1. M’wombawombo awu wu nga vekwa ngu mwanathu Rutherford ngu 1935 wu mahile txani ka dijaha dimwani?

KHE Estados Unidos ku ti ni mwaya wumwani wa Tifakazi ta Jehovha, ka mbimo yoneyo va txi dhanwa ku vagondi va Bhiblia. Mwaya wonewo wu ti 5 wa vanana, vararu va majaha ni vambidi va mahorana. Vaveleki vawe va va gondisile kuthumela Jehovha Txizimu ni kuetetela txikombiso txa Jesu. Mmweyo ka vanana vawe va majaha a ti ni 18 wa malembe mbimo yi a nga bhabhatiswa ngu dilembe da 1926. Dilembe ni dilembe, dijaha donedo do thembeka di txidya dipawa ni kusela vhinya ngu ditshiku da Txialakanyiso nga ti votshe vagondi va Bhiblia va nga ti mahisa tona. Msana ko engisa m’wombawombo a wu nga ti ni msungo mhaka awu wu ku: “Dibutho da hombe,” ku ni ti ti nga txitxa ka wutomi wa dona. M’wombawombo wonewo, wu vekilwe ngu mwanathu J. F. Rutherford ngu 1935 mtshangano wa m’ganga akhe Washington, Estados Unidos. Ngu tihi ta tiphya va nga ti gonda ka mtshangano wonewo?

2. Ngu dihi ditshuri da diphya adi mwanathu Rutherford a nga di txhamusela ka m’wombawombo wakwe?

² Ka m’wombawombo wakwe, mwanathu Rutherford a txhamusete to mbamani ava va lumbako mtxawa wa “dibutho da hombe” awu wu nga wombwa ka Mtuletelo 7:9. Kala mbimo yoneyo, ku txi kholwa ti to mtxawa wonewo wa dibutho da hombe kupateka vathu va likholo la lidotho, ava ni vona va ndi no ya nzumani kambe va si ya fuma ni Kristu. Mwanathu Rutherford a thumisile Mibhalo ti to e txhamusela ti to dibutho da hombe kha da sawulwa ku di  ya hanya nzumani. Dona ndinvuta timwani * ati ti no huma ngu “kuxanisekani ka hombe” ti hanya ha mafuni ngu ha ku si gumiko. (Mtu. 7:14) Jesu a thembisile tiya: “Ni ni timwani tinvuta ati ti si lumbiko txibala txiya, aniko kulaveka ti to ni ti tshanganisa, ti ta engisa dipswi dangu, se ku nava ni mtxhambi wumwewo ni M’dyisi mmweyo.” (Joh. 10:16, NM) Vanathu vonevo va fananiswako ni tinvuta, Ndifakazi ta Jehovha to thembeka, ati ti ku ni lungelo yo ta hanya ha mafuni ngu ha ku si gumiko. (Mat. 25:31-33, 46) He wone to ditshuri donedo da diphya di txitxisile kutxani wutomi wa malanda o tala a Jehovha kupata ni dijaha dile di nga bhabhatiswa di di ni 18 wa malembe.—Mas. 97:11; Mav. 4:18.

3-4. Ngu tihi ti vanathu vo tala va nga ti pfisisa mayelano ni themba yawe ka mtshangano wa 1935?

³ Mbimo yo tsakisa ya mtshangano wonewo hi nga womba-womba ngu wona makhatoni i mbimo yi m’wombawombi a nga khene: “Votshe ava va ku ni themba yo hanya ha mafuni hi kombela ve khukha ve ema.” Mwanathu mwani a nga ti ka mtshangano wonewo a womba ti to kona mu ka hafu ya vathu va 20.000 va nga ti tiho ka mtshangano wonewo va to khukha ve ema. Mwanathu Rutherford a ti khene: “Wonani dibutho da hombe!” Msana keto kupekilwe manza. Ava va nga ti emile va ti pfisisile ti to vona va sa sawulwa ku ve ya hanya nzumani. Vona va ti ti ziva ti to va sa sawulwa ngu moya wa Txizimu. Ka ditshiku di di nga londisela da mtshangano, kona mu ka 840 wa vathu va bhabhatisilwe, vo tala ka vonevo i ti va tinvuta timwani.

