1. Kufana ni Mkoma Dhavhidha, ngu tihi ati vamwani va nga wotisako?

HOTSHETHU hi lava kuhanya wutomi awu wu tsakisako, wu si ngako ni sikarato. Kha ngaho wu a tsakelako kuzumba a txi vilela, kambe mbimo yimwani ha wonisana ni kona kuvileleko. Phela malanda mamwani a Jehovha ma nga thuka me wotisa ati Mkoma Dhavhidha a nga wotisa Jehovha a txi khene: “Ni na xaniseka ni kupandiseka moyani kwangu ni mbiluni kwangu otshe masiku, kala mbimo muni kani?”—Mas. 13:2.

2. Hi na bhula ngu txani ka gondo yiya?

² Hambiku mbimo yimwani hi no vilela, ku ni ti hi nga ti mahako ti to hi si karateki ngutu. Ka gondo yiya, hi na khata ngu kuwona asi si nga hi mahako hi vilela. Hi na gwita hi bhula ngu 6 wa timhaka a ti ti nga hi vhunako ku hi simama hi si thavi hambi hi txi manana ni kuvilela.

3. Ngu sihi sikarato asi hi mananako naso asi hi si si kotiko ku si vhalela?

³ Timwani ati ti hi mahako hi vilela, kha ti nga mtamoni kwathu ku ti lulamisa. Ngu txikombiso, kha hi nge sikoti kuemisa kukwela ka mapreso a sakudya, so ambala, ni kulugara tinyumba aku ku mahekako dilembe ni dilembe. Ni ku hi nge mahi ti to vathumi kulothi ni vagondi kulothi ve leka ku hi kuzetela kumaha to biha. Hi nge sikoti kambe kuvhalela wugevenga, awu wu mahekako amu hi zumbako kona. Phela hi wonisana ni sikarato siya, ngu ku hi hanyako ka ditiko adi vathu va kona  va si hanyiko ngu kuya ngu milayo ya Bhiblia. Sathani i ku txizimu txa ditiko diya, wa tiziva ti to vathu vamwani va ndi na tumelela ti to sithikamezo sa ditiko si va lekisa kuthumela Jehovha! (Mat. 13:22; 1 Joh. 5:19) Ngu toneto, ditiko di tate ngu sikarato asi si hi mahako hi vilela.

4. Ngako hi di karatekile ngutu hi nga thuka hi ti wotisa txani?

⁴ Ngako hi di karatekile ngutu, hi nga thuka hi zumbela kuvilela. Ngu txikombiso, hi nga karateka ngu kupimisa ti to hi na yi manisa kutxani male yo khatalela silaveko sathu. Ni ku hi txi thuka hi lwala hi nga karateka ngu ti to kha hi na mbi sikota kuthuma mwendo hi na luza mthumo. Hi nga karateka kambe ngu kupimisa ti to ngako hi txo dukwa kufunya milayo ya Txizimu, hi na mbi thembeka. I si nga kale, Sathani a na maha ti to avale va emako nayo ve wukela vathu va Txizimu. Se ti nga maha hi txi karateka ngu kupimisa tiya: ‘Ina na simama ni di thembekile mbimo yi hi no wukelwa. Ina ti bihile kukarateka ngu mhaka ya sikarato soneso?’

5. Jesu a txi lava kuwomba txani mbimo a nga khene: “Mi nga karatekeni”?

⁵ Jesu a txi lava kuwomba txani mbimo yi a nga gela valondeteli vakwe a txi khene: “Mi nga karatekeni.” (Mat. 6:25) Ina a ti la kuwomba ti to kha ha fanela kutshuka hi karateka ngu to kari? Ahim-him, phela ka mbimo yi yi nga pinda, hambi malanda a Jehovha ma txi wonisana ni kuvilela, kambe ene a simamile e ma randa. * (1 Vafu. 19:4; Mas. 6:3) Jesu a txo hi tsanisa. Ene a si lavi ti to hi zumbela kuvilela ngu sikarato sa wutomi wuwa aha koza hi hola ngu didhawa da moya. Se hi nga maha txani ti to hi wonisana ni kuvilela?—Wona dibhokiso di di ku: “ U nga mahisa kutxani.”

6. Ngu kuya ngu Vafilipiya 4:6, 7, nji txani txi nga hi vhunako ku hi si vileli?

⁶ 1) Khongela mbimo yotshe. Makristu a ya ma wonisanako ni sikarato ma nga mana kuhefu ngako ma txi maha mkombelo ka Jehovha. (1 Pedro 5:7) Jehovha a nga xamula mkombelo wako ngu ku kuninga “kuthutha ka Txizimu kupindako wotshe wuzivi.” (Lera Vafilipiya 4:6, 7.) Jehovha a nga kuninga kudikha ka mialakanyo ngu kuthumisa moya wakwe wo sawuleka.—Vag. 5:22.

