▪ Wufakazi wu komba ti to Jesu a vile Mphaxeli wa hombe mbimo a nga bhabhatiswa ngu dilembe da 29 ka mbimo ya Makristu. Ngu wuhi wufakazi wa kona? Mbimo yi Jesu a nga bhabhatiswa a ti kombisile ti to a di tiemisete kuningela wutomi wakwe kota digandelo ka txiluvelo txo fanekisela a txi txi emelako “kuranda” ka Txizimu. (Vag. 1:4; Vaheb. 10:5-10) Txiluvelo, ditshina da dithepele da moya, txiluvelo txonetxo txo fanekisela txi khatile kumaneka mbimo yi Jesu a nga bhabhatiswa, ka mbimo yoneyo ku vite ni dithepele da moya adi di emelelako lulamiselo ya wukhozeli wa Jehovha wa ditshuri ayi yi nga seketelwa ka digandelo da Jesu.—Mat. 3:16, 17; Vaheb. 5:4-6.

Ngako kale dithepeleni ku nga txi laveka Mphaxeli wa hombe ka dithepele da hombe da moya ni dona kulaveka Mphaxeli wa hombe. Ti to e va ho Txizimu txi totile Jesu ngu “moya wo sawuleka ni ku mu tsanisa.” (Mith. 10:37, 38; Marku 1:9-11) Hi nga tsanisekisa kutxani ti to Jesu a totilwe e va Mphaxeli wa Hombe mbimo yi a nga bhabhatiswa i si nga mbimo yi a nga fa ni kuwuswa? Txikombiso txa Aroni ni vaphaxeli va hombe ava va nga maneka msana kwakwe txi nga hi vhuna kumana xamulo ya txiwotiso txiya.

Ka mlayo wa Mosi mbimo yi ku nga di ni ditenda i ti mphaxeli wa hombe awu a nga ti wulela ka wukhalo wo sawuleka ngutu. Se mbimo yi ku nga di ni thepele i mphaxeli wa hombe dwe a nga txi bela ka wukhalo wo sawuleka ngutu. Wukhalo wo sawuleka ngutu wu ti hambaniswa ni wukhalo wo sawuleka ngu m’jiyo i ku dikortina. Mphaxeli wa hombe a txi pinda ngu ha ka m’jiyo ngu Ditshiku da hombe do Divalela sionho. (Vaheb. 9:1-3, 6, 7) Aroni ni vavamna vamwani vo thembeka va totilwe kota vaphaxeli va hombe va si se “pinda ngu hagari ka m’jiyo” ve bela ka wukhalo wo sawuleka ngutu, ngu ha kufanako Jesu nene ti woneka nga a totilwe kota Mphaxeli wa Hombe wa dithepele da hombe da moya na a si se fa kasi ku e ‘pinda ngu hagari ka m’jiyo i ku mmidi wakwe’ e wulela nzumani. (Vaheb. 10:20) Paulo a bhate tiya mayelano ni Jesu: “Aniko Kristu, i ku Mphaxeli wa Hombe. . . a humelete ka ditenda da hombe da kuhetiseka, adiya di nga mbi mahwa ngu manza a m’thu” e wulela “nzumani kupune.”—Vaheb. 9:11, 24.

▪ Ina! Kha ku na kuhambana ka mbimo yi txitumelelano txi nga mahwa ni mbimo yi txi nga khata kuthuma ngu yona. Ngu kutxani? Nguko txitumelelano txa txiphya txi khatilwe kumahwa mbimo yi Jesu a nga tsula nzumani e ya ningela digandelo da mmidi wakwe wo hetiseka ngu kota yathu. I ku ti to mbimo yi Jesu a nga ningela digandelo txitumelelano txa txiphya txi to ko khata kuthuma. Ngu tihi timhaka tiraru ti patekako ka kumaha ni kukhata kuthuma ka txitumelelano txa txiphya.

Yo khata Jesu a wulete nzumani masoni ka Txizimu; ya wumbidi Jesu a ningete digandelo da mterulo ka Jehovha; txa wuraru Jehovha a amukete mnoha wa Jesu a wu wu nga theketwa. Ti si se maheka ti mhaka tiya ta tiraru txitumelelano txa txiphya txi si thumi.

Bhiblia kha yi wombi ti to Jehovha a amukete mterulo wa digandelo da Jesu ngu mbimo muni. Ngu toneto, kha hi ti zivi ngu kukongoma mbimo yi txitumelelano txa txiphya txi nga mahwa ni kukhata kuthuma ngu yona. Ati hi tizavako ngu ti to Jesu a tshumete nzumani ku txi txhota 10 wa masiku ti to di hoka ditshiku da Pentekoste. (Mith. 1:3) Mndani ka masiku onewo a madotho Jesu a ningete digandelo da mmidi wakwe ka Jehovha, se ene e amukela. (Vaheb. 9:12) Ati ti nga maheka ngu Pentekoste ya 33 ti vekile hakubasani ti to txitumelelano txa txiphya se txi di khatile kuthuma. (Mith. 2:1-4, 32, 33)

Ngu mapswi o koma txitumelelano txa txiphya txi mahilwe ni kukhata kuthuma mbimo yi Jehovha a nga amukela lisima la mnoha wa Jesu awu wu nga theketwa. Txitumelelano txonetxo txi khatile kuthuma ku di ni Mphaxeli wa Hombe Jesu Kristu kota Muemeli wa txona.—Vaheb. 7:25; 8:1-3, 6; 9:13-15.