wa hombe wu xuxile timhaka wu wona ti to wukoma wule wo khata wu ti ndakile mlayo mayelano ni mkhululeko wa wukhongeli. Se wukoma wa hombe wu rumile wukoma wa didhoropa dile ku wu tumelela vanathu ti to ve maha mthumo wawe. Ni tsakile aku nani ni nga vhuneta mhaka yiya.

Vanathu va khatile mthumo wo wuseta. Ngu 8 ka Setembro wa 1985 kumahilwe gradhuwasawu ya kalase ya wu 79 ka nyumba yona yile nem ku se guma dilembe va di khatile ku yi wuseta. Ti txi ni tsakisa ngutu kuvhuneta ka timhaka ta mthumo wa Mfumo kota advogado, ni si khali kuthuma ta wu advogado ni pfa litsako la hombe nga li ni li pfako a kuwa ni ku hawa Bhetele. Ni si pimisi ti to Jehovha a ndi na ni thumisa ka timhaka to tala ka mthumo wakwe.

Ka malembe a ma 1980, sibhejela so tala si txi eyisa txisungo txa vanathu txo lamba kuthelwa mnoha. Vanathu va txisikati ava va ku ni sirumbo ngu vona ti nga txi va karatela ngutu, nguko vadhokhodhela va txi khona kha va fanela ku ve lamba kuthelwa mnoha. Wukoma wu ti womba ti to ngako vanathu vonewo va si thelwi mnoha, vanana va na sala va xupheka ngu kufelwa ngu vamame vawe.

Ngu 29 ka Dezembro wa 1988, mwanathu Denise Nicoleau a luzile mnoha wa wungi ngutu msana ko va a di phulukile. Se dhokodhela a mu kombete ku e tumela kuthelwa mnoha. Mwanathu kha tumela toneto. Mangwana ka kona, vadhokodhela va kombete wukoma ku wu va tumelela ku mwanathu wule e thelwa mnoha. Ngu toneto, wukoma wu tumelete vadhokodhela ku ve thela mnoha mwanathu Nicoleau nem va sa khata ngu kubhula nayo mwendo ni mwamna wakwe.

Ngu Wazixanu wa kona i nga ti 30 ka Dezembro, vadhokodhela va thete mnoha mwanathu wule hambi ku ene ni maxaka akwe ma nga sa ti lava. Ni minova ya kona maxaka a mwanathu Nicoleau ni madhota o kari va nõtwe va txi lumbetwa to va txi vhikela mwanathu  kuthelwa mnoha. Ngu Mlongiso ka kona ngu 31 ka Dezembro, mahungu a ti to vanathu vale va nõtwe ma humile ka majornal a Nova York ni Long Island.

Ngu Mvhulo ka kona ni womba-wombile ni mlamuli wa hombe Milton Mollen. Ni mu txhamusete ati timhaka ti nga tsimbisila tona, ni mu gela ku wukoma wu to ruma ku kuthelwa mnoha wu sa khata ngu kubhula ni mlwati. Mlamuli Mollen a ni gete ti to ni tshumela ngu mbimo ya mitshikari ti to hi ta bhula ngu maxuxelo a timhaka tiya. Muwoneleli wangu Philip Brumley a tsute ni nani ka hofisi ya Mlamuli Mollen. Mollen a kombete ku va advogado va sibhejela ni vona ve maneka. Hi dhokadhokisanile ngutu navo, ha ko za mwanathu Brumley a ni gela ku khene “u nga tiliki ngutu, holanyana.” Phela ngu ditshuri se ma ti kwete ha kwangu ngu kuzama ku va komba ti to ati va nga ti womba i si nga ditshuri.

Ku di pindile diora mlamuli Mollen a ni gete ti to mhaka yiya hi na khata ngu yona hi yi xuxa mangwana ni mixo. Mbimo yi hi nga txi huma, mlamuli Mollen a wombile ti to timhaka tiya ti na ta nemelela ngutu va advogado va sibhejela. I ku ti to vona ti nga maha va ta pwata razawu. Eto ti ni mahile ni pfisisa ti to Jehovha o hi gela to mi nga thaveni ti na lunga. Ti ni tsakisile kuwona nzila yi Jehovha a nga txi hi thumisa ngu yona ti to e hetisisa mthumo wakwe.