7. Hi txi lava kumaha mkombelo hi fanete kukhumbula txani?

⁷ Mbimo yi hi mahako mkombelo ka Jehovha, ti lava hi mu tulela mbilu yathu, hi txi womba ngu kukongoma ati ti hi hi karatako. Hi fanete hi mu gela txikarato txathu hi tshumela hi mu txhamusela nzila yi hi tipfako ngu yona. Ngako ku di ni ti u nga ti mahako ti to u lulamisa txikarato txonetxo, kombela wutxhari ni mtamo ti to u txi lulamisa. Ngako i di txikarato txo u nge sikoti ku txi lulamisa, kombela Jehovha ti to e kuvhuna u si karateki ngutu. Ngako u txi womba ngu kukongoma ati ti ku karatako, u na ti wona to ngu ditshuri Jehovha wa xamula. Ngako Jehovha a si xamuli ngu txikuluveta mkombelo wako, u nga gume mtamo. Jehovha a lava hi womba ngu kukongoma txikarato txathu ni kutshumela hi simama ka mkombelo.—Luka 11:8-10.

8. Hi fanete hi pata txani ka mkombelo wathu?

⁸ Mbimo yi u vekako kukarateka kwako masoni ka Jehovha ngu mkombelo, u nga divali ku m’bonga. Ndinene kubonga ta tinene a ti Jehovha a hi mahelako hambi hi di ka siemo so karata ngutu. Ti nga maha mbimo yimwani  hi pwata ni mapswi o ma womba ngu kuva hi di karatekile ngutu, kambe khumbula ti to Jehovha wa xamula hambi mkombelo wo hehuka wo fana ni ku u txi khawe: ‘Jehovha ni vhune!’—2 Mak. 18:31; Var. 8:26.

9. Hi fanete hi maha txani ngako hi txi tipfa hi di ka phango?

⁹ 2) Themba Jehovha i si nga mapimo ako u pune. Ka mbimo ya profeti Isaya, vathu va Judha va ti ka phango yo dhumelwa ngu Vasiriya. Aku va nga ti karatekile ngutu, vona va kombete txivhuno ka ditiko da Egipta a di di nga ti khozela sizimu sa walo. (Isaya 30:1, 2) Jehovha a va txharihisile ti to ngako va txi kombela txivhuno khe Egipta, va si na kuhokela magwito a txilo. (Isaya 30:7, 12, 13) Ngu kuthumisa mprofeti Isaya Jehovha a gete vathu vakwe ati va nga ti fanete kumaha ti to ve vhikeleka. Ene a ti khene: “Kuzumbisekani ni mu ka kuthemba, [Jehova] ku ndi na maneka mtamo wanu.”—Isaya 30:15b.

10. Ngu sihi siemo ti no lava u kombisa ti to wa m’themba Jehovha?

¹⁰ Hi nga kombisisa kutxani ti to ha themba Jehovha? Ngu txikombiso, alakanya u txi ningwa mthumo awu wu holelako male ya yingi kambe ti ti na lava u thuma ngutu mbimo yo lapha aha koza ti kutsulupeta kuthumela Jehovha. Mwendo alakanya ku di ni m’thu awu a ku navelako mthumoni, kambe m’thu eneyo kha thumeli Jehovha. Ni ku alakanya mwayani kwako va txi ku gela tiya: “Ngako u txi lava kuthumela Jehovha athu hi na kutsukula.” Ka txiemo tximwani ni tximwani ti na lava u maha sisungo so karata, kambe Jehovha a na kuninga mkongomiso awu u wu lavako. (Mat. 6:33; 10:37; 1 Vak. 7:39) Txiwotiso ngu txiya, ina awe u na themba mkongomiso awu Jehovha a no kuninga ni kutshumela u wu thumisa?