⁴ Msana ka m’wombawombo dijaha dile ni vanathu vo tala va lekile kudya dipawa ni kusela vhinya ya Txialakanyiso. Vanathu vo tala va wombile ati mwanathu mmweyo a nga womba a txi khene: “Txialakanyiso txa 1935 i ve txo gwita kudya sifanekiselo sa Txialakanyiso. Ni ti pfisisile ti to Jehovha a sa thumisa moya wakwe wo sawuleka ti to e ni ninga themba yo ya hanya nzumani; kuhambana nito, ani ni ni themba yo hanya ha mafuni ni kuvhuneta ka mthumo wo wuseta mafu me va paradhise.” (Var. 8:16, 17; 2 Vak. 1:21, 22) Kukhukhela koneho dibutho da hombe di ya masoni di kula ni ku di thuma kumweko ni masalelwa a vasawuleki. *

5. Jehovha a va wonisa kutxani ava va nga ema kudya sifanekiselo sa Txialakanyiso?

⁵ Jehovha a va wonisa kutxani ava va nga leka kudya dipawa ni kusela vhinya ngu dilembe da 1935? Ni ku a va wonisa kutxani vanathu ava nyamsi va emako kudya dipawa ni kusela vhinya ngu kuva va di pfisisile ti to ngu ditshuri vona kha va sawulwa? (1 Vak. 11:28) Vamwani ava va nga ti tidya sifanekiselo sa Txialakanyiso va si ti pfisisi khakwati ti to va na ya nzumani mwendo va na hanya ha mafuni. Kambe ngako va txi tipfisisa ti to va ti ko phazama se ve ema kupateka kodya sifanekiselo sa Txialakanyiso ve simama ve thumela Jehovha ngu kuthembeka, ene a na va bala ka va va tinvuta timwani. Hambiku va si swiko vedya sifanekiselo sa Txialakanyiso, vona va simama ve xalela Txialakanyiso nguko va lava kukombisa kubonga ati Jehovha ni Jesu va nga va mahela.

6. Ngu tihi ati Jesu a gelako tingelozi ti to ti ti maha?

⁶ Aku hi yako hi txi tshuketela ka ditshiku da xanisa ya hombe, ti nga va tinene kuwuseta ati dibhuku da Mtuletelo ndima 7 di ti wombako  mayelano ni vasawuleki kumweko ni dibutho da hombe da tinvuta timwani. Jesu a ruma tingelozi ti to ti simama ti si tshwitimusi mune wa timoya ta kuonha mafu. Tona ti na mbi tshakunuta timoya toneto kala kuza votshe vasawuleki ve ginjwa txitambu i ku ti to Jehovha a di tsanisekile ti to va thembekile. (Mtu. 7:1-4) Kota hakelo yawe, vasawuleki va na va vakoma ni vaphaxeli nzumani kumweko ni Kristu. (Mtu. 20:6) Jehovha, Jesu kumweko ni tingelozi va na tsaka ngutu mbimo yi va no wona ava va 144.000 va txi amukela hakelo yawe akhe nzumani?

7. Mbamani ava Johani a nga va wona ka m’woniso wakwe? Vona va maha txani? (Wona mfota wa kapa.)

⁷ Msana ko wona ava va 144.000 i di vakoma ni vaphaxeli, Johani a tshumela e wona to tsakisa ngutu. Ene a wona “dibutho da hombe” adi di humako ngu Armagedhoni. Kuhambana ni mtxawa wo khata wa 144.000, mtxawa awu wa wumbidi a nga wu wona mbwa hombe ngutu ni ku matanda kubala. (Lera Mtuletelo 7:9, 10.) Vona va “va ambate siambalo so basa,” i ku ti to vona kha va na “dikhwita” ti wombako to kha va nyetiselwa ngu mafu awa a Sathani, ni ku va simamile ve thembeka ka Txizimu ni ka Kristu. (Jak. 1:27) Vona va kwangula va txi womba ti to va hulukisilwe ngu kona ha ka ti Jehovha ni Jesu, i ku Txinvutana txa Txizimu va nga va mahela. Mbimo yoneyo vona va ñote mijindo manzani kwawe ati ti kombisako ti to vona va tumela kufumwa ngu wu Jehovha a nga m’sawula i ku Jesu.—Fananisa ni Johani 12:12, 13.