Ni hetile wusiku wotshe ni txi lulamisela to ya womba. Tribhunali ku txi maneka hafuhi ni Bhetele ya Brooklyn, se kutala kwathu hi txi tsula ngu minenge. Valamuli va mune va va nga ti tiho va emile ni nathu, se ve womba to mwanathu a sa fanelwa kuthelwa mnoha. Wukoma wu emile ni mwanathu Nicoleau, ni ku wu tshumete wu veka mlayo wa ti to kusinzisa m’thu kuthela mnoha ngu onhela tifanelo takwe.

Tribhunali ya Nova York yi wombile ti to mwanathu Nicoleau a ti nayo fanelo yo thumwa a sa thelwa mnoha. Ka timhaka ta muni ati ni nga xuxa mayelano ni timhaka ta mnoha, ayiya i ve yona yo khata. (Wona  dibhokiso adi di ku “ Makhambi ya hi nga humelela wukomani ka hombe.”) Ni tshumete ni pateka ka kuxuxa timhaka ta kulwetana ngu vanana ngako vaveleki va txi hambana, kudaya wukati, kuxavisa tinyumba ni ta mlayo wa mathumiselo a tinyumba ngu kuya ngu wukhalo wu ti manekako ka wona.

Msikati wangu Dawn ni mu zivile a di lekanile ni mwamna wakwe a di ni 3 wa vanana. Ene a txi thuma na i di nyaphandule. Txa wutomi txi khala ku mu bhedhela, kambe kutiemisela kwakwe kuthumela Jehovha ku ni renderisile. Ngu 1992 hi ti ya xalela mtshangano wa m’ganga awu wu nga ti msungo wo khene: “Varwali va Liwoningo” khe Nova York, se ni mu sihile. Ngu lembe di di nga londisela hi txhadhile. Ku va ni wamsikati wa moya ni wa kudhunda kubhula ni ti wona i di ningo yo ta ngu ka Jehovha. Ngu ditshuri i kateko ya hombe ngutu kuva ni di txhadhile ni Dawn.—Mav. 31:12.

Mbimo hi nga txhadha vanana va vararu va Dawn va ti ni 11, 13, ni 16 wa malembe. Ni ti lava kuva tate wa mnene, se ni txi lera ni kumaha ati ni nga txi ti gonda mayelano ni ku vatete wa mnene ka vanana va mmwani tate. Ku vile ni sikarato, kambe na tsaka aku vanana va nga ni tumela ku ni va tate ni mngana wawe. Hi ti tsaka ngutu kuendelwa ngu vangana va vanana vathu, ni ku hi txi dhunda ku ve hi hungatisa.

Ngu 2013 ani ni Dawn hi khukhile hi ya Wisconsin ti to hi ya khatalela vaveleki vathu va nga ti kumbile. Kambe, ni xamate kuziva ti to mthumo wangu Bhetele kha wa guma. Ni kombetwe ku ni simama ni thuma kota advogado.

Ngu Setembro wa 2018, ni tumbute ti to ni txi khosolela ngutu. Dhokodhela wathu a ni kambete kambe kha wona txilo. Se a to ni gela ku i tshuku ni lava dhokodhela wo thuma ta Sistema Nervoso. Ngu Janeiro wa 2019, a zamile kuxola malwati e tumbula to ni ti ni paralisia supranuclear progressiva (PSP).

Ditshiku dimwani hi txi sakana ngu kuritika ka marigwi a gelo ni funyekile diwoko. Ani ni kute ni txi sakana ka gelo, hi nga ti to ni txo gondela. Se ni ti pfisisile ti to tiho ti nga onheka. Malwati yawa ma tile ngu txidhukisa ma ni rerile ngutu ha ko nem si si gwenti ni ku mita sakudya.

Ni vile ni lungelo ya hombe ngutu yo thuma kota advogado ti to ni maha mthumo ka Jehovha. Ni tshumete ni bhala to tala ka majornali a nduma ni kuwomba-womba ka maseminariyo ka matiko o hambana-hambana ti to ni emela vathu va Txizimu ka txisungo txawe txo mbi thelwa mnoha. Hambiketo, ani womba ti ti kuka Luka 17:10 ati ti ku ‘Ni txithumi txo mbi vhuna txilo, ni mahile tiya ni nga ti ni fanelo ya ku ti maha dwe.’