11. Ngu yahi matimu a Bhiblia a ya ma nga hi vhunako ti to hi simama hi si karateki hambi hi txi kanetwa?

¹¹ 3) Gonda ka sikombiso sa sinene ni so biha. Bhiblia yi tate ngu matimu aya ma junyatisako lisima la kusimama hi si karateki ni kuthemba Jehovha. Mbimo yi u gondako matimu yawa wona nzila yi Jehovha a nga vhuna ngu yona malanda akwe hambiku va nga ti manana ni kukanetwa ka hombe. Ngu txikombiso, mbimo yi dibanza da wuxuxisi da Vajudha di nga sinzisa vapostoli ti to ve leka kutxhumayela, vona kha va dhukiselwa. Hahanze keto, ngu txibindi va wombile tiya: “Ti ni fanelo ngutu kuengisa Txizimu kupinda kuengisa vathu.” (Mith. 5:29) Hambiku va nga kwapelwa, vapostoli kha va thava. Ngu kutxani? Nguko va ti ti ziva ti to Jehovha a ti va vhuna. Ene a txi tsakiswa ngu vona. Ngu toneto vona va simamile ve txhumayela mahungu a Mfumo. (Mith. 5:40-42) Ngu ha kufanako m’gondiswa Sitefani mbimo yi a nga ti hafuhi ni kudawa, ene a simamile ni kuthutha aha koza “khohe yakwe yi txi fana ni ya ngelozi.” (Mith. 6:12-15) Ngu kutxani? Nguko a txi tsaniseka ti to Jehovha a txi tsakiswa ngu ngene.

12. Ngu kuya ngu 1 Pedro 3:14; ni 4:14, ngu kutxani hi sa fanela kukarateka ngako hi txi xaniswa?

¹² Vapostoli va ti tsaniseka ti to Jehovha a ti navo. Ene a ti va ningile mtamo wo maha sidiwukiso. (Mith. 5:12-16; 6:8) Atiya kha ti swi ti maheka nyamsi. Hambiketo ngu kuthumisa Bhiblia, Jehovha wa hi tsanisekisa ti to hambi hi txi xaniswa ngu kona ha ko emela ditshuri, ene wa tsakiswa ngu ngathu ni ku a na hi ninga moya wakwe wo sawuleka. (Lera 1 Pedro 3:14; 4:14.) Se hahanze ko zumba hi txi pimisa ngu ti hi fanelako ku ta maha mbimo yi xanisa ya hombe yi no khata, hi fanete hi veka mapimo ka ti hi nga ti mahako konkuwa ti to  hi kulisa kuthemba ti to Jehovha a na hi xayisa ni ku hi hulukisa. Kufana ni vagondiswa vo khata, nathu hi fanete kuthemba txithembiso txa Jesu atxi txi ku: “Ni na mi ninga mapswi a wuzivi, ayawa valala vanu va no mbi si kota ku ma xula hambi ku ma kambula.” Jesu a tshumela e hi thembisa tiya: “Ngu kutimisela kwanu, mi na hanyisa mimoya yanu.” (Luka 21:12-19) Kha ha fanela kudivala ti to Jehovha wa ma khumbula otshe malanda akwe o thembeka. Se ngako ma txi fa ene a na ta ma wusa.

13. Hi nga gonda txani ka sikombiso sa va va nga mbi themba Jehovha?

¹³ Hi nga tshumela hi gonda ka sikombiso sa va va nga mbi themba Jehovha. Mbimo yi hi gondako ngu sikombiso so biha, ti na hi vhuna ku nathu hi si mahi tiphazamo ati vona va nga maha. Ngu txikombiso, makhatoni ka kufuma kwakwe, Mkoma Asa a thembile Jehovha mbimo yi a nga dhumelwa ngu dibutho da Etiyopiya ni ku Jehovha a m’vhuni. (2 Mak. 14:9-12) Ngu msana mbimo yi a nga dhumelwa ngu dibutho da Mkoma Asa wa Israyeli, ene a ti ya kombela txivhuno ka Siriya i si nga kukombela txivhuno ka Jehovha nga ti a nga maha makhatoni. (2 Mak. 16:1-3) Mbimo yi a nga ti hafuhi ni kufa, ene a beletwe ngu malwati a hombe ngutu hambi keto ene kha themba Jehovha.—2 Mak. 16:12.

14. Hi nga gonda txani ka tiphazamo ta Asa?

¹⁴ Makhatoni Mkoma Asa a kombete txivhuno txa Jehovha, mbimo yi a nga ti manana ni sikarato. Kombe ngu kutsimbila ka Mbimo ene a lekile kuthemba Jehovha e sawula kutimahela takwe. Pulani yi Asa a nga yi thumisa yo kombela txivhuno ka Siriya mbimo yi a nga wukelwa ngu Israyeli yi ti woneka nga njinene. Kambe pulani yoneyo kha ya m’vhuna txilo. Jehovha a m’gete tiya ngu kuthumisa mprofeti Hanani: “U themba mfumeli wa Siriya, khu thembi MKOMA Txizimu txako, ngu toneto mabutho a mfumeli wa Siriya ma hulukile mawokoni kwako.” (2 Mak. 16:7) Nathu hi fanete kutiwonela ti to hi si ti thembi ngutu aha koza hi leka kukombela txivhuno ka Jehovha ti to e hi kongomisa ngu kuthumisa Bhiblia. Hambiku mbimo yimwani ti no lava hi maha sisungu ngu txikuluveta, ti lava hi txi thutha hi themba Jehovha, ene a na hi vhuna ti to hi humelela.