8. Ngu kuya ngu dibhuku da Mtuletelo 7:11, 12, mwaya wa Jehovha wa nzumani wu na ti pfisa kutxani mbimo yi wu no wona dibutho da hombe?

⁸ Lera Mtuletelo 7:11, 12. Ngu tihi ati Jehovha, Jesu, tingelozi kumweko ni vasawuleki va no tipfisa tona mbimo yi va no wona dibutho da hombe? Johani a tshumela e wona mwaya wotshe wa Jehovha wa nzumani wu txi tsaka mbimo yi wu wonako dibutho da hombe di txi humelela ni kudhumisa Txizimu. Mwaya wa Jehovha wa nzumani wu na tsaka ngutu mbimo yi m’woniso wonewo wu no hetiseka i ku mbimo yi dibutho da hombe di no huluka ka xanisa ya hombe.

9. Ngu kuya ngu dibhuku da Mtuletelo 7:13-15, ngu tihi ti mahwako ngu va va dibutho da hombe kona kuwa?

⁹ Lera Mtuletelo 7:13-15. Johani a bhate ti to dibutho da hombe di ‘kuwute siambalo sa dona, di si basisa ngu mnoha wa Txinvutana.’ Atiya ti womba ti to vona va ni livhalo lo basa ni ku va ti komba va di lulamile masoni ka Jehovha. (Isaya 1:18) Vona Makristu ya ma nga bhabhatiswa me ti ningetela, me kombisa likholo ka digandelo da Jesu, ni kuva ni wuxaka wo tsana ni Jehovha. (Joh. 3:36; 1 Pedro 3:21) Ngu toneto, vona va faneleka kuema masoni ka Txiluvelo txa Txizimu ve txi “khozela wusiku ni mitshikari” ahawa mafuni ka Dithepela da Jehovha da moya. Kala konkuwa, vona va hiseka ni ku ngu vona va mahako mthumo wa hombe wo txhumayela ni kumaha vagondiswa nguko va tiziva ti to Mfumo wa Txizimu ngu wona i ku wa lisima ka wutomi wawe.—Mat. 6:33; 24:14; 28:19, 20.

10. Ngu tihi ati dibutho da hombe di no mahelwa? Ngu txihi txithembiso txi no hetiseka?

¹⁰ Dibutho da hombe adi di humako ngu kuxanisekani ka hombe, di na tsaniseka ti to Txizimu ati txi nga khalahatsha ha ka “txikhalo txa wukoma” txi na va fenengeta ngu “ditenda” da txona. Txithembiso atxi dibutho donedo di nga ti txi rinzela kukhukhela kale, txi na hetiseka i ku txiya: “[Txizimu] txi na bahulela yotshe mirongo tikhoheni kwawe; kha ku nambi swa ku txi maneka kambe lifo, hambi kudila, hambi tihuwa, hambi kupandiseka, nguko so khata si pindile.”—Mtu. 21:3, 4.

11-12. a) Nga ha ti nga kombiswa ngu kona ka Mtuletelo 7:16, 17, ngu ahi makatekwa aya ma no manwa ngu va va dibutho da hombe? b) Ngu yihi nzila yimwani yi tinvuta timwani ti nga dhumisako ngu yona Txizimu ni Jesu Kristu?

¹¹ Lera Mtuletelo 7:16, 17. Kala konkuwa vathu va Txizimu va xupheka ngu kupwata  male yo xava sakudya, ti nga maha ngu kona ha ka kupwateka sakudya ka ditiko di va zumbako ka dona mwendo ngu kona ha ka tiyimbi. Vamwani va khotetwe jele ngu kona ha ka likholo lawe. Hambi keto dibutho da hombe da tsaka ngu kuziva ti to mbimo yi di no hulukiswa ka kuloviswa ka mafu yawa a Sathani dona di na va ni sakudya so tala ngu didhawa da nyama ni da moya. Mbimo yi mafu a Sathani ma no loviswa, dibutho da hombe di na hulukiswa ka “kuhisa ka ditambu kumbe ka lisani” i ku mbimo yi Jehovha a no theketa kuhenya kwakwe hagari ka matiko. Msana ka xanisa ya hombe, Jesu a na kongomisa ava va nova va di hulukile ka “nzila ya kuya ka sisima sa mati ya wutomi” wo mbi na magwito. Alakanya ngu tiya, dibutho da hombe di ni themba yo tsakisa ngutu, tibhiliyoni ta vathu ti ni themba yo hanya ha mafuni ti si fi!—Joh. 11:26.

¹² Ava va tinvuta timwani va ni themba yo tsakisa, se vona va bonga Jehovha ni Jesu ngu toneto. Vona kha va sawulwa ti to ve ya hanya nzumani kambe eto kha ti wombi ti to lisima lawe masoni ka Jehovha lo va la lidotho. Ava va tinvuta timwani kumweko ni vasawuleki, votshe va dhumisa Txizimu kumweko ni Kristu. Yimweyo ya tinzila yo maha toneto, ngu xalela Txialakanyiso txa lifo la Mkoma.

13-14. Ngu kutxani hotshethu hi di fanete hi ya ka Txialakanyiso txa lifo la Mkoma?

¹³ Ka malembe a ngweno, mbadotho ngutu ava va dyako sifanekiselo sa Txialakanyiso. I ku ti to mabanza o tala hamafuni kotshe kha ma nga ni m’thu awu a dyako sifanekiselo. Atiya ti womba ti to vo tala ava va yako ka Txialakanyiso va ni themba yo ta hanya ha mafuni. Se ngu kutxani vona va txi ya ka Txialakanyiso? Kufana ni wu a rambwako mtxhadhoni a yako ti to e ya kombisa kubonga ni kutsaka ni va va va txhadhako, ni vona va tsula ngu kulava ku ya kombisa lirando lawe ngu Jesu. Ngu toneto ava va tinvuta timwani va xalela Txialakanyiso ngu kona ha ko lava kukombisa lirando lawe ngu Kristu ni ngu vasawuleki. Vona va tsula ka Txialakanyiso kasi kukombisa ti to va bonga digandelo da Jesu Kristu i ku dona di mahako ti to ti koteka kuhanya ngu ha ku si gumiko.

¹⁴ Txivangelo tximwani txi mahako ti to tinvuta timwani ti tsula ka Txialakanyiso ngu ti to ti engisa txirumo txa Jesu. Mbimo yi Jesu a nga khatisa tximahakalo txiya txa lisima a di ni  vapostoli vakwe vo thembeka a va gete tiya: “Sotshe sikhati si mi no sela digombe diya, mi na ti mahela ku ni alakanya.” (1 Vak. 11:23-26) Se vona va na simama ve xalela Txialakanyiso kala kuza masalelwa a vasawuleki ava va ku ngadi ha mafuni me ya nzumani. Phela ava va tinvuta timwani va ramba vamwani ti to ni vona ve ta ka Txialakanyiso.

15. Hi nga maha txani ti to hi dhumisa Txizimu ni Kristu ngu ditshiku da Txialakanyiso?

¹⁵ Ka tximahakalo txa Txialakanyiso, hi ni lungelo yo dhumisa Txizimu ni Kristu ngu ndando ni mkombelo. M’wombawombo wu wu no ningelwa dilembe diya wu ni msungo mhaka awu wu ku: “Bonga ati Txizimu ni Kristu va nga kumahela!” M’wombawombo wuwa wu na hi vhuna kuengetela kubonga ati Txizimu ni Kristu va nga hi mahela. Mbimo yi sifanekiselo sa sialakanyiso si tsimbitiswako, si na hi khumbutisa ati si emelako tona, i ku ti to si emela mmidi wa Jesu kumweko ni mnoha wakwe. Hi na khumbula ti to Jehovha a tumelete ku mwanana wakwe e dawa ngu kota yathu ti to hi mana wutomi. (Mat. 20:28) Mmwani ni mmwani awu a randako Jehovha Tate wathu wa Nzumani kumweko ni mwanana wakwe a na susumeteleka kuta ka txialakanyiso.