15. Ngu tihi ati hi nga ti mahako hi txi lera Bhiblia?

¹⁵ 4) Veka ha msungo tindimana to kari ta mu ka Bhiblia. Mbimo yi u lerako Bhiblia u na mana tindimana a ti ti kombisako lisima la kusimama hi si karateki ni kuthemba Jehovha, ti di ngeto zama ku tivekisa tindimana toneto. Ti nga va txivhuno ngutu ku ti lera ngu dipswi do guleka ni ku ti bhala ka wukhalo awu ti no ku hehukela ku ti mana. Joxuwa a getwe ti to a ti fanete kulera dibhuku da mlayo ditshiku ni ditshiku ngu dipswi da hahatshi ti to eva ni wutxhari. Sialakanyiso soneso si ndi na mu vhuna ti to e xula kuthava aku a ndi o manana nako ka txiavelo txakwe. (Jox. 1:8, 9) Tindimana to tala ati ti ku mu ka Dipswi da Txizimu ti nga kuninga kudikha ka mialakanyo ka siemo asi si ndi no kumaha u vilela mwendo kuthava.—Mas. 27:1-3; Mav. 3:25, 26.

16. Jehovha a thumisisa kutxani vanathu ti to ve hi vhuna hi simama hi si karateki ni ku m’themba?

¹⁶ 5) Ti pate ni vathu va Txizimu. Jehovha a thumisa vanathu ti to ve hi vhuna ku hi simama hi si karateki ni ku mthemba. Ka mitshangano yathu ha wuyelwa ngu tigondo ti hi ti manako ka miwombawombo, ka tixamulo ta vanathu ni ka mabhulo ya hi vako nawo. (Vaheb. 10:24, 25) Ha tshumela hi tsaniswa kambe ngako hi txi womba ati ti hi karatako ka vanathu ava va hi va thembako. “Mapswi a  manene” ma nga hi vhuna ti to hi rula kuvilela aku hi nga vako nako.—Mav. 12:25.

17. Ngu kuya ngu dibhuku da Vahebheru 6:19, themba yathu ya mbimo yi yi tako yi nga hi vhunisa kutxani kuzumba hi di tsani hambi hi txi manana ni sikarato?

¹⁷ 6) Tsanisa themba yako. Themba yathu ya mbimo yi yi tako, yi thuma kota “hangi” ayi yi hi ningako kutsana kasi ku hi si nyeka-nyeki hambi hi txi manana ni siemo asi si hi tiselako kuvilela. (Lera Vahebheru 6:19.) Alakanyisisa ngu txithembiso txa Jehovha txa mbimo yi yi tako aha hi no mbi swa hi va ni sikarato asi si no hi maha hi vilela. (Isaya 65:17) Tshumela u alakanya u di ka mafu a maphya aha u no ya tidila ngu kudikha ku singa ni sikarato. (Mika 4:4) U nga tshumela tsanisa themba yoneyo ngu kubhulela vamwani. Maha totshe ti u nga ti kotako ka mthumo wo maha vagondiswa. Ngako u txi maha toneto u na tsaniseka ti to ‘txithembo txako txi na hetiseka.’—Vaheb. 6:11.

18. Ngu sihi sikarato asi hi no ta wonisako naso ka mbimo yi yi tako?

¹⁸ Aku mafu yawa a Sathani ma yako ma txi guma, hi na manana ni sikarato asi si no hi tisela kuvilela. Ndimana yathu ya dilembe ya 2021 yi na hi vhuna ku hi wonisana ni sikarato soneso ni ku hi simama hi si thavi i si nga ngu kuthemba mtamo wathu, kambe ngu kuthemba ti to Jehovha a na hi vhuna. Ka dilembe da 2021 hi navela ku simaho sathu si ti komba ti to ha kholwa ka txithembiso txa Jehovha atxi txi ku: ‘Kuzumbisekani ni mu ka kuthemba, ku na maneka mtamo wanu.’—Isaya 30:15.