16. I ngu nzila yihi vasawuleki va fanako ni tinvuta timwani?

¹⁶ Kuhambana ku kukuho ka vasawuleki ni ka va va tinvuta timwani hi nga ngu lisima li va ku nalo masoni ka Jehovha, nguko yotshe mitxawa yi ni lisima masoni ka kwakwe. Phela ene a dihile preso yo fana ka votshe ngu kuningela mwanana wakwe wo dhundeka kasi ku e xava vasawuleki kumweko ni tinvuta timwani. Kuhambana ku kuho ka mitxawa yiya, i themba yawe dwe, ngu toneto votshe va fanete kuthembeka ka Txizimu ni ka Kristu. (Mas. 31:23) Ni ku hi fanete hi khumbula ti to moya wa Txizimu, wu thuma ngu nzila yi yi fanako ka votshe. Atiya ti womba ti to Jehovha a ninga moya wakwe wo sawuleka ka mmwani ni mmwani, ngu kuya ngu txilaveko txakwe.

17. Ngu tihi ati Makristu aya i ku vasawuleki va ti emelako?

¹⁷ Makristu ya ma nga sawulwa hi nga ti to mo velekwa ma di sawutwe. Txizimu ngu txona txi va sawulako. Msana kova va di sawutwe vona va zumba va txi alakanya ngu themba yawe, ve khongela ni ku va yi emete ngu maso o bhilivila mbimo yi va no amukela hakelo yawe nzumani. Hambi keto vona kha va tizivi ti to mmidi wawe wu na va i di wo zumbisa kutxani nzumani. (Vaf. 3:20, 21; 1 Joh. 3:2) Kambe vona va ti emete ku ya wonana ni Jehovha, Jesu, tingelozi ni vamwani vasawuleki. Vona va ti emete ku ya teka sikhalo sawe sa wukoma ka Mfumo wa nzumani.

18. Ngu tihi ati tinvuta timwani ti ti rinzelako ku ta ti maha?

¹⁸ Ava va tinvuta timwani va tsaka ngu themba yawe ya ku ta hanya ha mafuni ngu a ku si gumiko.  (Ekl. 3:11) Themba yoneyo kha ti lavi ku ve yi sakulela, yona nja mtumbuluko, vona va yi emete ngu maso o bhilivila mbimo yi va no ta vhuneta, ko phindula mafu me va paradhise. Vona va yi rinzete mbimo yi va no ta aka tinyumba tawe ve dima tithembwe tawe ni kuvelaka vanana va di ni dihanyo do hetiseka. (Isaya 65:21-23) Vona va yi rinzete ngu litsako mbimo yi va no ta wona mtumbuluko, so fana ni mimango, sitinga ni linene ni kutshumela ve gonda to tala ngu mtumbuluko wa Jehovha. Kambe txa lisima ngutu vona va tsaka ngu kuziva ti to wuxaka wawe ni Jehovha wu na simama wu kula ni kutsana.

19. Ngu yihi lungelo ayi Txialakanyiso txi hi ningako? Txi nava ditshiku muni Txialakanyiso dilembe diya?

¹⁹ Jehovha a ningile otshe malanda akwe themba yo tsakisa ya mbimo yi yi tako. (Jer. 29:11) Txialakanyiso txa lifo la Mkoma txi hi ninga lungelo ya hombe yo dhumisa Txizimu kumweko ni Kristu ngu kona ha ka ti va nga hi mahela ti to hi mana wutomi wo mbi na magwito. Ngu toneto, Txialakanyiso njimahakalo txa lisima ngutu ka otshe Makristu a ditshuri ti to me maneka ka txona. Dilembe diya, Txialakanyiso txi nava ngu Mlongiso wa 27 ka Março wa 2021 ngu mbimo ya kuswa ka ditambo. Vo tala va no xalela Txialakanyiso txiya va maneka ka matiko ya ku ku ni mkhululeko wo ve tshangana, ngu toneto va na xalela Txialakanyiso va si tsivelwi ngu txilo. Kambe vamwani va na si kota kuxalela hambi ku va mananako ni kukanetwa mwendo kukhotelwa majele. Ti si nga ni mhaka ni ti to hi xalela kota mitxawa dibanzani mwendo m’thu a di ekha, hi mi navelela ku mi va ni Txialakanyiso txo tsakisa!